حكٍم طغى ماعاد ينفع نظامه

Part 13

عند البنات داخل
دخلت ريم و الجدة نورة و ام عبدالعزيز بعد مادخلهم سلطان و كانت ريم تنتفض من الموقف اللي شافته اما البنات كانوا حاضرين الموقف كامل من طلعت ريم عشان تشوف سلطان لين رجعت و وخروا يوم شافوهم رجعوا
الجدة نورة : اعذريني يا اماني على اللي صار
ام عبدالعزيز : من هو هذا مشعل ولد من وراه طاب علينا كذا ؟
الجدة نورة : ولد سعود تلقينه عرف انه عبدالعزيز اخذ غيداء
جلست ام عبدالعزيز على وحده من الكراسي اللي موجوده في المطبخ و كانت معصبه : ياربي وش هالمصايب اللي طلعت لنا فجاءه حتى عيالي رجعوا ولا جلست معهم اشوف وش امورهم و وش صاير معهم
الجدة نورة : اعذريني يا بنيتي اني طبيت عليك زي كذا و خربت نظامك ( طالعت في ريم ) روحي يا ريم نادي سلطان و قولي له انه بنمشي
قامت ام عبدالعزيز و مسكت الجدة من يدها : انا اقصد كذا يا عمه !!؟ انتي مكانتس فوق راسي بس قصدي اني ما جلست مع عزيز و شفت وش صار معه  بس من طبت مشعل علينا واضح انه عزيز اخذ البنت
الجدة نورة بضحك : اي اخذها
ام عبدالعزيز : امشي امشي ندخل داخل و الامور ان شاءالله بتنحل
دخلوا داخل و راحت ريم جلست على الكرسي : الله لا يوريكم يا بنات اللي شفته بغى يطير قلبي الا شوي
جت ندى و نجلاء و جمانه و جلسوا على الارض عند ريم من الحماس و نوف و غيم كانوا واقفين و يسمعون
نجلاء : طلينا عليكم من الدريشة بس ما شفنا شيء بس شفنا نواف يوم يدف مشعل مدري من ذا اللي جاء
ندى بحماس : قولي لنا السالفه كامله
اخذت ريم نفس و بدت تشرح لهم اللي صار : طلعت من عندكم و رحت سلمت على سلطان بعدين ... و كملت لهم ريم السالفه كامله : و اخر شيء من الخرشة قلت لسلطان يوصلني لين باب المطبخ و انا ما كان علي عبايه ولا جلال
نوف بكره : قطيعه تقطعه وش يبي ذا !!؟ لا و زود الوقاحه طاب علينا اخر الليل و فوقها يوم جاء يدخل دف توأمي كأنه البيت مافيه رجال
ندى : ابك هذي بتجلطني ما همها من السالفه كلها الا توأمها
نوف : ليه انتي ما شفتيه كيف دفه على ظهره !!! اكيد تعور
ندى : ابد جني ما يصير له شيء
تحمست جمانه ودخلت في سالفه ثانيه : صادقه تذكرت اليوم يوم تركي يسال عن نجلاء ليكون صارلها شيء المفروض ما نخاف على اللي زي كذا جنون ما يصير لهم شيء
و كملت نجلاء معها : ولا كلمه اصلاً انا لحد الان مقهوره اني ما شفتس يوم تطردتس الناقه ولا كان من يمسكني عنتس
غيم : ممكن تأجلون هوشتكم و تخلون البنت تكمل كلامها  !؟
كلهم طالعوا في غيم نظرة الاستغراب : وش عندتس المره هذي تدورين البربره مو من عادتس
غيم : وش اسوي الموضوع شدني
ندى : وهي صادقه اسكتوا خلوا البنت تكمل
ريم : وش اكمل خلصت السالفة
ندى : بس هذا اللي صار !!! قولي لنا كيف شفتي اخوتس الصراحه اعجبتني حركته يوم خباتس ورا ظهره
نجلاء : صادقه ندى تكلمي عنه بنشوف هو نفس عيالنا ولا لا
ريم وهي تتذكر شكل سلطان : رجال مب نفس اللي طب علينا فجاءه يوم شافني مع امي قبل ما يعرف اني اخته على طول نزل راسه بالأرض
ندى : ليه ماكان يدري ؟
نجلاء : صدق انتس دلخه جدتس قبل شوي ما كانت ناويه تخطب ريم لسلطان اكيد ماكان يعرف
ريم : بالبداية يوم عرف اني اخته استغرب بعدها جاء ضمني الصراحه استغربت ضمته و قالي طلع عندي اخت بهالزين انصدمت منه كأنه يعرفني من زمان بس ماشاءالله يا بنات طوووويل تخيلوا و انا متخبيه ورا ظهره كنت نتفه عنده
نجلاء : اي لاحظنا يوم رجعتس هنا اصلاً حتى هذا اللي طب علينا بعد شفته كان طويل شكل الطول وراثه عندهم
نوف : وش يشتغل !؟
ريم : أمي سألته عن شغله قال بس جالس اعدي ورا هالقضايا ف اكيد محامي
ندى : اكشخ طلع محامي من قدتس عندتس اخو محامي
جمانه : انتي متأكده انه قال اعدي ورا هالقضايا لان شكله ما يحسسني انه يقول اعدي
ريم : لا قال اركض بس انا قلتها بلهجتي اصلاً حتى حرف السين ما ينطقه يقولي كيفك اخبارك مب نفس اخواني
غيم : اي لاحظت حتى جدتكم ما تتكلم بالسين
جمانه : طلع حضري شكل البنت اللي خطبها عزيز بتجي خكريه و دلوعه الا صدق ما عرفتوا وش اسمها !؟
نجلاء : كأني سمعت اسم غيداء يتطاير في السماء اظن هذا اسمها
ندى : والله شكلها مزيونه دام عزيز و الخكري الثاني يتهاوشون عليها
نوف : اهم شيء لا تجي مايعه ثم نبتلش فيها
غيم : ماشاءالله عليكم حللتوا البنت ترا الحين خالتي بتجي تشوف سوينا العشا ولا لا ثم نتهزى زي دايم
نجلاء : افف منتس يا غيم خلينا ناخذ علوم بعض
وقفت ندى : الله يعينتس و بتجي معها ريم الحين
نجلاء : يوووه عاد انا اذا جيت اكلم غيم تسكتني تقول فجرتي راسي و بتجي معها ريم لا صدق كملت
جمانه : لاتخافين دقي علي و اجيتس طياااره اسمع لتس ولا منتهم
راحت لها نجلاء و ضمتها : والله انتس محزم
ندى : خلي البربرة و قومي انتي و محزمتس عشان نسوي العشا
راحوا لها نجلاء و جمانه و ضموها : طلعتي تغارين لا تخافين انتي محزمنا و عصابة روسنا
ضحكت لهم ندى و خربت ريم ام الجو : ما اقول الا الله يخلف بس
___________•
في بيت ابو تميم
متجمعين ماجد و اديم اما ابو تميم و تميم راحو يرجعون زوجة تميم
اديم تتكلم و هي معصبه : لحد الان مقهوره كيف ابوي سمح لتميم يرجع بشاير الله لا يبشرها
ماجد وهو خلاص فاقد الأمل : لو تقعدين تتحلطمين من هنا لبكره مارح يتغير شيء دام ابوي قال كلمه
اديم : تدري وش يدور في عقلي
ماجد باهتمام : وش !؟
اديم : بروح اخذ زيت و اكبه عند الباب عشان اذا دخلت تطيح على وجهها ونفتك منها مره وحده
ماجد : وانا احسب عندتس سالفه طيب و اذا طاحت يعني بترجع لبيت ابوها من طيحه !!؟ بالعكس بتجي عندتس وهي متحروله و تخدمينها فكري بشيء ثاني
اديم : المشكله ابوي محذرني ما اقرب منها و هي دامها رجعت يعني شخصية تميم بتتغير فمن الحين اقولك ودع شخصيته الطيوبه و الحبوبه اللي كان يعاملنا فيها الايام اللي راحت
ماجد : معليتس اخوتس ما تمشيه حرمه
اديم : بتشوف و قول اديم ما قالت
طق الباب و قام ماجد يفتحه و كلهم كانوا متوقعين انهم رجعوا بس انصدم ماجد من اللي عند الباب : دقيقه هذا انتم ولا انا بديت اتخيل !!؟
عبدالله : اي حنا شكل ما ودك تدخلنا !؟
ماجد : الا بالله تفضلوا حياكم الله
اديم بفضول : من عند الباب يا ماجد
ماجد ببتسامه : عيال عمتي فطوم
اديم بفرح : تمزح قول والله !!!
دخلهم ماجد : شوفي بعيونتس
دخلت جود من الباب و شافتها اديم و ركضت تحظنها  : ما اصدق انتي متى جيتي و ليه ماقلتوا انكم جايين ؟؟
جود : سويناها لكم مفاجاء
اديم بضحكه : احلا مفاجأة و الله لكم فقده ليش كل هالغيبه يعني ماتقولين عندي بنت خالي اجي اتفقدها و اشوف احوالها
جود : بعد وش نسوي الضروف احكمتنا
تنحنح ماجد عشان بيدخل و معه عبدالله اخو جود : كيفتس يا جود ان شاءالله بخير ؟
جود : الحمدلله انت كيفك ؟
ماجد : نحمدالله و نشكره الا عمتي وينها ؟
لاحظت اديم انها ماجت معهم : صادق وين عمتي ليكون ما جت معكم !؟
جود : الا جت بس حنا من الحماس طلعنا من البيت قبلها و هي بتلحقنا
اديم : كيفك يا عبدالله
عبدالله : بخير انتي كيفتس ؟
اديم : الحمدلله تكفون قولوا انكم بتطولون و مارح ترجعون بدري
جود : مارح نطول و بس الا بنجلس هنا على طول
اديم بحماس : كذااابه صح تكذبين !!!
جود بضحكه : والله ما اكذب حتى شرينا لنا بيت هنا و بعد في نفس حارتكم البيت اللي في الزاوية
التفت ماجد لعبدالله و هو يحاول يتذكر : ليكون اللي قبل كم يوم كانوا ينقلون هنا مع العمال انتم !؟
عبدالله بضحكه : اي حنا
ماجد : ايا الكلب لكم كم يوم هنا و توكم تجونا حتى ما علمتونا انكم ناقلين هنا
عبدالله : نبي نسويها لكم مفاجاة جيت انا لحالي مع العمال و نقلنا الاغراض و امس جت جود و امي و ريحوا و جيناكم اليوم
اديم : مو مهم اهم شيء اني بصير اقابلكم كل يوم
اذن العشا و سمعه ماجد : اجل انا و عبدالله بنطلع نصلي و نرجع
طلعوا العيال و فضى البيت للبنات و شالوا جلالهم جلست جود في الجلسه الموجوده بالحوش : الا وين خالي و تميم
جت اديم و جلست جنبها و بوجه عابس من تذكرت سالفة تميم و زوجته : ما تدرين خالتس وش بيسوي
جود بأهتمام : وش بيسوي !؟
اديم : فجاءه ركب راسه الا ويرجع بشايروه
انصدمت جود : تستهبلين صح !! الحرمه طامح من قبل لاتتوفى امتس الله يرحمها الحين جاء ببالهم يرجعونها
اديم : تشوفين يا جود القهر والله انه النار تلعب فيني و المشكله انه ابوي يقولي عساني اشوفتس مكلمتها و لا تحارشينها
جود : وش تسوين بعد عضي على شحمه و اسكتي مالتس الا كذا و بعدين الشيء الوحيد الزين اللي بيجي منها انها بتصير مسؤوله عن تميم و احتياجاته و انتي بتفتكين من همه
اديم بقهر : خليها على ربتس بس
_________•
بعد صلاة العشاء في بيت ام عبدالعزيز
رجعوا العيال من الصلاة و راح نواف و فيصل للمطبخ و كانوا مقررين انهم يطبخون العشا اليوم و قفوا عند الباب و صوتوا لريم عشان تجيهم و طلعت لهم : وش بغيتوا ؟
نواف : كيفتس انتي خفتي !؟
ريم : اي والله خفت ( ضربت نواف من كتفه ) بعدين انت وراك تطب على الرجال زي كذا شكلك ما صدقت على الله تلقى احد تضربه
نواف : تستهبلين انتي ليش اضربه !! اول شيء دف فيصل عشان يدخل هذي يستاهل عليها ضربه و ثاني شيء متهجم على بيتنا و هذي يستاهل عليها ضربتين و ثالث شيء انا هالمشعل هذا ما بلعته من يوم قابلته و يستاهل على هذي الضرب كله 
ريم بخوف : اخاف يحقد عليكم و يسويلكم مشاكل
نواف : يحقد بيدينه و رجوله ماحنا بخايفين منه
ريم : طيب انت جاي وش بغيت ؟
نواف : فضوا المطبخ اليوم انا و فيصل بنطبخ العشا
ريم : غريبه مب من عادتكم
نواف : لانه جايبين ذبيحه و نبي نطبخها
دخلت ريم و دخلت البنات عشان العيال بيدخلون يطبخون و قفلت الباب اللي بين المطبخ و بين البيت من داخل و دخلوا نواف و فيصل و ابتدوا يسوون العشا و البنات كانوا مجهزين كل شيء و مقطعينه على اساس انهم بيطبخونه هم و استفادوا منه العيال
دخلت عليهم ندى : هلا باللي له الخافق يهلي
نواف : هلا بوخيتي
ندى : هلا بالكذابين اللي سحبوا على اختهم الصغيره اخر العنقود و كسروا خاطرها
فيصل : كان ما صرتي غبيه لهذي الدرجة
ندى : مادريت انكم نجسين زي كذا
نواف : دام ربي جابتس شمري عن كميماتس و حطي يدتس معنا
راحت ندى و جلست على الكرسي : والله دامكم دقيتوا الصدر كملوها مع انها غريبه منكم بس ان تصل متأخرً خيرًا من الا تصل
فيصل : اكشخ يا القزمه صرتي تقولين امثله بعدين ليش غريبه ما حنا بمعودينكم انه نطبخ ؟؟
ندى بضحك : لا معودينا تاكلون و تمسحون يدينكم بالجدار
نواف : شوفي و تعلمي الطبخ كيف يتسوى
ندى بحماس : دريتوا عن اخر الاخبار !!!
رفعوا نواف و فصيل راسهم : وشهيي
ندى : ريم طلعت اخت سلطان اللي عندكم هنا
نواف : صايره تتأخرين بالاخبار عرفت قبل لا تقولين
فيصل : وانا ليش توني اعرررف !!!!؟ رجل كرسي بالبيت !!؟
ندى : محشوم يا اخوي بس رجل الكرسي تعرف اشياء انت ما تعرفها
راح لها فيصل بيضربها بمزح : هذي اللي تبيني اجلدها
ركضت ندى و تخبت ورا نواف : انا في وجهك يا نواف
مسك نواف يد فيصل : خلاص قالت بوجهي ( التفت لندى ) قومي نقعي الرز
ندى : طيب بنقعه بس قولو لي وش صار معكم هناك ؟
دخلوا نوف و ريم على سؤال ندى : الحمدلله لحقت على السوالف يا قولوا وش صار معكم
ندى : ليش خليتوا البنات و جيتوا ؟
ريم : جمانه نادتها امها و نجلاء و غيم بياخذون لهم غطه
راح فيصل و حط يده خلف كتف نوف : تعالي يا توأمي اقولتس اللي صار
ناظرت ندى فيه بنص عين : والله من قلة الادب اللي تعرفها لي ساعة عندكم و تطقطون علي ولا تقولون لي !!!
فيصل بضحك : امزح معتس عزيز تملك اليوم و زواجه بعد اسبوعين مع فارس و ريم
نوف : اوووف مو بدري ؟
ندى : اي سمعنا انه تملك بس غريبه في نفس يوم الخطبه ؟
نواف : مدري حنا كنا على اساس خطبه بس جدي سألهم متى تبون الملكه و قال اليوم اصلاً شكله من قبل ما يسأله جدي و هو راسل ولده يجيب الشيخ
نوف : وانا كنت احسب عزيز هو اللي نشب بحلقكم عشان يتملك اليوم
ندى : غريبه مستعجلين كذا ؟
نواف : يقول نهيان عشان حنا اكيد نبي نرجع للديره فعجل بالملكه عشانا
فيصل : احسن عشان نفتك منهم مره وحده
ندى : اول مره اسمعك تقول شيء صح
دخل عليهم عزيز و شافهم متجمعين : متجمعين على الخير ان شاءالله
نواف : وراك خليت الرجال و جيت
عزيز : طلع يكلم و العيال عنده
ندى : هلا بعريسنا وراك مستعجل زي كذا هد ترا البنت مب طايره
عزيز : والله انا اللي بجي اطيرتس
ريم : خلك منها مبروك يا اخوي و الله يجمع بينكم على الخير
عزيز : الله يبارك فيتس و ترا عرسي بيكون معتس في نفس اليوم
ريم : اي قالي فيصل
نوف : مبروك عزيز
عزيز : الله يبارك فيتس
ندى : مبروك يا العضيد و الله يبارك لك في زواجك
ضحك عزيز : الله يبارك فيتس بس اول مره اشوف كلامتس مرتب زي كذا الحمدلله في تطور
ندى : بسكت و مارح ارد
دخلت ام عبدالعزيز المطبخ و شافت عيالها كلهم متجمعين وجلست على الكرسي : اخيراً قدرت اصيدكم و القاكم متجمعين
نواف : ما يحتاج تصيدينا نادينا و نجيتس
ام عبدالعزيز : اي ماشاءالله عليكم تسمعون الكلام
فيصل بضحك : امي لازم تجلد
التفتت ام عبدالعزيز لعزيز : سمعت انك تملكت مبروك يايمه
ضحك عزيز : الله يبارك فيتس
فيصل : خلاص ندري انه عندك سنون سكر فمك
عزيز : وش تبي انت اذا غيران عادي نزوجك
فيصل : اي طراها الزواج يمه زوجي نواف لان انا بديت احس انه لازم نزوجه و نستر عليه
نواف بضحك : انت وراك متعقد مني قاعد على قلبك انا !!! بعدين صدقت انا لازم اطلع من حياة العزوبيه عشان لو قلت لزوجتي انتظريني لا تاكلين تنتظرني مب تشيلي الاكل في الحافظه
ندى : ياقدمك يانواف بعير انت ما تنسى
ام عبدالعزيز : ان شاءالله نزوج ريم و عزيز و نواف وراهم
ندى : ليه يمه عينتس على وحده ؟
التفت نواف لصوب امه و كملت ام عبدالعزيز : اي في وحده ببالي ودي اخطبها لواحد من عيالي
ندى وهي تبتسم و تناظر نواف : منهي !؟
ام عبدالعزيز : عبير بنت جارنا احمد
كان نواف يطبخ و منزل راسه على القدر ومن سمع الكلام انخبص و رفع راسه لأمه : لا يايمه مارح اتزوج الحين و انتبهي تكلمين الحرمه و تقولين لها شيء و توقفين نصيب بنتها
لاحظ عزيز توتر نواف من الموضوع و حب يسكر الموضوع : صغير نواف توه على العرس
وقفت ام عبدالعزيز ناويه تدخل داخل : لاصغير ولا شيء خل يجي وقتها و نشوف و انت يا عزيز جهز نفسك من بكرا نجهز لزواجك انت و اختك ما بقى عليه شيء ولازم ننزل نفصل غرفتك
عزيز : ابشري يمه
فيصل : الزواج بيكون هنا في الديره ؟
ام عبدالعزيز : الهنوف قالت انه زواج ريم تبيه بالمدينه و عشان كذا بيكون زواج عزيز بعد بالمدينه
ندى : اي احسن عشان ما يكون في بيتنا و نقعد نكرف
ام عبدالعزيز : هذا همتس
ندى : اي والله هذا همي لان مارح يكرف الا انا
طلعت ام عبدالعزيز و لاحظوا البنات توتر نواف بعد طاري الزواج و كان يشتغل و لا يرد عليهم و انسحبوا واحد واحد و طلعوا من المطبخ ولا بقى فيه الا نواف و فيصل اللي يطبخون العشا
_________•
في جانب اخر من بيت ام عبدالعزيز
كان سلطان طالع بالحوش يكلم عشان الشبكه تلقط و كان يتصل على غيداء عشان يشوف احوالها بعد ماشاف ردة فعل مشعل خاف انه قالها شيء ولا سوالها شيء و كان يتصل ولا ترد غيداء
جاء بيرجع للمجلس و شاف عزيز طالع من باب المطبخ : عبدالعزيز
التفت عزيز لناحية الصوت : سم وش بغيت
سلطان : ممكن تنادي لي جدتي ابيها بموضوع
دخل عزيز للصاله ولا شاف فيها الا امه و الجده نوره و نادى سلطان يجي يكلمها هنا لان الجدة نوره يالله تمشي
دخل سلطان و شاف ام عبدالعزيز بعد جالسه معها : اذا تبي تكلمها بشيء خاص عادي اقوم
سلطان : لا عادي اجلسي
الجدة نورة : وش بغيت يا سلطان
سلطان : جده انا بمشي للمدينه
الجدة نورة بتسأول : وراك نويت ترجع
سلطان بقلق : اتصل على غيداء ولا ترد علي و الصراحه خفت عليها بعد ردة فعل مشعل اليوم
الجدة نورة : وش بيسوي لها مشعل
سلطان : والله ما ادري عنه ما اضمنه
الجدة نورة : طيب دقيت على امك
سلطان : دقيت دقيت عليهم كلهم محد يرد
الجدة نورة : يمكن نايمه انت تعرف غيداء نومها ثقيل
مدت ام عبدالعزيز جوالها لمشعل : خذ كلم من جوالي يمكنها الحين مستحيه عشان الملكه ولا تبي ترد على احد خذ دق و طمن روحك
اخذ سلطان الجوال و طلع برا و اتصل عليها و ما اخذ عشر ثواني الا وهي راده
سلطان بعصبيه : الحين ابي افهم يوم اني ادق و ما تردين علي ليه يعني عادي عندك تخليني اجلس افكر فيك و احاتيك
غيداء : يمه هذا انت يا سلطان ؟
سلطان بنفس العصبيه : اي انا ليه مارديتي علي !!؟
غيداء : كنت في مرسمي و الجوال صامت و ما كان عندي
سلطان : تكذبين علي و انا اكثر شخص فاهمك تدرين اني كنت ناوي ارجع من الديره عشان اشوف اذا فيك شيء ولا لا حتى امي ما ترد علي
غيداء : خلاص انا اسفه و مارح اعيدها انت ليش متصل ؟
سلطان : اتصلت اتطمن عليك مشعل جاء هنا و تهاوش مع عيال خالي مطلق و بعدها طلع جاء قالك شيء !؟ سوالك شيء !؟
قررت غيداء انها ما تقول لسلطان عن الحوار اللي صار مع مشعل عشان لا تصير مشاكل بعد : لا ما جاني اتوقع انه نهيان قاله كل شيء و قاله ما يجيني و انت تدري انه مشعل ما يكسر كلمة نهيان
سلطان : لو جاك او تعرض لك دقي علي على طول
غيداء : طيب يا سلطان انت استمتع لا تفكر فيني
سلطان : شلون ما افكر فيك وانتي اختي الوحيده ( تذكر ريم ) لا صح صرتي مو اختي الوحيده
غيداء : وش تقول انت ماني فاهمتك
سلطان بضحك : تخيلي طلع عندي و عندك اخت و تونا ندري عنها
انصدمت غيداء : تمزززح صح
سلطان بنفس الضحكه : لا والله صادق بنت خالي مطلق و اسمها ريم
غيداء : اذكرها ريم اما طلعت اختنا !؟ ماشاءالله على امي تمشي و توزع حليبها كيف حالها ريم ؟ قابلتها ؟
سلطان : بخير الحمدلله اي شفتها ماشاءالله عليها جميله
غيداء : هد ترا اغار
سلطان : لا تغارين انتي ما يجي قبلك ولا بعدك احد انا بقفل لانهم ينادوني على العشا و لو سمحتي خلي جوالك مفتوح عشان اذا اتصلت تردين
غيداء : ابشر من عيوني
قفل سلطان المكالمه و هو كان حاس بنبرة صوت غيداء انها كانت تبكي بس ما قالها شيء لانه هو مب طالع بيده شيء حتى لو جاء و عارض الزواج غيداء رح تعارضه و توافق و كانت غيداء طول المكالمه تجاريه بالكلام عشان لايحس بزعلها
_________•
في بيت ابو تميم
اديم و جود في المطبخ يجهزون الاكل و ماجد و عبدالله طلعوا يجيبون الاغراض الناقصه و يرجعون
وصل ابو تميم و تميم و بشاير و دخلوا ولا حصلوا احد
صوت ابو تميم لاديم و طلعت له اديم و كانت معها جود و لافه جلالها عليها عشان تميم موجود : سم يبه
ابو تميم : تعالي سلمي على مرت اخوتس
كانت تقول اديم بقلبها انه لو تنطبق السماء على الارض ما تسلم عليها و شافت جود جنبها وحبت تضيع الموضوع : مادريت يبه جت عمتي فاطمه اليوم و هذي جود
التفت ابو تميم لجود : يالله انك تحييهم ياهلا بجود تو مانور بيتنا فيتس
راحت له جود و سلمت على راسه : بنورك يا خالي طمني عنك و عن صحتك
ابو تميم : نحمد الله و نشكره الا اختي وين ؟
جود : جلست ترتب بالبيت و قالت انها بتجي بس لسى ما جت
قاطع كلامهم دخول ماجد و عبدالله : شف يبه من اللي جانا
راح عبدالله و حب راسه خاله : ارحب ياخالي
ابو تميم : تبقى يا ولدي وراك قاطعنا زي كذا و ما تزورنا
عبدالله : وش نسوي يا خالي ماجت فرصه بس خلاص حنا معكم هنا على طول
كانت تقول بشاير بقلبها : والله البلشه يعني على حظي يوم رجعت جو
ابو تميم : يالله ادخلوا و حطوا العشا
فرحت اديم انه ابوها نسى موضوع الترحيب و راحت تركض للمطبخ عشان ما يذكر اما تميم يوم شاف عبدالله جلس يسولف معه و نسى بشاير و دخلت بشاير لغرفتها و كانت معصبه مره كانت متوقعه انها بتشوف استقبال بس خاب ظنها
بعدها بنص ساعة حطت اديم عشا الرياجيل لحال و عشا الحريم لحال و بدوا ياكلون هي و جود ولا حتى فكرت تنادي بشاير
طلعت بشاير من غرفتها بعد ماخلصوا اكل وهي ماكانت تدري : خلص العشا ؟
كانوا اديم و جود جالسين و يشربون شاهي بعد العشا : اوووه صباح الخير
بشاير : شلون يعني ليش ما ندهتوني !؟؟
اديم : ليه خدم عند ابوتس نندهلتس تعرفين انتي موعد عشانا و متى نحطه
سكتت بشاير عشان لاتصير مشكله من اول يوم رجعت فيه و هي ناويه تكسب قلب تميم و ابو تميم من جديد : طيب يا اديم طيب ( شافت جود ) ليكون هذي بتنام هنا بعد !!؟
اديم : وش دخلتس وين تنام اذا كان البيت بيت ابوتس تكلمي
بشاير : البيت كله رياجيل خليها تروح تنام عند امها
جود : و انتي وش دخلتس وين انام ولا اقعد
بشاير بتهديد : طيب طيب اصبروا علي
راحت بشاير لغرفتها و طالعت جود باديم : تهددنا هذي ؟
اديم : خليها تهدد بيدينها و رجولها اصلاً انا ابي اطفشها عشان تطق و تطفش و عائلتنا تفتك منها
_________•
في بيت ام عبدالعزيز
بعد ما تعشوا و نام الكل كانوا العيال متفقين انهم بيطلعون يتمشون و نواف كان ماخذ مفتاح السياره من الجد مقبل و هو ما يدري لان من بعد الحادث اللي سواه نواف و نايف اخذ السياره منهم و كانوا اللي متفقين انهم بيطلعون يتمشون نواف و فيصل و نايف و تركي اما عزيز و فارس قالوا انه مافيهم حيل يخاونهم و بيحاولون يتسترون عليهم لين ما يرجعون و يوم دخلوا ينامون اخر من دخل نواف ولا سكر الباب زين وحط نعاله على الباب عشان لا يسكر لان اذا سكره و جاء فتحه بيطلع صوت
و ابتدت اصعب مرحله انهم يطلعون من المجلس ولا يحس عليهم احد و بيطلعون واحد واحد و في المجلس كلهم نايمين على الارض و اللي بيطلع ما معه كشاف يشوف وين يحط رجله و هو ماشي فلازم وهو يمشي ينتبه وين يحط رجله عشان ما يدعس احد فأول من طلع نواف عشان هو الوحيد اللي يقدر يفتح الباب بدون صوت و كان متمرس بهالشيء من كثر ما طلع و انحاش من الجد مقبل و طلع نواف من المجلس بكل سلاسه و اللي كانوا خايفين منه الشباب نايف لان نايف دايم وهو فضيحه و كانوا خايفين يفضحهم و قال نواف انه اللي بيطلع بعده نايف عشان لو صار شيء او طلع صوت و رفع الجد مقبل راسه يشوفهم نايمين وقف نايف و كان يحاول يمشي ولا يدعس احد و للحظه ما عاد صار يشوف لانه كان مدقق على الارض و ظلمت عينه للحظه و دعس على رجل عزيز و عزيز صرخ لا شعورياً و ضربه على راسه مسك نايف راسه من الضربه و رمى نفسه في مكانه
و اشتغل على طول كشاف الجد مقبل اللي على طول مسك عصاته و وقف لان هو عارف حركات نواف : من ذا اللي صارخ ؟
عزيز وهو يحاول يغطي عليهم : انا ياجدي رجلي جاها شد فجاءه
كشف الجد مقبل على مكان نواف و شافه في مكانه و كان نواف حاط مخده لانه عارف لو صار شيء الجد مقبل بيشك فيه اول واحد و بعدها الجد مقبل كشف على مكان نايف وشافه منسدح ولاهوب متلحف ضرب نايف على رجله بالعصا : تلحف زين يا ولد
يقول نايف بقلبه : حتى بحنيتك قاسي يا ابو عبدالرحمن
مارد نايف عليه على اساس يحسسه انه غاط بالنوم : قم يا عزيز لحفه زين عن هالبرد عشان نبتلش فيه
كان نايف مكانه جنب عزيز و مد عزيز يده له و لحفه وهمس له : يا النكبه ما تشوف انت وين تدعس لا اشوفك واقف اذا تبي تطلع ازحف لين توصل للباب يا الفضيحه
الجد مقبل بعصبيه : ابك منهو ذا اللي يتكلم
عزيز : انا ياجدي قاعد اقرا اذكاري
جلس نواف برا ينتظرهم لين ما غط الجد مقبل بالنوم و بدوا يطلعون ورا بعض ولا حس فيهم الجد مقبل و اخر شيء ثبت نواف الباب بالنعال عشان اذا رجعوا يقدرون يفتحون الباب بدون لا يطلع صوت
مسك نواف نايف من شعره : ياخي انت دايم نكبه توبه تطلع معنا
مسك نايف يد نواف اللي على شعره عشان مايشده اكثر : وش اسوي سيقان عزيز طويله
تركي : الحين ليش واقفين هنا تتناقشون يعني ماشافوهم وهم يسرقون شافوهم وهم يتقاسمون
فيصل : صادق تركي تهاوشوا في السياره
نواف : يالله اطلعوا عشان ارد الباب
نايف : ليه وين مفتاحك ؟
نواف : جدي ياخذه مني قبل النوم
تركي : ياخي انت وراك مجنن جدي تخيلي اول ما طلع نايف الصوت على طول شغل الكشاف و كشف على مكانك واضح إنك مجننه بهالحركات
نواف : لا والله اني مسكين بس هو ما ادري وش فيه علي
فيصل : والله جدي المسكين مب أنت حتى مفتاحي صار ياخذه بسبتك
طلعوا العيال و رد نواف الباب و قبل ما يركب السيارة حط من الحجر تحت مكان الكفرات عشان اذا رجعوا يحط السياره في نفس المكان ركبوا السيارة و انطلقوا يتمشون و قرروا يروحون يكشتون و يرجعون و كان اللي يسوق نواف و من دخلوا للعزبه و جلس نواف يفحط فيهم لين كل واحد مسك راسه
نايف : انزل انزل خلني اعلمك الطاره كيف تكون
نزل نواف و تبادل هو و نايف بالاماكن : لاتروح من هنا لان يمكن نغرز
ناظره نايف بنص عين : تعلمني انت !!
و ما اهتم نايف بكلامه و راح من نفس الطريق اللي قاله نواف لاتروح منه و فحط فيهم شوي و لا امداه يكمل و السياره غرزت
ضربه نواف على راسه : قايلك انا ولا تفهم ( قلد نبرته ) تعلمني انت
نايف : طيب انزلوا دفوا السياره ولا احفروا
نواف : لا والله قم انزل انت و دف ولا احفر يا النكبه
نزلوا العيال اللي يحفر و اللي يدف و اخر شيء طفش نواف من الحفر و كان نايف يحفر ولاهوب منتبه له و شات نواف التراب برجله على نايف كح نايف من كمية التراب اللي جته و قام نفض نفسه و راح يركض ورا نواف و خلوا فيصل و تركي وراهم ولا حس نواف من الركض الا و قدهو واصل للعزبه حقتهم و نايف وراه طاح على الارض من التعب و جاء نايف طاح جنبه و مسك وجه نواف بيد و اليد الثانيه ماسك فيها التراب ودخله في فم نواف دفه نواف برجله وجلس يكح التراب اللي بفمه
وصلوا فيصل و تركي بعد ما طلعوا السياره : صدق انه ما ينطلع معكم
تركي : صادق والله طالعين مع مبزره
نواف : ولا كلمه انت وياه و جهزوا القهوة الشاهي
نايف و هو منسدح على التراب : وش جوك قهوة اخر الليل
نواف : من اللي بيشربها انت ولا انا
جلسوا العيال حوالي ساعتين في العزبه و يوم قرب اذان الفجر قرروا يرجعون قبل لايصيدهم الجد مقبل و كان هالوقت الجد مقبل يصلي الوتر
و يوم رجعوا العيال حصلوا الباب مسكر مب مردود : الباب مسكر
نواف : لاتقولها
نايف : قلتها و خلصت وش بنسوي ؟
فيصل : امشوا نطق على غرفة البنات يفتحون لنا
تركي : اكيد نايمين الحين
نواف : امشوا نجرب حظنا
راحوا العيال و طقوا على دريشة البنات و فتحت لهم ندى : اني داريه انكم طالعين
نواف : انقزي يا الذيبه افتحي الباب لقيته مسكر
ندى : اكيد بتلقاه مسكر جدي قام يتسنن و شافه مفتوح و سكره و اعذروني ما اقدر اقوم افتح لكم الباب لان جدي جالس بالحوش و يدعي ربه
نواف : يووه انا كيف راح عن بالي انه جدي بيقوم يتسنن
ندى : مالكم الا تنقزون من الجدار يا حلوين
سكرت ندى الدريشة على وجيهم و راحوا العيال من جهة الحوش الخلفي عشان يطمرون من عنده و كان الجد مقبل يصلي في الحوش طمروا العيال على الحوش الخلفي و طلوا على الجد مقبل و شافوه راكع و قرروا يركضون للمجلس اذا الجد مقبل سجد و كانوا رامين نعالاتهم و مخلينها في الحوش الخلفي و رابطين ثيابهم على بطونهم عشان اول ما يسجد يركضون و اول ما سجد الجد مقبل ركضوا و كل واحد يركض بجهه و اللي يركض اول واحد كان نايف و يوم قرب يوصل تزحلق من النعالات اللي عند الباب و طاح مسكه نواف من ثوبه و سحبه معه لين دخلوا كلهم داخل و فصخوا ثيابهم وكل واحد انسدح في مكانه بس فيصل من طمرت الجدار و الركض اللي ركضه ضاق نفسه و بدأ يكح و قام له نواف على طول و عرف انه من الربو و جلس يدور علاجه ولا لقاه و علاج الربو طاح من فيصل في الحوش الخلفي يوم طمروا الجدار طلع نواف من المجلس عشان يدور العلاج و كان يركض ولا اهتم انه الجد مقبل يشوفه ولا لا وراح دور في الحوش الخلفي و من التوتر ما لقاه و راح يركض للمطبخ يدور بين العلاجات و لقى واحد و اخذه و راح يركض لفيصل و لقاه لحد الان يكح و مسك فكه بيده و بخ له من البخاخ جاهم الجد مقبل و شاف نواف ماسك فيصل اما نايف و تركي اول ما سمعوا خطوات الجد مقبل تسدحوا و سووا انفسهم نايمين
الجد مقبل : وش فيك يا نواف ؟
نواف : ما ادري فجاءه فيصل جلس يكح و عطيته علاجه
الجد مقبل : من وش يكح و هو نايم ؟
نواف : ما ادري يمكن اختنق وهو نايم
الجد مقبل : رح ارقد رح
راح نواف لمكانه و طلع الجد مقبل يكمل صلاته وهمس نواف لفيصل : ورع فيك شيء !؟
فيصل وهو بدا يلقط النفس : لا ارقد ارقد
_________•
في اليوم اللي بعده
رجعوا عائلة ام فارس و عائلة ابو نايف للمدينه و رجعوا سلطان و الجدة نورة و فضى البيت و ابتدت ام عبدالعزيز تجهز لزواج ريم و عزيز مع بعض و نزلت هي و عزيز و جهزت غرفته و كان عزيز مرره مستانس و فرحان و يجهز كل شيء بدقه و يحاول انه اذا جت غيداء و شافت الغرفة تعجبها ولا تحس بالفرق بين بيتها اللي هي فيه حاليًا و البيت اللي بتجي له و كان عزيز ينزل مع فارس للسوق و يتقضون مع بعض
اما بالنسبه لريم كانت عكس عزيز و كانت خايفه من هالخطوة اللي اقدمت عليها و اكثر شيء كانت تفكر فيه انه لو صارت مشكله مع فارس هل بتأثر في علاقة العائلة مع بعض ولا لا و زاد خوفها من قرب يوم العرس
و بالنسبه لغيداء كان شعورها متبلد و لاتقضت شيء لعرسها كانت امها و الجدة نورة هم اللي يقضون لها و كل شي كان على ذوقهم و هي ما كانت تعترض على شيء
الاسبوعين عدت على هالحال اللي كان خايف و متوتر و اللي فرحان و الدنيا مب سايعته
_________•
و اخيراً يوم الزواج
كانت ام عبدالعزيز و عيالها كلهم رايحين للمدينه و مستأجرين لهم فندق بأستثناء نواف و الجد مقبل اللي بيجون اليوم و قاعدين عشان المحل و الطلبيات اللي عليه و خلص نواف الطلبيات و كان راجع للبيت عشان يشيل اغراضه و يمشي هو الجد مقبل
و هو راجع صادف ماجد و كان معه بنت و عرف هالبنت : ارحب يا ماجد
ماجد : تبقى يا نواف مارحت لعرس اخوك انت ؟
نواف : كان فيه طلبيات على المحل و خلصتها و الحين بنمشي اكيد انتم مارح تحضرون صح
ماجد : اعذرنا يا الخوي انت تعرف الظروف و بارك لعزيز عني
نواف : يوصل و الحين انت اعذرني اغراضي كلها بالسطح بروح المها و اسلم عليها
ضحك ماجد : الله يستر عليكم
راح نواف متجه لبيته و كان نواف يقول كذا عشان اديم تفهمه و تجي للسطح
فهمت عليه اديم و كانت و هي تمشي تعجل بخطواتها انتبه عليها ماجد : هدي ترا البيت مب طاير
اديم : اتوقع اني نسيت النار شغالها عشان كذا
ماجد : خلاص وصلنا
اول ما دخلت اديم للبيت على طول راحت للسطح و لقت نواف فوق ينتظرها : خفت انتس ما فهمتي علي 
اديم : لا فهمت عليك الصراحه منقهره اني مارح احضر العرس
نواف : الله يزينها انا بصور لتس العرس كامل و اذا رجعت وريتس اياها الحين انا ابغى شماغي و بشتي اللي عطيتس اياه
اديم : نعم !!؟ خلاص صار حقي مارح اعطيك اياه
نواف :
( جبت لتس قلبي وسلمته يديتس
‏مشتريتس ومشتري معتس الهنا
كل مافيني تحت امرتس وليتس
‏قلبي وعمري وتـفكيـري و انا ! ).
جت على الشماغ و البشت يا اديم !!! انا كلي لتس بس هاتيه لان اذا جدي ما شافه معي بيغسل شراعي
اديم : طيب بشرط اذا خلصت ترجعه لي
نواف بضحكه : ابشري بيرجع لتس
راحت اديم و جابت الاغراض و عطتها نواف و ودعها و طلع متجه للمدينه
_________•
في المدينه
اخذ فيصل البنات و وداهم لصالون و بعدها راح للعيال اللي كانوا متجمعين عند الحلاق و كان الحلاق كله رقص و حماس و اللي كان عليه ماسك و قايم يرقص و اللي السفره مربوطه على رقبته و يصفق و وصل فيصل و نواف في نفس الوقت نواف نزل الجد مقبل في بيت ابو نايف و جاء الحلاق و يوم وصل صادف فيصل عند الباب و كان الحلاق في هدوء بعد الرقص اللي جاء
فيصل بتفكير : اسمع انا بدخل و انا اغني و انت كمل معي
نواف : لا والله عشان صوتي خايس تبي يبين الفرق بين الاصوات
فيصل : معليك العيال اذا سمعوك تغني بيغنون معك
نواف : يالله تقدم
دخل فيصل و أبتدأ يغني :
يا عريسنا يا بدري بادي
دامت لياليك السرور
ردد وراه نواف :
يا عريسنا يا بدري بادي
دامت لياليك السرور
كمل فيصل :
عريسنا يا عطر زاهي
غلب على كل العطور
ردد وراه نواف :
عريسنا يا عطر زاهي
غلب على كل العطور
اتجهوا للعرسان و باركوا لهم بزواجهم و بدأ كل واحد يقدم هديته للعرسان و بعدها طلعوا متجهين للقاعة
_________•
في بيت ال غانم
كانت غيداء تتجهز ولا تشرطت عليهم بشيء كانت تتجهز ماكأنه عرسها ولا حتى نزلت دمعه من عينها كانت قد ما تقدر تبين لهم انه الزواج تم برغبتها عشان تقنعهم
اما بالطرف الثاني من البيت و في مكتب نهيان كان موجود مشعل و نهيان في المكتب و كان نهيان يقنع مشعل ما يسوي مشاكل اليوم : ما اقدر اسكت ما اقدر اشوفها فضلت ولد الديره علي و اسكت
نهيان : ما فضلت احد عليك انا غصبتها
انصدم مشعل : وش تقووول !!؟
نهيان : مثل ما سمعت انا غصبتها في خطه ببالي و ابي انفذها و جاء زواج عبدالعزيز من غيداء و رح يسهل علي هالخطه
مشعل : كيف تبيني ارضى بهالشيء كيف !!؟
نهيان : مثل ما رضيت باللي قبلها بترضى الحين ولا تخاف مارح يلمسها
مشعل : كم بيقعد متزوجها ؟
نهيان : بالكثير شهر و الحين ابيك تروح ولا ترجع الا بكرا و ياويلك لو اشوفك حاضر للعرس و مسوي مشكله اذا بتحضر احضر بأدبك
طلع مشعل من عند نهيان بدون لايقول ولا كلمه و نهيان ماشال همه لانه عارف انه مشعل بيسمع كلامه
_________•
في قصر الزواج
كانت فيه غرفة لريم و غرفة لغيداء و كانوا البنات ما يقدرون يطلعون من الغرفه الا وهم متغطيات بعدين جوو اخوان ريم عشان يقدمون هداياهم لها و كانت دموع ريم على طرف اول من قدم هديته هو عزيز و كان جايب لها ساعة و قدم نواف هديته و كانت جوال و فيصل هديته كانت طقم و قاموا كلهم و ضموا ريم و كانت ريم بينهم
ندى بضحك : شوفي نواف البخيل جايب لها جوال من محلنا عشان ما يدفع
نواف : لا والله ترا دفعت عليه فلوس
ريم : معليك منها اهم شيء فكرت
ندى : والله لو تجيب لي بزواجي جوال اني لارميه في وجهك انا ابيك تدفع
نواف : اول شيء من قال انه بنزوجتس و ثاني شيء لو زوجناتس ماني مجبور اجيب لتس هديه الهدية تطلع من الخاطر
جمانه : ما تحسون انكم فليتوها هنا ترا انكتمنا تحت الغطوه
طالع فيها فيصل : ما الومتس من الجبل اللي بانيته فوق راستس
جمانه : وش نسوي لزوم الكشخه
الجدة منيرة : يالله سلمتوا على اختكم اطلعوا عشان نتنفس
نواف : افا يا جديده كاتمينتس
اشرت الجدة منيرة على البنت : كاتمين هالمساكين
رجع نواف و حظن ريم و من حظنه نزلت دموع ريم وخر نواف عنها و مسح دموعها بطرف شماغه و جت ام عبدالعزيز و سحبته من كتفه و طلعته برا عشان لا تبكي ريم زياده
_________•
في قسم الرياجيل
كان الجد مقبل يكرف نايف و تركي و جو نواف و فيصل و ضربهم الجد مقبل على رجولهم : ماتقولون لي انتم وين طسيتوا لابغيت الواحد ما عينته !!!
نواف : رحنا نسلم على اوخيتنا و جينا وش بغيتنا نسوي
الجد مقبل : رح يا فيصل جب الدلال و القدوع من قسم الحريم و رتب القدوع على الطاولات و انت يا نواف رح رتب ورا الدلخ نايف هذا جنني ما يفهم بسرعه ابيكم تبردون خاطري
راحوا و كل واحد يسوي اللي قاله عليه الجد مقبل و في نص ساعه بردوا خاطره
و جاء نهيان و اتجه للجد مقبل : وراك كرفت العيال يا مقبل فيه قهوجين و منظمين
الجد مقبل : خلهم يكرفون ما يبرد خاطري الاهم و القهوجيين نيرهم ما يبردون خاطري
نهيان : الحين تبي هالاربعه هم اللي يخدمون كل هالمعازيم اليوم !؟
الجد مقبل : انت ورا ماتروح و تشوف شغلك !!؟ اللي مسؤول عن القصر اهل العريس انت وش تبي ؟
نهيان : ليه و عبدالعزيز وش يقرب لي !؟ ولد الجيران ؟ ولد ولدي تراه
الجد مقبل : نهيان اترك العرس يقضي على خير
راح نهيان و جلس في مكانه و كملوا العيال تنظيم القاعة و شافهم سلطان و حط يده معهم و عاونهم و كان هذا كله تحت اشراف الجد مقبل و ابو نايف
وقطع شغلهم دخول مشعل اللي دخل و راح جلس جنب نهيان
طالعوا فيه العيال و كانت عيونهم تناظره و بحقد و انتبه لهم الجد مقبل و تنحنح و نبهم ما يتعرضون لمشعل عشان لا يخرب العرس
_________•
بعد صلاة العشاء في القصر
ابتدوا المعازيم يجون وكانوا العيال يركضون بين المعازيم اللي يصب القهوة و اللي يبخر المعازيم و جت الفرقة و ابتدت تحيي الحفل و كانت عيون مشعل على عزيز و كانوا كل العيال خايفين لايسوي شيء و يخرب العرس وكانوا كل العيال يكرفون الا نايف اللي فجاءه غاب عن انظارهم ولا حصلوه
و راح الجد مقبل لنواف و كان واقف معه سلطان و كان الجد مقبل معصب : رح دور نايفوه وين انحاش لا اجي و اتوطى في بطنه
نواف : ابشر ابشر
الجد مقبل : ورح جب العشا من قسم الحريم ترا تاخرنا عليه
نواف : سم ابشر
راح الجد مقبل و التفت سلطان لنواف : رح دور نايف انت و انا بروح اجيب العشا
نواف : تسوي خير و انا بشوف نايف و الحقك هناك
طلع سلطان يجيب العشا و طلع نواف يدور نايف و دار حوالين القصر ولا حصله و راح لغرفة العشا و لقاه هناك جالس و كان ياكل من الفواكه اللي موجوده و فاتح له كم علبة بيبسي و حاط شماغه على كتفه و عقاله على راسه فوق الطاقيه جاه نواف من وراه و هو مقهور منه و معصب بشكل لا يُعقل وضربه على رقبته من ورا
مسك نايف مكان رقبته و هو عارف من اللي ضربه : قبل لا الّف عارف انك نواف ( لّف عليه ) لان محد يضربني على رقبتي من ورا الا انت وش تبي بغيت اغص بلقمتي
نواف بحده : لا والله حنا من اليوم نكرف و يدينا شوي و تنخلع و انت جالس و تفطح هنا !!؟ جدي معصب و يسأل عنك قم انقلع قدامي
نايف : هد يا ابوي من العصر وانا اكرف رح انت وانا باكل لي كم لقمه و الحقك
نواف بقهر : انا اكلم الجدار ولا اكلمك بعدين الاكل هذا مب لك للمعازيم
اكل نايف حبة الجح اللي بيده ومشى قدام نواف : اففف يا نواف صاير من تالي ما تنطاق
نواف : ضبط شماغك و انت ساكت
طلعوا من غرفة العشا و شافوا انه اللعب بدا و كان جدهم ماسك السيف و مقابله عزيز و فارس و كانوا يعرضون بشكل متناغم و اول ما شافهم نواف سحب على نايف و راح يركض و اخذ سيف و طب معهم و وقف قدامهم و رفع يده لهم وبدأ يلعب و بعدها طلع الجد مقبل و بدأ يقلط المعازيم على العشا و جلسوا العيال يرقصون قدام بعض و بأستهبال و كانوا كلهم منزلين غترهم و حاطينها على رقبتهم و العقال فاتحينه و لابسينه و كانوا يستهبلون بالرقص 
_________•
في قسم الحريم
كان الرقص قايم و البنات فرحانات لانه فيه قهوجيات و منظمين قايمين بالعرس و لا رح يكرفون و بيستمتعون بالعرس و بيحللون الرقص
و كانت نجلاء تحاول في غيم و تقنعها تقوم ترقص معها : تكفين يا غيم اذا جت الطقاقه قومي ارقصي معي
غيم : ما ابي تعرفيني ما احب ارقص
نجلاء بعصبيه : عرس اخونا يا السبك اذا ما رقصتي فيه متى بترقصين ؟؟
غيم بطفش من حنتها : اااف ازعجتيني تراتس فجرتي مخي روحي لجمانه ولا ندى تلقينهم يركضون قبلتس للمنصه
و ابتدت الطقاقه تطق و تعلن دخولها على كلمات : كل ال ابو عبدالرحمن قصرهم عالي كل النشامه يدلونه
و على هالكلمات شاش راس البنات و طبوا على المنصه يرقصون لين ما انتهت الطقاقه من الطق و نزلوا و اتصلت جمانه على نايف عشان يجي ياخذ العشا وراحو ندى و جمانه و نجلاء يرتبون صحون العشا و يقسمون صحون الرياجيل عن صحون الحريم و دخلوا ندى و نجلاء لانه جمانه دقت على نايف انه يجي و يجيب تركي معه عشان يشيلون العشا و تعلمهم وش ياخذون وش يخلون و سمعت صوت الباب ينفتح و لا لّفت لناحيته و تكلمت و كانت تأشر بيدينها على الصحون اللي بياخذونها و الصحون اللي مارح ياخذونها ولا سمعت منهم صوت : وراكم ما تردون !؟
و لّفت لجهة الباب و انصدمت باللي شافته قدامها و كان سلطان طالعت فيه ولا قدرت تتحرك او تسوي شيء من الصدمه و بعدها انتبه سلطان على نفسه ولّف لجهة الباب و طلعت جمانه من غرفة العشا و صابتها حراره في جسمها و كانت تهوي على نفسها جوها ندى ونجلاء و شافوها : وش فيتس جو اخوانتس اخذوا العشا ؟
جمانه بتوتر : لا ماجو
نجلاء : تستهبلين تأخرنا على عشا الرياجيل الحين جدي بيغسل شراعنا
جمانه بحده : اسكتي جاء واحد و اخذها
ندى : ليكون شافتس ؟
جمانه بتوتر : لا ماشافني دخلت على طول
_________•
جاء وقت دخول العرسان
و اول شيء كانت ريم لان عزيز بيدخل مع فارس و دخلوا عند ريم و راحوا اخوانهم و قفوا جنبها و كان جنب ريم فيصل و جنبه نواف و اخر واحد عزيز عشانه بيطلع و اول ما شافت ريم فارس مسكت يد فيصل و ضغطت عليها
فيصل بألم : تراه ماياكل و انتي تراتس قطعتي يدي
ماردت عليه ريم من الخوف و فارس اول ما شاف ريم ما شال عينه عنها و راح سلم على ام عبدالعزيز و الجدة منيرة و امه و بعدها وقف جنب ريم
نواف بضحكه : نزل عينك عن محارمنا
فارس : خلاص صارت حرم فارس بن طلال ماعاد هي عليكم
طلعوا كلهم ولا بقى في الغرفة الا ريم و فارس و جلسوا يصورون وبعدها طلعوا للفندق
_________•
في غرفة غيداء
جتها امها و قفتها و قالت لها انه العريس بيدخل وقفت غيداء وكانت عادي حتى ما تكلفت مرره بشكلها كان بسيط حتى شعرها كانت فاكته عادي ما تكلفت فيه سمعت غيداء اصواتهم و انهم بدوا يدخلون و كان ودها تصرخ و تصايح بس ماسكه نفسها دخل عزيز و كان داخل معه الجد مقبل و نهيان و سلطان و عمانها و اول ما دخل عزيز طاحت عينه على غيداء ولا قدر يشيلها عنها و كيف يشيلها و هو يشوف حب طفولته قدامه سلم عزيز على الجدة نورة و مريم
وبعدها وقف جنب غيداء : الف مبروك يا غيداء
ماردت عليه غيداء وكان نهيان يطالعها ويهددها بعيونه عشان لاتسوي شيء و صوروا معها و جو بيطلعون عشان هم يصورون لحالهم و راح سلطان و حضن غيداء و اول ما حست غيداء بحضن سلطان داهمت عيونها الدموع و تحاول تمسكها لا تنزل بس تمردت دمعه و نزلت و اول ما حست فيها غيداء مسحتها بخشونه
همس لها سلطان : ترا عادي لو نزلت دموعك ترا مايدل على ضعفك
بعدت غيداء عنه و ابتسمت له وبعدها طلع سلطان و ما تبقى بالغرفة الا عزيز و غيداء و معهم المصوره اللي تصورهم و كان نهيان مهددها لو تبين شيء لعزيز انه رح ينفذ اللي قاله و كانت تجاريهم بالتصوير بعد ما انتهوا طلع عزيز ودخلت مريم عشان تجهزها و تطلع مع عزيز للفندق
شافت ام عبدالعزيز عزيز و قررت انه تقوله كل شيء بما انه حب يقرب من عائلة ال غانم و اتصلت على نواف و فيصل و نادتهم يجون لها فوق و كانوا واقفين معها نوف و ندى و يوم وصلوا نواف و فيصل دخلتهم في غرفة ريم و نادت عزيز
دخل عزيز و شافهم متجمعين كلهم و استغرب : وش فيكم متجمعين هنا
نواف : ما ادري دقت علي امي و قالت تعالوا ابيكم
ام عبدالعزيز : اجلسوا بقولكم شيء
جلسوا و تكلم عزيز : وش الموضوع
ام عبدالعزيز بتوتر : مب انتم مزعجيني و تبون تعرفون سالفتي مع عمانكم !!!؟ قررت اقولها لكم و كل واحد يقرر وين بيوقف
نواف : قولي نسمعك !!
ام عبدالعزيز : اول شيء ابيكم توعدوني انكم ما تسوون شيء و انا قررت اقولكم لاني عادتكم رياجيل و وكل واحدٍ منكم في راسه شورٍ يقديه
العيال بصوت واحد : طيب نوعدتس ما نسوي شيء بس قولي
ام عبدالعزيز : الكلام اللي قلته لكم قبل صح هم ماكانوا يحبوني و كان نهيان حاط اني انا حاجز بينه و بين ابوكم و في يوم من الايام رجع ابوكم للبيت متأخر و كان معصب مرره
فلاش باك قبل ١٥ سنه /
دخل للبيت و كان بعيونه يدور على ابوه و بيده ملف و شاد بيده عليه بقوة لّف البيت ولا حصله فيه بعدها طلع للمكان الأخير اللي رح يدوره عليه في البيت فتح الباب و حصله جالس خلف المكتب
تقدم له بخطوات ثابته و ضرب الملف على الطاوله : ابيك الحين تقول لي عن هالملف هل الاوراق اللي فيه صحيحه ولا مزوره !!
وقف نهيان و تقدم له : يعني جاء الوقت اللي تعرف فيه
لّف مطلق بغضب : اعرف بوش الاوراق اللي بالملف صحيحه ولا مزوره
نهيان ببرود : صحيحه
مطلق بغضب : يعني كل هالمده تلعب علي و مخليني اصرف على عيالي من مال حرام !!!!! انا رح اعلمك كيف تلعب علي كل هالسنين و الملف هذا خله عندك و نتقابل من اليوم و رايح في المحاكم يا ابوي
لّف بيطلع بس كلام نهيان دبسه في مكانه : تدري لو رحت و شكيتني عند المحاكم اني بأجر زوجتك اماني معي لاني خليتها توقع لي على اوراق تخليها ماتشوف النور لو تموت وهي حتى ما تدري على وش وقعت المسكينه
لّف عليه مطلق و ضحك بضحكه ساخره : ادري انك موقعها على اوراق و ادري اني لو شكيتك اماني رح تنجر معك بس هذا كان قبل لا اسجل صوتك و الحين بنشوف من بيجر الثاني
طلع مطلق و هو يركض و ركب سيارته وراح متجه لبيته
دخل مطلق و هوه غاضب جداً شافته اماني و جلست جنبه و حطت يدها على يده و تحاول تخفف غضبه : وش صاير معك قول لي ؟
مارد عليها وهو بنفس موضعه حتى مارفع راسه لها وهو صار ما يشوف شيء من غضبه قام و رفس الطاوله اللي قدامه برجله فزت اماني من مكانها و حطت يدها على فمها من الخوف لأنها تأكدت انه صاير شيء قوي دخل مطلق داخل البيت اخذ شيء و جاء بيطلع من البيت بس التفت لنوف اللي متعلقه برجله و تناظره ببراءه جلس على رجله بحيث يكون على طولها وهو يمسك وجهها الصغير بيدينه الضخمه سلم على راسها ثم التفت لاماني : انتبهي لنفسك و للعيال و امسكي هالملف و انتبهي على اللي فيه و اذا صارلي شيء قدميه للشرطه على طول ولا تقعدين بالبيت و انتبهي من اخواني في وداعة الله
قال كلماته و طلع و سكر الباب وراه وكانت هذي الكلمات قويه على اماني اللي ماكانت تعرف وش صاير معه عشان يقول هذا الكلام و انهارت اماني بكاء بعده وبعدها بكم ساعة جاها خبر وفاة مطلق اثر حادث سير من شاحنه ضخمه انقلبت عليه
في الوقت الحالي /
ام عبدالعزيز : وانا بعد اخر يوم في العزاء اخذتكم و طلعت من المدينه لان ابوكم قالي لا تقعدين بالبيت و انتبهي من اخواني هذي هي السالفه اللي تبوني اقولها لكم و الحين انتم تعرفون كل شيء و وين عليكم توقفون
كانوا البنات يبكون من اثر موت ابوهم القاسي و اللي اكيد تعذب و هو يموت اما نواف كان شاد على يده و بقوة و الدموع في عينه بس مو راضيه تنزل و كان فيصل متلطم بشماغه و الدموع تنزل من عينه اما عزيز كان واقف و مصنم في مكانه من السالفه اللي سمعها و كيف بيكمل زواجه بعد هالسالفه
.
.
( انتهى )
اطول بارت كتبته اتمنى تعطونه حقه عشان ما نتهاوش ☺️...