زينة الهاشم 💝

الجزء 20

زينة الهاشم 💝
الجزء 20
غدوة منو نضت كيما طبيعتي سيقت وجيت للكوزينة قلت لعجوزتي نعاونك قاتلي مكان والو بصح بعد الظهر عاونيني فالمقروط راني شمختو الصباح قتلها أوكي بعد الصلاة تعاونا عليه بسلامتنا في ربعة بالخف كملناه وزادت دارت غريبية فالحق أول مرة نشوفها دارها بطريقة خلاف على لي نديروها تاني تعاونا عليها لحق العصر راحت عجوزتي صلات وتكسلت تريح وحنا صلينا وسيقنا الكوزينة وكملنا واش يخص للفطور كي فطرنا شفت عجوزتي تعبانة قتلها كون غير خليتي غريبية لغدوة اليوم تعبتي بزاف قاتلي اواه مكاش كيفاه لحقت ليلة 27 غدوة عندنا خدمة استغربت واش قصدها راحو هوما وحنا نفس روتينا حتى لل2 جا هشام كنا في بيتنا قتلو واش كاين عندكم في ليلة القدر علاه تهدرو عليها قالي حبيبي بابا توفى نهار ليلة القدر سكت صراحة ملقيتش واش نقول حتى زاد قالي منها بدينا كل عام ندير فطور ونخرجوه صدقة عليه قالي جامي حكيتلك عليه هزيتلو راسي ناض راح جاب البيسي نتاعو شعلو وبدا يوريلي فتصاورهم مع بعض تحسب خوه مش باباه حتى قالي علابالك كان صحيبي مش بابا كان خويا قتلو كنتو قراب لبعض قالي بزاف قالي تأمني كان غير يشوفني غايس ولا نخمم يسقسيني يقولي كاش وحدة فالقلب نهار سودنيت الدكتوراه جاني الدنيا مش واسعة فرحتو شرالي هذي الطونوبيل كادو وبدى يبني فالايطاج الدوزيام قالي ضوكا لازم تزوج خلاص بدينا نضحكو قتلو مالا معندوش بزاف ملي توفى حسبت خلاكم صغار قالي هاذا عامو السادس انتبهت عينين معبيين دموع زاد قالي تكسرت بين يوم وليلة راح قتلو علاه مكانش مريض قالي تقدري تقولي كان ديما يشكي من ليسطومة وكل مرة يروح غير لطبيب عام يجيب دوا مرات يشري غير من فارماسي بلا ميروح للطبيب حتى في نهارات رمضان الأولى كي قوات عليه ديتو أنا وعمي للطبيب دارلو لي راديو ولي زاناليز وقالنا على سمانة ولا كثر باش يخرجو كي رحت نجيبهم لقيت الطبيب حالو مينشافش ممبعد قالي أسوء خبر اسمعتو في حياتي قالي بلي بابا مريض بالكونسار وللأسف في مرحلة متقدمة يعني مراح يفيدو لادوا لالاشيميو بالعكس يعيوه ويأثرو على نفسيتو كثر تحطمت رحت طول لعمي قتلو صدقيني كان واقف طاح قلنا لما وعمي آخر برك الباقي مكاش لي سمعناه الطبيب قالي من الافضل ميصومش بصح هو الله يرحمو عند محبش يفطر نهارات التوالا عيا بزاف ولا ميقدرش يمشي ولى يصلي فالدار حتى نهار 25 فالليل قلنا غدوة ادوني معاكم للجامع نصلي ونشوف لي يكرموهم بصح مكتبش ربي غدوة منو قبل العصر زاد عليه الحال جاو عمومي تلمينا عليه كيما عيينا نفطروه محبش عيات ما باه تسقيه ما زمزم محبش قاللها حاب نلقى ربي صايم قبل الأذان بنص ساعة خرجت روحو وخرجت معاها أرواحنا تأثرت بزاف وليت نبكي وهشام مرة مرة طيحلو دمعة يزرب يمسحها قتلو علاه خليها تخرج علاه حاكمها قالي ضوكا روطار ندمت نهار الصح لي مخرجتهاش بصح الله غالب شفت ما وخياتي ضعاف فلازم حتى أنا منضعفش قدامهم باه نكوراجيهم زاد حكالي بزاف عليه ممبعد قالي موتو فشلتني مقدرت نكمل البنيان الفوق مقدرت نخرج طونوبيلتو قتلو لي فالقاراج نتاعو قالي ايه من نهار مات غطيتها ومقدرت نسوقها ما قدرت نبيعها حتى حانوتو وراه مسكر قتلو هذوك لي وريتهوملي قالي لالا هذوك داير فيهم الخدامة وكاين واحد قريب ليهم. هو كان يخدم فيه مسكين شحال مأثرة فيه موت باباه بصح مش مبين ، نهارها نضنا الصباح بكري على 9 وكنا ديجا وجدنا كلش من قبل جاو نسا العموم فالزوج ولبنات والعرايس مع العصر كان كلشي واجد جاو داو الفطور لوحد الجمعية هي تسربيه وعاودو ولاو فطرنا كامل مع بعض صح كان نهار شوية حزين سيرتو لبنات ولعجوزتي تفكرو فيه المرحوم وحتى هشام غير هو ما يبينش فالليل غسلنا الماعن بالضحك والقصرة كي جا هشام بغيت نحي عليه قتلو دبر راسك اشرينا لاف فيسال عينا من الماعن ولاو يضحكو قالي ويديك واش يخدمو قالو صالح وقيلا حتى هيا يديها غير نتاع ستيلو قالو ياودي غير اسكت مرات نجي نلعب معاها نخاف نكسرها وصح صرات وكسرني من يدي ، المهم فوتنا الحمد لله غدوة منو نضت حتى للظهر خاطر عييت نهار الأول صليت ورحت لعجوزتي لقيتها كملت طيابها مالا جبدت القاطو قلت نحيه من الطريق بديت بالتشاراك نسكر فيه جاو لبنات قلت لزهيرة كملي قاطوك عمريه بالنيسلي وديريلو الشكولا من الفوق وديري حبة جوز من الفوق قاتلي أوكي ، زهية قتلها طلي صابلي بالشكولا وديري وريدات بالشوكولا البيضة قاتلي منعرفش يا زينة نخاف نخسرو خلي أنا نسكر تشاراك ونتي اخدميه تبادلنا الخدمة.
خليتلها حبات توالا قتلها نتي خدميهم حتى وخسرتيهم معليش حنا راح ناكلوهم قطعت البقلاوة ديكوريتها ، المهم كملنا كامل مع القاطو خبيناه ورجعنا لصوالحنا فالليل فالسهرة حطينا منو للقهوة باه نذوقوه عجوزتي عجبها قاتلنا صحيتو هكا راكم ساجيين اليومين التالين جوزناهم غير مع الميناج ، نهار الأخير غير فطرنا راحت زهية هي الأولى دوشت وأنا وزهيرة غسلنا الماعن وسيقنا الكوزينة كي كملت راحت زهيرة دوشت وأنا كوافيت لزهية شعرها ممبعد زدت كوافيت لزهيرة شعرهم قصير بالخف كملتلهم ورحت دوشت كوافاتلي زهية شعري ، جات عندنا عجوزتي قاتلنا هيا شدو بلايصكم نحنيلكم صراحة فرحتنا بهذي الجاست ملي توافت يما الله يرحمها محنيتش فالعيد ، جا هشام قتلو طولت قالي هذا وين بلعنا قتلو معليه راح دوش وجا بقى يهبل فيا راكي زينة وشابة وزيد مدوشة راكي تشهي قتلو غير روح خطيني غدوة نوض بكري قالي والو ديجا مش راني نسالك قتلو مش اليوم قالي والو اليوم بقيت نحاول فيه بصح والو قالي هيا نوضي معايا قتلو وين قالي نقصي الحس داني معاه طلعنا لايطاج الفوقاني فالبيت لي فيها قشي جبد زوج بساطات قالي نرقدو هنا قتلو صح قالي ايه تباوسنا شوية ممبعد قالي ضوك نجي شديت فيه قتلو متخلينيش وحدي هنا نخاف قالي بصحك واش تخافي قتلو مااه الظلمة والله نخاف قالي صايي نخليلك التليفون كنا شاعلين غير لاتورش قتلو والله نخاف متخلينيش وحدي ولا يضحك قالي حبيبي والله منطول هبط وأنا نرجف كي طلع حسيت بيه يمشي عييت نعيطلو محبش يجاوبني خفت مت وليت نبكي زرب جا عندي ولا يسكت فيا قالي خوافة هذا أنا برك سكت راح جابلي نويزات ومقلشات للسهرة مدلي نويزات فالموتارد ملي شراهم لي ذيك المرة قالي والله متخيلت يخرج عليك الموتارد شباب حتى كي قيستي ذيك الجبة قتلو اخرج باش نلبس ولا يضحك قالي مش تخافي قتلو ابقى عند الباب ،لبست هبل باسني من فمي ويهدر حبيبي نحبك موت نعشقك هبال ممبعد قالي حبيبي راكي واعدتني ديري واش نحب قتلو ايه قالي علابالك بلي فالعلاقة حاجة وحدة محرمة برك هزيت راسي قالي ملا لي نقولك عليها ديريهالي قتلو أوكي بدا معايا وعلمني صوالح مكنتش نعرفهم جوزت معاه أحلى ليلة شابة حتى على ليلتنا الأولى بقينا مع بعض حتى سمعنا الأذان قالي اليوم مكاش صلاة قتلو أنا تعبت ونعست غفينا مزية كان مريقل تيليفون على 6 ونص نضنا بالزربة هبطنا لتحت هو دخل دوش وأنا جبدتلو حوايجو جا يلبس بوستو ورحت حتى أنا دوشت كي خرجت لقيتو راح نشفت شعري ولبست جبتي الموتارد مشطت ومكييت تحفت روحي وخرجت صبحت على عجوزتي طيبنا القهوة ووجدنا الطابلة فالصالون الكبيرة كي سمعناهم كملو الصلاة غافرت عجوزتي و لبنات كانو حتى هوما ناضو ووجدو رواحهم سمعنا هشام جا راحت زهيرة تجري عنقاتو غافراتو قبلنا ممبعد لحقت أنا وزهية غافرناه ولحق غافر يماه قعدنا باش نتقهواو حتى قاللها ما شكون فيهم لي خدمت وتعبت بزاف قاتلو باينة زينة فرحت مدلي دراهم قاللها وبعدها شكون قاتلو زهية زعفت زهيرة مد لزهية وممبعد مدلها وهمسلها في وذنها قاتلو والله بصح قاللها ايه ولات تسوطي قاتلنا عطالي كثر منكم شح شح شربنا قهوتنا مع هبالها كملنا قاتلنا عجوزتي هيا نوضو وجدو القاطو ولبسو نروحو لعمكم نضت أنا وزهية قاتلي نخملو لعمومي وعماتي قتلها نروحو كامل ليهم قالتلي لالا نروحو غير عند عمي الكبير وضرك هوما يجو نتلاقاو كامل تما كملنا رحت لبيتي نلبس ملاية دخل عندي هشام بقى يبوس ويعنق قالي راكي بزاف شابة قتلو يسلمك قالي اقعدى هنا ندي ما ولبنات ونرجعلك نديرلك كثر من البارح ها واش رايك مرة الاولى محبيتش ممبعد اسكت قتلو معليش ولا يضحك قالي بغيتي خديجة اليوم تحاوزني من الدار امشي قدامي امشي.
رحنا عندهم غافرناهم شوية جا عمهم الصغير مع ولادو وبناتو لحقو عماتهم تاني مع ولادهم المهم ماشاء الله غاشي نتاع عرس بلا عرس رحت مع مريم وزينب للكوزينة نعاونهم جات عجوزتهم قاتلي شفتي يا بنتي نتي عروس وحنا خدمناك قتلها لالا مفيها والو كملنا مع القهوة والماعن وجدنا الغداء تغدينا كنا نفرزو فالكوزينة حتى جات عجوزتي لابسة ملايتها قتلها رايحين قاتلي لالا رايحة لخويا نغافرو ونتي ولبنات بقاو هنا حتى نجي قتلها معليه هوما راحو وحنا كملنا فرزنا بدى يحكم فيا النعاس قاتلي زينب طلعي لداري رقدي مع بناتي المرة الأولى محبيتش بصح كي بقات تأنسيستي وزاد خلاص عيينيا ثقالو مقدرتش نفتحهم طلعت عندها تكسلت فالبيت نتاع بناتها معاهم غفيت شوية حسيت بواحد يبوس فيا ويمشي في يدو على جسمي نضت مفزوعة لقيتو غير راجلي المهبول قتلو خلعتني تبسم معايا حسيتو مش نورمال بقيت نسقسي فيه واش بيك محبش يجاوب ممبعد قالي حبيبي ما راها زعفانة ومقلقة إذا كاش ما هدرت معاك اسكتي وخليها حتى نروحو لدارنا صحا قتلو غير الخير واش بيها قالي والو حاجة خاطيتنا المهم متعانديش معاها رانا في دار الناس حنا هكا حتى ناضت تسنيم قالت لهشام روح من دارنا قاللها علاه قاتلو خلاص مكاش تحبني مراك تجي عندنا متشريلي وزيد كي نجي عندكم ترقد زينة معاك وأنا تخليني ولينا نضحكو عليها قاللها بصح نايفيها هي هي داتلك بلاصتك بقات تشوف معايا قتلو والله عيب عليك تحرضها عليا جبدتها عندي بستها قتلها والله أنا نحبك وخلاص كي جي عندنا أرواحي رقدي معانا قاتلي أوكي قتلها رانا حبابات ضوك قاتلي ايه رفدتها وهبطت أنا وياها لقيت النسا كامل فالصالون غير دخلت سكتو قتلها يما مطولتوش قاتلي من تحت راسك ناضت مريم تجري قاتلي زينة ارواحي معايا سمعت عمتهم قالتلها عيب عليك الطفلة واش دخلها بنك دارها تفاهمي معاه دخلت مع مريم لبيتها قتلها واش بيهم قاتلي والو خوها برك محبش يشوفها قتلها علاه قاتلي زينة باينة زعفان كي بطلو على بنتو قتلها بصح هشام قالي مخطبتهاش قاتلي يا ختي والله معلابالي هكا راهم يهدرو وليت نفور وضياقت عليا عيطت لهشام قتلو نروحو للدار قالي علاه قتلو هكا برك عييت وحابة نرقد قالي بصح هذا وين نضتي قتلو مرقدتش مليح حس بلي يماه كاش ما قاتلي قالي زينة واش وصيتك أنا متعانديهاش حتى روحو للدار قتلو واقتاه نروحو للدار قالي بعد العشاء قتلو منقعدش للعشا نروح ضوك قالي منقدرش حنا ديما هكا حتى نتعشاو نروحو قتلو مش قادرة نقعد هنا عيط عليا قالي زينة معندي واش نديرلك اقعدي وبركاي مسمير نتاعك وكوبا عليا وليت نغلي بكيت حتى شبعت قاتلي مريم زينة بركاي والله مراها مستاهلة ديري في روحك هكا حنا هكاك جات زهية دقدق باش تقولنا نشربو قهوة العشية دخلت شافتني هكاك قاتلي زينة واش بيك مسحت دموعي قتلها زهية تعيشي قوليلي هشام خطب بنت خالك ممبعد بطل عليها وخطبني أنا قاتلي لالا مخطبهاش ما قاتلو عليها وقاللها لالا معينيش عليها ذاك وين ريحت شوية نضت غسلت ورحت شربت معاهم قهوة وأنا سامطتلي نساير برك زدت نضت عاونتهم فالعشا تعشينا ونقينا الحالة وتفركتنا.