رواية ظل أسود للكاتبة أناهيـد.

الجزء السادس

الساعه ٩ صباحاً ..
الاجواء مُمطره وتفتح النفس والغيوم مغطيه السماء بشكل جميل جداً ..
واقف ابو سياف داخل الحوش بالشاص وعنده سيف وسعود جالسين يحطون بيت الشعر بالحوض
سيف جلس على العتبه حقت الباب بتعب وناظر لـ ابوه : يبه والحريم
ابو سياف : انا كلمت عمك ابو سند يجيب خيمه للحريم
سعود بتعب : والماء
ابو سياف عصب : الماء والعزبه على ابو سهم بس هاتوا الحطب بعد ما ندري عن الديره اللي بنجيها ذي اول مره ندخلها يمكن ما بها حطب واربطوا الحطب بحزمه ولا تنسون عمدان البيت واغراضه كامله حطوا الحطب على طرف وانتي يا ريم روحي شوفي امتس وش ناقص من اغراض اكتبيها وعطيها سيف يجيبها
ريم راحت لـ امها : طيب
جُمان جالسه مع امها بالمطبخ تجهز الاغراض عشان يحطونها بسيارة سيف ..
ريم : يمه ابوي يقول وش ناقص
ام سياف : لا مافيه شي ناقص كل شي جهزته من امس بالليل وعلمت به سعود وجابه معه
ريم : كويس والله فيني نوم
جُمان : لا يسمعتس ابوي يعلقتس مع ذا العمدان
ريم : يليل
—
في بيت أبو سهم
محمد مدخل السياره ويطنب بالحوش
ابو سهم طلع معصب : انت متى تعقل فضحتنا
محمد مبتسم : يبه امانه علمني من جاب فكرة هالطلعه ابحب خشمه
ابو سهم : عمك ابو سند الله يطول بعمره ويخليه لنا
محمد : الله يطول بعمره
ابو سهم ناظر لـ محمد : سو لك شغله بدل ذا الوقفه الباطله
محمد : يبه كل شي طلبته حطيته وسويته ما عاد باقي شي لكن انت تدور علي الزله
ابو سهم : لا بالله ما عاد به حيا
محمد حب راس ابوه : جعلني قبلك يا يبه امزح معاك
ابو سهم : اخوك متى يجي
محمد : والله مدري يمكن العصر او قبله بشوي
ابو سهم : لازم قبل العصر لان بنمشي مباشره بعد صلاة العصر
محمد : ابشر ولا يهمك
امجاد جالسه على الباب : محمد
محمد : قومي وشذا الجلسه كنتس شحاته
امجاد بنوم : مالك دخل فيني فيك كوميديا طلعها على اختك
محمد : وش نفسية الحوامل ذي
امجاد ناظرته بطرف عين : ابي اروح للبقاله
جود تمشي وبيدها شبس وعصير : وانا بعد بروح معاكم
محمد : يلا تجهزوا خمس دقايق ما لقيتكم قدامي مافيه روحه بروح اغير ملابسي واجي
امجاد : زيين
ام سهم تناظر لجود : وشذا الاكل اللي ما يجبر العظم انتي ليه ما تاكلين معانا تونا مفطرين
جود : يمه والله ما تعجبني الاكلات الشعبيه
ام سهم ناظرتها بطرف عين : بوديتس لولد عمتس سعود يعالجتس يفتح شهيتس
جود بهيمان : لا تكفين مالي خلق اعيش قصة حب
ام سهم : بنت استحي على وجهتس
جود ضحكت بصوت عالي : علمتس بس
ام سهم : اص لا يسمعتس اخوتس
جود وقفت راحت تجيب عبايتها : ولا يهمتس
—
محمد طلع من غرفته وشاف ابوه : ارحب يابو سهم
ابو سهم : على وين
محمد : البنات يبون البقاله
ابو سهم : البقاله ذي ما تخلص
محمد : شرايك اردهن يبه ما ينفع الرجال لازم يصير ثقيل
ابو سهم : اقول مابك ثقل بس روح لخواتك
محمد : الله يسامحك عز الله انك ظلمت ولدك
ابو سهم ضحك : ولد البنات ينتظرونك اترك عنك السوالف
محمد : ابشر ابشر يلا تامر على شي
ابو سهم : لا بس روح
محمد لبس نظارته : الوالد يبي الفكه بعدين وشعندك جالس بروحك
ابو سهم رفع العقال : ما تستحي انت
ام سهم جت
محمد : وشعرفني قلت يمكن تراسل حريم
ابو سهم : اقطع واخص ما ربيتك انا
محمد انكتم من الضحك
ام سهم : ليكون صادق محمد
محمد : ياويلك
ابو سهم يناظر لمحمد بحقد : اقول اذلف بس انتي تصدقين ولدتس المصروع ذا
ام سهم : والله مدري من اصدق تعال تقهوى بس
وجلسوا يتقهوون
—
في بيت ابو سند
ابو سند واقف برا يحط الخيمه بمساعدة عياله ويجهزون الاغراض
اميره جالسه على السرير والحزن مخيم على ملامحها مسحت وجهها بيدها بهدوء وناظرت للهنوف اللي كانت واقفه عند الشباك تناظر لـ ابوها واخوانها وهم يجهزون أغراض الطلعه : متى يجي العصر والله متحمسه مره مشتاقه لبنات عمي وحتى سوالف الحريم الكئيبه اشتقت لها
اميره : ليت عندي ام اسمع سوالفها مع الحريم
الهنوف ابتسمت : امي امنا كلنا
اميره غسلت وجهها وقالت بصوت مسموع : امتس لحالتس انا امي ماتت من كنت صغيره
الهنوف تبي تغير الموضوع : تبين نروح مع فيصل للبقاله نشتري لنا اغراض ترا معاي فلوس
اميره بفقدان شغف : روحي انتي انا مابي
الهنوف : طيب بس وشتبين اجيب لتس معاي
اميره : سم
الهنوف : بسم الله عليتس خلاص انا اعرف وشتحبين يلا رايحه انتبهي لتس وباست خدها وطلعت
ام سند شافتها طالعه من عند غرفة اميره : تعالي
الهنوف : سمي يمه
ام سند : اميره صاحيه
الهنوف : ايه ما نامت اظن
ام سند بضيق : لا حول ولا قوه الا بالله وانتي شفيتس مستعجله
الهنوف بأبتسامه : بروح للبقاله
ام سند : من بيوديتس
الهنوف : فيصل
ام سند : لا روحي مع فهد
الهنوف : مدري بشوف يلا بروح البس عبايتي
ام سند : استودعتكم الله
ام سند طقت الباب : صباح الخير
اميره بهدوء : هلا
ام سند جلست بجنبها : شخبارتس
اميره : عايشه
ام سند مسحت على ظهرها : ابوتس رفض
اميره ببرود : ادري انه بيرفض لو ما رفض جيتي من الصبح تقولين لي
ام سند بحزن : الله يجبر بخاطرتس ليش ما نمتي يا يمه
اميره : مابي انام شبعانه
ام سند : ليه ما رحتي مع اختس رايحه للبقاله
اميره : مالي نفس اطلع
ام سند : امشي معاي يلا
اميره ناظرتها : وين
ام سند : بروح لسوق شعبي هناك يلا يا يمه انتظرتس
اميره : مع فهد لا
ام سند قامت : لا بروح مع سند
اميره بهدوء : طيب دقايق
ام سند : لا تأخرين وطلعت
اميره راحت تلبس عبايتها بأهمال وحطت الطرحه على شعرها الطويل وخذت النقاب بيدها وجلست تحت
شافت ام سند لابسه عبايتها ونقابها ومعاها شنطتها وطلعت جوالها الكشاف وجلست تدور رقم سند واتصلت عليه وقالت له يوديها
ام سند : يلا البسي اخوتس عند الباب
اميره عدلت عبايتها ودخلت شعرها داخل العبايه ولبست الطرحه والنقاب
المها : ماشاءالله خيانات من وراي زين قلنا اني الاخت الكبيره بس مو لهدرجه انظلم
اميره ضحكت داخلها على شكل المها المقهوره
ام سند : ارجعي وكملي شغلتس يلا
المها : بروح معاكم مالي دخل
ام سند : والشغل
المها : الشغل بقى شوي واخلصه بخلصه لا رجعت
ام سند اللي ما تحب تكسر بخاطر بناتها : يالله اجل
المها : انتظروني بجيب عبايتي
ام سند جلست على الكنب : استعجلي
اميره جلست بجنبها
ودقايق وهي نازله المها وراحوا كلهم للسوق
نزلوا للسوق كلهم الاربعه ام سند وسند والمها واميره
كان السوق عباره عن ادوات شعبيه واللي يبيع شايب سعودي
سند : السلام عليكم يا عم
الشايب : وعليكم السلام يا ولدي حياكم الله شوفوا اللي تبونه وان شاءالله براعيكم بالاسعار
اميره كانت صامته طول الوقت
ام سند كانت تاخذ براد شاهي ومقادع للتمر واخذت بعد صاج للخبز
المها راحت تاخذ عود
ام سند : رجعيه لا يفضحنا ابوتس
المها : يمممه امانه بنعزف هناك بالبر
ام سند تمشي وراها بسرعه : رجعيه رجعيه بسرعه
المها تضحك على امها : خلاص بنرجعه بس لحظه
سند اللي واقف يطقطق بجواله
المها : سند
سند : هلا
المها : خلنا ناخذ عود ونخبيه عن ابوي
سند ضحك : عيال عمي مجهزينه من قبل ف بس اجلسي واسمعي لهم
المها : وانا شدخلني فيهم ابي اخذ ذا اطقطق فيه مع البنات
سند : خذيه عشان اطقطق عظامتس فيه
المها : امانه تكفى
سند : خلاص خذيه
اميره تناظر لهم بدون ردة فعل
المها : ما تبين تشترين ربابه
اميره : ياشيخه ليه بتسوون فرقه موسيقيه هناك
المها : عادي بنستانس هناك
ام سند : لا تطاوعينها ذي مهبوله
المها : انتي عاد بنجيب لتس بيانو
ام سند : اخيييه
الكل ضحك
سند : ابوي بنجيب له مايك يغني
ام سند تضحك : امشوا بس تأخرنا اللحين ابوكم يدور الغدا عاد ما ينام هو وبقلبه شي يلا
مشوا معاها كلهم ..
ام سند راحت تحاسب واللي دفع الحساب سند
ام سند ناظرت لـ اميره : ليه ما شريتي شي
اميره : وش اشتري صحن
المها ضحكت : هذي رضاوه عند امي
ام سند : بجنب المحل بقاله امشوا نروح
اميره : والله مو مشتهيه شي بس ابي نرجع للبيت
ام سند : يلا يلا بس ادخلوا وراحوا للبقاله
ام سند اشترت مويا ومعمول وكيك وعصيرات كبيره مثل اغراض الحريم الكبار اما المها اشترت بسكوتات وشبسات ومشروبات غازيه وسناكات وكانت تاركه الحلويات على الهنوف اللي رايحه لسوبرماركت كبيره وفيها كل شي ..
—
أبو سياف : يا مرحبا
سياف : صباح الخير
أبو سياف : هلا والله وشلونك
سياف : ابشرك بخيير انت شعلومك وشخبارها امي والاهل كلهم
ابو سياف : ما علينا بخييير ننتظرك بعد اسبوعين ع ملكة سيف
سياف : ان شاءالله بأذن الله والله فرحت لمن قالي سيف
ابو سياف : الله يتمم له ع خير يا يبه ليه ما تعرس انت كبرت اللحين وش بعد الـ 33
سياف ابتسم يدري ابوه بيتكلم بذا الموضوع : صدقني لا جهزت نفسي وتفرغت اني بجيك وبطلبك تزوجني ان شاءالله
ابو سياف : عاد لا تبطي وانت تجهز نفسك ابي اشوف عيالك
سياف : بأذن الله سلم ع امي والاهل كلهم استودعتكم الله
ابو سياف : بحفظ الله يابوك انتبه لنفسك
سياف : ان شاءالله
—
بالبقاله
امجاد : اسمعي لازم نقسم الفلوس على الاغراض
جود بعناد : من اللحين اعلمتس ١٠٠ على خرابيطي على قولتكم ابي اجمع شبسات تالي الليل بيزين لنا الحش واهم شي العصيرات عاد ذي علي بعد
امجاد : اجل دام كذا انا بجيب اغراض للجلسه حقت الحريم
جود : اتفقنا
محمد جاء وبيده حمضيات ومستعجل : بسرعه بسرعه ع السياره
جود : وشفييييك
محمد : سيف هنا
امجاد : مع نفسك بروح هناك وانت اجحدني ، ومسكت يد جود ، يلا امشي
جود راحت هي وامجاد بقسم الحلويات
وبالصدفه شافوا ريم
ريم : يا خايسات
جود تضحك : من انتي
ريم : بالله اقول تعالي عرفتس من عيونتس
امجاد تضحك : محمد يقول لا اشوف وجيهكن كيف قفطتينا
ريم بضحكه : حافظه شكلتس بالعبايه انتي واختس
جود تضحك : صدق ان الاقارب استخبارات وينها جمان
ريم : افا عليتس بس جمان بالبيت تشتغل عليها المطبخ
جود : الله يعينهااا
ريم : وانتم خلصتوا
جود : ايه الحمدلله احنا اشتغلنا البارحه بالليل واليوم فاضيين
—
محمد سلم ع سيف : شخبارك شخبار الاهل
سيف ضحك : اجل الاهل هاه الاهل مندبله تسبدهم منك حارسهم اربع وعشرين ساعه
محمد ضحك : لا ترا استحيت لي كم يوم ما جيتكم
سيف : ماعليه بيتك ومحلك
محمد : والله يا اني مشتاق لطبخ امك
سيف : ماعليك بتاكل لين تشبع الليله من طبخها
محمد : ان شاءالله وشتسوي هنا
سيف : جاي اباخذ اغراض
محمد : الحساب علي
سيف : اقول اقلب وجهك بس
محمد ضحك : والله اني صادق
سيف : يرجال الله يكثر خيرك ما تقصر الحساب كل واحد يدفع حسابه
محمد : عز الله ان ودي اني دفعت عنك
سيف : اقول دز امها بس
محمد يضحك : يلا يلا نشوفك ع خير الليله لا تطلع بوجهي كل شوي خلني اشتاق لك ياخي
سيف ضحك : ولا يهمك بس انقلع
محمد : يلا مع السلامه
سيف : بحفظ الله
—
رجعوا للبيت وكان موجود فهد والهنوف جالسين اما فيصل كان برا يشتغل مع ابوه
ام سند خافت لمن شافت فهد تخاف يهاوش اميره : اميره يلا روحي انتي والبنات
اميره بعناد : اللي يبي يروح يروح انا بجلس
الهنوف : اميره جبت لتس العصير اللي تحبينه وجلست تدوره فهد اتوقع انه عندك عطني اياه
فهد عطاها اياه
الهنوف عطته اميره : خذي
اميره رمته بالارض وانكسر وعيونها على فهد تبي تستفزه
فهد قام بعصبيه : الله يكسر هاليد
سند مسك فهد : خلاص يافهد ماهي متعمده
ام سند خذت اميره : روحي لغرفتس امشي
اميره ناظرت فهد بحقد : ما راح اروح
فهد : وين ماهي متعمده هي متعمده تكسره ما شفتها انت
سند : ماعلييييه خلاص امش نروح لـ ابوي
فيصل دخل : السلام
كلهم ما عدا فهد : عليكم السلام
فيصل انسدح على الكنب : تععبان
ام سند : بسم الله عليك تعال ارتاح شوي
فيصل انسدح بتعب : يبي يأذن الظهر بتسبح
فهد رمَق اميره بنظره وناظر لسند : امش
الهنوف جلست بجنب اميره : كيفك اللحين
اميره اللي تكره احد يهتم فيها بزياده : خلاص يختي بخير
الهنوف بقهر : زين اعصابتس وراحت للمطبخ
اميره وقفت بتروح
فيصل : شش اميره
اميره : نعم
فيصل : نعامه ترفستس
اميره : شتبي
فيصل : سوي لي شاهي
اميره : الخلا بس
فيصل : يلا تكفين
اميره : زييين
ام سند نزلت عباتها وهي تسبح وتستغفر وراحت تشوف الغدا : يلا يا بنات خلصوا بسرعه
المها : السلطه على اميره امس دلعناها ما اشتغلت
اميره بقهر : يا شيخه انا بسوي لفيصل شاهي
الهنوف عصبت : السلطه عليتس انتي الشاهي ترا ماغير سكر ومويا وشاهي وانتهينا انا تعبانه من اللحين اغسلوا يدكم مني
ام سند : اميره ساعدي خواتس
اميره انقهرت وسكتت : زين زين
فيصل منسدح على الكنب ويصارخ : الشاهي
اميره جابت الشاهي وحطته قدامه : ابلع لا تموت
فيصل : فيه بسكوت جايبه هاتيه
اميره عصبت : اقوول ترا ما اشتغل عندك انا فيك رجلين
فيصل : انا عارف ان فيني رجلين بس تعبانه من الكد يلا هاتيه بالله
اميره اللي ما تحب ترفض لفيصل طلب : ترا اخر مره بطيعك بشي يكون بعلمك
فيصل : ماعليه يلا
اميره تعرف البسكوت اللي يحبه مع الشاهي واعطته اياه وراحت تقطع السلطه ..
—
الساعه 12:30
متجمعين كلهم على الغدا
ابو سياف : سياف يسلم عليكم كلمني اليوم الصبح
الكل : الله يسلمه
ام سياف : وشلونه ان شاءالله انه طيب
ابو سياف : طيب ما عليه تراني كلمته عن موضوع الزواج
سعود : يبه يمكن سياف ما يبي من بنات عمي
ابو سياف بعصبيه : وشذا الكلام وشبلاهم بنات عمك
سعود : ما فيهم شي والنعم فيهم لكن يمكن يبي بنت ثانيه او بمواصفات معينه
ابو سياف : سياره هي كل كل وانت ساكت انا ما ربيتك
سيف غص باللقمه
سعود جالس يصفق ظهره بقوه من القهر وهو عارف انه يضحك عليه : خلصت من الضحك
سيف بضحكه: كل كل
ام سياف : اشرب مويا
سيف : وش هالتدخلات البطيئه
ابو سياف : اتركوا عنكم الكركره الرجل حلاته ثقيل
سعود : انشهد شرواي
ابو سياف : انت والله مدري عنك ما خربك الا الطب ذا
سعود عصب : يبه وشفييييك علي اليوم
سيف يضحك : الشايب مستقعد لك
ريم بضحكه : سعود تكفى اسكت خلاص جبهتك لو تنطق قالت ارحمني
جمان : اي والله اسكت
سعود جلس ياكل وهو معصب
—
بعد نص ساعه حطوا الغدا والكل تجمع على السفره
ابو سند : بسم الله
الباقي اكلوا : بسم الله
فيصل جاء والمنشفه على راسه : كان انتظرتوني
ابو سند : تونا بدينا تعال سم بالله
فيصل جلس واكل
ابو سند ناظر لسند : انت بتاخذ مرتك وعيالك
سند : لا بيروحون مع خوالهم
ابو سند كان حريص على ان فهد واميره ما ييتجمعون بمكان واحد : اجل فهد انت خذ امك والهنوف والباقي امشوا مع سند
فهد : ابشر
الهنوف مقهوره من قلبها تبي تركب مع خواتها وفيصل
المها واميره فرحانات ويناظرون للهنوف المقهوره وهم يضحكون -
ابو سند : علامكن
المها : لا ولا شي
فيصل يبي يستفز المها : وشرايك يبه تركب المها معاك تحطها بالحوض تمسك الخيمه لا تطيح
ابو سند ضحك على فيصل
المها شرقت : وجع ان شاءالله الا انت اللي وشرايك نحطك بالحوض تمسك الخروف لا ينحاش
فيصل : اذا انحاش انتي موجوده
المها : عمى يعمي هالعين كل لا ادخل الملعقه بعينك
فيصل ضحك
—
الساعه 3:30 العصر ..
سهم ونوره توهم دخلوا ديار اهلهم
نوره مبتسمه : اهه يا زييين ترابتس يالشمال
سهم مبتسم : ما بغينا قسم اني منهد حيلي ودي انام لكن مابي ابويي يزعل
نوره : لا والله ما فيه نوم بتنام نام هناك
سهم : وذا اللي بيصير تسلمين ع اهلي ؟
نوره : تمام بس ترا بمشي علطول ما بجلس
سهم : بتجلسين شوي
نوره : سهم بيمسكوني وانا لازم اساعد اختي بروحها
سهم : زين زين بس بريح رجولي شوي
نوره لفت لسهم ومسكت يده وهي تحسه تعبان : سهم تكفى لا تجحفلني مالي خلق للسان ملاذ
سهم : ماعليتس
دقايق ونزلوا سهم ونوره وسهم كان يطق الباب : بنت روحي مناك
نوره : وشفييك
سهم : يمكن محمد يفتح يلا وقفي هنا
نوره : طيب
محمد فتح الباب : حيييياك الله يا مرحبببا والله اقلط اقلط
سهم : الله يبقيك ويطول بعمرك الاهل معي
محمد : دقيقه بقول للبنات يفتحون باب الحريم اقلط بالمجلس ابوي قدامك
سهم : يلا الله يعافيك
سهم ناظر لنوره : غطي عيونتس
نوره ناظرت له بعصبيه وغطتها وهي مغطيتها اصلاً بس ما تبي تصير مشكله
سهم دخل يسلم على ابوه
دقيقه الا ام سهم جايه تفتح الباب : حياتس الله ادخلي يا يمه
نوره دخلت وسلمت عليها ام سهم بحراره كانت ام سهم تحب نوره جداً ولا ترضى عليها وتعدها بحسبة بناتها ..
نوره نزلت النقاب بعد ما عدلت شكلها بالمرايه ودخلت امجاد : يا مرحبا والله الله يحييتس وشخبارتس
نوره : الله يبقيتس بخير الحمدلله
جود جات مستعجله : حي الله من جانا
نوره : الله يحييتس ويبقيتس
جود ضمتها : يا مرحبًا بالشيخه
نوره : بعد قلبي شخبارتس
جود جلست بجنبها : بخير انتي كيف حالتس
نوره : بخيير الحمدلله
سهم دخل جود جت تركض : هلا هلا والله بولد الرياض اقلط ما قدامك الا بنات الشيخ عبدالعزيز
سهم : السلام عليكم
ام سهم قامت تسلم عليه : يا مرحبا والله يهلا حياك الله
سهم : الله يبقيتس وشلونتس
ام سهم : بخير يا حبيبي انت وشحالك
سهم : زين ما علي
جود راحت تحضنه : يا مرحبببببا والله يهلا
سهم : هلا والله ببنت الشمال
جود تضحك : ما بغينا نشوف ولد الرياض
سهم : ماني فاضي لوجهتس
جود : يع انت للحين متكبر
امجاد : وخري يا حيوانه بسلم عليه
سهم سلم على امجاد وجلسوا ..
جود : وين عفشي اللي موصيتكم عليه
امجاد جالسه تقهويهم وهي تضحك على جود : اظن كل هالفرحه عشان الاغراض
نوره : ما عليتس جبت لتس كل اللي تبينه
جود : هذي زوجة الاخو الكفو امجاد صبي لي قهوه
امجاد : تراني اكبر منتس المفروض انتي تقهويني
جود : صبي لا تخلين بنت عمي تتشمت فينا
نوره : ياويلي يا جود للحين ما عقلتي
امجاد : تدورين بذي عقل ، وصبت لها قهوه ..
—
ام سند مسكت يد فهد : يا فهد يا يمه طلبتك ما تهاوش اميره مهما كان تراها امانه عندنا وانت اخوها البنت لا بكت من اهلها واخوانها وين بتلقى الامان
فهد : ماعليتس ازهلي
ام سند : اجل روح شوفها يا يمه ولا تهاوشها انا طالبتك
فهد : ماعليتس ازهلي
دخل الغرفه شافها نايمه ومو واضح الا شعرها الطويل اللي منتثر على السرير : اميره
اميره فزت : بسم الله
فهد : بسم الله عليتس قومي يلا نبي نمشي
اميره ناظرته بصدمه وبعدت شعرها عن وجهها : انت
فهد : ايه
اميره جلست : وشجايبك
فهد مسك يدها : جاي ابصحيتس وشفيها ذي
اميره ببرود سحبت يدها منه بعنف : مافيها شي
فهد : تعالي
اميره : وشفيك
فهد مسح دموعها : ليش تبكين
اميره انصدمت : لا
فهد : الا بس علميني ليه
اميره بكت وسكرت وجهها بيدينها فهد حضنها : بسم الله عليتس وشفيتس تبكين
فيصل طق الباب ودخل وألجمه المنظر جلس على السرير وناظر فهد بصدمه : وشفيها
فهد بهدوء : مدري
فيصل جالس يمسح على ظهرها بحنيهّ : امور
اميره رفعت راسها ومسحت دموعها : مافيه شي
فهد : وش
فيصل : ذي هرمونات اظن اسمها
فهد : وش هرموناته
فيصل : مدري يبكون ويضحكون بوقت واحد لا تستغرب
فهد ضحك : والله مدري المهم يلا تجهزي بنمشي بروح لـ ابوي
فيصل لف لـ اميره : ليش تبكين
اميره بهدوء : ولا شي
فيصل : شوفي تخبين على الكل الا علي انا حطي هالشي ببالتس
اميره : مدري ضغوطات
فيصل : علميني من ضاغطتس عشان اضغط وجهه فهد ؟
اميره : لا خلاص
فيصل : انتي اللي خلاص ولا عاد تصيحين يع ترا مو لايق علييتس مره
اميره : وجع
فيصل : احسبتس ما تعرفين تبكين يلا روحي تجهزي بنمشي
اميره : كلتبن واطلع
اميره راحت تتسبح لبست بنطلون جينز ازرق فاتح واسع من تحت مع قميص أبيض وحذيان سودا أنيقه صلت واستشورت شعرها وربطته وحطته داخل العبايه وحطت واقي شمس وروج ومسكرا ورسمت حواجبها وطلعت وكانت جميله جداً جداً
راحت لغرفة الهنوف شافت عندها المها
الهنوف لابسه عبايتها وحاطه شعرها على جنب وكعادتها بجمالها البريئ الناعم اكتفت بـ لمسات بسيطه اظهرت ملامحها اما المها كانت أيضا تحمل بعض من صفات أختها الا ان المها اكثر جمالاً وملامحها ما بين الحاده والناعسه راحت تعدل وجهها تحط اشياء بسيطة هي ما تحتاج الكثير اصلاً
اميره جلست على السرير : مطولين
الهنوف جلست بجنبها : انا خلصت نمتي
اميره : ايه
المها : الحمدلله نمتي صداع الأرق محد يتحمله
اميره : اي والله
الهنوف : متى نمشي يا اننا متأخرين يا اني انا المستعجله
اميره : انتي من الصبح تبين المشيه اصلاً
الهنوف : ايي والله مشتاقه للبنات
المها حاطه يدها على خدها وتتذكر وش الاشياء الناقصه : بنات لا تنسون واقي الشمس والمرطبات الشمس تلعب بالبشره
الهنوف : ما ظنتي هناك فيه شمس الجو يهبل من اسبوع والديره اللي بنجيها الكل يمدحها
اميره : انا حطيت على قدي من اللحين اقولكم
المها ناظرت اميره بقهر : انتي ما منتس فايده اصلاً
اميره : اشوا انتس تدرين
الهنوف : انا بنزل لـ امي ما شفتها من نص ساعه
اميره : انا بعد بنزل
المها : انقلعوا خوات عالفاضي