زينة الهاشم 💝

الجزء 36

زينة الهاشم 💝
الجزء 36
اليوم هذاك هشام ديجا بات عندي ومن قبل مريم حكاتلي بلي راهي نايضة عندهم في الدار مرتو راحت لدار باباها ويماه بعثت لعمامو قالتلهم الطفل مهوش يبات في الدار شوفولي حل معاه راهو يبات البرا مع نسا ولا منعرف عليه هوما جبدو رواحهم وقالولها دبري راسك مع ولدك حنا مندخلوش مهوش صغير. هذاك اليوم نضت كيما موالفة خملت الدار درت لغدا جاهو تغدا وراح من وراها كانت 14هكاك عيطلي نجيب قالي وينك انت قتلو في داري قالي راني قريب نوصل حلي عليا الباب قلتلو وعلاه وين راك انت قالي راني جاي كان يحكي ويعيط باين عليه قلقان قلتلو غير الخير وش كاين قالي مكان والو راني نهدر معاك ذوك نجي حلي عليا الباب كوبيت زاد شوي طبطب الباب روحت حليت عليه سلمت عليه بقا يشوف معايا قالي شوفي والله العظيم لوكان ماجاتش كرشك سابقاتك راني عطيتك طريحة قالي هيا امشي لمي حوايجك المهمين باش نروحو قلتلو وعلاه وش كاين واصبر حتى يجي عشام قالي بلعي فمك عليا ومتذكريش اسم هذاك الرخيس قدامي ومنزيدش نسمع اسمو وديجا من بعد حسابي معاه هيا ازربي لمي حوايجك انا مفهمت والو كان تلفوني فالصالو هزيتو جا نحاهولي قالي روحي جيبي حوايجك روحت لميت غير لحوايج الي نحتاجهم وهزيت الغوج كتبتلو فلمراية تاع لخزانة قتلو راهو نجيب جا وداني معاه منعرف وش كاين ولبست قشي ورحت معاه طريق كاملة وهو يعيط في الطريق عيط لخواتاتي قالهم روح لدار نحتاجكم كل وحدة تسقسيه وش كاين قالها متحوسيش وش كاين المهم نوصل نلقاكم في الدار قدامي، كي وصلنا لدار لقيناهم قدامنا سلمت عليهم من بعد قالهم ذوك فهموني هذاك الخامج وكتاه تزوج وشكون علبالها وشكون معلبالهاش انا بقيت ساكتة ونبكي ملقيتش وش نقول صليحة بقات غير تشوف سعاد تكمشت كعاد كان علبالها اما كريمة قاتلو شكون تزوج كيفاش تزوج شكون هذا الحاجة المليحة كي بدات كريمة تسقسي عرف بلي معلابالهم بوالو قالهم معلبالكمش الطحان تزوج عليها وهي ساكتة وزيد بقات عندو وعاجبها الحال وحنا منا سامعين بوالو حسبتنا حيوط مقيمتناش ودار عندي قالي واش مكيش تشوفي فيا راجل قدامك انا اذا شفتيني ساكت ومنيش نهدر كعاد نبغيك ومبغيتكش تزعفي ومنيش حاب نآذيك ولا ماعلاباليش بيك كيفاش الرخيس يتزوج عليك وانت تبقاي ساكتة وين راهي كرامتك انت سمحتيلو يعفس عليك وعلى كرامتك انا بقيت ساكتة مقدرتش نجاوبو عندو الحق في كل كلمة قالها.
أنا طايحة في كوانة وضامة رجليا لصدري ونبكي طار ليا نجيب هكا ترخسي فيا يا زينة هكا حتى يجي ليا خو مريم يا نجيب روح جيب ختك كيفاه راضي عليها بعد ما تزوج عليها راجلها ورماها عند مريم حتى نتا سمحت فيها جيبها ولا قول لباباها يجي يديها انا غير نبكي هكا طيحيلي قيمتي بين الناس لاه ياك ربيتك كبرتك لي تقولي عليها تحضر ،ناضت كريمة كيفاه قبلتيها على عمرك وعلينا واش يكون هذا الخامج حتى ذالة روحك ليه الف واحد يتمناك يا زينة لاه تحككتي على هذا الكعالة من نهار الاول قتلك خطيه بصح نتي لالا شادة فيه بسنيك عجبك حالك جا جمال لقى حالتنا حالة غير الخير واش بيكم قالو ارواح اسمع الخامج تزوج عليها وهي ساكتة وعاجبها الحال قالو شكون هذا قالو شكون من غير الرخيس نتاع الشاوي قالو يا لطيف مكاش منها هبل هذا عندو قاع زينة ويتزوج عليها باينة كاين حاجة ولا كذبو عليك شوية قوا الطبطيب عرفتو هشام فتح عليه نجيب لقفو من تريكو رخيس خامج وجاي بوجهك صحيح بالسيف لا فكهم جمال وقال لنجيب خليه يدخل ونحلوها متفضحناش قدام الجيران دخلو لصقت فيه كريمة يا رخيس يا الخامج يالي متسواش ختنا لويزة نتا تتزوج عليها وتذلها هكا هشام ساكت برك ويحوس عليا بعينيه حتى شافني جا ليا عاود جبدو نجيب هذي تنساها من اليوم تحلم تشوف خيالها قالو يا نجيب خويا اصبر نفهمك قالو متفهني ما نفهمك طير عليا خير ما نخسر عليك رصاصة بين العينين ونباصي بيك قالو هشام اني قدامك ودير ليتحب عليها المهم مرتي وبنتي يكونو معايا قالو شوف يا سيدي هذا وين بانلك على مرتك وبنتك يوم تزوجت علاه ماخممتش عليهم طير منا وزينة ماعندها رجوع معاك يا طلقها يا نرفع عليك الخلع بدى حتى هشام يعيط كيفاه هذا نطلقها نتا في عقلك مرتي ومنسمحش فيها غير الطلاق لي منيش مطلق ناض حتى نجيب تطلقها تطلقها رضيت ولا مرضيت والله ثلاث مراك مكحل عليها اقسم بالله غير تشتاق خيالها هي وبنتها ومندمكش على النهار لي زدت فيه مني نجيب وضوكا امشي اخرج عليا وولى يطبع في هشام زاد حتى هشام دزو وجرا ليا نوضني قالو منا منيش خارج غير وزينة معايا خطفني نجيب من عندو والله مراك دايها ولاو كل واحد يجبد فيا من جهة داروني كي البالون بيناتهم مزية لحق جمال فكني منهم قاللهم الطفلة مريضة ونتوما تلعبو بيها بيناتكم حسيت جسمي ثقل وموالاش قادر يهزني حتى عينيا بالسيف نحل فيهم وجاني القيا عييت حاكماتو بصح كان أقوى، تفرعت زينة وكامل شفنا معاها والصدمة أنها خرجت الدم من فمها ومن نيفها مهوش قيء عادي وجات طايحة زرب جمال سندها خاطر كان أقرب واحد ليها مع طاحت فالارض جرينا كامل ليها هشام يهز فيها ويقوللها حبي واش بيك وهي تشوف معاه بصح نظراتها تحسهم نظرات لوم وعتاب دورت وجها جيهتي وجهة نجيب نظراتها فيهم كسرة وألم عيينا نهدروها والو أكثر ما استفزني كريمة تعيط وتقوللها زينة شهدي زينة شهدي وليت نعيط ونقوللهم قتلتوها قتلتوها اتهناو ضوكا اتهناو رفدها هشام وطار بيها للطونوبيل لقينا الجوارين الكل متلامين خاطر عياط نجيب وهشام كان لسابع جار.
مريم تحكي جيت لدارنا خاطر تعبانة بالزاف من التربية ولادي جبتهم على روس بعض ، كنت في دارنا حتى سمعنا العياط جيت فالتاقة ونتصنت  سمعت زوج رجال مدابزين دخلت وخليتهم شوية سمعنا عياط نسا جريت حليت لباب لقيت ولد جوارين صغير قتلو يا ولدي واش كاين قالي زينة خت عمو نجيب ماتت من الخلعة خرجت نجري لدارهم بلا خمار بلا حجاب مع دخلت نلقى صليحة طايحة وسعاد تعيط وتقطع فشعرها قتلهم واش كاين تعيشو متفجعونيش واش بيها زينة غير البارح حكيت معاها فالتليفون وكانت لاباس طارت ليا كريمة اخرجي الله لا تربحك كي نتي كي هوما هوما رخاس وميسواوش بصح نتي ياك كنتي صحبتها ياك كنتي لاعبتها ختها كيفاه قبلتي عليها هذا الشئ وأنا مفاهما والو طبعتني وغلقت الباب في وجهي جريت لدارنا نعيط من برا اماما تعيشي ارواحي سقسيلي على حبيبتي اماما راهم يقولو زينة ماتت ، الله أكبر الله أكبر ادخلي عند ولادك نشوف واش كاين ونجي هي خرجت وانا عييت نركح مقدرتش جبت تيليفون وعيطت للصالح غير قالي الو وليت نضبح اصالح صح زينة ماتت يا صالح تعيش واش كاين ولا يقولي كيفاه زينة واش بيها زينة قتلو منعرف راهم فالحومة يقولو زينة ماتت اصالح تعيش الحق ليا راح نموت راح نموت كوبا عليا وانا بقيت على الجمر نسمع غير فالعياط والضبيح شوية سمعت الباب جريت لقيتو بابا وجهو ميفسرش قتلو تعيش يا بابا طمني تعيش قول خبر مكاش منو غير يكذبو قالي يا بنتي كل واحد واش راه يهدر هوما شافو راجلها وخوها رافدينها وطايرين بيها بصح مزال مبان والو جاو خاوتي وماما مابانتش وانا على النار حتى صالح نعيطلو ميجاوبش شوية جات ماما جرينا قاع ليها بصح هي طارت لمرت خويا قتلتها بالسوط حتى فكوها خاوتي ولا الرويجل نتاع خويا يزعف على ماما كيفاه ترفدي يدك على مرتي نطقت ليه قاتلو روح يا ولدي يا عدو كرشي ربي يجيبلك ضربة نتا وهي لي تقسم ظهروكم وتطيح غروركم وحقرتكم لبناتي ربي يخلص فيكم القديم والجديد بدى بابا يعيط اسكتي يا مرا وحكيلنا واش كاين قاتلو السبع نتاع ولدك راح قال لنجيب بلي هشام تزوج على زينة ورماها عند مريم والطفلة حالتها حليلة راح نجيب جابها ولحق عليهم هشام ناضت بيناتهم والطفلة مسكينة من القلقة والخوف راهم يقولو تقيات الدم ومزال مبان عليها والو بديت نعيط ونقطع في شعري عندهم الحق كلو في جرتي انا لاه حليت فمي انا لي قتلت صحبتي انا لي قتلت زينة ، نعيط ونسوطي حتى تغاشيت بالسيف فطنتني ماما وليت نقوللها تعيشي قولي منام برك تعيشي قولي مكاش منها قاتلي يا بنتي هذا قضاء الله رجعت نبكي عيطت لصالح محبش يجاوب بصح يا خوفي كي يدري واش راح تكون ردة فعلو ،بالسيف لا رقدنا هذيك الليلة ، للصباح راحت ماما لدار زينة تستخبر بصح ليه ليه ولات قاتلي ملقيت حتى واحد حنا هكاك دخل بابا ومعاه صالح وجهو ميتفسرش  جرينا ليهم قالنا بابا راها في يد ربي العالمين دخلنا للصالون بابا خرج ويجيبني صالح بكف النجوم شفتهم جرات ليا ماما قاتلو يا صالح وليدي والله هيا محكات واش راهم يقولو وليدي لي ميسواش هو ومرتو قلبو الهدرة وليت نبكي قالي من وينتا كنا نخرجو أسرار الناس قتلو اصالح والله مهدرت هكا انا يوم قتلي هشام البارح تزوج على زينة مقدرتش نحمل عيطتلها لقيتها مسكينة مدارية بوالو عيطت لماما وحكيتلها قتلها انصحيني نخبرها ولا نخليها حتى جي هنا وتتصدم قاتلي يا بنتي كون كيما قبل كون قتلك خبريها بصح كي قلتيلي راها بالحمل تخافي كاش ما يصرالها ويقتلك تأنيب الضمير يخي الظاهر الرخيسة مرت خويا سمعتنا وزاد سمعت بلي زينة كانت عندي شوف واش كذبت والله يا صالح انا مهدرت هكا  عاود رفد يدو جا راح يضربني ممبعد حبس قالي قوليلي برك  ضوكا خويا انا كيفاه نوقف معاه في محنتو خويا كيفاه نقابلو حنا هكاك حتى دخل الرخيس نتاع خويا قالو كي نتا كي خوك رخاس ومراكمش رجالة الراجل كي يدير حاجة يستعرف بيها قالو صالح وقيلا نتعلم الرجلة منك يا الوذنان يلي تعاود هدرة النسا وتلاصقو في بعض بالسيف لا فكهم بابا صالح راح واناطحت فالارض نعدد ونبكي.