حكٍم طغى ماعاد ينفع نظامه

Part 1

من قبل ١٥ سنه في المنطقة الوسطى من المملكة وقف وراح يسكر بوابة البيت معلن انتهاء ايام العزاء الثلاثه
الجد مقبل : سكرت البوابه يا عزيز ؟
عبدالعزيز ابو ١٣ سنه : اي سكرتها ياجدي
الجد مقبل : اجل ناد اخوك يعاونك و شيلو الدلال و القدوع ودخلوها خلهم يغسلونها
عبدالعزيز: على خشمي
هز الجد مقبل راسه بهدوء و فجاءه سمع صراخ من جهة الحريم فز وراح لجهتهم وهو يشوف ام عبدالعزيز تصارخ و تلم اغراضها و تبكي : استهدي بالله يا بنيتي وش بلاتس ؟
ام عبدالعزيز ببكاء : والله ما اقعد في ذا البيت ولا دقيقه باخذ عيالي و اروح
الجده منيره بأسى على حال بنتها اللي انقلب : يابنيتي وين بتروحين وانتي في ذمتس ٧ عيال وشلون بتصرفين عليهم ؟
ام عبدالعزيز: مايهم اهم شيء اني اخذ عيالي و اطلع من هذي المدينه ولا يلحقون عيالي بابوهم
الجده منيره : يابنت وش ذا الكلام اللي ...
قاطعت كلامها ام عبدالعزيز وهي تقول بترجي :تكفون لا تحاولون توقفون بطريقي و خلوني اخذ عيالي و اروح ولا مارح ارتاح هنا
الجد مقبل وهو يشوف كيف بنته تكلمهم و هي ترجف و تبكي : ابشري مارح يصير الا اللي يرضيتس و انا وامتس نروح معتس بعد ويلا انتي يا منيره جهزي اغراضتس وعاوني بنتتس على اغراض ورعنتها
فزت آم عبدالعزيز من مكانها وهي تحضن ابوها و تسلم على راسه : الله لايخليني منك ولا من امي
و طبعًا لموا اغراضهم و طلعوا من المدينه وراحوا لديرة نجد العذيه و اشتروا لهم بيتين جمب ببعض وبينهم جدار وعلى هذا الجدار في باب عشان يكونون قريبين من بنتهم و عيالها ياخذون راحتهم
_____________
وفي الوقت الحالي
في الديره على حدود الساعة ٨ الصباح العيال كانوا نايمين باستثناء عزيز اللي كان عليه الدور انه هو اللي يفتح المحل وبعدها يجون العيال مع جدهم
وكان نواف و فيصل بسابع نومه و فجاءه بدون سابق انذار الا مستقبلتهم مويه على وجيهم رفعوا راسهم الا يشوفون امهم واقفه و بيدها اللي حق المويه ومعصبه : قوموا يا الدشير الليل يالله تنامونه و الصبح ما تعرفون تقومونه
نواف وهو يناظر امه بعين مسكره وعين مفتوحه : يالله صباح خير يا يمه وش هالروقان من الفجر
ام عبدالعزيز: قيلت القايله وانت تقول فجر بروح اشوف السملق اللي هناك وبرجع عساني ما القاكم قايمين و متزهبين والله لتعلم العصا على ظهوركم
رجعوا ينسدحون العيال وفجاءه صرخت امهم : تسمعوني انتم ولا لا
فيصل : خلاص قمنا قمنا
راحت ام عبدالعزيز تشوف البنات وش زهبوا دخلت عليهم وهي تشوفهم ناسين الطبخ و ندى متربعه على الطاوله و تسولف عليهم : ياربي انا القاها من الحمير اللي هناك ولا انتم الفطور احترق وهذي تهذري على راسكم
ندى : افا يمه هذا وانا ابي اوسع صدورهم
ام عبدالعزيز : صدورهم وسيعه دون سوالفتس بروح عند امي و الفطور خمس دقائق و انتم منزلينه ولا والله ما يصير خير و نادوا اخوانكم معكم
كلهم : ابشري
و طاروا كلهم كل وحده ماسكه لها شغله لانهم دارين انه اذا ما نزل الفطور بعد خمس دقائق بينغسل شراعهم
وتجمعوا في بيت الجده منيره 
الجد مقبل : وراتس يا ام عبدالعزيز صوتتس طالع مع هالصبح
ام عبدالعزيز: شسوي هالعيال جننوني ما يفهمون
الجد مقبل مسك عصاته و ضربها على رجول نواف و فيصل : انتم وراكم مطلعين قرون امكم بدال ما تعقلون و تعاونونها
فيصل باستعطاف : والله يا جدي ما يحتاج نسوي شيء امي على اي شيء تعصب
ام عبدالعزيز: انا بنت ابوي بنته وش قصدك يعني ادور الزله عليك ؟
فز فيصل من مكانه وهو يروح يبوسه راسها : ابد يا طويلة العمر نعتذر منتس وهذي بوسه على راستس
الجد مقبل : يلا يا عيال ابطينا على عزيز وانت يا فيصل روح للعزبه وضبط امورها
ام عبدالعزيز: اي يا فيصل رح و جب لنا ذبيحه من هناك عشان خوالك بيجون اليوم
فيصل : لا تكفون تكفى يا جدي خذني للمحل معك ما ابي العزبه بعدين انا ما اعرف لها مره خل نواف يروح وهو يعرف يختار الذبيحه الزينه و يذبحها مره وحده
نواف قام من مكانه : خلاص ياورع رح للمحل و انا اروح للعزبه لا تصيح علينا
فزت ندى من مكانها : نواف بروح معك بشوف جنهام ( الخيل حقهم )
ام عبدالعزيز: انثبري بمكانتس ياحبتس للدوجه بيجونا ناس لازم ننظف
ندى بترجي : تكفين يمه عندتس ريم و نوف يكفون تكفين بخاطري الروحه مره مشتاقه له
الجده منيره : خليها تروح يا اماني ( اسم امهم ) روحي وانتبهي لعمرتس وانت يا نواف انتبه لاختك
نواف بضحك : هذي اخت نواف ماعليها خوف هذي تخوف ما تخاف
ندى بفخر : نعم هذي انا
ضحكوا كلهم على ندى وهي اللي معطي البيت لون مع سوالفها و هبالها و تفرقوا وكل واحد راح لشغله
_____________
طلعوا مع الجد وبنفس الوقت طلع ابو تميم و عياله من البيت و بيتهم اصلاً جمب بيت ام عبدالعزيز بينهم جدار بس
ابو تميم : يالله صباح خير على المسلمين غريبه ما اشوف شيطانكم معكم
الجد مقبل : اقضب لسانك يا ابو تميم دام النفس راضيه عنك
طلع نواف ينتظر ندى تخلص و وقف على بوابة البيت و يناظرهم
ابو تميم : اطريت الكلب ولَّم العصا
ماجد : يبه وش هالكلام
تميم : اسكت انت
نواف وهو يناظرهم من بعيد : رح يا ابو تميم الله يستر عليك الناس تصبح بالخير وانت بالشر اعوذ بالله
تميم : اعوذ بالله منك انت اقضب لسانك وانت تكلم ابوي
نواف بغضب : اقضب ابوك اللي متفلت على الناس من صباح الله
جت ندى وركبت السياره وركب نواف عشان اخته ما تحضر الموقف وهو راكب غمز له ماجد انه بيقابله قدام
وراح له نزل نواف يوم شافه : ياولد لاتزعل من ابوي هو هالايام مدري وش بلاه
نواف وهو وده يقول انه ابوك مو هالمره وبس اللي يتعرض لهم فيها بس سكت عشان صديقه : ولا تشيل بخاطرك معليك الامور بسيطه
_____________
ومشى الجد مقبل و فيصل وهم يستغفرون من الجار ابو تميم وهو يوم جوا للديره كان يعاملهم زين بعدين فجاءه  صار يكرهم و ما يحبهم وهم ماسوو له شيء ويكره نواف ولا يدرون ليه يكرهه هو بالذات
وصلوا للمحل واستقبلهم عزيز : لا كان نمتوا ترا عادي لو ماجيتوا بعد
فيصل وهو يعلم عزيز كل اللي صار : راحت علينا نومه و قابلنا ابو تميم عند الباب ... وكمل له الي صار : وانت تعرف ابو تميم اذا شافنا وش يقول
عزيز: ياليل ذا الشايب مدري وش قلبه علينا
الجد مقبل : خلاص اتركوا الناس و التفتوا لشغلكم
وخلصوا اشغالهم ورجعوا للبيت
____________
دخلوا البيت وكان هدوء الجد مقبل : شكل نواف مارجع
فيصل : اي اتوقع لان ندوه مالها حس لو انها هنا كان تسمعون صياحها
وسكتوا على دخول نواف و ندى
الجد مقبل : ها ذبحت الذبيحه ؟
نواف : اي ذبحتها و ضبطتها و رتبناها انا و ندى في اكياس
الجد مقبل : الله يعطيكم العافية
نواف و ندى : الله يعافيك
____________
وبعد الظهر وصلوا الخال عبدالرحمن و الخالة الهنوف
وبدأت مراسم السلام و مزح العيال و صراخ البنات اذا شافوا بعض وجلسوا في الحوش بين شبة النار و ريحة القهوة وكان نواف يصبها للرجال و ندى للحريم وكانوا كلهم بجلسه وحده بس عليهم جلالاتهم و السوالف وسعة الصدر مخيمه عليهم نايف شاف نواف ماسك الدله و وقف وحب انه يساعده وقام راح بياخذها منه : هاتها عنك انا اصبها
نواف : لا يارجال اجلس انا اصبها انت ضيف وغمز له يجلس
نايف : وش ضيفه عيب عليك هاتها وسحبها لجهته
نواف بطفش : ابك ياولد وش بلاك انثبر وخلني اصبها
الجد مقبل : انا بس اتحرى القهوه تنكب عشان اشوف شغلي معكم وانت يا نايف انثبر مكانك
وقعد نواف يسحبها لجهته و نايف يسحبها له و بدون سابق انذار انكبت القهوه على رجل الجد مقبل ويد نواف ورفع راسه نواف يناظر نايف وهو داري انه الجد مقبل بيفصل عليهم : انحش
وركضوا كل واحد راح بجهه نايف فتح الباب وانحاش
و نواف من الخوف شقح جدار بيت ابو تميم وهو مو حاس على نفسه من الخوف
.
.
( انتهى )
اتمنى انه البارت نال اعجابكم 💕
اكتبوا لي اراءكم حول البارت بالكومنت 🫶🏻
#حكمٍ_طغى_ماعاد_ينفع_نظامه