زينة الهاشم 💝

الجزء 19

زينة الهاشم 💝
الجزء 19
فوتنا باقي اليامات كيما ديما حتا نهار عشرين من رمضان  بعد التراويح طلعت غير عجوزتي مجاش هشام حتى ممبعد جا لقانا فالصالة الصغيرة مجمعين حطلنا ساشي كبير على الطابلة قالنا جبتلكم حوايج للعيد  ناضت زهيرة تجري فتحتها جبدت ساشي قاللها هشام هذيك نتاع زينة مدتهالي حتى قاتلو عجوزتي ياك مازالها عروس وحوايجها جدد  قاتلي ولا لبستي قاع جهازك قتلها لالا مزال قاللها معليش كيما جبت لبنات جبتلها مدلي الساشي قالي روحي قيسيهم وتاني خواتاتو قاللهم هكا دخلت لبيتي لقيتو جابلي جبة ميجي ومن الفوق العفسة هذيك نتاع ديكوتي وشوية مونش ويبقى الكتف عريان شوية مطرزة كامل من الفوق للتحت ستيل قفطان بالحزام جاية بلو غوا مع سابو خفيف لبستهم جاوني تحفة خرجت عندهم نوريلهم هو عينيه ولاو قلوبا وعجوزتي قاتلي شابة بصح مهيش نتاع عيد قاللها علاه قتلو بصحك حاب تخرجها هكا قدام ولاد عمومك وولاد خوالك عريانة وهي بيضاء ومعمرة الله الله قاللها ما جبتهالها للدار مش باه تلبسها للناس أنا زربت خرجت سمعتو قاللها ما مكيش ناوية تخطي الطفلة جيت داخلة لبيتي بصح معلاباليش علاش كلاني قلبي بقيت نسمعلهم قاتلو علاه شاراني نديرلها قاللها علاش راكي جايبتها من وراها إذا طيبت متاكلي إذا لبست تعلقي حتى إذا جات عندي وميعجبكش الحال قاتلو أنا مني نديرلها والو نتا لي موسوس راني نعاملها كيما نعامل خواتاتك نتا برك مخلوع فيها نهار بطول تشايع غير فيها وميعجبكش الحال عليها حتى قاللها مهوش عاجبني الحال اي وزيد مرتي ومتفاهم معاها ومفهمها على الصوالح لي مديرهمش شفتيها كاش يوم لبست العريان ولا المفضوح قدام كاش واحد ياك غير هنا وزاد راها تلبسي ليا أنا لي قلتلها يا ما  التعامل نتاعك معاهم فالثلاثة مراهش عاجبني  علاه تضني منيش نشوف فيك كنتي نهار بطول ورا زهية حتى  عقدتيها ودرتي ضوك لزينة باينة كي تكملي معاها ترجعي لزهيرة قاتلو علاش واش درتلهم أنا قاللها اغفلي عليهم شوية متضليش تراقبي فيهم على كل كبيرة وصغيرة  تعسي على اللبسة على الطياب على الخدمة حتى على الهدرة يا رب أنا راني خوهم نهار مسقسيتهمش شكون عيطلكم نتي غير يحكمو التليفون شكون واش ديرو إذا لبسو لالا علاه ديجا تفكرت زهيرة علاه مخليتيهاش لبست الصواري لي شراتها لعرسي قاتلو لبستها كيفاه قاللها ما متتمسخريش بيا رجعتها وكي سقسيتها قاتلي ما معجبتهاش  ورجعت رحت  جبتهالها وقاع ذاك   رحتي شريتيلها وحدوخرا  قاتلو بناتي وراني ربي فيهم ومذا بيا يسترو رواحهم ولا تحوس يديرو كيما لالة زينة قاللها واش بيها زينة قاتلو كون مشفتهاش في عرس صالح عريانة وفتناتك كون ماراهيش هنا ومرانيش فالمشاكل من وراها قاللها عريانة وفتنتي قاللها مالا نقولك من لآخر زينة كنت نعرفها قبل عرس صالح ونهار شفتها شفتها بحجابها ومفتنتنيش بزينها سكنت قلبي بعقليتها ونيتها قاتلو ملا كذبت عليا قاللها ايه وكاين صوالح بزاف مخبيهم عليك خاطرك متتفهمينش وعمرك لا فهمتيني نحب  نحكيلك بصح ردة الفعل نتاعك ديما تمنعني  قاتلو من اليوم والله منزيد ندخل فيكم كيما راكم وعندك تجي تشكيلي ولا تقولي شوفي واش عملو زربت دخلت لبيتي يا ربي هذا كامل غير على جبة دخل للبيت مينشافش حقيقة كنت راح نبدا نعرش  بصح كي شفتو هكاك نتاع الصح خوفني عروق رقبتو كانو باينين قعد على البوف ويهز في رجلو من العصب والزعاف جيت من وراه حاوطتو بيديا وطحت على ظهرو بوستو على خدو قتلو صحا حبيبي شابين بزاف الحوايج كي نروح لدارنا نروح بيهم باه نزوخ عليهم ونقوللهم حنوني يعرف يشري على رجالتكم تبسم وجبدني عندو قعدني على حجرو باسني على فمي قالي حبيبي علابالي اسمعتينا مديريش في بالك صحا حبي عاودت حتى أنا بستو على فمو قتلو تهمني نتا برك  ومشاكلك مع يماك بيناتكم أنا واش دخلني فيها لعبلي في شعري وقالي يا ربك تقتليني بهذي العقالة والحنانة عاود نوضني قالي بصح والله ماغلطت قتلو علاه قالي كي كنت رايح للصلاة شفت الجبة فالمانكان غير صليت رجعت ليها قتلو مدهالي حب يمدلي وحدوخرا كيفها قتلو لالا ندي هذي نحاها من المانكان علابالك غير شفتها تخيلتك بيها وعرفت راح جيك هبال بوستو قتلو صحا حبيبي ممبعد قالي حنونتي ممبعد نزيد نشريلك حاجة تلبسيها باه تروحي عند عمومي قتلو غير ميشقاش والله عندي بزاف حوايج ديجا شريتلي جابادوغ وجبة من تلمسان كنت معولة نلبسهم قالي بصح والله منيش شافي عليهم رحت للخزانة جبدتهم وجبدت تاني حوايج وحدوخرين عندي بديت نقيس وهو يقولي حتى قيست جبة بيزو بيزو فالموتارد سامبل بصح لبستها متحوفة قالي واو هذي جاتك هايلة البسي هذي حتى اسمعنا الأذان الأول قالي يا حلوفة دايرالي عرض الأزياء ولهيتيني حتى راح الحال على ...... وليت نضحك قتلو اليوم ورينالك السلعة باه تتشوق لغدوة  بدى يضحك قالي وأخيرا بدات تروحلها الحشمة ولينا نضحكو قتلو بديت تسوفج فيا  بدلت ورحنا نتسحرو كنت نستنى في عجوزتي كاش ما تسمعني  بصح سلامات ماقالت والو مام مع وليدها تهدر معاه عادي مش زعفانة مزية .
فات نهار عادي فالليل كي راحو للتراويح سقسيتهم قتلهم مديروش القاطو خاطر حنا من طبيعتنا من العشرين نبداو نخدمو قاتلي زهية احنا حتى تبدى ما هي ديما دير  مقروط معسل وغريبيةباش ممبعد حنا نزيدو كاش ما نديرو قاتلي ونقولك الصح أنا معنديش خاطر فيه علاخاطرش ميجينيش شباب مالا نزيد غير مودال ولازوج قتلها اواه أنا نحب نصنع القاطو سيرتو ملي جات صليحة عندنا وعلمتني شوية وليت نحب نخدم معاها قاتلي خلاص قولي لهشام يهدر مع ما تخليك تصنعي وعلمينا حتى حنا قتلها لالا حنونتي شفتي واش صرا البارح من تحت راسي مخصنييش يزيدو وتكرهني يما قاتلي زهيرة ياودي هوما ديما هكا يتعاركو بصح يرجعو لبعض كلي مصرا والو خلاص كي يجو أنا نهدر مع ما قلنالها خلاص نتكلو عليك غير جاو جمعنا فالصالة كيما موالف بقيت نشوف لزهيرة حتى قالتلها ما وينتا نديرو القاطو قالتلها علاه قالتلها والو غير صحبتي فلانة بعثتلي روسات نتاع قاطو وعجبني باين بنين بغيت نسييه  قالتلها خلاص غدوة  قولي لخوك يجيبلك الصوالح وديريه وأنا يومين ولا وندير كيما موالف حتى قاللها هشام مبقاش الحال ما متنسايش ليلة القدر راها قريب قاتلو لالا مش ناسية ممبعد قال لزهيرة نشريلك بصح كون مايعجبنيش القاطو تاكليه كامل نتي ولينا نضحكو من الفرحة نضنا نجرو فثلاثة لبيت لبنات بست زهيرة على خدها قتلها صحيتي حنونتي ممبعد قتلهم هيا واش نديرو قاتلي زهية أنا موالف ندير كروكي وصابلي منزيدش نكسر راسي قتلها اواه نديرو تشاراك مشوك صابلي بالشكولا هبلتي نتيا باغية توكلينا كروكي فالعيد قاتلي زهيرة شوفي القاطو لي بعثاتولي صحبتي قتلها ايه هذو ليتاغت بالنيسلي والشوكولا صح بنان بزاف قاتلي نديروهم قتلها أوكي حتى دخل علينا هشام قالي رئيس العصابة إذا كملت امشي قدامي نحتاجك وليت نضحك دخلنا لبيتنا عنقتو وبوستو على فمو قالي يا حي بدات تقباح واليوم ناكلها قضينا أمورنا وبقينا متكسلين  قالي واش معولين ديرو قاطو قتلو مزال متفاهمناش بدا يضحك قالي مالا حرشتو زهيرة على ما قتلو مش هكا والله واحكيتلو كامل قالي خلاص معليش غدوة قوليلي كامل واش نجيبلكم بصح حبيبي حابك تخدميلي بقلاوة كيما نتاع صليحة ضحكت قتلو نخدمهالك بصح محال جي كيما نتاع صليحة وضحكت بقى يبوس فيا قالي معليش ناكلها المهم دارتهالي حنونتي عاودنا مع بعض حتى أذن زربنا دوشنا وتصحرنا  كي جينا نرقدو قالي إذا فطنتي قبل الظهر نوضيني نشريلك  قتلو أوكي  صباح نضت مع 10 كيما موالف صبحت على عجوزتي و رحت طول لبنات نوضتهم قتلهم واش نديرو باش يشرينا قاتلي زهية نتي راح تصنعي حنا غير نعاونوك قتلها صحا عندكم مشينة نتاع بقلاوة قاتلي لالا معندناش خرجت من عندهم رحت لعجوزتي فالكوزينة سقسيتها واش تحتاج قاتلي كتبت كلش ونوضت هشام  ناض غسل قتلو هاك هذو هوما قالي صحا قتلو بصح مراحش نديرلك بقلاوة قالي علاه قتلو مكاش مشينة نتاعها قالي وين تتباعك نشريلك واحدة قتلو بزاف عليك المصروف قالي بزاف المصروف ولا متعرفيش ديريها حابة تتهربي قتلو والله ما مليح الواحد يخمم عليك وبوزت شفافي شحطني على لاريار نتاعي ممبعد حتى قالي استغفر الله اللهم اني صائم حلوفة جبتيني لنهارات التوالا  حلفتي تفطريني قتلو علاه قالي فالليل نقولك نوضي البسي تروحي معايا وازربي روحك قتلو صح قالي هيا ولا نروح ونخليك.
رحت نجري للخزانة جبدت ملاية ودرت الخمار وهو بلعاني حل الباب وبدا يعيط عليا شوفي نديك غير لهذا لحانوت التحتاني اشري لي لقيتيها متضليش دوري فيا فالزنق الواحد السخانة والصيام وزيديه نتي وغمزني حتى جات عجوزتي قاتلو متديهاش وخلاص علاه تاكل في روحك قاع هكا  ياك راحا تشري مش حتى تحوس وزاد هيا كي راها كل يوم مشوطة فالكوزينة على جالك تاني راها تقولك علاه ولا راها تزعف عليك شافت ليا وقاتلي مديريش عليه لي تحتاجيها اشريها ياك راه غير قاعد واش من وراه ودخلت للكوزينة أنا خلاص هبلت مقدرتش نشد الضحكة خرجت نجري حتى قالي اصبري الطونوبيل راها فالقاراج عجوزتي والله لا مهبولة أنا نسبك ونعاشيك ونعلق عليك كيما نحب معليش بصح هو لالا ركبت حتى قالي شفتي زينة باش تعرفي بلي ما طبعها هكا مش متحبكش  هي هكا دايرة ، المهم رحنا اشرينا كامل واش نحتاج وحتى زهيرة منسيتهاش جبتلها لي مول والدوزان باه تخدم قاطوها جينا للدار قدقد مع الظهر هو راح للجامع وأنا دخلت توضيت وصليت رحت لبنات لقيتهم ناضو دخلنا للكوزينة مع بعض خملنا الدوزان رحيت اللوز ووجدتو وجدت تاني لابات نتاع البقلاوة ونتاع التشاراك  وحطيتهم ورجعنا كملنا واش يخص للفطور ، غير فطرنا قالي هشام زينة ارواحي اعطيلي قميص هذا راه توسخلي قاتلو عجوزتي متعرفش تجبد وحدك قبلها شكون كان يعطيلك خلاص ذوكا حبست منا حنا لبنات رجعت عليه هو ،دخلت معاه للبيت حصرني مع الحيط باسني وقالي شوفي بعد التراويح نروح أنا وما لدار عمي باه تلقاو راحتكم بصح نبقى نسالهالك لازم تخلصيني عنقتو وبوستو قتلو نديرلك واش تحب قالي مالا اشفاي عليها  قتلو أوكي، غير هوما راحو قلت لبنات رايحين لدار عمي مش جايين ولينا نسوطو من الفرحة  المهم زهيرة حصلناها مسكينة مع الماعن وأنا وزهية تعاونا على البقلاوة وجدناها قتلها خليها هي تالية ولا حتى غدوة نطيبوها ممبعد زدنا درنا التشاراك حنا معاه كملت زهيرة دارت لي فون دوتاغت لي حابة ديرهم وقلتلها دارت صابلي نتاع قلوب  باش نديرهوهم بالشوكولا كملنا مع الواحدة ونص سواسوا درت البقلاوة طيب هوما خملو الكوزينة وسيقوها وأنا رحت لبيتي خملتها  بقاتلنا غير الديكوراسيون قتلهم حتى يومين قبل العيد ونديروها وجدنا السحور جات عجوزتي وهشام غير دخلت قاتلنا علابالي درتو رايكم ضحكنا من تحت لتحت  تسحرنا ورقدنا.