زينة الهاشم 💝

الجزء 28

زينة الهاشم 💝
الجزء 28
نضت تقهويت حكيت لصليحة كلشي قاتلي شفتي قتلك غير من الزعاف وهشام مزالو يحبك كيما زمان وزاد ضوك راح تكوني ام وليدو ولا بنتو والله ميسمح فيك حقا وينتا يجي يديك قتلها قال ليماه الخميس نجيبها قاتلي أيا مليح روبوزي هذو يامات وانهار الاربعاء نروحو للحمام والحفافة الخميس كي يجي يلقاك عروسة لازم وكي تروحي حنونتي وجديلو سهرة بالطبع وخبريه بلي راكي بالحمل وعاودي حاولي معاه باه يكمل البنيان قتلها والله مشكيت يا صليحة خايفة يقولي ايه ممبعد يدور عليا كيما المرة لي فاتت قاتلي متخافيش هذي المرة فيها هدرة الرجال قتلها كيفاه قاتلي شوفي راني حكيت لنجيب قتلها كيفاه قلتيلو نخاف ميخلينيش نرجع معاه قاتلي اصبري انا قتلو بلي راكم مدابزين وبلي هو عيط عليك قدام ماليه وخسر معاك الكلام والسبب انو هو وعدك باه يبنيلك وكي مقبلتش يماه دار عليك مالا نتي زعفتي وزدت حصلت فالوحم هكا باه ميخممش قاع بلي راكي غالطة وكي يجي نجيب راح يهدر معاه في هذا الموضوع بصح ردي بالك نتي تسكتي بقاي غير تزني عليه ولي ديرها العجوز صح اسكتي وخليها بصح غير يدخل خبري عليها قبل ما هي تحكيلو وتزيد من عندها صحا قتلها اوكي ، على الغدا سقساني نجيب على هشام حكيتلو واش فهمتني صليحة قالي خلي كي يجي نتفاهم معاه مع العشية عيطت لمريم  لقيتها مهيش قاع مليحة قتلها حتى أنا منيش مليحة مع هشام وكنت ناوية نبقى في دارنا غير كي لقيت روحي بالحمل ملقيت واش ندير قاتلي زينة احلفي قتلها والله بالحمل قاتلي مالا غير اقعدي في داركم ومجيش قتلها علاه ولات تبكي قاتلي والو بصح هكا تريحي خير من هنا  قتلها منعرف راه قالي الخميس نجي نديك قاتلي ان شاء الله  وكوبينا فالليل عيطلي هشام هزيت عليه بقى كيما البارح غير يتغزل بيا نحبك ونعشقك ونتي عندي كلشي وغير نتي لي في قلبي وغير نتي لي مالية عيني ونحبك موت انا نسمع ونبكي حتى سمعت يماه قاتلو واش راك دير هنا قاللها واش ندير نهدر مع مرتي لي حرمتيني منها كوبا وأنا درت حالة بالنواح بالسيف لا رقدت ،فطنت بصليحة تنوض فيا زينة هشام هنا نوضي خلعت شحال الساعة قاتلي السبعة قتلها واش بيه هذا واش جابو ضرك قاتلي معلاباليش المهم راه مع نجيب نوضي روحي ليه غسلت وبدلت حوايجي ورحت ليهم للصالون  سلمت عليه سافا لاباس راكي مليحة قتلو سافا الحمد لله حطتلنا صليحة قهوة تقهوينا كامل في رحبة ممبعد قالي هشام إذا كملتي البسي نروحو قالو نجيب كاين هدرة نهدروها ممبعد نشوفو إذا تروح زينة معاك ولالا هشام ريقو نشف بقى غير يشوف معايا.
قال هشام غير الخير نجيب واش كاين قالو شوف نتا إذا خير ولالا علابالك بلي زينة بنتي مهيش ختي تحملت مسؤوليتها وانا عندي 15 عام نحبها أكثر من اولادي ولي يوصلها معناه وصلني  قالو هشام حاشا كيفاه نوصلك قالو مالا كيفاه تعيط عليها وزاد مبهدلها قدام داركم قايللها كلام مش مليح تقبلها نتا على روحك ولا على ختك تنهان  قدام الناس بقى هشام غير ساكت زاد قالو نجيب نهار جيت خطبتها حنا مشرطناش عليك دار وحدك علابالي وحيد يماك بصح كي وصلت وعدتها بدار معناها كون قد الوعد نتاعك قالو من هذي الناحية تهنى يا ربي شهر نكمل البنيان ونديرلها دارها انا من أول كنت نسمع وساكتة غير دموعي يطيحو بصح كي سمعتو قال بلي راح يكمل البنيان فرحت بزاف كمل نجيب الهدرة قالو هذي المرة مراحش ندخل نخليها بينكم بصح تعاود تغلط يا هشام متفوتلكش على خير وصح كان عند كلمتو شاف ليا قالي زينة ترجعي مع راجلك ولالا واحد مراح يسيف عليك هشام مصدوم يستنى غير فيا نهدر قتلو هذي المرة نسامحو بصح كون يعاود يغلط يخلصها قالي نجيب تأكدي كون يعاود يغلط معاك نخليه يحلم بظلك هشام مش كيما عوايدو غير ساكت منيش عارفة صح معترف بغلطو منعرف عندو حسابات أخرين ، رحت لبست وصليحة معايا غير توصي وتعاود ،خرجنا من دارنا غير ساكتين حتى ناصفنا الطريق قالي هشام زينة والله نحبك ومهما نغلط اعرفي تحتمت عليا فوق يدي بليز متسمحيش فيا وراح نفهمك كلشي وكيما قلت لنجيب والله بالاك غير 15 يوم نكمل البنيان ونطلعو الفوق واحد ميدخل فيك واحد ميديرونجيك المهم نتي بقاي معايا ولي حبيتيها ديريها سبيني تحبي حتى تضربيني منقولش لالا تبسمت على جهة حبيت نستفزو قتلو هذي المرة مخبرتش عليك مليح وراك سمعت نجيب كون تعاود تغلط تهز يدك عليا والله نخبرو عليك ونتا دبر راسك قالي زينة انا نحبك ونتي تحبيني بليز متدخليهمش بيناتنا ووعد راجل لي تطلبيها نديرها المهم بقاي معايا علابالي مهيش حاجة ساهلة بصح والله ربي انا نموت عليك غير نتي قتلو واش بيك قالي غير ابقاي معايا ومتسمحيش فيا قلتلو حاساتك مخبي عليا حاجة تلبك قالي لالا برك كثرو المشاكل وخايفك تكرهيني قتلو إذا نتا مسمحتش فيا ومخليتنيش أنا محال نخليك جبدلي يدي باسني من الكف قالي ربي يخليك ليا عمري والله غير جامي نسمح فيك إلا إذا داتني الموت قتلو بعيد الشر عليك  وصلنا لدارهم نزلنا كي كنا طالعين مع الدرج حصرني مع الحيط باسني من فمي مع الاول جبدت روحي منو ممبعد تفاعلت معاه قالي حبي انا نتاعك وحدك واقسم بربي قلبي فيه غير نتي ونحبك تأمني هدرتي أنا والباقي خطيك منهم خاطر ميحبوناش وميحبولناش الخير اوكي عمري هزيتلو راسي عاود باسني وكملنا دخلنا.
مع دخلنا لاقاتنا بنت زينب تسنيم ولات تعيط خالو هشام جا هو وطاطا زينة وتلاحت لينا تبوس فينا حتى شفتهم كامل خرجو للهول يشوفو معايا داهشين نطقت العجوز قاتلو رحت جبتها كيفاه جبتها قاللها ما مرتي وجبتها وين المشكل لحقت عندها سلمت عليها جبدني هشام من يدي زينة هيا لبيتنا قتلو اصبر نسلم على لبنات قالي هيا معايا قبل ممبعد وسلمي عليهم قتلو واش بيك اصبر حتى شفت واحدة خارجة من بيت لعجوز شعرها بلي ماش صفر هيا الله يبارك سمينة ومعمرة قالت لهشام يا جيت قتلهم شكون هذي بقاو ساكتين كامل عاودت سقسيتهم شكون هذي معرفتهاش نطقت ليا قاتلي أنا مرتو بقيت نشوف معاها ونضحك جبدني هشام من يدي ودخلني لبيتنا قتلو والله شكون هذيك قالي بنت خالي قتلو وبنت خالك واش دير هنا بقى ساكت عيطت واش دير هذي هنا قالي تزوجتها من الصدمة مقدرتش نهدر بقيت نشوف معاه ونحاول نفهم واش يهدر قالي تزوجتها وهي قاتلي أنا مرتو يعني صح منيش نتخيل ولا هبلت وهو يقولي فيها عادي بكل برود تزوجتها انا نخمم كيفاه نخبرو بحملي لي شحال وحنا نستناو فيه وهو تزوج علاه وين راه حبو لكبير لي ديما يهدر عليه وين راهم كلمات الغزل لي نهار كامل وهو يتغنى بيهم وين راهم كلماتو لي يوم يديرني تحتو يولي يعيط للي خلقو باسمي وين راهم كلماتو بلي غير أنا لي يسخف ويسخن عليا ومن غيري واحدة مراح تبردو ولا راح يرتاح معاها انا رحت 4 أيام لدارنا جيت لقيتو تزوج وينتا تزوج وكيفاه تزوج معناها الواد كان يجري من تحتي وانا لاخبر.