زينة الهاشم 💝

الجزء 29

زينة الهاشم 💝
الجزء 29
إذا قلت بكيت نكذب خاطر هبطت الدم بدل دموع بصح من الصدمة مقدرت ندير حتى رد فعل هو باقي غير يعيط عليا زينة جاوبيني زينة احكي معايا زينة انا والله نحبك قتلو بلع فمك عليا ونوض رجعني لدارنا قالي زينة محال نرجعك وراح تبقاي معايا انا نموت بلا بيك قتلو.محال تموت بلا بيا قالي والله يا عمري فوق جهدي قتلو محابة نسمع منك والو خاطر نتا أكبر كذاب شفتو في حياتي قالي زينة انا رخيس انا خماج انا منسواش بصح والله ربي مني كذاب انا نحبك انا نعشقك بديت نعيط اسكت تكذب محال تحبني محال تعشقني خاطر لي يحب ميخونش قالي والله ما خنتك وهاهو قلبي افتحيه تلقاي فيه غير نتي قتلو ولي برا واش تسميها قالي والله سيفوها عليا قتلو وباه تبات معاها تاني سيفو عليك قالي ايه والله سيفو عليا ومقدرتش نتوشيها حتى تخيلتها نتي وجيست درت اللازم وخرجت متقزز من روحي وعيطتلك نطلب فالسماح منك عسى تطفى ناري وليت نعيط وناري أنا واش يطفيها وإذا هذي قاع ومخنتنيش واش تسميها كون خدعتني برا ومراحش نسامحك ما بالك جايبهالي لنص الدار واش تحوس مني نبقى نتفرج عليكم ولا نولي خديمة ليكم قالي حاشاك نتي لالاها وهي تخدمك قتلو ما تخدمني ما نخدمها يا ترجعني لدارنا يا نعيط لخويا يجي يديني وجبدت تيليفوني زرب نحاهولي وضربو على الحيط وبدى يعيط منا متخرجيش محال تروحي عليا يا ربك نحبك نتناك عليك انا كيفاه تروحي وتخليني قتلو محال نبقى معاك محال وراح نرجع لدارنا قالي علاه متفهميش يا ربك نحبك نتي هيا غير تحتمت عليا قتلو حياتك متهمنيش أنا نخرج من هنا ونتا دبر راسك واش دير قالي والله يا زينة وتروحي عليا نموت قتلو موت وشكون حاكمك أنا متهمنيش كنا للزوج نعيطو طبعت العجوز علينا الباب قاتلي في راسك ان شاء الله إذا تدعي على بني بالموت الله يجيبها فيك قتلها آمين يارب العالمين ونظن كانت ساعة استجابة ولى هو يعيط ما اسكتي واش تهدري نتي كون كاش مايصرا فيها نموت انا من وراها قتلو بركا متأمن في الكذبة هذي مكاش منها كون جيت نهمك محال تغدرني وتخدعني بهذي الطريقة بصح برافو عليكم عرفتو تلعبو عليا لدرجة محسيت بوالو ومشكيت في والو نتوما تستاهلو الاوسكار قالي يا زينة والله جات بلا حساب والله قتلو بلع علابالك راني نتقزز منك من كلامك في حياتي مشفت أقذر واوسخ منك البارح ولي قبلو ويامات الي فاتو كي كنت تعيطلي وتتغزل بيا وين كنت متقوليش برك معاها بقى غير ساكت قتلو اهدر علابالك كرهتك قلبي عافك خاطر  انا معيافة منقدرش لحاجة مستعملة نتقزز منها قاتلي لعجوز بلعي اعرفي واش تهدري يا قليلة الأصل قاللها ما اسكتي خليها تهدر لي حبتها قتلها معليش انا قليلة أصل بصح مدرتش واش درتي نتي يا بنت الأصل والفصل بصح نقولك حاجة حسبي الله ونعم الوكيل فيك دنيا وآخرة قالي زينة تعيشي إلا هذي قتلو علاه خاطر عارفة دعوة يتيمة ودعوة مظلومة مالا نقولها ونعاودها حسبي الله ونعم الوكيل..........زرب غلقلي فمي زينة لالا زينة تعيشي إلا هذي عضيتو وقتلو حسبي الله فيكم كامل وجيت خارجة لقيت لبنات ومعاهم هذيك الخامجة فالهول.
حنا هكاك ولى الباب يطبطب بالقاوي قالت زهيرة هذا عمي انا عيطتلو هبطت تجري تفتح وانا من وراها حابة غير نخرج بصح زرب حكمني هشام دخلو عمومو لزوج ومعاهم سعيد  وصالح لقاونا فالدروج هو حاكمني وانا نفارع فيه حابة نسلك روحي منو جبدني عمو الكبير من عندو وطلعني الفوق دخلنا للصالون الكبير ودخلو هوما كامل نطق وقال لهشام  هذي علاه جبتها ياك تزوجت قالو هشام اعمي علابالك بالحكاية أنا هذي مرتي ومحال نسمح فيها قتلو صاي نتا سمحت فيا وخلصت واش بقى قالي والله ماسمحت فيك قالو عمو الصغير ياك قلنالك اسكت وخلي خديجة علينا علاه تسرعت ودرت حاجة هكا نطقت لعجوز قاتلو واش دار ياك تزوج على سنة الله و الرسول مدارش حاجة حرام بغات تقعد على العين والراس محبتش الله يسهل عليها قاللها ما اسكتي تروح زينة نروح معاها قاتلو هذاك ماخص  راها ترضع فيك وقيلا عيط عمهم الكبير خلاص يا خديجة خربتي دار بنك ومزالك تهدري قاتلو علاه خربتها هاني جبتلو مرأة باه تعمرهالو وجيبلو ولاد عيط هشام قالها نحتاج ولاد من زينة وفرات رجع عمو يعيط انتوما دخلتو في علم الله هذي حاجة ربي هو لي يرزق يا خديجة اخزي الشيطان واستغفري ربي الطفلة صغيرة ويتيمة قتلو منيش يتيمة انا ليا ربي يجيبلي حقي تعيش يا عمي اديني لدارنا مش نتا قتلي أنا في عوض باباك ترضاها على بنتك ناض هشام يعيط منا مراكيش خارجة غير بعد جنازتي والله ربي منخليك تروحي ملقيت كان صالح جبدني ودارني تحت جناحو قالي انا نرجع ختي لدارهم طبعو هشام قالو ربك مرتي هذي وين راح تديها نتا بدى صالح ثاني يعيط روح تعطي يا الرخيس حسبتك راجل وعرفتك بيها محسبتكش ولد موك تمشيك من وذنيك تلاحو لبعضاهم هذا يضرب وهذا يضرب زربت خرجت للهول قلت لبنات تعيشو مدولي تيليفون مكاش لي حبت تمدلي وليت نبكي قتلهم خسارة عليكم حسبتكم خواتاتي قاتلي زينب والله غير نتي ختنا بصح ......مكملتش كلامها لقات ذيك الرخيسة مدتلي تليفونها جيت نشدو خطفاتهولي لعجوز ناضت زينب تعيط عليها يا الخامجة يا خرابة لبيوت يالي متحشميش دخل هشام يجري واش كاين قاتلو  زهيرة القحبة هذي  مدتلها التيليفون باه تعيط لخوها عطاها كف جابها مكسلة فالارض وقاللها والله ثلاثا تخرج زينة منا تخرجي وراها ولات العجوز  تعيط كيفاه الطفلة عروسة عندها يومين ترجعها لدارهم واش يهدرو عليها الناس دار عندي هاتي التيليفون هنا بقيت ساكتة لصق كامل فيا هاتي رب التيليفون ازينة متهبلينيش أنا غير ساكتة شاف ليديا لقاهم فارغين وزينب تقولو مهوش عندها وهو مهوش يسمع اطلاقا لاح يدو لصدري ولات العجوز تعيط راه عندي نحيتهولها خلاص جرني من يدي ودخلني لبيتنا قالي زينة نتي حبي اهداي ونحلوها صحا عمري متعيينيش وخرج غلق عليا الباب من برا.
  رحت للخزانة جبدت لافاليز الكبيرة لميت حوايجي وجبدت ساك شوية كبير درت ذهبي نحيت منو الباغوغ نتاع الفضة والباغوغ نتاع صداقي نحيت لاليونس رميتهملو مع حوايجو وذهبي الباقي درتو فالساك لي بابي نتاوعي الديبلوم ، كشوف النقاط ، باسبوري ، البارمي المهم كامل كواغطي درتهم في هذاك الساك  شفت مع حوايجي لقيت فيهم الدم تخلعت بقيت نفيريفي في روحي بصح منيش مجروحة مالا رخيس هذاك طاشاني نحيتهم وجبدت غوب دونتال قصيرة من القدام وطويلة من اللور لميت شعري كوشوفال والله منحزن عليه الرخيس لي باعني بالفول نبيعو بقشورو اصبر عليا برك طبطبت فالباب لقيتو فتح عليا طبعتو ورحت للدوش غسلت  وخرجت لقيتو هو العجوز واقفين يستناو فيا كملت طريقي للكوزينة شربت الماء وخرجت كملت طريقي جهة الدروج لقيت هشام جرا ليا شدني من يدي وين رايحة نحيتلو يدو وطلعت الفوق هو حسبني خارجة كي شافني طلعت الفوق تبعني لقاني قاعدة فالبالكون وضامة رجليا لصدري جا قابلني وقعد بقينا ساكتين للزوج وكل واحد فينا واش يخمم انا تخمامي كلو كيفاه ندير ونعيط لنجيب يجي يديني بقينا حتى ظلامت الحالة قالي هيا نهبطو مجاوبتوش هبط هو وانا تكسلت فالارض وضميت روحي حتى البكا مقدرتش نبكي مقدرتش حتى نخمم في حياتي ولا حتى كيفاش راح نبدا حياتي من جديد سمعتو طالع جا وحطلي سنيوة نتاع الماكلة طبعتهالو قتلو منتسممش وهبطت لقيت هذيك الرخيسة خارجة من بيتها (لي كانت بيت العجوز) كي شافتني ضحكت قتلها  بكل برود شوفي روحك وشوفيني ولا حاسبة روحك درتي انجاز راكي غالطة  ان شاء الله تشربي من نفس الكاس بصح علابالك انا هذاك الوقت منتشمتش فيك خاطر الشماتة من طبع الرخاس ورحت وخليتها بقات تعيط انا رخيسة يا وحد الخامجة سمعتو عيط عليها بلعي رب فمك هذي لالاك دخلت لبيتي وخليتهم ياكلو بعضاهم لكان حبو مهمنيش فيهم تسطحت على الفراش شوية ودخل عندي هشام درت روحي راقدة قالي علابالي فيك نايضة زينة تعيشيلي اصبري غير نكمل البنيان ونطلعو الفوق والله ثلاث منسمعو بيهم ولا نحوسو عليهم قتلو في قلبي احلم كان حكمتني هنا راني يهودية بقيت فالفراش حتى رقدت جابتني الفطنة على وجاعة تقتل نسيت كامل روحي ونسيت لي في كرشي يا ربي وميكون صرالو والو نضت بالزربة للتوالات لقيت شوية دم حكمتني الرجفة شحال خفت رجعت دخلت وبدلت وبقيت نتلوى في بلاصتي معلاباليش شحال الساعة وواش ندير نروح نوض هشام مستحيل جامي نديرها كيفاه نطبطب عليه وهو معاها نروح للعجوز علابالي متديهاش فيا بالعكس مذابيها كاش ما يصرالي وتتهنى مني انا هكاك لقيت هشام دخل غطيت راسي جا نحى عليا الغطا لقاني نبكي قالي يا عمري مزالك غير قاتلة روحك بغيت نقولو متوجعة بصح ممبعد خفت وتراجعت كون يديني للطبيب ويعرفني بالحمل والله ميخليني نخرج منا مالا الحل الوحيد نصبر ونخمم كيفاه نهرب ، بقى معايا شحال فالبيت حتى سمعت الاذان هو ناض يتوضى قلت هذي فرصتي ستنيتو خرج وزربت لبست هزيت الفاليزة حسيتها  خفيفة فتحتها لقيتها فارغة زربت فتحت الساك لقيتو كيما خملتو هزيتو وهزيت صباطي في يدي خرجت من بيتي شفت منا ومنا مكان والو ونعطيها بجرية فتحت الباب نتاع برا وخرجت وأخيرا الحرية بربي منعاود نرجع لهاذ الدار .