زينة الهاشم 💝

الجزء 33

زينة الهاشم 💝
الجزء 33
فاتت سمانة كاملة هكا يجي الصباح يديني ندير  ليزاناليز نتاوعي ونرجعو نفطرو مع بعض يروح وديما يغلق عليا الباب من برا بالمفتاح مرات يدير دورة مرات ميجيش حتى للمغرب يتعشى عندي ويبقى حتى تأذن العشاء يروح حتى للواحدة ولا الزوج يجي يبات هنا صباح على الفجر يروح يصلي ويروح لدارهم ل 8 يعاود يجي عندي بصح تقريبا متنايفين نهدرو غير الحاجة الاساسية برك جابلي تليفون عيطت لمريم ديجا كان علابالها خاطر نهار لي جابني للدار راح جاب من عندها صوالحي وتاني خواتاتي قلتلهم بلي كرالي مام سعاد فهمتها واش صرا بصح هي معجبهاش الحال حتى كي قلتلها مازالني على رايي وأول فرصة نهرب عند بابا باه تهنات ورتاحت زدنا سمانة ورجعت لهذاك الطبيب هو طبيب أمراض داخلية قالي للأسف راه حاكمك سكري الحمل بصح مهوش حاجة صعيبة غير تولدي راح يروح قالي ارجعي لطبيبتك تزيد تفهمك قلت لهشام اديني لطبيبة مريم ديجا راني جوزت عندها رحت ليها قلبتني وشافت ليزاناليز أكدتلي هدرة الطبيب هذاك وفهمتني فالدوا كيفاه نشربو وأنا دموعي جراية وهشام يسكت فيا رجعت قاتلي هيا مزية هاهو راجلك جا وهو يوقف معاك والله شحال خفت عليك تكوني رحتي لفرنسا وكاش ما صرالك الدم جمد في عروقي خرجنا من عندها هشام ميضوويش مهدرش قاع معايا طاير بذيك الطونوبيل برك وانا نستنى غير فيها تنقلب بينا مع دخلنا للدار ويطير ليا مالا يا قحبة ناوية تروحي لفرنسا وانا تخليني بلا ولدي  هذا وين تفكرتي باباك وين كان يامات فاتو وين كان باباك حياتك كاملة هذا وين نفحتلك تروحي ليه ....بديت انا نعيط معندو ما دخلك بابا صح كان غايب عليا بصح عمرو أذاني حسبت كيما يماك لي استخسرت فيك الهنا مقنعتش حتى خربت بيناتنا عمري شفت أم تكره ولادها كيما يماك قالي بلعي كيفاه تهدري على ما هاكا قتلو ايه أنا بابا قاع غلطاتو بصح يبقى أب مش كيما يماك يقولو الام حنينة وتنحي من روحها وتزيد في ولادها بصح نتا أمك أنانية تخمم في مصلحتها قبل مصلحتكم يا عجبة شحال وهي يتزن عليا وينتا تهزي وكي وليت بالحمل خبات عليك قالي كيفاه قتلو ايه يماك اول وحدة عرفتني بالحمل وهي لي قاتلي بلي راني نتوحم بصح مخبراتكش علابالك علاه باه تبقى تمشيك على رايها قالي زينة بلعي راني رايح ونسقسيها والله كون ندريك تتبلاي فاها تخلصيها غاليا قتلو وإذا كان صح واش دير دار خارج ممبعد عاود رجع نحالي الباسبور وبطاقة التعريف وخرج كي الثور الهايج عند دقيقة ندمت لي هدرت معاه بصح لوينتا نبقى ساكتة أيا خليهم يا كلو بعضاهم واش همني.
ملي خرج ما بان ولا رجع خفت نتاع الصح خاطر خرج وهو شيطان في هيئة بنادم جامي شفتو بهاذ الحالة هو صح نهار يتقلق يولي ميتحملش بصح هذاك النهار حالة خاصة كامل وزدت تقلقت كي قالي شوفي مانهدر معاك ماوالو اني رايح ليها ونسقسيها اقسم بالله يازينة لوكان نلقاك كذبتي عليا وهي معلبالهاش نقتلك ونقتل روحي خلاص هنا حدها قتلو صحا لوكان تلقى بلي كان علبالها وش راح دير قالي لثما عندها هدرة خلاف  ندمت قولت لوكان غير ماقلتلوش كي شفتو كيفاش خرج مايبانش انسان واعي خفت غير يضرب يماه من الغش الي عامي عينيه تخيلت بزاف حوايج يقدرو يصراو، طول مارجعش مابانش خلاص حبيت نعيطلو بصح عزت عليا نفسي معيطلوش بقيت صابرة من بعد عيطت لمريم حكيتلها قاتلي هاذي هيا  خلي الي يصرا يصرا المهم لازم تتحل  المشاكل ويتوضحو كامل الامور وكل حاجة تبان كوبيت عليها وقعدت نستنى فيه يجي طول بزاف لحقت 12من بعد الواحدة الساعتين الثلاثة ذوك يجي ذوك يجي والو ماجاش هذاك النهار ماجاش كامل هو موالف ديما يجي على 1تاع ليل ومع وقت الفجر يروح يصلي وميرجعش حتى ل7ولا 8نتاع الصباح، هذاك اليوم ماجاش داتني عيني رقدت لصباح مكانش تقلقت عليه هزيت التلفون نعيطلو والو مكانش التلفون مقفول وش كاين خفت عليه بزاف بقيت صابرة صابرة حتى ل15 صونا تلفوني ريبونديت صافا صافا قلتلو وش بيك قالي مكان والو يبان تعبان من صوتو قلتلو وش بيك قالي مكان والو تعبان برك المهم وش بغيت نقلك ياخي تعرفي خالتي فلانة قلتلو هيه نعرفها قالي راجلها توفى ربي يرحمو قالي راني ديت يما ورانا رحنا راكي تعرفي لازم نوقفو على الجنازة قلتلو ايه صحا معليش قالي انت ذوك يجي لعندك صالح روحي معاه لعند مريم قلتلو بصح راك غالق الباب قالي لالا خليتلو المفتاح راهو عندو المفتاح المهم كي توجدي روحك عيطيلو وروحي تقعدي عند مريم اليامات هذو حتى نجي قلتلو مكانش مشكل كوبيت عليه وروحت غسلت ولبست خملت شوي حوايج وعيطت لصالح قلتلو راني واجدة قالي معليش ختي ذوك شوي هكا نجي جا داني روحت عندو لدار لقيت حالة مريم متعجبش عيت نقولها وش بيكي وش صرا والو مبغاتش تقول قالتلي مكان والو وش حبيتي يكون راني تعبانة بنتي صغيرة والحمل عياني ثاني قلتلها وش حبيتي ديري اصبري وخلاص جوزنا هذيك الليلة لصباح فات عادي تغدينا غسلت هي لماعن من بعد قالتلي زينة معليش نخلي عندك  قطر الندى  قلتلها معليش خليها قاتلي شوفي خليها عندك والوقت الي نخلص راني نرجع انا رايحة نسويفي وهي ولات تعبني بزاف هي كي كانت تحكي حسيت بلي راهي مخبية حاجة قلتلها وش بيكي تعاودي فلهدرة هكا خلاص خلي بنتك عندي وروحي لطبيبة   قاتلي هيا صحا معليش هي راحت وانا حكمتلها بنتها من بعد جات قالتلي زينة علبالك قلتلها واش من بعد قالتلي لالا مكاين والو.
جبت عند مريم 5 أيام هشام يعيطلي كل يوم يسقسي عليا برك يقولي مشغول ومن صوتو يبان موش نورمال كي نسقسيه يقولي تاعب برك من السهرة والعباد يجو صح مرات نسمع عندو الحس مريم وصالح نحس مخبيين عليا حاجة يا درا واش هيا معليش تعيا وتبان واحد اليوم عيطلي قالي روحي للدار ضوك نجي داني صالح وصلني وراح درت ميناج للدار ودوشت ورجعت درت كليت تسطحت شوية حتى عيطلي جاي مع صالح قتلو معليه ستنيت شوية جاو سمعت لاصونات رحت فتحت لقيت صالح في وجهي بعد هو حتى نشوف هشام وراه ذراعو مربوط لكتفو راسو تاني مربوط وجهو قاع مجروح يا خاه واش بيه هذا بقيت غير داهشة فيه حتى قالي خلينا ندخلو راح نبقاو فالباب جبدت بجهة دخلو وغلقت الباب واش بيك واش صرالك هكا قالي والو درت أكسيدون  خفيفة برك قتلو بصحك نتا هذي أكسيدون خفيف وينتا درتها  وكتاه وكيفاش صرات  وش لحكاية هذي ياخي كنتو فالجنازة قالي لالا مكان لاجنازة لا والو اني كذبت عليك النهار هذاك كي رحت من عندك روحت لدار وصرا الي صرا محبش يحكي كعاد كاين صالح معانا من بعد قالو صالح ايا نخليكم شوي هكا ونرجع راح خرج من بعد قلتلو احكيلي وش صرا كيفاش صرا وليت نبكي قالي وعلاه راكي تبكي ذوك دعوتك وخرجت فيا نورمالمو تفرحي قلتلو ياخاه واش راك تهدر كيفاش هذي دعوتي خرجت فيك قلتلو صح انت أذيتني بصح منتمنلاكش الشر انا منيش انسانة حقودة قالي منيش نقولك بلي انت انسانة حقودة بصح ربي راهو يعاقب فيا على واش درت هذي هيا قولتلو صحا وكتاه صرات كيفاش صرات قالي هذاك النهار كي كنت عندك وروحت لدار لقيت ما سقسيتها اذا كانت عارفة بلي راكي اونسات قالتلي مكنتش عارفة بصح كنت شاكة فيها ونهار عرفة كي لقيتها فاطرة مهيش صايمة وقاتلي راني مريضة قلت امالا مكانش قلتلو امالا صدقتني بقى ساكت ملقاش كامل وش يهدر من بعد قالي صحا حاب نفهم حاجة انت وعلاه هربتي من الدار قلتلو كيفاش وعلاه هربت من الدار مازالك تسقسي فهاذ السؤال  ديجا انا مهربتش من الدار كذبت عليه قتلو كنت موجوعة بزاف ديجا ياك صالح جابني من السبيطار قالي كيفاش نتي ديتي كامل كواغطك حتى الذهب مصفياتو زعما خليتي واش شريت أنا ماعلابالكش بلي الهدية لا ترد قلتلو اصاك كنت مخملاتو من قبل هو لا فاليز ولي فرغ لافاليز متولهش للصاك قالي أنا لي فرغتها وصحا كي كنتي موجوعة معرفتيش تجي تنوضيني طرت فيه منك بالصح كيفاش انا نجي ليك لشمبرة ونطبطب عليك نلقاك راقد فوقها قالي ياطفلة وش بيك انا كنت راقد فالصالو مكنتش معاها كامل قلتلو مكانش علبالي قالي صحا كي مقدرتيش تجي ليا انا وعلاه مرحتيش لما تقوليلها قلتلو انت هبلت انا نقولك يماك من لول كان علبالها بلي انا راني اونسات ولوكان قلتلها هذاك الوقت تزيد تستشفى فيا وبلاك كشما ديرلي باش يروح البيبي وتتهنى على ضربة تحاوزني ديراكت من الدار قالي زينة استغفري مولاك وش راكي تهدري يما مهيش قتالة قلتلو بالنسبة ليا  راهي قتالة كعاد قتلتني انا.