زينة الهاشم 💝

الجزء 27

زينة الهاشم 💝
الجزء 27
فالليل كي جينا نرقدو قالي هشام خملي حوايجك غدوة نديك لداركم ابقاي يامات فرحت قتلو غدوة متخرجوش مع عمومك محاباش نحرم على لبنات قالي لالا مناش خارجين كل واحد واش عندو مرة خلاف ونروحو قتلو اوكي جبدت لافاليز نتاعي كبيرة وبديت نخمل هو كان لاهي مع تيليفون حتى قالي هذي وين دايتها قتلو لدارنا قالي تحسب راح تبقاي شهر قتلو في قلبي وقيلا منرجعش قاع لانو صراحة خلاص كرهت قالي راح نخليك يا ربي سمانة وغير كي عدتي مريضة شفت فيه باستهزاء وقتلو مالا علابالك مريضة حسبت ماعلابالكش ناض تقدم عندي وحضني ليه عندنا قريب شهر بالاك متحاضناش غير ضمني ليه غلبوني دموعي قالي زينة نتي حبي وعمري وروحي علابالي غلطت معاك وغلطت بزااف بصح والله نتي أغلى ماعندي نتي روحي كاملة لدرجة كون تغيبي عليا نموت علابالي عييتك وراكي مريضة بسبابي اسمحيلي حنونتي مدلي دراهم قالي كي تروحي لداركم روحي للطبيب متبقايش هكا ولى يبوس فيا من عينيا ،من نيفي ، فمي وهبط لرقبتي شوية وحبس بعدني عليه هز مفتاحو وتليفونو وخرج كملت التخمال وشديت بلاصتي رقدت للصباح نضت غسلت ولبست ووجدت روحي  ورحت تقهويت كانو هوما ديجا قاعدين يتقهواو حتى قاتلو العجوز خليها في دارهم حتى 15 يوم ولا 20 يوم قاللها علاه يا سيدي سمانة منزيدلهاش وغير كي راها مريضة اليوم الاربعاء الخميس الجاي نجيبها انا غير ساكتة ومخليتهم هذا قرار يخصني نورمالمو يشورني أنا بصح هو لالا لازم أمو تحكم وتتحكم نظن نروح ومنرجعش هذا احسن حل.
رحنا طريق كاملة ساكتين مرة مرة يحب هشام يحكي معايا بصح انا مسمطاتو رجعت لعبتها رقدت وصح من تالي رقدت حتى وصلنا للدار  غير دخلت سلمت على صليحة ونجيب وجوزت قبالة لبيتي تسطحت جات صليحة واش بيك حنونتي قتلها عييت من الطريق قاتلي هيا هشام رايح ويحوس يشوفك قتلها خليني منو قاتلي زينة مزالكم مدابزين راهو محبش يتغدا قتلها خلاص كلشي بيناتنا قاتلي يا لطيف صحا نوضي شوفيه ممبعد نحكو عليها خرجت ليه لقيتو عند الباب خارج سلم عليا قالي تهلاي في روحك وروحي للطبيب متنسايش هزيتلو راسي  ورجعت رقدت حتى للمغرب نوضتني صليحة زينة واش بيك حنونتي هذا قاع نوم تحضنتها وليت نبكي حكيتلها كلشي خاطر فالتيليفون محكيتلهاش بديتاي قتلها تخيلي ملي تزوجنا جامي هجرني حتى هذي لمرة  ميشوفش معايا خلاص نظن هذا آخر الطريق معاه قاتلي صحا وكون تطلعي صح بالحمل بقيت ساكتة قاتلي زينة هو غلط وراح نحاسبوه عليها بصح مش لدرجة تخربي دارك وتيتمي وليدك وزيد المشاكل هذو نتاع العجوز قاع على جال الحمل ان شاء الله يكون فرج عليك ربي وتتهناي قتلها واش ندير قاتلي نوضي كولي حنونتي وغدوة يفرج ربي ، نضت غسلت وتعشيت معاهم ورجعت شديت بلاصتي لقيت هشام يعيط محبيتش نرد عليه خلاص حاسة قلبي برد من جهتو عيط شحال مجاوبتوش رجع بعث ميساج محبيتش نشوفو رقدت للصباح منضتش حتى مع 9 فايتة لقيت صليحة حطتلي تاست عند راسي رحت درتو خرج بوزيتيف غسلت ورحت عندها عنقتها ونبكي قتلها بوزيتيف قاتلي الحمد لله ربي يتمم بالخير تقهويت سمعت تيليفون يصوني عارفة بلي هشام محبيتش نشوفو قاتلي تيليفونك قتلها باينة هشام قاتلي متخبريهش ضوكا قتلها معليه كي بقى غير يعيط ويعاود هزيت قالي واش بيك من البارح متهزيش تقلقت عليك قتلو مين كنت قدامك متقلقتش عليا وضوكا كي وليت في دارنا ومع حبابي تقلقت قالي علاه حنا مش حبابك قتلو كنتو قالي وضوكا قتلو ضوكا خلاص برد القلب عليكم قالي زينة بركي واش هذي الهدرة مع الصباح صحا رحتي للطبيب قتلو لالا قالي علاه قتلو بالاك عشية نروح راني مقدرتش نوض الصباح قالي معليش المهم روحي متزتهزايش بروحك راكي مريضة بزاف قتلو ان شاء الله وكوبيت عليه شبعت بكا قاتلي صليحة علاه راكي تقتلي في روحك قتلها شوفي كي كنت قدامو مداهاش فيا وضوكا لاعبها يحبني ويخاف عليا قاتلي زينة راكي حساسة من الوحم حنونتي ريحي ويفرجها ربي وجدي روحك باه بعد الغدا نديك للطبيبة، على 2 رحنا لجينيكولوغ أكدتلي الحمل نتاعي سقسيتها على الوجع نتاع راسي و الدوخة قاتلي احتمال كبير من الحمل بصح إذا محببسش عليك ارجعي نمدلك ديري ايارام ومدتلي دوا وليزاناليز  ورجعنا للدار جات كريمة وسعاد فرحولي بالحمل نتاعي  قالولي ان شاء الله تتهناي من العجوز ، مع العشية عيطلي هشام سقساني إذا رحت للطبيب قتلو رحت قالي واش قالك قتلو والو غير من التعب والقلق قالي ربي يشافيك هيا تهلاي في روحك ضوكا شوية مشغول ممبعد ان شاء الله نعاودلك قتلو ميشقاش راهم خواتاتي هنا ولاتية معاهم قالي زينة كرهتيني بقيت ساكتة قالي من حقك حتى أنا غلطتي مهيش قليلة وكوبا.
جمعت مع خواتاتي بصح سامطتلي حتى هوما وحسو عليا قاتلي كريمة كيفاه حتى رضى يخليك وسمانة كاملة وموالف نحاولوه ميخليكش قاتلها صليحة شافها مريضة والعجوز مهداهاش ربي تخطيها راها دايرة حالة كي راه يبني الفوق قاتلي منضنش تخليكم تخرجو سيرتو كي راه جايها الحفيد  قاتلها سعاد كون غير تبرد وتخطيهم ياك راها بالحمل وهي هذا علاه مكانش عاجبها الحال انا غير ساكتة بصح دموعي على الشفر قاتلي كريمة حالتك مهيش عاجبتني راني حاسة كاين حاجة زربت نضت خاطر دموعي راح يفضحوني قاتلها سعاد كريمة خطيها باين الوحم مأثر فيها وزاد الزعاف نورمالمو راها ضوكا مع راجلها فرحانين بالبيبي لي جاي يخي محرمة عليه عجوز الهم قاتلها نهار قتلكم والله متخليها تتهنا معاه مديتوش على هدرتي ومزال نقوللكم ضوك تزيد تهبل وتولي تدخل فيها حتى في تربية وليدها وقولو مقلتش ، تعشينا وراحو خواتاتي مباتوش أنا شديت بلاصتي ورقدت حتى فطنت بتيليفوني يصوني لقيتو هشام محبيتش نهز بقى غير يعيط ويعاود كانت الواحدة صباح كي سمط هزيت الو ،ألو حبي الو عمري توحشتك نحبك موت نتي العمر نتي روحي نتي حياتي كاملة قتلو  كون جيت هكا بالنسبة ليك مجيب قريب شهر منايفني الشوفة ومتشوفش فيا قالي والله نتي أكثر من هكا وانا مكنتش منايفك أنا كنت زعفان ومتقزز من نفسي على واش درت معاك نتي حبيتيني بنيتك وكنتي معايا مرأة وفحلة وانا بواش كافئتك ...... انا غالط زينة انا الغلط راكبني من ساسي لراسي بصح والله ربي نحبك نموت عليك نتناك عليك واش بغيت نقولك ميوفيش يا زينة بليز سامحيني بليز متسمحيش فيا قتلو هدرتك جات روطار قالي لالا حبي مهما نكون روطار بصح علابالي تحبيني صح ياك ديما تقوليلي نموت عليك  قتلو صح كنت نحبك بصح نتا قتلت هذاك الحب قالي حبنا جامي يموت زينة نتي ليا وانا ليك مهما واش يصرا نبقاو لبعضنا صحا حبي والله تروحي عليا نموت معرفتش واش نجاوب بقيت ساكتة ونبكي قالي يا زينة متقتلينيش هكا نموت الف موتة ومنشوفش دموعك صحا حبي انا رخيس ومنستاهلش تحبيني وديري في روحك هكا على جالي ، بقى غير يحكي انا مرات نجاوبو مرات نسكت حتى سمعنا أذان الفجر قالي باي خلي نروح نصلي وندعي ربي مخلاونيش نهنا بيك فالدنيا فندعي ربي يهنيني معاك فالاخرة وكوبا بقات جملة تالية غير تتعاود حتى شكيت  كاش ما صرالو نضت صليت حتى أنا ودعيت ربي يصلح الأحوال بيناتنا انا صح قلت قلبي برد عليه بصح باينة كذب انا غير منشوفوش ولا منسمعش صوتو نهبل نحن ليه رجعلي هوس رجعلي الهواء لي نتنفسو حتى ومدابزين بصح نحبو يبقى على عيني بالسيف لا رقدت فطنت بتيليفوني يصوني لقيتها مريم شفت مع الساعة لقيتها 10 هزيت لقيتها تبكي واش مريم غير الخير باقية تبكي زينة راكي مليحة قتلها سافا شوية قاتلي وينتا روحتي للدار قتلها غير نهار الاربعاء علاه قاتلي والو غير سقسيت قتلها واش بيك واش هذا النواح قاتلي مدابزة مع صالح قتلها علاه قاتلي محبش يجيبني لدارنا قتلها شفتي معليش ختي اصبري وخلاص قاتلي هذاك مكان هيا باي حنونتي وكوبات واش هذا فالزوج مدابزين مع رجالنا .