زينة الهاشم 💝

الجزء 21

زينة الهاشم 💝
الجزء 21
رحنا للدار غير دخلنا لبيتنا قتلو واش بيك نتا ويماك عليا قالي والو نتي مكبرتها برك قتلو مش مكبرتها كاين حاجة مخبيها عليا قالي الله يهديك واش نخبي عليك أنا ، قتلو منعرف حاجة تخص حبيبة الصغر قالي زينة ارقدي بركي متخلطي فالهدرة غدوة ورانا طريق لداركم مالا بركاي من هبالك قتلو مش هبال هذا ياك سقسيتك إذا خاطب نجبد روحي ونتا قلت لالا علاه خليتنا نوصلو هنا ونبان خطافة رجال قدام الكل قالي بلعي شا راكي تخلطي علاه راكي تشوفي فيا ذراري نلعب هكا وهكا ياك قتلك مخطبتهاش وكون مزال بابا حي يشهد على كلامي أنا كي قاتلي ما عليها قتلها لالا منيش حاب نجيب من العائلة وزيد ذيك الطفلة بذات متعجبنيش قداه من مرة ديرلي عفايس عيانيين دار خالي قطعتها من جالها وهدرت معاها وقتلها معينيش عليك غير متشقايش ياخي تنوض لالة ما تقول لخوها خليلي الطفلة لوليدي ضوكا قاللها شديتي الطفلة حتى فاتها زواج نتي وبنك وأنا والله معندو مدخلني فالحكاية قتلو علاش شحال عمرها قالي مش عارف وقيل راه ف 30 قتلو تتمسخر مولات 30 فاتها زواج نتاجاتها هذا وين راهم يتزوجو تحسب كيما حالتي كلختلي بزوج كلمات حصلتني معاك قالي ياه ملا حصلتك قتلو ايه وزيد مأمنتكش كون مخطبتوهاش رسمي خالك ميزعفش قاع هكا قالي صحا وليت كذاب ذوك اسكت قالي جاوبي ربك وليت نعيط قتلو ايه مدخلتش راسي هذي الحكاية قالي زينة نقصي حسك لا نكسرلك فمك قتلو هذا واش تعرف غير تعيط وترد زعافك فيا جا يعنقني بعدتو عليا تلاقت يدو مع وجهي قاسني على نيفي ولا الدم يسيل غير شفتو هبلت رحت نجري للصال دو بان وغلقت الباب عيا يدقدق زينة حلي والله ماهو بقصدي زينة افتحي سمعت عجوزتي جات ليه قاتلو واش كاين واش بيكم قاللها مكان والو سمعتني نبكي الداخل قاتلو واش درت لبنت الناس قاللها مدرتلها والو غلطة برك قاتلو نظن العين لي شافتكم الصباح مصلاتش على النبي قتلها في قلبي نتي مش حابتني وعاملة روحك نهمك وخايفة عليا بقيت فالصال دو بان حتى عرفتو راح خرجت لبيتي لقيتو متكسل على ظهرو وداير ذراعو على عينيه هذي رقدة نتاعو جيت تكسلت في بلاصتي جبدت روحي عليه ومديتو بظهري جبدني عندو نضت نعيط وخر عليا متمسنيش قالي زينة اتهدني نهدر معاك برك قتلو متهدرش معايا بعدني قالي زينة أقسم بربي كون ما تسمعيليش ما نديك لداركم غدوة قتلو علاه متوحشتهم علاه تحقر هكا وليت نبكي باسني من عينيا وحضني قالي يا العمر والله ماهي حقرة والله جات هكا برك مضربتكش صح غششتيني بصح متوصلش للضرب بقى يحاول فيا حتى اسكت ممبعد قالي غدوة سقسي ما والله تحكيلك الحكاية كيما قتهالك صح بقات تحرق في قلبي بصح بلعتها غير باش نروح لدارنا ، الصباح نضنا وجدنا رواحنا عيات عجوزتي تسقسي واش بيكم البارح محبيتش نقوللها رحنا كامل لدارنا خاطر عارضينا للغدا غير وصلنا طلعت للدار نجري ونعيط من برا راني جيت دخلت نعنق ونبكي توحشتهم بزاف لقيت كريمة وسعاد قعدنا جمعنا شوية تغدينا وزدنا شوية قالنا هشام هيا قتلو تعيش خليني نقعد متوحشتهم قالي لالا مرة خلاف قالولو خياتي ونجيب خليهانا يامات محبش قاللهم مبقاش بزاف نرجع للخدمة وراني واعدهم باه نخرجهم ديجا ريزارفيت بنقالو وخلاص رجعت معاهم نبكي مشبعتش قاع دارنا قاتلو عجوزتي كي نجو عاود جيبها لدارهم تنحي منهم الوحش .
جينا للدار قالي زينة اطلبي مني لي حبيتيها غير نتاع تقعدي في داركم انسايها ملي تتوحشيهم نديك الصباح والعشيا نجيبك قتلو يا علاه والله نتوحشهم قالي حتا أنا نتوحشك ومنقدرش بلا بيك قتلو بصح غير سمانة راه عندي شهرين مشفتهمش قالي هبلتي وقيلا والو ليلة منفوتهاش بلا بيك كيما عييت نحاول فيه والو راسو خشين بتنا هذاك اليوم والغدوة منو وجدنا حوايجنا النهار الأخر دانا لبجاية جبنا فيها سمانة هايلة غير تحواس ورجعنا عاود داني لدارنا صباح والعشية رجعنا كيما حاولتو محبش يخليني حتى يماه وقاتلو خليها فدارهم بعدا يومين قالها والو نديها ونجيبها مكاش مباتة، دخل للخدمة عندو رتراباج وليت نوض معاه صباح نوجدلو قشو ونوجدلو قهوة يشرب ويروح وأنا نرجع للشغل مرات ميروحش الصباح حتى العشية كل مرة كيفاه واحد اليوم كان قريب العيد الكبير فالليل مجمعين الفوق ولات تحلالو الفوق ولينا غير مرة مرة ونطلعو نرقدو تم حتى سقساني قالي عمري مش عندك بزاف ممرضتيش تولهت بلي صح قتلو ايه بصح نوغمال موالف ديرلي هكا مهيش مرقيلة قالي بصح مش كيف كيف من قبل كنتي عزبا زعما مكيش بالحمل قتلو والله منعرف وصح أنا متولهتش الصباح غير نوضتو لبس وخرج طول خلعني شوية دخل جابلي تاست قالي ديريه قتلو خلي ممبعد قالي لالا أنا نتقهوا ونتي ديريه حسيتو متحمس بزيادة رحت درتو دخل عندي للبيت قالي بشري واش قتلو دوماج بصح مكاش قالي تزعقي قتلو لالا والله مكاش حسيتو خاب الأمل نتاعو قتلو اسمحلي انتبه عليا عنقني قالي لالا نوغمال مزال الحال وخرج راح نهار عرفة نوينا كامل الصيام ، الصباح فطنت على وجاعة لالة نضت غسلت ودرت قهوة أنا نشرب حتى دخلت عجوزتي قاتلي مكيش صايمة قتلها لالا قاتلي علاه اسكت قاتلي متقوليليش بالعادة قاتلي يا نندب وأنا طامعة راكي بالحمل فوتت نهارها كامل مشنفة عليا ، نهار العيد ذبح هشام هوما ملي باباهم حي يذبح زوج مالا باقيين عليها تعاونا على الدوارة والبوزلوف نقيناهم كملنا وسيقنا رحنا غسلنا ولبسنا وعجوزتي وجدتنا الغداء سقسيتهم إذا روحو لدار عمهم قالولي لالا حتى غدوة نتلاقاو جاو عمومهم وولادهم غافرونا حتى فالليل قاتلنا العجوز أيا نخملو قلت لزهية واش نخملو قاتلي حنا ديما ثاني عيد نخرجو للغابة مع عمومي نديرو الشواء المهم خملنا السلاطة القاطو اللحم كلش وجدناه الصباح لبست سروال وليكات طويلة بيما باش نكون ألاز شافتني بدات تعيط عليا بركاي من الترعوين امشي لبسي حاجة مستورة قتلها هاهي زهيرة لابسة هكا عادي علاه قاتلي نتي وهي مش كيفكيف ناض هشام قالنا واش بيكم قاتلو شوف لالة مرتك واش لابسة قتلها ياك رايحين للغابة باه نكون آلاز قالي لبسي ملايتك من الفوق قتلو منك بصح هزلي راسو دخلت لبيتي نبكي يعني لازم تمشي رايها عليا غير دخل قتلو واش هذا قالي نتي وياها هبلتوني نديرلك جلباب بالستار ونتهنى قتلو والله قالي معجبكش الحال وقيلا قتلو والله منديرو جبتني من دارنا هكا نقعد هكا قالي زينة راسك متيبسيهش معايا ولا تشوفي لي ميعجبكش سكت لبست ملايتي ورحنا المرة الأولى كنت قالبة خليقتي ممبعد قلت خليني منها والله متفسد عليا وليت نضحك فوت نهار هبال لعبت مع بنات زينب الجعلايلة البالون وهي غير تشوف معايا مش عاجبها الحال والله مديتها فيها .
فاتو اليامات نفس الروتين نوض صباح نغسل نوجد روحي وندير قهوة نوض هشام يتقهوى ويروح للخدمة وأنا نرجع للشغل يجي هو نتغداو ندخل معاه للبيت شوية هو يروح والعجوز ترجع عليا سيرتو كي تكون دالتي نتاع الماعن كيما عيت نفهمها بلي كي يروح نغسلهم والو محبتش قال واش متبغيش الكوزينة مربلة زعما غير على نص ساعة مالا تفاهمت مع زهية هي تغسل ماعن الغدا وأنا نغسل ماعن العشا باش خطاتني ، ونهار الجمعة هو يصبح راقد ل 11 وقالي والله وتتحركي من تحتي نتفاهم معاك حتى نوضو مع بعض وزاد هو فيه طبيعة يرقد فوقي كيما نعيا نجبد روحي منقدرش هي متهدرش كي يكون تم حتى يروح للصلاة دير فيا حالة متخليش هدرة متقولهاليش السبت صباح يروح للحوانيت والعشية ديما نخرجو كل مرة كيفاه مرات كامل مرات غير أنا ووياه وليت نحب نستغل الخرجة معاه كون نلقى مندخلوش مرات نتعشاو ونجو مالا الغدوة كي يروح هو للخدمة دير فيا رايها مكيش قاع تخليه يريح وراه هامل للحوانيت من تحت راسك وإذا تعشينا علاه تندبلي نتاع الصح كرهت ومليت نقولو روح للدار كيما العادة يديني الصباح ويجيبني تخنقت ولى ملي يدخل يلقاني نبكي ولا قالبة خليقتي وحد اليوم ناض يعيط كرهت وهبلتيني وعلاه راكي ديري هكا نجي ليك باه تنحي عليا تزيدي تغميني قتلو حتى أنا مغمومة خلاص تخنقت كرهت حابة روح لدارنا قالي والو انسايها داركم ومنا وجاي نديك مرة فالشهر برك نديك الصباح وتجي متزوجتكش باه نظل دايك لداركم كي حكيت لصليحة وسعاد قالولي زينة راكي غالطة معاه راه يخرجك يشريلك يجيبك للدار اصبري وخلاص بيك غير والفتي مع القراية والخرجة ومتقعديش فالدار جاتك صعيبة مع الوقت وتوالفي وأنا خلاص والله عييت حاولت نتأقلم بصح إلا وتسمط عليا عجوزتي سيرتو كي جيني مدام روج تبهدلني كيفاه مزال محملتيش مرة قاتلي روحي للطبيبة تشوفك قتلها من نيتك علاه عندي 6 أشهر زواج نولي نجري عند الطبة قاتلي معليش باه إذا كاش حاجة تبان من الأول ونديرو حسابنا قوتلها واش قصدك قاتلي لالا منقصدش وأنا متأكدة كانت تمعنيلي بلي ممكن منجيبش ولاد كيما سعاد هبلت غير جا قتلو شوفلي خدمة مساعدتنيش القعدة فالدار قالي بصحك قتلو ايه خلاص راح نهبل أوموا لقالي خدمة نتلهى فيها قالي صحا معليش بقينا نهارات كل مرة نفكرو قالي زينة والله راكي في بالي وراني موصي عليك كاش حاجة نقولك وحدي ، وحد اليوم كي جا قالي زينة ملقيتلكش بوست فالسبيطار بصح راني هدرتلك مع الفرماسي لي قدامنا تخدمي عندو حتى كاش ما يبان فرحت نضت نسوطي ونبوس فيه قالي وهدرتي منعاودهاش تهمليني كاش ما نشوف نحبسك قتلو خلاص ميكون غير خاطرك.