زينة الهاشم 💝

الجزء 5

زينة الهاشم 💝
الجزء05:
أنا بعثتلو ميساج فتيليفون وفالفايس فالليل حتى عيطلي حكيت معاه شوية سقساني علا حالي قتلو عايشة وخلاص قالي زينة ابكي وخرجيها من قلبك مديريش كيفي كي مات بابا الله يرحمو لعبتها رجلة ومنبكيش قالي لضوك راها ضارتني لضوك راها تحرق وانا تقول سبالة وتفتحت دموعي ولاو يسيلو وهو يسمع وساكت معرفتش كيفاه غفيت فطنت لقيت لابال تمشي عييت ألو ألو مكاش وليت كوبيت وكملت رقادي ، جبناها قريب شهر وحنا على هذا الريتم فالنهار يبعث لي ميساج فالفايس وفالليل يعيط تيليفون نحكو حتى نرقد وهو كل مرة يحاول معايا باه ينحيلي على خاطري ديما يقولي اخرجي روحي للبحر بصح أنا الله غالب كلش سماطلي وليت من الدار منخرجش حتى لمريم ومنروحش هي ديما جينا مرة سقساني قالي زينة تدخلي للرتراباج نستناك قتلو لالا الحمد لله بلعت العام ضحك قالي مدريتكش قراية ضحكنا ممبعد قالي كي تعولي جي تسجلي خبريني باش نستناك قوتلو أوكي هذو اليامات نقص بيناتنا التيليفون خاطر خرج هو والعايلة نتاعو راحو فتلمسان قتلو في خاطري نشوفها قالي ان شاء الله يكتب ربي ونديك ضحكت أنا وقتلو في قلبي تمسخر ولعب بيا عندك الصح أنا لي راضية على روحي علابالي بيك خاطب ولاتية نتمعشق معاك مرات عقلي يفطن ونقول منزيدش نحكي معاه السيد خاطب تم تم يغلب قلبي ونقول علاش أنا واش راني ندير ياك رانا نحكو برك جامي تجاوزنا الحدود ديزامي برك مرات نشك كيفاه هاذي لي خاطبها ميهدرش معاها ولا خاطر يهدر معايا ب 2 سوايع وديجا جامي حكماتو اوناتونت المهم كيما عييت ندير ملقيت حل وديما قلبي الطحان يغلب.

موراها بيامات جاتني مريم غير تنوح عند راسي باغية نشوف صالح ديريلي سبة وخرجيني من الدار خاطر خاوتي مخلاونيش نخرج كيما عييت معاها خطيني والله مراني قادرة شدت الصحيح ونتي ختي ونتي حبيبتي ممبعد حرشت صليحة عليا وتفاهمو على راسي وبدات صليحة ها روحي معاها وهي ختك وهي ديما واقفة معاك وزاد نتي تاني تخرجي وتنحي على روحك المهم مريم راحت قاتلي صليحة والله مريم تحبك وشفتي واش دارت على جالك وزيد فترة الخطوبة أروع فترة قاتلي ان شاء الله تعيشيه مع لي حاباتو قتلها طريتيني بلا جنحين يا صليحة غير خليني نروح نرقد خير حكمت بلاصتي عييت نستنى ضوك هشام يعيط بصح معيطش شوية لحقني ميساج فالماسنجر قالي وصلنا للدار بصح راني تاعب ميت غدوة ان شاء الله نعيطلك ،رقدت الصباح عاونت صليحة فالشغل ممبعد رحت عند مريم قلتلها صحا يا لالة وينتا معولة ولات تزغرت بالشوية قاتلي اصبري نعيط لصالح المهم تفاهمت هي وياه على نهار لي يكونو خاوتها خدامين ليلة من قبلها رحت عندهم قتلو عمي مصطفى معليش غدوة نروح مع مريم نقضو وحد الصوالح عندي من البلاصة الفلانية حتى يماها قاتلي يا حتى أنا سمعت كاين صولد تما روحو كاش ما تشريو سكت وقالي خلاص روحو مش مشكل رحت أنا لدارنا حكيت شوية مع هشام بصح هو كامل مجبدليش بلي صالح جاي وحتى أنا مخبرتوش رقدنا حتى الصباح فطنت على مريم تعيطلي لقيتها 8 نتاع الصباح غير ريبونديت قاتلي واش واجدة ولا مزال قلتلها واش بيك وقيلا مرقدتيش كامل ديجا مزال الحال 4 سوايع باه يلحق قاتلي جداك راه هنا خلعتني قتلها علاه قلع هذا قاتلي على 4 صباح وليت نضحك قلتلها الحب يدير قاع هاك قاتلي ها نوضي ازربي روحك قل من نص ساعة نجي ليك والله مدارت ربع ساعة كانت عندي لبست سروال وليكات فالنواغ شوية طويلة جيت ندير خمار نواغ مخلاتنيش مريم قاتلي سخانة والله تتشوطي مالا درت خمار مارون قاتلي ديري شوية مكياج راكي شاحبة قلتلها غير خليني وهي كانت تاحفة روحها لابسة حجاب جديد فالغوز ودايرة خمار أفلوغ غوز وشوية مكياج برك بصح الفرحة نتاعها كانت محليتها ومزينتها جينا خارجين لقينا نجيب مدلي دراهم قالي كاش ما تشري رحنا ركبنا فالبيس وتليفونها محبسش صالح غير يعيط غير شوية وين راكم وين راكم.

حتى وصلنا عندو لقيناه مع هشام شفت مع مريم قاتلي أقسم بالله معلابالي بلي جاي معاه هدرناها غير بيناتنا صافحنا عليهم بقاو يسقسو فيا كيفاه راكي واش احوالك قتلهم الحمد لله ركبنا فالطونوبيل قالنا هشام بصح ڨيدوني منعرفش البلايص هنا قاتلو مريم على وحد البلاصة دار جيبياسgps دانا ليها قعدنا شوية مريم وصالح كانو يحكو بيناتهم مرة مرة يوشوشلها في وذنها وهي تضحك وانا وهشام مرة نحكو مرة نسكتو شوية قالي هشام واش رايك نخلوهم هنا ونديك للبحر تقعدي تريحي شوية البحر ينحي عليك قتلو معليش غير خلي بقينا تما حتى قيس 11 ونص دخلنا ريسطورون فطرنا وزدنا جمعنا شوية كي لحقت الواحدة قلنالهم نروحو الوقت قالونا مزال الحال قالتلهم مريم لالا الوقت عليا نخاف خاوتي يرجعو للدار ويديرو الحس على ماما قاللها هشام خاوتك وشبيهم ياك عندك باباك هو يحكم علاش ميبسين راسهم ممبعد سقساني قالي ونتي زينة تان يحاسبوك هكا قاتلو مريم أواه نجيب هايل ميهدرش قاع معانا خزر فيها صالح عاد يخوف قاللها مالا هايل نجيب يعجبك وقيلا حتى قاتلو يا وشبيك نجيب خويا كي كنت صغيرة كان يشريلي الحلوة يوصلني للمسيد لي يضربني ولا يخرب فيا نروح نشتكيلو يضربهم وضوكا أنا راني نتهلى في ولادو حتى قاللها آه زوج قتلو ايه مزوج وعندو زوج ولاد ذكورة قالي الله يبارك المهم نضنا رحنا كي وصلنا لبلاصتنا لي ننزلو فيها جبد هشام زوج صاشيات هذوك نتاع لي كادو مد لمريم وحدة غوز ومد لي أنا وحدة غوج قالنا محبيتش نجيكم بيديا فارغين شكرناه ممبعد صالح ضربو للكتف قالو والله متحشم علاه مفكرتنيش دار عندي قالي زينة ختي راكي تساليني كادو اسمحيلي أنا خوك ومد لمريم صاشي قتلو معليش نوغمال ممبعد مريم قالت لهشام صحا خويا اديه للدار متبقاوش دورو عينيه يزغدو ولا يضحك قاللها خلاص اتهناي نزلنا ورحنا ركبنا فالبيس غير ركبنا بقينا نقرعجو واش جابولنا هشام جابلنا كوفري بارفان وشوكولا، و صالح جابلها حجاب مع خمار وبوشات ودوبياس فالروج ضحكنا حتى شبعنا كي وصلنا ونزلنا من البيس مشينا شوية حتى انتبهت لطونوبيل ورانا تلفت بلا منفيق لقيتهم هوما قلتلها مريم راهم ورانا ولات تتخبط غير وحدها كون كاش واحد يشوفنا اليوم يقتلونا قلتلها ازربي في مشيتك ومدوريش انتي برك لي تفضحينا المهم زربنا دخلنا لدارنا وبقينا نطلو عليهم من البالكون أيا مزية كملو طريقهم قعدنا شوية ممبعد مريم جات رايحة لدارهم خملتلها شوية حوايج من عندي باش إذا تلاقات بخاوتها ولا باباها يلقاو عندها صواشي زعما صح شرات مالا ارحمها ربي وجازت سلامات متلاقات مع حتى واحد فالليل عيطلي هشام سقساني إذا عجبتني البارفان قلتو شابة قالي جبتهالك معايا من تلمسان قتلو يا مالا كنت مخمم جي قالي لالا جبتهالك قلت كي جي تسجلي نمدهالك البارح كي قالي صالح راني رايح مالا رحت شريت لمريم بصح متخبريهاش ردي بالك أنا خلاص ذبت نتاع الصح طحت على راسي ممبعد سقساني قالي البارفان نتاعك هايلة حوستلك گامل عليها ملقيتهاش زلقت فالهدرة قتلو نتاع فرنسا مش هنا قالي صح شكون جابهالك تبكمت ممبعد قتلو خالتي دنيا قالي عندك خالتك في فرنسا قتلو ايه قالي الله يبارك قتلو يبارك فيك شوية وكوبا قالي عيان من الطريق والسوقة.