زينة الهاشم 💝

الجزء 4

زينة الهاشم 💝
الجزء 04:
أنا عينيا تغرغرو بدموع عنقتني مريم حتى ولاو يطيحو وحدهم وصالح قرص هشام وشارلو بيدو نتاع اسكت بقى مستغرب ممبعد قالي علاش تبكي الخير برك قتلو متوفية ولا يستسمح مني اسمحيلي اسمحيلي والله منقصد ربي يرحمها واسكت مزادش كامل هدر وصلنا عند واحد صالون دوتي دخلنا دومونداو هوما جابولنا شربنا وهشام غير ساكت وهاز النظرة فيا حشمت بزاف حتى قاتلو مريم واش هشام وشبيك قاللها والو غير عيان برك اليوم نهار شارجي قالو صالح الله يكون في عونك نهار كامل رياضيات راك مليح كي متيقرتش قتلو أنا علاش واش تقرا ضحكو كامل ممبعد قالي نقرا كونطابيليتي (محاسبة) زدنا شوية ونضنا وصلونا لاسيتي . المهم جازو يامات بزاف معاودتش تلاقيت مع هشام مريم أوكيبي مع الميموار نتاعها وانا مع القراية
وحد اليوم كانو نهارات التوالا نتاع القراية وكانت سخانة شوية خرجت قلت نقضي باش ندير عشا لمريم مسكينة حنا ملي جينا الجامعة نطيبو وحدنا كملت وكنت راجعة لاسيتي نستنى فالبيس كنت لابسة سروال وليكات ودايرة خماري ومن طبيعتي نشدو بالمساك ونخليه مندوروش على لفات كيما البعض المهم ولى لي يفوت عليا يبقى يشوف ليا حتى استغربت شوية حسيت غير يد تحطت على رقبتي تلفت وجيت نعيط لقيتو هشام قالي دوري شعرك راه كامل برا بقى يدخلي فيه تحت اللليكات وأنا خلاص وحد الاحساس شادني معرفتوش من واش ممبعد قالي هيا راهي طونوبيل منا قتلو ميشقاش ضوك نروح فالبيس قالي امشي قدامي شعرك الكل برا وباغية تروحي فالبيس مشيت قدامو وهو من ورايا يخبي فيا زعما لحقنا عند طونوبيل فتحها قالي اركبي وعدلي خمارك ضوك نجي منكذبش كبراتو جاست في عيني عدلت شعري وخماري شوية جا ركب حط صاشي اللور وعطاني وحدة قتلو واش هذي قالي فراز ولا متحبيهاش تبسمت ممبعد قالي ختي صغيرة تموت عليهاحتى اليوم باش لقيتها تبسمت وقتلو ياسعدها ختك قالي علاه قتلو عندها خو كيفك يخمم فيها قالي علاه نتي ماعندكش خوك ولا ميخممش فيك قتلو فالزوج ضحك قالي فهميهالي هاذيا قتلو عندى زوج خاوتي بصح هوما ماهم معتبريني ختهم وأنا ماني معتبرتهم خاوتي قالي يا ستار لاه قاع هكا قتلو هوما ولاد بابا قالي خلاص خلاص وصل الميساج سيناريو خاوة غير أشقاء ومرت الاب الشريرة قتلو لالا أنا ماما ماتت على زيادتي وداتني جداتي أم أمي رباتني وهو عاود حياتو وكل واحد فينا عايش في ولاية يعني منشوفهمش بزاف كنت نحكي وعينيا مغرغرين دموع والعبرة في صوتي لقيتو قالي بصح الله يبارك طويل وشباب بقيت مدهوشة قتلو واش هو قالي شعرك هبال الله يبارك قتلو هبلني تبانلي نقصو باش ميوليش يخرج عيط قالي ردي بالك لالا خليه هكا طويل بقيت مستغربة وشبيه هذا وزيد واش دخلو، قالي علابالك الشعر الطويل زينة المرأة مرة أخرى راجلك تهبليه بشعرك قتلو وكون نطيح في واحد يحب الشعر القصير قالي أواه لالا نحبو طويل قصدي قاع الرجال يبغو الشعر الطويل حشمت دورت راسي لقيت وصلنا عند لاسيتي شكرتو وهبطت طلعت الشومبرة بصح معلاباليش علاش وليت نخمم في هشام حتى دخلت مريم بقينا نحكو ممبعد قاتلي زينة عقلك مش هنا وين راكي تخمي قلتلها هنا برك ممبعد خبرتها على ملاقاتي مع هشام حتى قاتلي زينة حنونتي هشام خاطب غير مكالاه تتعلقي بيه حسيت سطل ماء وصبوه عليا.
كنت عارفتها زهري عوج ومش راح يسقم ليلتها نشفى رقدت نبكي غدوة من ذاك جاز سامط يقتل وعقلي وتخمامي غير فهشام معلاباليش علاش زعما عششقتو علاش وينتا عرفتو حتى عشقتو بصح علاه غاضتني عمري كي عرفت بلي خاطب المهم ألف سؤال في راسي حتى مريم تولهتلي بقات تسقسي فيا وشبيك قلتلها والو بغيت نبدل السوجي قلتلها حقا ضرتك صنعتلك القاطو كادو قاتلي شكون قلتلها صليحة مرت نجيب ولات تضحك قاتلي قولي والله قلتلها والله وقاتلك نبعثولك مع ماماك ،(مرت نجيب خويا تصنع القاطو عندها ديجا حانوت) فرحت مريم بزاف وقاتلي عيطيلها نهدر معاها ونشكرها ، هذي السمانة جوزناها مع الجري خاطر سوتنونس نتاع مريم نهار التخرج نتاعها جاو والديها وخاوتها زوج المهم جازت بزاف شابة غدوة من ذاك راحو والديها وصالح دارلها حفلة صغيرة فالفوايي نتاع الجامعة تلمينا فما مكناش بزاف وبالطبيعة جا هشام وليت نحاول نتفاداه غير نشوفو جاي من جيهتي نوض ونبدل البلاصة، شوية كنت مع مريم حتى جا لينا مدلها كادو ليها وزاد مدلي أنا وقالنا مبروك التخرج ضحكت مريم عليه قتلو أنا متخرجتش حتى العام الجاي متامنوش الفرحة لي في عينيه قالي مالا نتلاقاو العام الجاي ان شاء الله قتلو علاه مزال مكملتش نتا ضحك قالي حتى العام الجاي ان شاء الله نتخرجو كيف كيف ممبعد صالح ركع على رجل ودار لمريم دوموند دو ماغياج روعة مسكينة من الفرحة قريب تغاشات لبسلها الخاتم وجازت حفلة فالتوب ،زدنا يومين فرزنا صوالحنا ورجعنا لديارنا مطولناش وجا صالح لبابات مريم خطبها منو بصح دوماج خاوتها مقبلوش وضربوها وخوها واحد قطعلها الديبلوم وقاللها انساي الخدمة المهم دارو حالة ونحاولها التيليفون وليت كي نروح ليها تحكي مع صالح بالتخبية وخبراتو واش صرا زدنا غير يامات وعاود جا صالح لعمي مصطفى (بابات مريم) ومعاه هذي المرة باباه وخوه وحكى بابات صالح مع عمي مصطفى وقالو جيتك طالب في بنت مش في كنة والله بنتك حاجة متخصها عندنا ونوعدك نحميها ونحافظ عليها من ولدي حتى نهار ربي يدي أمانتو وصح كان عند كلمتو وكانلها أب ثاني باباها اقتنع بهدرتو وقالو خليلي وقت ونرجعلك مشى للبلاصة لي يسكنو فيها وسقسى عليهم وكامل الجيران شكروهملو وقالولو من أروع الناس ناسبهم ونتا مغمض عينيك ، المهم قبل وعيطلهم وليكم تتصورو فرحة مريم هبلت مسكينة ولات جي لدارنا وتزغرت خاطر فدارهم تخاف من خاوتها سقساتني يما عليها صارحتها وحكيتلها قاتلي خرج ولد حلال وراجل ونتي كاش ما كاين المرة الأولى سكت ممبعد قلتلها أنا مش كيفها أنا عشقت واحد مهوش ليا قاتلي كيفاه قتلها حبيت واحد خاطب جات تعيط عليا حتى قلتلها حبيتو بيني وبين روحي هو ماعلابالوش واصلا جامي هدر معايا ولا طمعني قاتلي كي دايرة هاذي قلتلها حبيتو من النظرة برك قاتلي كثرتي المسلسلات التركية هبلوك نوضي خير ما نكسرلك عظامك نضت نجري ونضحك بصح والله إلا قلبي كان يبكي دم هشام عشش في عقلي وقلبي كيما سييت ننساه والو المهم جاو دار صالح خطبو مريم بصح للأسف محضرتش خاطر يما كانت مريضة فالسبيطار ولات لاتونسيو تطلعلها بزاف وكنت معاها قارد مالاد جات طلت على ماما وحكاتلي كامل واش صرا وعلى الخير لي جابوهلها.
قاتلي بلي على شهر الخطبة والعقود والعرس مزال شوية قاللها صالح بلي خوه الكبير راه يبني فوق باباه وعندهم أبارتومو صغير خوه الكبير راه ساكن فيها مالا لازم يستناو حتى يكمل خوه لبنيان ويروح لسكنتو باه صالح ومريم يسكنو في هذيك اللوجمو المهم فرحتلها بزاف نهار الأربعاء خرجنا يما للدار الخميس فالليل قوا عليها الحال طلعناه للسبيطار حتى قالونا دايم الله حسيت الارض دور بيا حسيت موس نغرس في صدري يعني ضوكا صح وليت يتيما يعني ضوكا خلاص ما بقالي حتى واحد في هذي الدنيا ظلامو ياماتي كرهت دارنا بلا يما أنا وسعاد أكثر اثنين نضرينا قالت لنجيب وكريمة نتوما أوموا عندكم ولادكم تتلهاو معاهم وتنساو مش كيفي أنا وزينة ما عندنا حد مسكينة حرقة الضنايا لي معندهاش وزادها التيتم ، دارنا ولات گئيبة وسامطة مريم كانت ديما عندنا ومرات تبات معايا نبات نبكي حتى يطلع النهار حكا معايا صالح بالتيليفون عظملي الأجر ممبعد جوزلي هشام تان عظملي الأجر وقالي نومرو نتاعي راه عند مريم أي وقت تحتاجني راني هنا حتى وكان بغيتي تحكي عيطيلي قتلو صحا وكوبيت وانا قلبي نارو شاعلة تمنيت كون كنت معاه ضوك وراه واقف معايا في محنتي وصح لقيتو معايا خير من بابا لي عظملي الأجر بلاكام ومنبعد معاودش تفكرني ولا سقسى عليا شحال كرهتو خلاص من هذا نهار نسيت بلي عندي أب هو الواجب نتاعو دايرو كل شهر يفارسيلي ويعيطلي يسقسي ويقولي بلي فارسا بصح أنا ولا مرة عيطتلو خلاص طاح من عيني كي ملقيتوش وقت الصح وينتا راح نلقاه جاز شهر هكاك كنا نتعشاو حتى صليحة قاتلي بصح مريم والله ما منها زوج علابالك أنيلات فيونساي نتاعها على جالك قاتلي مجاياش نفرح وختي تبكي حتى نجيب قاللها طفلة هايلة وعطاها ربي على نيتها علابالكم بلي لي خطبها جا حضر للجنازة مع باباه وخوه غدوة كي جات عندي مريم قتلها علاه بطلتي الخطبة نتاعك قاتلي بركي متجياحي نفرحو مع بعض ونبكو مع بعض وليت عنقتها قلتلها مقلتيليش بلي صالح جا للجنازة قاتلي ايه جا هو باباه وهشام نخلعت قلتلها هشام جا قاتلي ايه جا معاهم معلاباليش كيفاه جبدنا الحديث حتى قاتلي بلي هشام مش خو صالح ولد عمو بصح متربيين مع بعض سيرتو كي مات بابات هشام مالا ولاو دار وحدة وزيد أخت هشام متزوجة پأخ صالح الكبير يعني هي ومريم سلايف ممبعد قاتلي نورمالمو هشام بعثلك أنفستاسيو فالفايس قلتلها منيش نفتح جبدت تليفوني حليت الفايسبوك لقيتو باعثلي انفيتاسيون بالمسنجر كاتبلي سلام أنا هشام وقت تكوني مليحة بعثيلي ولا عيطيلي وكاتب نومرو تيليفون رسلتلو سلام وخليتو.