حكٍم طغى ماعاد ينفع نظامه

Part 3

طلع نواف الاغراض لابو محمد بعد ما وقع على اوراق الاستلام وهو ماصدق على الله انه سلمه الاغراض وراح قفل المحل عليه ودخل لمستودع المحل وطلع المفرش الصغير اللي في المستودع و طلعه برا و فرشه ورفع على المكيف ونام وهو اصلاً دايم يسويها ولا مره قفطه الجد لان فيصل و عزيز يدقون عليه اول ما يقومون
_________•
قاموا العيال على الفطور و اليوم كان العرس فلازم يروحون يعاونونهم في مخيم الرجال
الجد مقبل : عزيز وانا ابوك
عزيز : سم
الجد مقبل : اخذ معك خالك وفارس و تركي للمخيم عاونوهم والله الله ابيكم تبيضون وجهي
عزيز : ابشر
نايف : وانا يا جدي اروح معهم ؟
الجد مقبل : انت انطق عندي اخاف تلزم على احد و تروح تكب القهوة على المعرس
ضحكوا عليه العيال
نايف : مقبوله منك
ابو نايف : وانت يبه وين بتروح ؟
الجد مقبل : بروح لنواف حتى تاخرنا عليه باخذ فيصل و نايف معي و برسل نواف يكون هنا ينام له شوي عشان في العرس يكون مصحصح الكلب ما نام امس زين من الضحك اللي ماله سنع
عزيز بهمس لفيصل : دق على اخوك خله يقوم و يشيل المفارش و يفتح المحل قبل ما يجي جدي
فيصل : اي صح بغيت انساه
دق فيصل على نواف بس ما كان يرد عليه و الجد مقبل طلع قبل فيصل وقاله يلحقه اذا خلص فطور
___________•
في المحل عند نواف كان نايم ولا حس بشيء لان جواله خلص شحنه و لا فيه اصوات مره في السوق لان الكل تقريباً رايحين يعاونون في العرس
وصل الجد مقبل و استغرب انه المحل مسكر المفروض يكون مفتوح و نواف فيه و شاف ابو عباس راعي البقاله واقف عند بقالته : يا ابو عباس ما شفت نواف ؟
ابو عباس : لا ماشفته
الجد مقبل بداخله اجل شكله رجع البيت ولا صادفته رجع للبيت وهو ينادي : نواف يا نواف
ابو نايف : وش فيك يبه وش مرجعك و نواف وينه ؟
الجد مقبل : انا ادري عنه مالقيته المحل مسكر فاتوقع انه رجع للبيت رح انت للمخيم وناد لي نايف
جاء نايف : سم ياجدي
الجد مقبل : ماشفت نواف جاء هنا ؟
نايف : لا ما شفته اكيد انه في المحل
الجد مقبل بعصبيه خفيفه : لا مو في المحل انا توني راجع ما لقيته رح دوره يمكن انه نام في المجلس او نام داخل جب لي مفتاح المحل منه
راح نايف للمجلس ودخل لقى فراشين تحتها احد رفعها لقى في واحد نايم فيصل و الثاني نايم تركي خلاهم نايمين بعدين راح عند باب المطبخ : ولد فيه احد ؟
الخاله الهنوف : اي فيه من انت يا يمه
نايف : انا نايف
ام نايف : ادخل تغطوا البنات
دخل نايف للمطبخ : ياخاله ماشفتي ولدتس؟
ام عبدالعزيز : ولدي من ؟
نايف : ولدتس نواف جدي يدوره يقول شف يمكن نام داخل
ام عبدالعزيز بقلق : ليه هو مارح الفجر يفتح المحل اكيد انه هناك
نايف : لا جدي توه جاي من المحل مقفل واكيد نواف رجع
ام عبدالعزيز : قومي يا نوف روحي دوري اخوتس داخل
راحت نوف دورته و ما لقته : ما لقيته يمه
ام عبدالعزيز : ياويلي وين راح الولد
نايف : هدي يا خاله يمكن انه راح للمخيم الحين بروح اشوف
ام عبدالعزيز بقلق : رح شف وتعال قولي
طلع نايف بعد ما بلغ الجد مقبل انه مالقى نواف و رجعوا للمحل و لقوا فيصل قاعد يطق بابه : تطق على من انت يا الدلخ
فيصل عرف انه خلاص ماعاد فيه مخرج : اطق على نواف
و ما امدا الجد يرد عليه الا ونواف يفتح باب المحل و هو مكشر عينه و عليه سروال و فنيله وواضح عليه ان توه قايم
•_________
في بيت ابو تميم
كانوا متجمعين على سفرة الفطور وكان ابو تميم يطالع عياله اللي كان قد مايقدر ما يحسسهم بفراق امهم وكان راحم اديم بعد كلامها امس و انهم ينسونها أحيانًا وهو عشان كذا سمح لها تروح تحضر العرس في بيت ام عبدالعزيز : اديم وانا ابوتس وراتس ما تجهزتي مارح تروحين العرس ؟
اديم بضحك : الا بروح بس انتظركم تخلصون عشان اذا بديت اتجهز محد يناديني و يخرب علي
ماجد : ما يحتاج تتجهزين من الحين اقولتس بتطلعين احلا وحده بالعرس ابصم لتس بالعشره
ابو تميم : اهم شيء خلي هبالتس عنتس والرقص شوي شوي فيه مو تجيني متكسره انا ابي بنتي مثل ما وديتها
اديم : ابشر يا ابو اديم
تميم : هييه ابو تميم لا تسرقين حقوقي
ابو تميم : يلا طلعنا للمخيم وانتي يا اديم طلعي المجاند و جهزي اغراضنا عشان اذا جينا ما نحوستس
اديم وهي تأشر على خشمها : ابشر على ذا الخشم
ابو تميم : عليه الشحم
طلع ابو تميم و العيال و اديم شالت الفطور ودخلته وغسلت مواعين الفطور بعدين راحت تطلع اغراض ابوها واخوانها و تكوي اللي يحتاج ينكوي بعدين راحت تجهز نفسها
_________•
في المحل
الجد مقبل بعصبيه : ايا التسلب انت نايم هنا و انا افتر مخي و انا ادورك
نواف من قوة النوم اللي فيه ما كان حاس انه في المحل : يالله يا يجدي ياخي ليه ما تخلي الواحد ينام
الجد مقبل : نومة اهل الكهف ان شاءالله وانا اللي راحمك و كنت بخليك ترجع تنخمد لين الظهر طلعت كل ماجاء دورك في المحل نمت وانا احسبك تشتغل سلمت الطلبيه لابو محمد ولا سحبت عليه !!؟
نواف استوعب انه في المحل وانه الجد مقبل عرف اذا راح بدري ما يفتح المحل بالعكس يسحب عليه و ينام : اي سلمت بعدين شفت السوق هادي و مافيه احد طلعت هذا الفراش من المستودع ونمت
الجد مقبل ما صدقه بس مشى الموضوع لانه مو فاضي له : قم طس للبيت واقعد عند الحريم اذا احتاجوا شيء تجيبه لهم او توديهم اذا بغوا
نواف : ابشر
الجد مقبل : ورح لامك اللي اختبص قلبها عليك
راح نواف يجمع اغراضه و لبس ثوبه وطلع من المحل
_____________•
في بيت ام عبدالعزيز
وصل نواف للبيت وراح داخل يدور امه عشان يطمنها : يا يمه وينتس
ام عبدالعزيز: تعال انا هنا
دخل نواف بعد ما سلم بصوت جهوري : السلام عليكم
ام عبدالعزيز بعصبيه : وينك انت من صباح الله ندورك
نواف : كنت في المحل وشفت انه ما فيه احد في السوق قفلت المحل علي و نمت
ام عبدالعزيز : وتقولها بأريحيه نمت ماقلت وراك اهل يدورونك يخافون عليك
نواف بضحك وهو يمسك خدود امه : والله وطلعتي يا ام عبدالعزيز تخافين علي الانسان لازم يسوي احياناً مثل هذي الحركات عشان يشوف قدره عندكم
الخاله الهنوف : وانت تعرف يا نواف قدرك عندنا
نواف : اي والله ادري
ام نايف : لاعاد تسوي هالحركات امك بغى يوقف قلبها الحمدلله انه عمتي ما درت ولا كان انجنت
نواف بتسليك : اي اي أن شاءالله المهم تبون مني شيء ترا بروح للمخيم مو بعدين تنادون
عطوا نواف الاغراض اللي يبونها وراح جابها بعدين راح للمخيم
________•
في المخيم الاحتفالات و الرقص ما وقفت من بعد صلاة العصر وكانوا اهل الديره كلهم هناك و الشباب ما وقفوا رقص و الشياب متركين على معكازهم و يصفقون وكلهم شاركوا ابو خالد الفرحه وكانت اول مره يتقابل ابو تميم مع عائلة ام عبدالعزيز ولا يصير بينهم هوشه من بعد خلافهم واذن المغرب وراحوا كلهم للمسجد عشان يصلون بعدها كل واحد راح لبيته عشان يتجهزون بعدين يرجعون للمخيم و ابتدت المصارعات على الحمام و على الاغراض اللي يسأل وين عقالي والثاني سروالي وينه والثالث مالقيت الكبك حقي وعلى هالحال لين دخلت عليهم ام عبدالعزيز بالخيزرانه : والله والي رفع السماء ان سمعت صوت و صراخ يا ويلكم وش ذا ما امداكم تجون الا وصجيتوا البيت عزيز انت وش تبي وش تدور
عزيز : انتظر تركي يطلع من الحمام حشى لو انه نايم فيه
ام عبدالعزيز : تركي لو ما تطلع الحين ما يصير علمٍ طيب وانت يا نايفوه وش تبي
نايف : ابي سروالي شوفي نواف ماخذه
نواف : ابك انت حمار شف هذا سروال من محلات الديره بعدين السروال طويل وانت قصير يعني ما يجي عليك غبي انت
نايف : مالي دخل طلع سروالي
فيصل : اظن انه هذا سروال يا نايف شفه مع اغراض اخوك
ام عبدالعزيز : وانت يا نواف وراك تصارخ ؟
نواف : يمه نادي بنتس ندوه انا كنت معطيها اغراضي ما ادري وين حطت كبكي
آم عبدالعزيز: ندى مع جدك تساعده هي حطت كل الاغراض هنا دور منا مناك تلقاه بروح وعساني اسمع صوت من احد
فيصل بصراخ : ماشاءلله حليتي مشاكلهم ولا حليتي مشكلتي تلوموني يوم اقول لكم اني مضطهد
ام عبدالعزيز وهي صبرها بدا ينفذ : اخلص يا المضطهد وش عندك ؟
فيصل : معطيني عقال صغير تشوفونه يدخل راسي
نايف : اي من كبر راسك انت جسمك ما يكبر راسك اللي يكبر
راحت ام عبدالعزيز وجابت له العقال ثم طلعت من عندهم وهم صاروا يتجهزون بس هالمره بهدوء
_________•
عند البنات
كل وحده ماسكه شيء وحده اللي تمكيج و الثانيه تسوي الشعر و الثالثه تحط المناكير
وكانت اللي تسوي الشعر ندى ماسكه منشفه و الكوايه حقت الملابس ( سراميك الطيبين ) وكانت تسوي شعر جمانه و كان شعرها مو ذاك الطول كان لحد كتوفها وكانت ما تقدر تقعد و تخلي ندى تسويها بهدوء لازم تتحرك ولازم اذا تحركت تاكلها لسعه من الكوايه دخلت الخاله الهنوف تشوفهم اذا ناقصهم شيء ولا لا وجايبه معها اكل عشان ياكلون لان في العزايم الواحد ما ياكل زين فياكلون قبل العزيمه و يشبعون بطونهم : جبت لكم فطائر مسويتها امي من يبي
فزت جمانه من محلها ونست الكوايه و نست اصلاً انها قاعده تسوي شعرها : انا انا اب...ولا امداها تكمل كلامها الا حست باللسعه على رقبتها من ورا : اااااه رقبتي
ندى بعصبيه : انا كم مره قلت لتس انطقي بمكانتس يعني هذي اللسعه كم اللي لسعتتس اياها
جمانه : ااااه خلاص مارح اكمل تلسعت لين قلت بس
ندى : لو انتي منثبره بمكانتس كان ما تلسعتي
دخلت عليهم ام عبدالعزيز وهي شوي و ينفجر راسها من الصراخ : ياربي انا القاها منكم ولا من اللي هناك وراكم تصارخون انتم بعد
جمانه : عمتي خلاص انا مارح اكمل اسوي شعري بنتتس بس تحرقني
ام عبدالعزيز : بتخلين شعرتس كذا نص لاحسته صخله ونص كانتس ام السعف و الليف
جمانه : مشكوره على السبه يا اخت ابوي
ندى : اصلاً انا طفشت مارح اسويه لها بس تتحرك وانا حتى شوشتي ما سويتها
نجلاء : خلاص تعالي يا جمانه امكيجتس لين ما تخلص ندى شعرها بعدين تكمله لك
وراحت كل وحده تسوي شكلها و اخيراً جمانه قدرت تكمل شعرها بعد ما حلفت ندى انها ماتسويه وجت ريم تسويه لها وخلصتها ولبسوا وبدوا عاد يشرفون على البيت
___________•
في بيت ابو تميم
كانوا اهدى من بيت ام عبدالعزيز و كانت اديم مجهزه اغراض اخوانها في غرفتهم و اغراض ابوها في غرفته فعلى طول حصلوا اغراضهم ولا صار ازعاج وخلصت نفسها وراحت شغلت بخور وراحت تبخر ابوها و اخوانها : يا جعلني ما عدمكم
ماجد : له له له اديموه وش هالجمال ما قلت لتس انتس بتغطين عليهم
تميم : لا ورايحه لهم بالبحري بتاخذينهم بالموج رايح جاي
كان لبس اديم فستان ازرق وكان الصدر مفتوح شوي بس انها لافه طرحتها عليه عشان اخوانها
اديم : وانت يا ابو اديم مارح تقول شيء ؟
ابو تميم : ما يحتاج اقولتس شيء اخوانتس ما قصروا
بخرتهم  وطلعوا كلهم وصلوها لبيت ام عبدالعزيز وراحوا مع انه البيت جمبهم بس وصلوها لان الديره كلها رجال والكل مستنفر عشان العرس
_____________•
دخلت اديم و وقفت عند الباب تناظر بيتهم اللي دايم تسمع منه سوالفهم و ضحكهم و حتى هوشاتهم وناظرت الجدار اللي بينهم و تذكرت نواف يوم طاح عندها وضحكت شافتها نجلاء واقفه و استغربت و قفتها و تأملها للبيت و ضحكتها  ونادت نوف : نوف تعالي شوفي من هذي اللي واقفه عند الباب و تناظر كذا
جت نوف وهي مستغربه من اللي واقفه : اييي هذي اديم بنت جارنا ابو تميم
نجلاء : اول مره اشوفها ماقد شفتها في الديره
نوف : اي لان بينا و بين ابوها مشكله ما يخليها تجي عندنا ولا حنا نجيها حتى اذا كانت فيه جمعه مع بنات الديره في بيتنا ما تجي بس اذا كانت الجمعه في وحده من بيوت الديره تجي بس يمكن صارلها سنه او سنتين ما طلعت من البيت من بعد وفاة امها انتي ما تعرفين سالفتهم كم مره علمتس ندى عنهم
نجلاء : يووووه ياكثر ما تهذري ندى ضيعت بين السوالف
جت ندى و طبت عليهم : سمعت طاري ندى وش
تحشون فيني ؟
نوف : شوفي حضرت اديم العرس لا وفي بيتنا بعد
ندى : وخروا خلوني اشوفها وينها ؟
نجلاء : شوفيها هناك اللي راحت عند الغسالات
ندى بتصفير : يووووه طالعه تمووووت بس غريبه ابوها خلاها تجي عندنا
نجلاء : مدري عنه بس شكلها كيوت
ندى: لا يغرك تراها عوبا تروع بس ماشاءالله عليها غابت عن الانظار سنتين و رجعت جميله
طلعت اديم من الغسالات وجت جهتهم عشان تسالهم عن الطريق سلمت عليهم و اخذوا عبايتها وهي تحاول تتذكرهم وشافت ندى وحست انها اخت نواف لان نظرة عين ندى مثل نظرة عين نواف : من وين الطريق
ندى : من هناك يا روحي
راحت اديم للحوش اللي مفروش فيه الزل و اللي الحريم كلهم متجمعات فيه دخلت و جلست
_________•
في عرس الرجال
كانوا كل الشباب قايمين بالعرس من قوة حبهم لابو خالد و خالد اللي ابد ما يقصرون مع احد من الديره و ابتدأ اللعب بعد ما بدت الفرقه بالعرضه النجديه وراح كل واحد ياخذ سيفه و صفوا صفين و ابتدوا يرددون مع الكلمات
( نجد شامت لأبو تركي و أخذها شيخنا
و اخمرت عشاقها عقب لطم خشومها
لي بكت نجد العذيه تهل دموعنا
بالهنادي قاصرينن شوارب قومها
حن هل العادات و مخضبين سيوفنا
و الطيور الحايمه جادعين لحومها
صعبه أفعالنا لي بغاها غيرنا
كلمة التوحيد حنا عمار رسومها )
وكانت بس هذي الكلمات كافيه انها تشيل الحفل شيل وكانوا كل العيال يعرضون بالسيف قبال جدهم و كان منظرهم كله هيبه و فخامه وانتهت عرضتهم وصار وقت انه العريس يطلع وراح كل واحد يجهزه اللي يعطره و اللي يضبط عقاله و بشته وكانوا كانه عرس اخوهم و زفوه لين بيت العروس و رجعوا يكملون العرس
________•
في عرس الحريم
ابتدت الطقاقه العرس بالاغاني وكانت اديم ماسكه نفسها تبي تقوم ترقص بس تنتظر الاغنيه المناسبه و ابتدت الطقاقة تطق وجت ام خالد قومتها و رقصتها
( العود الازرق و قادي
و الورد و ريحه و الكادي
و انغام غناها الشادي
يتواضع منها المتغلي )
انتهت اديم من الرقص وراحت جلست مكانها و كان رقصها يجنن ولا استصعبت الامر لانها هي دايم ترقص
نزلوا العشاء و جلسوا الحريم ياكلون وكانت ام راشد تناظرها وكانت عاجبتها :الا بسالتس يا ام عبدالعزيز هذي بنت من ماقد شفتها بالديره ؟
ام عبدالعزيز: هذي اديم بنت ابو تميم انتي جيتي الديره يوم توفت امها وهي يمكن لها حول السنتين ما طلعت من بيتها
ام راشد : الله يرحم امها و اموات المسلمين والله انا اعجبتني شرايك فيها و في اخلاقها ودي اخطبها لولدي
ام عبدالعزيز : والله البنت جميله و اخلاقها مثلها وهذا هو بيتها جمبنا كانتس تبين تخطبينها
ام راشد : ان شاءالله بشاور ابو راشد و اشوف
________•
طلع ماجد من العرس بعد العشا عشان ياخذ اخته و يرجع بعدها للمخيم وهو عاده عندهم ينامون بالمخيم بعد العرس و الصبح يشيلون الزل و الخيام وصل لبيت ام عبدالعزيز طق الباب
جت نوف تشوف من عند الباب : مين
ماجد : انا ماجد ممكن تنادين لي اديم
دخلت نوف تنادي اديم : اديم ماجد برا
وطلعت معها اديم وقالت لها تبي عبايتها راحت نوف تدور عبايتها وجابتها لها لبستها اديم وطلعت : تأخرت عليك ؟
ماجد : لا عادي عساتس انبسطتي
اديم : يوووه ياماجد العرس مرره يجنن مره استمتعت
ماجد : الحمدلله اجل ادخلي و انا برجع للمخيم
_______
في بيت ام عبدالعزيز
البيت بدا يفضى من المعازيم و اخر من طلع ام خالد بعد ما تشكرتهم على و قفتهم معها
ندى بتعب : ااففف مرره تعبت كانه عيد
جمانه : الله يسامحك يا عميمه وش ذا الكرف ليه ما تجيبون قهوجيه تصب ؟
ام عبدالعزيز: انا بنت ابوي بنته ماعاد فيه بنات وحضرتس ليه موجوده عشان تترززين عند الحريم
جمانه : لو سمحتي يا عمتي ترا هذا شغلهم وانتم كذا اذا ما جبتوهم تقطعون برزقهم
ام عبدالعزيز: الظاهر عمتس هي اللي بتقطع لسانتس
ريم : يمه ترا العيال جابوا صواني العشاء عشان تتغسل
نجلاء : لا والله ليه ما يغسلونها هم بعدهم ترا من الحين اعلمكم مارح المسها
جمانه : حتى انا
ندى وهي تدري انها بتغسلها بس لازم تاخذ شرف المحاولة : وانا يعني اتوقع مارح المسها
ريم : خلاص انا اغسلها لا تموتون
جو العيال ودخلوا عشان يغيرون ملابسهم و يريحون شوي بعدين بيرجعون للمخيم
الجده منيره : عسى عرسكم زين يا يمه
ابو نايف : الحمدلله كان زين بس هالعرس مره متعب كان
جمانه : شفتوا طلعت صادقه حتى ابوي شهد
خاله الهنوف : عاد انتي دايم و ابوتس مناصرتس
ام عبدالعزيز: وين نواف ما جاء معكم ؟
فارس : بيجيب الدلال ويجي
ام عبدالعزيز : وانت يا يمه متى بترجع للمدينه ؟
فارس : الظاهر بكرا لازم بعد الظهر اكون هناك
ام عبدالعزيز : الله يحفظك
________•
في بيت ابو تميم
بعد ما دخلت اديم و نزلت عبايتها فجاءه سمعت صراخ شخص عند الباب وراحت قريب من الباب و كانت لافه طرحتها على وجهها فتحت الباب و شافت واحد طايح على الارض وكان واضح على وجهه انه مضروب من احد دققت النظر فيه وطلع انه اخوها ماجد صرخت يوم شافته وطلعت له و هي طالعه طاحت طرحتها من على راسها وراحت جلست عنده ورفعت راسه على فخوذها وهي تحاول تناديه بس ماكان يرد عليها وكان في هذي الاثناء نواف راجع و هو شايل الدلال كلها بيده عشان ما يروح و يرجع و كان يتحلطم و يسولف مع نفسه وشاف وحده من بعيد جالسه تصارخ و تستنجد في الناس و تقول اخوي مات ساعدوني
رمى الدلال اللي بيده وراح ركض له و يوم وصل عندها شافها و عرفها و شاف صديقه غرقان بدمه
.
.
( انتهى )
اتمنى انه البارت نال اعجابكم 💕
اكتبوا لي اراءكم حول البارت بالكومنت 🫶🏻
#حكمٍ_طغى_ماعاد_ينفع_نظامه