حبايبي لاتنسون تابعون الحساب والتصويت على القصة والتعليق على الفقرات اريد همتكم، توصلون القصه الف
#طفولة مسروقة
#بقلم روح
#يوزر الكاتبه على الواتباد R_oh98
غير مبري الذمه من ينشر القصه بدون ذكر اسم الكاتبة
يولاند:- كاعده اثرم زلاطه وحسيت واحد وراي شويه واجاني صوتهه يم اذني
مياسين:- اكلج هذولي كلهم حلوين شنو السالفه انوب حته الابو حلو ولا عبالك رجال شايب
درت وجهي خزرتهه وعضيتلهه شفتي واشوفلك برهان من الاستقبال يباوعلي، باب المطبخ مطل على الاستقبال من درت وجهي صار كبالي درت وجهي متفشله، وكعدت اسب بحظي وبمياسه وسوالفهه، كل قصدي جان حته تسكت خاف عمه تسمعهه هسه شتكول علينه، شمدريني يطلع گبالي ضليت مدنكه واثرم بس ميته من الفشله، كملت الزلاطه وخليتهه بالصحون ومياسه سوت الخضره ورحت اكمل الطرشي ومرت عمي تصب كملنه كلشي واجه واحد من الشباب يمكن ابنهم الثاني الي اسمه سند اخذ السفره وانه ومياسه ومرت عمي اخذنه الاكل نرتبه وصلت اول وحده جان برهان قريب مني كام اخذ الصحون مني واسمع واحد كحح حيل والي يمه يضربه على ظهره ويكول صحه صحه شجاك خويه، التفتلهم برهان وشفته خزرهم دنكو يضحكون، صاح عليهم عمي
ابو برهان:- بدل هالضحك البلا سبب ماتكومون تعينون البنيات وامكم وتجيبون الاكل بمجانهن
برهان:- كل خير مابيهم
ابو برهان:- تعلمني بيهم
سند:- يابه مو حته كدام مرت عمي وبنات عمي تفشلنه
ضحكنه وهمه سكتو بعد ماحجو شي
كعدنه كلنه على سفره وحده، اول مره احس بالاجواء العائليه الي نحرمنه منهه من وقت طويل شكد جنه نتمنه عدنه اهل واعمام واخوال نروح اله ويجونه رفعت راسي اباوع اعمامي كاعدين وعلى جانبهم من الجهتين اولادهم ومرت عمي ويمهه ماما وانه ومياسه اتمنيت ربي يديم علينه هاي اللمه ويجعلهم عزوه النه وحزام ظهر
كملنه الغده بين سوالف اعمامي ويانه وسؤالهم على حياتنه السابقه واشوف الاسف بعيونهم بس مايردون يقهرونه
شلنه السفره واكفين انه ومياسه بالمطبخ نعزل الاكل اجت يمي وهمست
مياسين:- والله فلا شبعت شنو هاي غير يضلون كاعدين شويه كاتلني الجوع اول مره اكله هيج اكل
يولاند:- والج انجبي واسكتي لا يسمعج احد بيهم فشله
مياسين:- يووو يولاند فشلتيش هيه بطني تعرف العيب والمستحه
غسلنه مواعين ومرت عمي سويت جاي شكد اصرت علينه هيه تغسل المواعين بس ماقبلنه ماما ضلت كاعده يمهم اصلا هيه تعبانه مو مال تفتر وتكوم وتكعد
كملنه كلشي واخذت مرت عمي الجاي كام سند تلكاهه اخذ منه وكام يوزع وصل يمي انطاني الجاي اخذته وتشكرت منه راح لمياسه اجه ينطيهه الجاي وتراجع
سند:- لحضه انتي بعدج صغيره ميصير تشربين جاي
وهيه احسهه دخنت
مياسين:- شنو صغيره اصلا عمري 15 وصف ثالث متوسط وين صغيره بعد(للكاتبة روح)
أنت تقرأ
طفولة مسروقة
Romanceليس اي طفوله.... هي طفولتي التي لطالما حلمت بتغييرها، طفوله أتمنيى لو آنني عشتها كباقي الاطفال لاهين في اللعب وشراء الحلوى،، قصه ليست كما اعتدتوا عليه من القصص معي انا الكاتبه روح
