حكٍم طغى ماعاد ينفع نظامه

Part 19

رفع راسه نواف لعزيز يبي يستوعب اللي قاعد يصير قدامه و شاف راشد طالع من البيت و هو معصب و انهبل يوم شاف اديم طايحه بين يدين نواف
تقدم لهم بغضب و هو ناوي ينهي الاثنين بس فيه يد مسكته من وراء و سحبته على الجدار و ارتمى على الجدار بقوة و حاول راشد يتفلت من يد عزيز اللي مثبته على الجدار بس كان عزيز مثبته بقوه
بدأ نواف يرجع للواقع و يطلع من صدمته و يستوعب اللي قاعد يصير قدامه
فك عصبته من راسه و ستر فيها اديم و تركها و قام لراشد و دمه يفور كيف طاوعه قلبه يسوي بهالانثى الرقيقه كذا!!؟ كيف قدر انه يفرط بجمالها و يشوه وجهها و يوصلها لهالحاله !!؟ الانسانه اللي يخاف عليها حتى من نسمة الهواء كيف قدر بهالسهولة انه يكسرها كذا
تقدم نواف بغضب الدنيا لراشد و هو يدف عزيز عنه و يمسك يده و يلويها له لحد ما سمعها تطقطق و صراخ راشد يعلى بالحاره
بدت الناس تطلع على الصراخ اللي يسمعونه و راح عزيز يبعد نواف عن راشد و يحاول يفهمه انه ياخذ اديم قبل لايشوفونها الناس
ترك نواف راشد و راح اخذ اديم و كانت اديم مب واعيه على نفسها تحس نفسها في خيال اللي قاعده تعيشه الحين مب حقيقه
وقف نواف قدام باب بيت الجد مقبل و هو يسمع اصوات العيال من برا ولا يقدر يدخلها قدامهم كذا و انتظر عزيز لين يجي عشان يدخلهم
جاء عزيز و دخل العيال لحوش ام عبدالعزيز و سكر الباب اللي بينهم و فتح الباب لنواف و دخلوها لغرفة عزيز و غيداء و طلعوا منها
نواف : رح ناد امي تجي تشوفها
رفع عزيز حاجبه : ليه ان شاء الله ما اضمنك انا الشيطان موجود رح انت ناد امي
نواف بنص عين : تقولها صادق انت ؟
عزيز : اكيد صدق رح انت نادها اخلص علينا
فتح نواف الباب اللي بينهم و دخل على حوش ام عبدالعزيز و بدأ ينادي امه من الحوش و دخل على طول داخل يدور امه
ريم بخوف : بسم الله عليك وش فيك تصارخ باسم امي ؟
نواف : وينها ابيها ضروري
ريم : مدري اتوقع راحت ترقد
نواف بعجله : شوفي لي طريق ابيها بسرعه
انصدمت ريم من توتره بس ما سألته اخذت له طريق و راح نواف متجه للصالة لان امه قليل تنام بغرفتها دايم تنام بالصاله
فتح الباب اللي يفصل بين الصاله و المطبخ و فزت امه من فتحة الباب : نواف يمه وش فيك ؟
راح نواف و رفع عنها البطانيه : يمه قومي معي ابيتس بموضوع ضروري
ام عبدالعزيز بخوف : بسم الله عليك وش صاير ؟
نواف : موضوع مهم مقدر اقوله لتس هنا قومي معي
الهنوف : خوفتنا يا نواف
نواف : مافيه شيء يخوف بس بستشير امي بشيء ... بنتظرتس عند باب المطبخ تعالي بسرعه
طلع نواف من الصاله و هو ينادي ريم عشان تجيه طلعت له ريم : نواف تراك غريب اليوم خوفتني وش فيك ؟
نواف : اقولتس بعدين يا ريم نادي لي غيداء الحين
ريم بصدمه : نعم ! وش تبي فيها !!؟
طفش نواف من أسالتهم و صوت هو بنفسه لغيداء لبست غيداء جلالها وطلعت له : هلا نواف
نواف : تعالي عزيز يبيتس برا
ام عبدالعزيز بصدمه : عزيز يبي مرته و راسلك انت تناديها !؟
نواف بطفش : اي راسلني انا بسرعه امشوا
اخذهم نواف وراحوا لعزيز و شافت ام عبدالعزيز عزيز واقف و مكتف يده و ينتظرهم بالحوش : انتم وراكم بلاء قولوا وش صاير معكم !!!؟
عزيز: غيداء وش جابها ؟
نواف : هي مب دكتوره عشان كذا ناديتها
فتح نواف الباب على اديم و هو صاد و دخلت غيداء و ام عبدالعزيز و هم منصدمين من اللي يشوفونه قدامهم
ام عبدالعزيز جاها هبوط من المنظر اللي شافته قدامها و التفكير اللي راح فيها لبعيد اما غيداء راحت لاديم تشوفها و كانوا كلهم يفكرون بنفس الشيء " نواف خطف اديم "
طلعت ام عبدالعزيز لنواف و عزيز بغضب الدنيا : ايا الردي ما بقى عليك الا هي خاطف لي وحده متزوجه !!!؟ صاحي انت في عقلك شيء !!؟ و انت يا الكبير غادي مع عقل هالمبدول !!؟ وصلت معكم المواصيل تخطفون لي حرمه متزوجه صاحين انتم بالعين شيء !!!؟ لعنبوا بليسك انت وياه مخلفه عصابه انا ولا وش !؟
نواف : يايمه خلينا نفهمتس طرتي بالعجه
ام عبدالعزيز بنفس الغضب : طارت روحك قل امين رح اذلف عن وجهي الله ياخذ يومن جيتوني فيه يا كلاب بتذبحوني قبل يومي انتم !!!؟
طلعت غيداء من الغرفه وهي معصبه بعد : انتم صاحين !!؟ جايبين البنت هنا بدال ما تودونها المستشفى !!؟
نواف وهو يقصد غيداء : المستشفى في بيتنا ما يحتاج
ضربته ام عبدالعزيز على راسه : انت اسكت يا السلوقي لك وجه بعد ترد ليكون يا الكلب انت اللي ضارب البنت عشانها اخذت واحد غيرك !!؟
نواف بصدمه : افا يمه انا امد يدي على بنت !!؟ ( فتح نواف باب الشارع ) الكلام معكم ضايع فهمهم يا عزيز اللي صار و انا بروح انادي اخوها و اجي
غيداء و هي بتذبح نفسها منهم : يا عمه عيالك مب صاحين البنت منخلع كتفها الحين هي مغمى عليها لو قامت الديره كلها بتسمع صوت صراخها من الالم انا هنا في البيت ما اقدر الا ارجعه مكانه و لازم احد يثبتها بقوه و بعده لازم تروح للمستشفى يمكن لازم يتجبر
عزيز : يا يمه افهميني
قاطعته ام عبدالعزيز وهي تضربه على ظهره : وش تبي تفهمني هاه سواد وجهك انت و اخوك و انا اقول عزيز هو العاقل طلعت ما تباعدهم بالردى
عزيز : يا يمه السالفه مارح تنحل كذا افهميني اول ... حنا مرينا من جنب بيتهم و سمعنا صراخ و شوي الا وانفتح الباب و البنت طالعه و تستنجد فينا نساعدها تبينا نتركها !؟؟ الكلب راشد ما رحمها و لو قعدت بيده شوي كان ماتت على يده
ام عبدالعزيز : و عاد طرزان ما صدق على الله تجيه فرصه كذا ليه ما وديتوها المستشفى !!؟ ولا عند ابوها تجيبونها هنا ليه !!؟؟ بعدين وش موديك انت و الكلب هذاك عند جهة بيتهم !!؟ ( سكتت ام عبدالعزيز يوم تذكرت راشد و اكيد انه مارح يسكت لهم ) اخوك ليكون تعرض لراشد !!؟ ليكون بينسجن مره ثانيه بعد !!!؟
عزيز وهو داري انه الحين بينلعن شكله : يمكن يكون بس كسر يده
مسكت ام عبدالعزيز راسها منهم و هي خلاص غسلت يدها منهم ما عاد يفهمون الكلام : قم انقلع برا يا الكلب انقلع الله لا يبارك فيك انت و اخوك
اما عند نواف طلع من بيته و راح لبيت ابو تميم و شوي و فتح له ماجد الباب
انصدم ماجد يوم شاف نواف قدامه ولا يدري وش يقول و جاء بيتكلم بس سكته نواف : لاحقين على المعاتب الحين فيه شيء اهم اختك عندنا بالبيت الكلب راشد ماد يده عليه و جت استفزعت فينا و دخلت في وجهي و شنبي جيت اقولك عشان تجي تشوفها و زوجة اخوي تقول حالتها ماهيب حاله و الحين امي و زوجة اخوي معها كانك تبي تجي تشوفها حياك
انصدم ماجد من اللي يسمعه و سكر باب بيتهم و طلع مع نواف بدون حتى لا يقول لابوه شيء
دخلوا لبيت الجد مقبل و كان بالحوش بس عزيز و ام عبدالعزيز و غيداء عند اديم داخل
ماجد : وين اختي ؟
عزيز : هد يا ماجد اختك بهالغرفه داخل و معها امي و زوجتي لا تخاف عليها هي الحين مغمى عليها بس يقولون انه كتفها منخلع من قوة السحب اللي عاشته و وجهها و جسمها كله كدمات من الضرب
راح ماجد عند الباب و شاف اديم و انهبل من اللي قاعد يشوفه و يسمعه شلون ما حسوا عليها وهو ملاحظ التغير اللي صار بشخصية اخته
فتح ماجد باب الشارع بغضب و جاء بيطلع بس وقف قدامه نواف : بعد عن طريقي يا نواف بروح اذبحه
نواف : لا ماني مبعد اذكر الله و اقعد اصلاً توني مقابل ابو عباس قالي انه ابوه اخذه المستشفى
ماجد وهو يتذكر حال اخته : شوه اختي يا نواف لعب فيها الكلب ما رحم اختي اللي اخاف عليها اكثر من روحي ( انهار ماجد على الارض )  كل يوم تنضرب ولا ادري عنها !!!!؟  كل يوم تكابر و تجينا ولا كانت تبين لنا شيء ( ناظر في نواف و بتهديد ) بس روحه محد رح ياخذها غيري اني لاشهيه الموت و ما يحصله
نزل نواف لماجد يسنده و يهديه : اختك بينوخذ حقها كانه منك ولا مني بس الحين انت شد عزومك و ثبت عمرك لا تخلي اختك تشوفك مكسور كذا خل اختك لا شافتك تدري انه وراها ناس بيأخذون حقها
مسك عزيز راسه من اللي يسمعه : حق اختك الحكومه اللي بتجيبه لا انت ولا هو اركدوا الحين بناخذها للمستشفى و تاخذ تقرير ضرب و تشتكي عليه و الباقي على الحكومه مب عليكم تسمعوني !!!؟
فتحت غيداء باب الغرف و نادت عزيز عشان يجيها : البنت فيها شيء ؟
غيداء : لا ما فيها شيء بس اديم بدت تصحصح و بدت تحس بالالم لازم ارجع الكتف مكانه ابي احد يثبتها عمتي مارح تقدر
عزيز : طيب لّفي على نفستس شيء و قولي لامي تتغطى بقول لأخوها يدخل يثبتها
اومئت غيداء و دخلت و رجع عزيز للعيال : ماجد ابيك تدخل عشان تثبت اختك عشان يرجعون كتفها لمكانه
هز ماجد راسه بالموافقه و مسح وجهه بيده و فتح باب الغرفة و دخل و شاف اخته اللي طايحه على السرير و وجهها اللي الكدمات مغطيته ولا شعوريًا نزلت دمعته صد للجهه الثانيه و هو يمسح عينه بشماغه يحاول يوقف دموعه
ام عبدالعزيز انكسر خاطرها عليهم : استهدي بالله يا ولدي الله بيأخد حقكم اتركوه لربه انتم فكروا باختكم حاولوا توقفون معها و تهدونها الفتره هذي لازم تشوفكم معها ولا احد يسألها عن شيء او يجيب طاري المخنز هذاك عندها
مسح ماجد عيونه و راح يثبت اديم و جت غيداء مسكت كتفها و سحبته لين بدأ يطق بشكل خفيف
و مع سحبتها الا و صراخ اديم يرتفع بالغرفة لّف نواف لجهة الغرفة من سمع الصراخ و جاء بيدخل بس مسكه عزيز : وينك رايح يا الطيب ؟
نواف بجديه : بدخل اشوف
رفع عزيز حواجبه : بالله عليك بصفتك وش !!؟ اقول رح انثبر هناك ترا تسبدي عليك تلعب من اليوم
اما في الغرفة راحت غيداء عند راس اديم عشان تهديها : خلاص مارح نلمسه انتي هدي نفسك اخذي نفس بناخذك الحين للمستشفى يشوفون كتفك
اخذت غيداء عبايتها و حطتها على اديم و جاء ماجد شال اديم و طلعوا كلهم لسيارة نواف
و حط ماجد اديم ورا مع ام عبدالعزيز و غيداء و ركب هو قدام مع عزيز
___________•
في الطرف الثاني من بيت ام عبدالعزيز
ما كانوا فاهمين شيء من اللي قاعد يصير فجاءة عزيز طلعهم من حوش الجد مقبل بعدين نواف دخل و هو مختبص و اخذ امه و غيداء بعدين فجاءه سمعوا صوت صراخ بنت و الحين صوت سياراتهم
الجد مقبل وهو مب فاهم شيء : صاير شيء مع العيال !؟
رفع فيصل كتفه بعدم معرفة : مدري بس من تعابير وجيهم واضح انه في شيء صاير
طلعت الجدة منيرة عشان تشوف الوضع : اماني و نواف وينهم ؟
الجد مقبل : وش يدريني عنهم ركبوا هالسياره و شخطو
الجدة منيرة : ياويلي من هالعيال اكيد انهم مسوين مصيبه يارب انك تصبر امهم عليهم
فيصل يحاول يخلي الموضوع إيجابي : ما تدرون يمكن اخذها فره بالسياره عشان تغير جو ليش على طول تشأمتوا
سحبت الجدة منيرة فيصل من ثوبه بخفه : طيب انا بسألك بالله متى شفت اخوانك صاحين و اخذوا امك فره بالسيارة اخر الليوله يمكن تصير بس بتصير اذا كانت عندهم مصيبه و يحولون يقولونها لامك بدون لا تعصب الله يستر منهم ما يعرفون يركدون
فيصل : طيب يا جديده لا تنادين السوء فكري بإيجابيه شوي
ولا امداء فيصل يكمل كلامه الا و باب بيتهم يطق راح فيصل يفتح الباب و كان خلف الباب ابو عباس
فيصل بمزح : وش عندك يا ابو عباس اخر الليل ليكون علينا ديون و حنا ما ندري ؟
ابو عباس : عليكم مصيبه اقوى من الديون
فيصل بخرشه : بسم الله الرحمن الرحيم فال الله ولا فالك وش صاير ؟
ابو عباس : ليه ما تدرون ؟ نواف خطف زوجة راشد و ضرب راشد لين ما دخله المستشفى يقولون كسر يده الثنتين
فيصل بصدمه : وش قاعد تقول انت !!!؟ و نواف ليش يخطفها ؟ صاحي انت ؟
ابو عباس : اسالوا عيالكم حتى عزيز اللي نقول عاقل طلع ما يباعد نواف
فيصل : توكل يا ابو عباس ما عندك الا الخريط و الزريط
قفل فيصل الباب و هو يفكر بالموضوع اذا صدق ولا لا بس كل الاحداث اللي صارت قبل يجي ابو عباس تدل على مصداقية كلامه
الجد مقبل : منهو اللي عند الباب يا ولد ؟
فيصل : ابو عباس
الجد مقبل باستغراب : ابو عباس جاي هالوقت !؟ وش عنده ؟
شاف فيصل الجد منيرة موجودة و يدري انه اذا قال عندها السالفه رح توصل للسماء من كثر مارح تكبرها : ما عنده شيء جاي يسلم
الجد مقبل : جاي يسلم هالوقت ؟
فيصل : خلاص اقولك بعدين
عرفت الجدة منيرة انه ما يبي يتكلم قدامها : بتتكلم يا فيصلوه ولا هالعصى بتعلم على ظهرك
فيصل : مافيه شيء علينا ديون عنده و جاي يقولنا عنها
ما صدقته الجدة منيرة و دخلت داخل و لّف فيصل على الجد مقبل و بدأ يقوله اللي قاله ابو عباس كامل و شوي الا و هم سامعين صرخة الجدة منيرة
مسك فيصل راسه من شافها واقفه و سمعت كل شيء و الحين ان كانه رجال يفهمها
الجدة منيرة : والله اني داريه انه هدوءه من طلع مب طبيعي اجل متى شفنا نواف يتقبل و يمشي الوضع !!؟ يا ويل حالي فضحنا في الديره خاطف له وحده متزوجه يا ويلي ويلاه
راح فيصل يهديها بس فصلت عليه : و انت يا السلوقي ما تبي تقولي !!؟ عارف طينة اخوانك و انت بعد ما تباعدهم
فيصل : انا وش دخلني ترا حنا الحين ما ندري اذا الموضوع فيه خطف ولا لا ترا ابو عباس دايم اخباره إشاعات
وقف الجد مقبل بعصبيه : انت اسكت ولا كلمه تحاول تغطي على سواد وجه اخوانك انا اشوف هدوءه مب لله اثاريه المخنز يخطط على شين اقوى و الحمار اللي معه بس يتبعه ولا يعرف يوقفه عند حده و يعلمه
فيصل : طيب الحين ليش تهاوشوني انا تراني عرفت معكم بعدين انتظروا لين يجون و نفهم منهم الموضوع
طلعت الهنوف و ام نايف و البنات و العيال على اصوات الجد مقبل و الجدة منيرة
الهنوف : وش فيكم وش صاير ؟
الجدة منيرة و هي تون : تعالي شوفي هالكلب نواف وش مسوي
الهنوف بخوف : لا تقولين متعرض لنهيان
الجدة منيرة بضحكه ساخره : يا ليته متعرض لنهيان الولد ما يلعب الا على الثقيل
فيصل وهو داري انه الجدة منيرة الحين رح تزيد على الكلام اللي قاله : يالله استلموا السيناريو و التأليف اللي بينزلكم الحين
ضربته الجدة منيرة على رجله بالعصى : انت اسكت يا ابو راس البلاء كله من تحت راسك هالكبير عاجبتك فعول اخوك يومنك تغطي عليه
فرك فيصل مكان الضربه : انا وش دخلني بعدين انا ما دافعت عنه قلت اصبري لين يجي و نفهم منه اذا الموضوع صح ولا لا
الهنوف : خبصتونا بتتكلمون ولا لا ؟
الجدة منيرة : هالكلب نواف رايح لبيت راشد و هاجم عليه و ضاربه لين ما عض الارض و ضرب ابوه فوقها و خاطف اديم من بيتها ولا اللي معاونه على هالجريمه اخوه العود ماطقع من من المتعوس الا خايب الرجاء
كلهم شهقوا و انصدموا من اللي يسمعونه و ناظروا فيصل : لا تناظروني ترا مب انا اللي خاطفها !!!
ابو نايف : فيصل امي صادقه !!؟
الجدة منيرة برفعة حاجب : ليه ناوي تكذبني ؟
فيصل : و كذا نشوف كيف تنتشر الإشاعه ... يا جديده ترا انتي فاهمه غلط الكلام اللي قلتيه كله ما قاله ابو عباس مدري من وين جبتيه ابو عباس قال نواف بس اخذ البنت عاد ما ندري ليش اخذها و وش السبب
راح الجد مقبل و مسك نايف اللي منصدم من اللي يسمعه باذنه : اكيد انت تدري اذا الكلام صدق ولا لا
نايف و هو يحاول يفك يد الجد مقبل عن اذنه : والله اني ما ادري تراني منصدم معكم
الجد مقبل وهو يشد على اذنه : اكيد
شاف نايف الوضع كيف متوتر وحب يلطفه : مب اكيد الا اكيدين انا ما اعاون على الخطف هذا مب اختصاصي
الجد مقبل وهو مرتفع ضغطه من اللي قاعد يصير الحين : انت ورا ماتروح و تذلف عن وجهي احر ما عندي ابرد ما عندك
( لّف على فيصل ) و انت قم انقلع دور هالدشير اخوانك مشكلين عصابه على راسي و انا ما ادري اخر شيء نروح نلملمهم من السجون
طفش فيصل من كثر ما حاول يدافع عن اخوانه فسكت ما رد راح للمجلس ياخذ مفاتيح السيارة عشان يطلع يدورهم و كانوا بالمجلس راكان و سلطان و معهم فارس و كانوا يسمعون الاصوات بس مب فاهمين شيء
فارس : صاير شيء يا فيصل ؟
فيصل : ابد حركات نواف يقدح من راسه و حنا نقعد نبرر عنه لين ما يظهر
سلطان بخوف : صاير شيء لنواف ؟
فيصل بطنازه : لا بس ابو عباس يقول خطف اديم و دخل راشد للمستشفى
كلهم فتحوا عيونهم من الصدمه الا راكان اللي قعد يضحك من الصدمه : بذمتك سواها ؟
فيصل : يقولونه و جدي الحين فصل علينا و طالع ادورهم
سلطان : بجي معك نواف هذا ما يعقل
طلع فيصل و سلطان على سيارة سلطان يدورون العيال
___________•
في المستشفى
وصلوا المستشفى و دخلوا اديم و دخلت معها غيداء و الباقين جلسوا برا ينتظرونهم يطلعون
جلس ماجد على نص رجله وهو الحين كل تفكيره وين يلقى راشد و يندمه على اللي سواه في اديم
اما نواف كان واقف و مكتف يدينه و متركي على الجدار و اللي يدور في مخ ماجد يدور في مخ نواف
اما عزيز واقف جنب امه و هو يناظر الاثنين و عارف انهم مارح يسكتون لراشد و اذا شافوا راشد يدري انه مارح يقدر يسيطر على الاثنين مع بعض : يمه
ام عبدالعزيز و هي مرتفع ضغطها منهم : وش تبي بعد !؟
عزيز : روحي قولي لولدتس يتحكم بعمره لا يفضحنا مب اذا شاف راشد يتهجم عليه و اكيد ماجد اذا شافه مارح يسكت مارح نقدر نسيطر على الاثنين
ماردت ام عبدالعزيز على عزيز و راحت باتجاه نواف و مسكته من كتفه : اياني و ياك اشوفك متعرض لراشد تسمع !!؟ مالك دخل بالموضوع الحين اهلها يدرون و هم اللي يتصرفون انت مالك علاقه انت تفهمني ولا لا
نواف بتسليك : اي معليك افهم
ام عبدالعزيز : اخر مره قلت لي معليك طلعناك من السجن تراني اتكلم صادقه والله يا نواف ان شفتك متعرض للولد اني لاني امك ولا اعرفك ( ناظرت في ماجد ) شد عزومك يا ولدي الحمدلله اختك بخير و الحمدلله ما تأخرتوا على شيء هونها و تهون و الكلب اللي سوا فيها كذا الحكومه وراه مارح تتركه
طلعت غيداء من داخل و طمنتهم انه الامور الحمدلله بخير و جبرو يد اديم اما تقرير الضرب بيطلع بكرا
دخل سلطان و فيصل للمستشفى بعد ما لّفوا الديره يدورونهم اخر شيء قالهم ابو عباس انهم راحوا باتجاه المستشفى : قل والله انت وياه دامكم ناوين على مصيبه اقعدوا بالبيت لين ما يفصل جدي عليكم بس خليتوه يستلمنا لين ما لعن اشكالنا و خلى اللي ما يشتري يتفرج
سلطان بنفس عصبية فيصل : نواف انت ما تهجد ما تعرف تقر في الارض !!!؟ فهمنا انك تحب البنت بس مب لدرجة انك تدخل راشد للمستشفى و تخطف زوجته !!!!؟ يا رجال قر في مكانك خلنا نلقط انفاسنا حنا تعبنا عنك
نواف وهو يأشر بعينه على ماجد عشان يشوفونه و يسكتون لّف فيصل و سلطان عليه
سلطان ما عرفه و بالنهايه فجرها فيصل : اوووح ماجد معاونكم على خطف اخته !!!؟
ضرب نواف جبهته من غباء فيصل و عطاه عزيز وحده على راسه من ورا : الحين دريت انكم ما تباعدون امي و جدي تطيرون بالعجه اول خبر تسمعونه تصدقونه ( قالهم نواف اللي صار و سحب سلطان من يده و اخذه لماجد ) ماجد هذا ولد عمتي سلطان محامي كانكم تحتاجونه ولا شيء تراه شاطر و اسعاره رخص التراب مجاني السنافي راعي فزعات
ماجد : تسلم انت و ولد عمتك بس خلني اشوف اختي اول بعدين نتكلم عن هالمواضيع
رجع نواف و سلطان للعيال و كانوا فيصل و عزيز ميتين ضحك على نواف : وش فيكم
عزيز بضحكه : هد هد كلنا ندري حتى ماجد يدري جايب له سلطان عشان يطلق اديم من راشد بس زبدلك
سلطان شاف غمزة العيال و كمل معهم : صدمني على طول درعمني عليه بعدين يقول اسعاره رخص التراب قلت حلو اهم شيء باخذ المقسوم الا الذيب يقول مجاني !!!؟ لو اعتمدوني ترا التكاليف كلها عليك
فيصل بضحكه : ترا الكريم من ماله غيره طقوع يا الغالي
نواف : ما ودكم تعضون على شحمه و تسكتون لقوا لهم شيء يتكلمون فيه و انت يا سلطان لا تقول لماجد شيء انا بدفع لك
طلع من الغرفة اللي قدامهم ابو راشد و راشد و انصدموا يوم شافوهم قدامهم
رفع راسه ماجد و شاف راشد طالع من الغرفة اللي قدامه و يده مجبره
وقف ماجد و راح سحب راشد من رقبته و ثبته على الجدار و هو خانقه : انا ما قلت لك لو اشوفك ماد يدك عليها يدك مارح تلقاها تحسب ما وراها اهل يقومون قيامتك !!؟
راح عزيز و سحب ماجد عن راشد و بدأ يكح راشد يحاول يلقط انفاسه : اختك لو على راسها رياجيل كان ما طلعت اخر الليوله مع اثنين ما تعرفهم ولا هم محرم لها بس الله العالم وش كانت تسوي معهم
انصدموا كلهم من اللي يسمعونه كيف كان يحاول يقلب الطاوله عليهم
راح له نواف و عطاه كف كلن سمع صوته و برد خاطرهم على الكلام اللي قاله : اديم اشرف منك و من اللي خلفوك يا الوصخ هي ما شافت قدامها رجال يصونها و راحت استفزعت بالرياجيل و انت جاي ترمي على شرفها عشان تغطي على وصاختك
مسك ابو راشد ثوب نواف من وراء و سحبه عن راشد : و انت و اخوك وش دخلكم مع ابو تميم و عياله على اخر خبري كان ابو تميم ينشر خبر تجارة نواف بالمخدرات الحين رضيتوا عنه
عزيز : ابو تميم و عياله بينا حق جيره و بنتهم اختنا و دخلت في وجه الله ثم في وجيهنا و اللي بيقربها ما يلوم الا نفسه بعدين انت عاجبتك فعول ولدكم يوم انك تدافع عنه
ابو راشد : البنت زوجته يضربها يذبحها محد له دخل فيه
حاول ماجد يدف عزيز عنه بس كان ماسكه بقوه : والله انا اللي بذبح ولدك و محد له دخل فيني اني لاخليه يندم على كل يد رفعها على اختي و كل دمعه نزلت من عينها
دخلوا امن المستشفى في السالفه و فرقوهم عن بعض و اخذ ابو راشد ولده و طلعوا من المستشفى و راحوا الديره و نشروا الخبر في الديره بس ما نشروه صح بس نشروا الشيء اللي يبونه ينتشر
___________•
في الديره
رفضت اديم انها تجلس في المستشفى و تبي ترجع للبيت و لبوا رغبتها
ركبت اديم و غيداء و ام عبدالعزيز ورا في سيارة نواف و ماجد داخل يوقع على اوراق الخروج
و كانت عيون نواف كل شوي ترتفع للمرايه و يشوف اديم منها رفعت راسها اديم و شافت عيون نواف عليها و على طول صدت عنه و هي ما تدري ليش في داخلها شعور خجل منه مع انها ما سوت شيء تخجل منه
فتحت ام عبدالعزيز الدريشة و نادت فيصل يجيها و ضربت نواف على رقبته بخفه : قم حول انت
نواف : ليش احول ؟
ام عبدالعزيز : ارجع مع سلطان و عزيز عيونك ما تطمن فيصل اللي بيسوق فينا
نواف : يا يمه لا تستهبلين خلاص ركبت ارجع وراك يا فيصل انا بوديهم
ام عبدالعزيز : بتحول ولا اجي اسحبك انا !!؟
مارد نواف و نزلت ام عبدالعزيز عشان تنزل نواف : يا يمه الله يهديتس فشلتينا قدام الناس
سحبت ام عبدالعزيز فيصل و ركبته : ليه ما اشوف عينك اللي قطعت البنت فيها و ترتها و وترتنا معها تراها لسى متزوجه اركد رح دورلك احد ترجع معه ولا ارجع على رجولك
ركبت ام عبدالعزيز و ماتت غيداء ضحك على نواف و حركاته على كثر ما كان يحاول يكون مع اديم في نفس المكان حتى لو ما يكلمها اهم شيء يشوفها
راح نواف و ركب مع سلطان و عزيز و هو معصب من امه و العيال ميتين ضحك عليه
جاء ماجد و ركب مع فيصل و حركوا باتجاه الديره و وقف فيصل قدام بيت ابو تميم
نزلت غيداء و ام عبدالعزيز و بقت اديم لحالها بالسيارة راح لها ماجد يشوفها : وش فيتس يا اديم ما تنزلين ؟
اديم و هي ما تناظره : ودني لبيت عمتي ما ابي انزل هنا
ماجد : عمتي مسافره مب فيه انزلي نروح لبيتنا
اديم و الدموع امتلت بعينها : ما ابي انزل عند بشاير و اخوك
ماجد : وين اوديتس يا اديم عمتي مب في البيت حتى جود رايحه معها البيت فاضي ما فيه احد
حاول ماجد ينزلها بس ماقدر فيها و كانوا كلهم واقفين ينتظرونهم يدخلون بيتهم
نواف بفضول : وراها ما تنزل ؟
ام عبدالعزيز : و انت وش دخلك نزلت ولا قعدت واحد منكم ياخذه يرميه داخل البيت تراه دابلن تسبدي
فيصل : يا رجال اسكت امي مب طايق لك هرجه
ام عبدالعزيز : ماجد يا ولدي فيكم شيء ؟
رفع ماجد كتفه وهو ما يدري وش يسوي و اشر على السيارة : مب راضيه تنزل
تقدمت ام عبدالعزيز و راحت للباب الثاني : اديم يا بنيتي وش فيتس ما تنزلين
ماردت اديم و ناظرت ام عبدالعزيز في ماجد و فهمت من نظراته انها ماتبي تنزل بيتهم : طيب شرايك يا بنتي تنزلين معي لبيتي تقعدين معنا و مع البنات ؟
اديم : اتركوني لحالي ما ابي اقابل احد
ام عبدالعزيز : بتقعدين بالسيارة !!؟
ماردت اديم و رجعت ام عبدالعزيز عند العيال : ما تبي تنزل
عزيز : ليه وش فيها ؟
ام عبدالعزيز : ما تبي تقابل احد
نواف : شرايك اروح اقنعها انا و انزلها لكم ؟
ناظرت فيه ام عبدالعزيز بنص عين : رح وشف وش بيصير فيك
غيداء : عمه شرايك اروح اكلمها انا ؟ يمكن تقتنع ؟
ام عبدالعزيز : روحي
راحت غيداء و ركبت جنب اديم : سمعت من عمتي انك ما تبين تنزلين اقدر عرف ليه ؟
ماردت اديم و نزلت غيداء جزمتها و تربعت على المرتبه : عاد تدرين ما قد جربت انام في السيارة بتكون تجربة جديدة علي
ناظرت فيها اديم : ليه تنامين في السيارة ؟ بيتك موجود
غيداء : و انتي بعد ليه تنامين بالسيارة بيتك موجود حتى مو بس بيتك بيوتنا كلها مفتوحه لك
اديم : ما ابي احد يناظرني و يشفق علي حتى نواف اللي احبه اكثر من روحي بنظراته و هو يناظرني رحمه النظرات هذي انا ما ابيها و بيتنا حاله خاصه ما يتحاج اقول ليه
غيداء : طيب انا جتني فكره تعالي عندي بقسم الجد مقبل تنامين معي بالغرفة و نطرد عزيز لبيت امه ارتاح منه شوي لانه الفتره الاخيره منرفزني و نقفل باب الحوش اللي بين البيتين حتى البنات اذا ما تبينهم ما ندخلهم شرايك ؟ بس فيه شخص واحد ما ادري اذا قفلنا الباب بنقدر ما نخليه يطمر علينا ؟؟
ضحكت اديم و هي عارفه انها كانت تقصد نواف : السكوت علامة الرضى ضحتك هذي بعتبرها موافقه
اومئت اديم و نزلت هي و غيداء و دخلوا لبيت الجد مقبل و دخّلت اديم الغرفة و طلعت لهم : اقنعت البنت انها بتكون هنا ولا احد رح يدخل عليها و يا عمه قفلي الباب اللي بينا في ناس ما نضمنهم
نواف : حتى انتي يا غيداء صرتي زيهم
عزيز بضحكه : بلاها عارفتك بغيت تاكل البنت بعيونك
ام عبدالعزيز : معليك يا بنيتي خليها تاخذ راحتها هالحمار بربطه عندي امش ادخل قدامي
فيصل بضحكه : اذا طق باب الشارع عليكم لا تفتحون تلقونه نواف منحاش من امي و جايكم
نواف : ما تحسون انكم فليتوها من اليوم مخليكم تطقطقون علي ولا قلت شيء
ام عبدالعزيز : تعال اضربنا احسن امش قدامي اخلص خل هالليله تعدي
فتح نواف الباب اللي بينهم لانه كان مقفله و جاء بيطلع المفتاح بدون لا تشوفه امه بس صوتها وصله : خل المفتاح مكانه يا السروق
دخلوا كلهم للحوش الا عزيز لّف على غيداء اللي كانت تمشي وراهم عشان تقفل الباب : يالله وانت معهم
عزيز بضحكه : اليوم ما تبيني طاردتني ترا لو طب عليتس الحرامي مالي دخل
غيداء : ولله انت اللي ميت على نومة العيال
عزيز : والله اني ميت على شين ثاني بس هذا الموجود
توترت غيداء من فهمت قصده : رح خذ المقسوم من جدك حرام تخلي نواف لحاله
عزيز : يووه يا جدي ان شاء الله تشوفيني بكرا قطعه وحده قدامتس
طلع عزيز من حوش الجد مقبل و مر من قدام المطبخ ويسمع صوت الجد مقبل من الصاله يهزء نواف
جاء بيفرك بس شافه الجد مقبل من الدريشه : تعال يالهبيل هذا طولك و تحاول تنحاش بدون لا نشوفك !!
دخل عزيز و وقف جنب نواف و بدأ الجد مقبل في هواشهم و كل شوي يقاطعونه يحاول يفهمونه الصح بس كان يقاطعهم بضربه على رجولهم بالعصى
طفش عزيز من كثر ما حاول يفهم الجد مقبل و لّف على امه : يا يمه تكفين فهمي ابوتس حنا ما طبينا على بيت البنت و اخذناها غصب
ام عبدالعزيز : مالي دخل خلوا ابوي يربيكم شوي كود ترجع عقولكم
الجدة منيرة : سوو مصيبتهم و خلوا هالورع يلهينا
فيصل : والله انبح صوتي و انا اقول اني عرفت معكم
نواف بتمثيل للعصبيه : خلاص انا بتكلم و انتم اسكتوا
الجد مقبل : سد فمك ولا اشوف حسك مرتفع
نواف بخرشه : ابشر بس اسمعوني انا جيت هنا و شفت في حوش جدي بوك طايح ... كمل لهم اللي صار معه كامل
و يوم انه نطق عليهم الباب طلعت اديم و هي تستنجد فينا تبونا نتركها عنده و نروح يعني الله ما شفناه و بالعقل عرفناه مستحيل نخليها و لو واحد غيرنا كان سوا نفس اللي سويناه
دخلناها بيتنا من هنا و رحنا نادينا اخوها من هنا يعني ما فيه خطف شيلوه من راسكم
الجد مقبل : و انت يوم انك تطمر و تكسر يد راشد ليه
نواف : عشان مره ثانيه لا يمد يده عليها
الجد مقبل : و انت وش دخلك البنت عندها اهل يدافعون عنها
نواف : عندها ولا مب عندها النبي وش قال ؟ قال رفقًا بالقوارير و لو ينعاد قدامي نفس الموقف بسوي نفس اللي سويته
الجد مقبل : قم انقلع عن وجهي الكلام معك ضايع و لو اشوفك موطوط عندهم حشيت رجلك حش
___________•
في بيت ابو تميم
دخل ماجد للبيت بعد ما شاف اديم دخلت مع غيداء و الحين ما يدري كيف يكلم ابوه عن هالسالفه
توكل على الله و دخل للبيت و شاف ابوه و تميم واقفين و يلفون بالحوش ينتظرونه يجي
شاف ابو تميم ماجد داخل و تقدم له بإندفاع : انت وينك تطلع بدون لا تقول كلمه لاحد !!؟
ماجد : يبه اذكر الله في موضوع ابي اكلمك فيه
تميم : و ابوي صادق لمتى الطيش و حركات الورعنه
ماجد : بتسكت و تخليني اتكلم انا !؟
ابو تميم وهو يشوف تعابير ماجد مختلفه عليه : صاير شيء يا ماجد ؟
ماجد بهدوء : اي صاير و صاير شيء كبير بعد
ابو تميم بخوف : وش صاير تكلم
بدأ ماجد يسرد لابوه الحدث اللي صار كامل و تهجم راشد عليهم بالمستشفى و وقفت بيت ام عبدالعزيز معهم
انهار ابو تميم على رجله و هو يسمع اللي صار مع بنته كيف كانوا لاهين بحياتهم ولا يدرون عن حياتها و اللي يصير معه كيف كذا انعمت عيونهم عنها يعني بنته طول هالشهرين كانت تعاني من راشد و ساكته طيب لو ما طلعوا بوجهها نواف و عزيز وش كان صار فيها : اختك وينها الحين ؟
ماجد : عند جيرانا
تميم : ليه تخليها عندهم ما يصير
ماجد بعصبيه : البنت ما كانت تبي تنزل من السياره لو ما جت ام عبدالعزيز و زوجته كان ما قدرت انزلها بعدين يبي لها بنت تقعد معها و تكلمها و تهديها اما انا وياك مارح نقدر نتواصل معها
تميم : حتى ولو كان جبتها هنا عندها بشاير
ماجد بضحكه ساخره : قل والله اديم بتجلس و تفضفض لبشاير يا رجال رح
ابو تميم : طيب انا ابي اروح و اشوفها
ماجد : خلها بكرا يا يبه هي الحين ما هيب في حاله تكلم احد فيها و ازعجنا الناس نصلي الفجر بكرا و نروح نشوفها
دخل ابو تميم لغرفته بدون لايرد عليهم مصدوم من اللي سمعه
و من الحاله اللي وصلت لها بنته بسبب اهمالهم لها
___________•
و كانت هالليله ثقيله على بعضهم
اديم اللي كل ما جت تغط تصحى على كوابيس راشد و كانت تصحى معها غيداء و تهديها
اما نواف اللي ما قدر ينام و هو يحس انه اديم مستحيل يجيها النوم من الخوف و كان يدور في الحوش خايف انهم يحتاجون شيء ولا يحصلون احد
اما ام عبدالعزيز اللي كانت تطل من الدريشه و هي تشوف نواف يدور في الحوش و على كثر ما هاوشته اليوم ما اهتم و مستمر انه يحاول يحمي اديم
طلع الجد مقبل بعد ما فقده من مكانه و طلع للحوش و شافه يدور فيه و هو يسحبه من يدينه و يدخله للمجلس و ينومه جنبه و حاط رجله على رجل نواف عشان يحس فيه لو تحرك و اخيراً استسلم نواف للنوم و نام
___________•
بعد صلاة الفجر
خلصوا من صلاة الفجر و راجعين للبيت و نواف كان يسارع بخطواته يبي يوصل للبيت بسرعه
يناظره الجد مقبل و هو يضحك عليه لانه على كثر ما يهاوشه الا انه ما يفهم الكلام : تعال يا نواف
نواف : سم
الجد مقبل : انت وعزيز الحين تروحون للعزبه ولا اشوفكم الا بعد ٣ ايام عشان تعرفون تقدحون من روسكم تحسبون ما على روسكم والي
نواف بصدمه : تكفى يا جدي ٣ ايام وش اسوي فيها هناك !!؟
الجد مقبل : حتى يمكن مب ٣ ايام يمكن تقعدون لين ما تروح البنت لابوها   
نواف : طيب البنت في البيت الثاني مب عندنا وين اجيها انا ؟
الجد مقبل : ليه ما شفتك و انت تدور امس في الحوش  رح للعزبه و انطق هناك و ريح عمرك
عزيز : ٣ ايام والله لنخيس فيها نروح اليوم و ما تشوف وجيهنا الا اخر الليل
الجد مقبل : روحوا الحين و نشوف اذا عجبني شغلكم برجعكم اليوم
نواف : طيب خلنا نفطر بعدين نروح للعزبه
الجد مقبل بضحكه : يعني البيت لازم تطبه ؟
نواف : لا مب لازم بس اني جويع يرضيك اشتغل و انا جويع
ضحك الجد مقبل و كملوا طريقهم للبيت و عند الباب صادفوا ابو تميم و عياله
الجد مقبل : ارحب يا ابو تميم حياك
ابو تميم : تبقى يا ابو عبدالرحمن امانتي عندكم يا عم مقبل
الجد مقبل : امانتك بالحفظ و الصون حياك
تقدم ابو تميم لعزيز و نواف و هو يحضنهم على وقفتهم مع اديم تحت صدمة الجميع : وقفتكم هذي مارح انساها لكم
طبعًا نواف ما قدر يرد وهو لحد الان تحت تأثير حضن ابو تميم
عزيز : لو واحد غيرنا سواها البنت بنت جارنا و اختنا
ابو تميم : مب اي احد يسويها واحد غيركم هو اللي وصلها لهالحاله
ابو نايف : اذكر الله يا حسن و سلطان من الصبح اخذ تقرير الضرب للشرطة و رفع شكوى عليه بياخذ جزاه
ابو تميم : رايتكم بيضاء ما قصرتوا
الجد مقبل : يا عزيز شف درب لابو تميم
فتح عزيز بيت الجد مقبل من الشارع و راح لباب غرفته و هو يطق الباب عليهم
فزت اديم من سمعت طق الباب و هي جاء ببالها انه راشد اما غيداء ما حست لانها كانت توها غاطه
قومتها اديم و هي خايفه عشان تشوف مين اللي يطق و وقفت غيداء و شافت من وراء الستاره عزيز : لاتخافين هذا عزيز اكيد يبي شيء
ارتاحت اديم و فتحت غيداء الباب و طلعت لعزيز و عيونها تغمض من النوم : وش فيك ؟
ضحك عزيز من شاف وجهها كيف مليان نوم و هي ترد عليه و مغمضه عيونها : البسي جلالتس و روحي لبيتنا ابوها يبي يشوفها
دخلت غيداء بدون لا ترد و لفت جلالها عليها و قالت لاديم انه ابوها بيدخل يشوفها و هي بتكون في الطرف الثاني
طلعت غيداء لعزيز و حط عزيز يده ورا كتفها يجاريها بالمشي عشان لا تصقع بشيء من النوم
دخلها للحوش الثاني و طلع لابو تميم يقوله يدخل : حياك يا عم بس بنتك تبي تقابلك انت لحالك
ابو تميم : مب مشكلة
دخل ابو تميم للحوش و اشر له عزيز على الغرفة اللي موجوده فيها اديم
فتح الباب ابو تميم و شاف اديم قاعده على السرير و بخوف في هاللحظه يحس ابو تميم انه انهارت دنياه عليه و هو يشوف الخوف بعيون بنته
تقدم لها ابو تميم بهدوء و جلس جنبها : وراتس صرتي كذا يا ابوتس ؟
سمعت اديم الحنية بصوت ابوها و هي تقرب منه و تحضنه و تنهار بحضنه
و في لحظة انهيار بنته يحس انه دنياه انهارت عليه و يدعي من قلبه انه راشد يطيح بيده
بعدت اديم عنه و هي تبكي : يبه تكفى ما ابي ارجع له انا ما عاد اتحمل تكفى طلقني منه
ابو تميم و هو يمسح على شعرها : مارح ترجعين له بس ليه ما قلتي لنا ليه صابره هالشهرين تنضربين و لا تكلمتي لو انك متي تحت يده كيف كنت بعيش انا
اديم ببكاء : هو كان يهددني فيكم يقول زي ما سجنت ولد جاركم بسجن اخوانك كان يهددني فيك يا يبه انا جيت وقلت لتميم عنه قبل لا يهددني بس اخوي ما صدقني
ابو تميم بصدمه : تميم كان يدري !!؟
اديم : انا قلت له بس اكيد حكم زوجته كان اقوى عليه
ابو تميم : طيب ليه ما قلتي لي انا او لماجد !؟
اديم وهي تتذكر تهديد راشد لها : ما قدرت يا يبه ما قدرت 
قام ابو تميم بغضب و طلع من عند اديم و راح للشارع و كانوا واقفين فيه ماجد و تميم مع العيال
جاهم و بغضب قالهم يدخلون للبيت و كان الغضب واضح من عيونه
نواف بتساؤل : بسم الله وش فيه ؟
نايف : الله يستر عليهم واضح انه بيجيهم من المقسوم شيء كبير
عزيز: خليكم من الناس امشوا ادخلوا
___________•
في بيت ام عبدالعزيز
دخلت غيداء المطبخ و شافت البنات يسوون الفطور راحت و جلست على الكرسي و حطت راسها على الطاولة تحاول تكمل نومها
دخلت ام عبدالعزيز المطبخ و شافت غيداء نايمه على الطاولة : غيداء ! وراتس خليتي اديم لحالها ؟
قعدت غيداء : ابوها جاء يشوفها
ام عبدالعزيز : وش سوت اديم امس !؟؟
غيداء : يا عمري عليها كل شوي تفز تحسب راشد بيدخل عليها و اليوم يوم عزيز يطق الباب علي فزت خايفه تحسبه راشد الله ياخذه لعب بنفسيتها
دخل نواف للمطبخ يدور غيداء عشان يسألها عن اديم بس انصدم يوم شاف امه موجوده : يمه انتي هنا !؟
ام عبدالعزيز : اي هنا يعني وين بكون وش تبي انت ؟
نواف : ما ابي شيء جاي اشوفكم بس
ام عبدالعزيز : جاي تشوفنا ولا جاي تنشد غيداء عن اخبار اديم ؟
نواف : ترا ما فيها شيء لو سألت عنها كيفها هي ؟
ام عبدالعزيز : طيبه ما فيها شيء
نواف : كيف طيبه و انا اسمع اصواتهم اخر الليل واضح ما ناموا
ام عبدالعزيز : و انت اخر الليل وش مطلعك ما ترقد
نواف : ما جاني النوم المهم قولي لي انتي يا غيداء اخبارها ؟
غيداء : والله انها بخير بس كوابيسها كثيره شيء طبيعي على اللي عاشته
ام عبدالعزيز : سمعت يالله قم اطلع بيجيكم فطوركم برا
قام نواف و راح للمجلس و اخذ له ورقه من الدفتر و كتب فيها الكلام اللي يبيه و رجع للمطبخ
انهبلت ام عبدالعزيز يوم شافته : ياليل الليل هذا ما يطعم العلم تراك ذبحتني
نواف : يا يمه وش فيتس اسلوبتس تغير معي نسيت جوالي و جاي باخذه
ام عبدالعزيز : اخلص علينا و خذه
راح نواف عند الطاولة و قرب شوي عشان تسمعه غيداء و مد لها الورقه : طالبتس عطيها الورقة
ضحكت غيداء و اخذت الورقه وهمست له : ابشر
طلع نواف و راح يودع راكان اما عزيز دخل ينادي غيداء
طلعت له غيداء : وش فيك عزيز ؟
عزيز : انتي ما كنتي ناويه تروحين تزورين امتس اليوم خليني اوديتس قبل اروح العزبه
غيداء : خلها مره ثانيه مقدر اخلي اديم لحالها
عزيز : كيفتس اختاري اليوم و ابشري
طلع عزيز وراح للعزبه هو و نواف و بعده بشوي طلعت وراه غيداء عشان تشوف اديم و دخلت للحوش و شافت اديم عند الحمامات و قاعده ترجع ( الله يكرمكم )
راحت لها غيداء تركض و هي تمسك شعرها و ترفعه لين ما انتهت اديم
غسلت وجهها اديم و طلعت مع غيداء : وش تحسين فيه يا اديم ؟
اديم : مدري حامت كبدي
غيداء : انتي ما اكلتي شيء من امس اتوقع من الجوع الحين بيجي الفطور اللي يحبه قلبك
طق باب الحوش عليهم و راحت غيداء تفتحه و كانوا البنات جايبين الفطور لهم
اخذته غيداء منهم : يسلمو
ندى : افا يا غيداء جحدتينا ما هقيتها منتس
غيداء بضحك : بروح افطر مع صديقتي الجديده
جمانه : اه من غدر الاصحاب
غيداء : امزح معكم بس وش اسوي البنت ما تبي تقابل احد بس بحاول فيها انها تقابلكم لانه ما ينفع ابداً انها تقعد حابسه نفسها كذا نفسيتها بتودع
ندى : يعني متى نجي ؟
غيداء : خلوها تفطر و بعد الفطور بقولها
راحت ندى تحضن غيداء : والله اني مشتاقه لاديم ولسوالفها يا حظ اخوي دامتس زوجته
ضحكت غيداء على مدح ندى و اخذت الفطور و دخلته على اديم و كانت تحاول فيها تفطر و كانت رافضه انها تاكل بس طلعت غيداء الورقه اللي كتبها نواف لاديم و قالت لها انه نواف هو اللي كاتبه و مارح تعطيها الورقه لين تاكل
___________•
في بيت ابو تميم
دخل ابو تميم لبيته و جنون الارض ترقص قدامه و دخلوا وراه تميم و ماجد و هم مو فاهمين شيء من اللي صار
تميم : يبه صاير شيء
لًف ابو تميم على تميم و عطاه كف بدون مقدمات
انصدم ماجد من ابوه و هو مو فاهم شيء : يبه وش فيك ؟
تقدم ابو تميم لتميم و هو يسحبه من كتفه : صدق انه اختك جت و استفزعت فيك و رديتها !؟
انصدم ماجد من اللي يسمعه و لّف على تميم : لا مستحيل يسويها !!!؟ مستحيل يسمع او يدري انه اخته تنطق و تنهان و يسكت
مارد تميم و كمل ماجد : اختك من امك و ابوي امانة المرحومه امك تدري انها تنطق و تنهان من واحد كلب زي راشد و انت ساكت عنه !!!؟
تميم : انا ماكنت ادري انها بتوصل لين كذا رحت و كلمته و تفاهمت معه و قالي وقتها حضر الشيطان بينهم و هو نادم على اللي سواه
ماجد بغضب : ما اشوفه ندم دام هذا حال اختك
تميم : طيب انا ما سمعت من اديم و سكت رحت و تكلمت معه و بعدها ما جت اديم تشتكي منه فقلت اكيد عقل
ابو تميم بغضب : غلطك يوم اديم تقولك ما جيت تقول لنا المفروض من اول ما سمعت انه يضربها اخذت اختك منه و الحين قم خذ حرمتك و اطلع من بيتي و مارح ارضى عنك او اسامحك لين تستسمح من اديم و ترضى عنك
لّف تميم على ماجد : يرضيك كلام ابوك انا اقولكم اني ما سكت رحت و كلمته
ماجد : اي بالله يرضيني ابي اعرف وش اللي خلاك ما تقول لنا !!؟ اكيد الحيه حرمتك
طلعت بشاير و هي كانت واقفه ورا الباب تتسمع عليهم : انا وش دخلني لا تدورون احد تحطون عذاريبكم عليه
ضحك ماجد بضحكه ساخره : واقفه ورا الباب تسمعين !! اقص يدي اذا ما كنتي انتي اللي معبيه براسه
ابو تميم : بشاير اقطعي الشر و ادخلي داخل و انت يا تميم خذ حرمتك دام النفس لحد الان طيبه
بشاير بغضب : اصلاً انتم متى حبيتونا اديم و المشاكل كلها عذر و جاكم ... على ابسط مشكله عشانه بس نسى يقولكم حطيتونا عند الباب
ماجد : والله اني داري انه الامور كلها من تحت راستس انتي
ابو تميم بحده : ماجد خلاص اقطع حسك خلها تولي و انت يا تميم كلامي واضح معك
دخل تميم مع بشاير يشيلون اغراضهم عشان يطلعون و تميم كان مقتنع بكلام بشاير لانه من دخل الغرفه و هي تكمل على الموضوع
___________•
في العزبه
وصلوا عزيز و نواف للعزبه و بدوا يشتغلون فيها عشان اليوم يرجعون للبيت
قسموا الاشغال بينهم و كل واحد راح يسوي اللي عليه و يوم خلصوا شبوا الضو و ضبطوا قهوتهم لين ما يجي الليل و يرجعون
طفش عزيز من نواف : يا رجال اركد و اقعد يعني وش بتسوي بتسرع الوقت مثلاً
ناظره نواف بنص عين : تطقطق علي انت ؟
عزيز : ما اطقطق بس اجلس
جلس نواف و هو ياخذ الدله من قدام عزيز و بدا يصبها : افتح سالفه ولا بتلقاني واقف
عزيز بضحكه : والله و طلعت صدق تحبها
نواف : تستهبل انت !!!؟ صح يمكن ما صار لي سنه اعرفها بس والله يا عزيز لو اقولك اني كاني اعرفها من يوم انها صغيره اعرف وش اللي يسعدها و وش اللي يضيق خلقها اعرفها اذا كلمتني اذا كانت متضايقه ولا لا انت لو تدري وش اللي صار فيني بالسجن يوم عرفت انها خلاص تزوجت الكلب راشد وقتها توني عرفت راكان و هو اللي سندني و خفف علي و اكيد سلطان اللي صح ما نعرفه من وقت طويل بس والله انه في الفتره هذي صار عندي زيك انت و فيصل ما ادري كيف برد جميله علي
عزيز : والله انك صدقت في سلطان عز الله انه رجال وينشد الظهر فيه شفه من الصبح نقز و اخذ اوراق اديم و رفعها للمحكمة
نواف : والله انه طيب حتى اخته غيداء زيه الا صدق كيف حياتكم تعودتوا على بعض
تنهد عزيز : اللي يفهم شخصية غيداء ما ادري وش اقول عنه الصراحه كل يوم لها شخصيه مره تحسها تحبك و مره تحسها تكرهك توترك بتقلب شخصياتها ما تدري كيف تتعامل معها و اصلاً انا ريحت نفسي ولا عاد ابي اكتشف شخصيات جديده اصلاً حياتي معها مؤقته ليه اتعمق فيها !!؟
نواف يتعجب : كيف مؤقته ؟
ضحك عزيز ضحكة قهر : انا يوم عرفت عن سالفة ابوي ما قدرت اني اروح الفندق و اقعد فيه كأن شيءٍ لم يكن نزلتها فيه و رحت ولا رجعت لها الا الصباحيه و اعترفت لي انه هي تحب مشعل من قبل لا اخذها و نهيان هو اللي جابرها علي و تبيني اطلقها و ما خلت كلمه ما قالتها عني
نواف بصدمه : صادق انت
عزيز وهو وده انه ما يكون صادق بهاللحظه : مع الاسف
فلاش باك الفندق ~
بعد ما رجع عزيز و شاف الاكل اللي كانت مدخلته و غيداء و حذرها انها ما تعيد هالحركه
غيداء ما كان عاجبها الوضع اللي هي فيه و كانت طول الوقت مكشره بوجهها و كل ما تكلم معها عزيز ردت عليه بدون نفس
كان ملاحظ عزيز تصرفاتها
كانت شوي زايده على تصرفات خجل البنت بوقت عرسها بس كان ساكت و عاذرها او بالاساس ما كان يهمه لانه الحين سالفة ابوه ماخذه ثلاثة ارباع تكفيره
اما غيداء ما كنت تدري كيف انها تخلي عزيز يطلقها و اذا رجعت وش تقول لنهان بس جتها فكرة انها تضغطه شوي يمكن يمد يده عليها من اول يوم و يكون عذر ما فيه احلا منه : اقولك شيء
رفع راسه عزيز لها باهتمام : قولي ؟
غيداء و هي ما تدري وش تقول بس تبي تدور لها كلمه ترفع ضغطه فيها : والله انك مب رجال
انصدم عزيز من جراءته و كيف تقدر تتكلم مع واحد توها تعرف كذا : كيف ؟
غيداء : والله انك منت برجال و انا ما ابيك تدري انه جدي  غاصبني عليك !؟ يعني مب رضاء مني ما خذتك ولا لو بيدي كان مستحيل اوافق ولا ودي بواحد عايش بديره و اقصى اهتماماته حلاله و زوجة تقعد تطبخ و تنفخ له اصلاً حتى اسمك ما ابي اعرف وش ولا حتى اهتميت اني اعرفه و اصلاً طلعت منت كفو و انت تارك وحده بالفندق لحالها طلعوا اهلي منخدعين فيك
عزيز في هاللحظه ما صار يشوف قدامه بس ما كان يبي يسوي لها شيء لّف وجهه عنها و ذكر الله و حاول انه يخفف غضبه عشان يرد عليها و كان عزيز اصلاً عاقل و يقدر يتحكم على اعصابه بس لا تضغط عليه مره : يا بنت الحلال تعوذي من الشيطان هالكلام ما يطلع منتس ( كان تفكير عزيز يروح لنهيان و متاكد من كلامها انه هو اللي جبرها عليه )
تنرفزت غيداء منه و هي تشوف كيف هو يحاول يكون هادي : طلقني انا ما ابيك
عزيز : ودتس تتطلقين من اول يوم لتس !؟
غيداء : اي طلقني انت ترضى تكون ماخذ وحده قلبها مع واحد غيرك !!!؟ انا ما احبك و لو ما جيت انت و تقدمت لي كان الحين انا زوجته
عزيز وهو يحاول يسيطر على نفسه : وش هالكلام اللي تقولينه
غيداء : يعني ما تسمع اعيده انا مغصوبه عليك ولا احبك ولا اشوفك رجال و في قلبي واحد غيرك فهمتني !؟ اذا ما كان عندك كرامه لهذي الدرجة و ما اتوقع انه هذي بعيده عن واحد بدوي زيك فلا تطلقني اما اذا كان عندك كرامة و كنت رجال صدق طلقني و خلني اشوف حياتي
كان اسلوب غيداء مررره ينرفز و ما يدري عزيز كيف هو قادر يصبر عنها لهذي الدرجة و لو في يوم عادي احد قاله كذا كان مستحيل يطلع من يد عزيز عايش : اسمعي واللي رفع السماء و بسط الارض اني لأطلقتس
فرحت غيداء و بانت اسنانها من الفرحه و اردف عزيز : و كلامتس اللي قلتي عني كله بمشيه لتس انا مارح اطلقتس الحين تدرين ليه ؟
تكتفت غيداء بيدينها : ليه
عزيز : مب عشاني ... انا مب لاحقني شيء لا طلقت و من اول يوم بعد ما هو لاحقني شيء لكن اول كلمه رح تطلع هي البنت وش فيها دامها تطلقت من اول يوم ولا ليه رجالها طلقها
عقب كلامتس اللي قلتيه و ما استحيتي انتس تقولينه لي المفروض اني اطلق لكن طيبٍ مني مارح اطلق و عشانتس انتي و عشان نهيان بعد ( عزيز كان يقصد انه عشان نهيان يحس انه وصل لمراده من زواج عزيز من غيداء ) لكن بوجهي اني لأطلقتس و بوجهي اني ما اقربتس ولا اجيتس لكن خلينا نستر عمارنا حتى شهر عسل مافيه خليتس معززه مكرمه لين ما يقضي اللي بينا و بين نهيان و قتها اني لأطلقتس و الوجه من الوجه ابيض
في الوقت الحالي ~
عزيز : يا نواف اصعب شعور تدري وشهو انك لا انت قادر تملكها ولا انت قادر انك تبعد عنها على كثر ما صار بيني و بينها يا نواف اني للحين اشوفها اجمل ما حصل لي
ليه انا احسها تبيني و بنفس الوقت ما تبيني ليه هي دايم تحب تشتتني
طيب انا داري انه غيري بياخذه بس غيري بيحبها مثل ما انا احبها !؟
نواف بصدمه : انت كيف قدرت تصبر على هالكلام والله لو اني في ماكانك اني ما تحمل و اطلقها في وقتها
عزيز : ما ادري كيف ربي وقتها ثبتني على هدوئي ولا لو بالحياه العاديه كان من اول كلمه و انا مطلقها حتى ما خليتها تكمل بس اتوقع حقدي على نهيان و قتها هو اللي طغى عليها و طبعًا كلام غيداء وقتها يختلف عن فعولها بالوقت الحالي عشان كذا اقولك انا ما اقدر افهم شخصيتها 
نواف : والله طلعت تعاني يا اخوك ولا ندري عنك ما اقول الا الله يكون بعونك غيداء واضح انه شخصيتها صعبه بس انت صادق بتطلقها ؟
تنهد عزيز : على وعدي لها بثبت لها شخصية مشعل الحقيقيه منا و يعطيها ورقتها منا
نواف : الله يكون بعونك يا اخوي و الله يكتب لكم اللي فيه الخير
وقفوا نواف و عزيز من سمعوا صوت سيارات داخله للعزبه و كانوا العيال جايين باستثناء فيصل و تركي اللي كانوا فاتحين المحل
نايف بضحك : اهلين باللي نفاهم جدي
عزيز : اقول اقعد لا ننفيك حنا
فارس : والله يا انه جدي من رحتوا مافيه سالفه انفتحت غيركم يا هو منبهر من نواف
نفخ نواف صدره بفخر : من موقفي البطولي صح ؟
فارس : الا من الطاقه اللي فيك يقول مكروفين بالعشا المفروض ينهد بس مب صاحي كلنا انهدينا الا هو تقول شافط طاقتنا كلها
نواف : والله انه صادق امس كانت فيني طاقة مب طبيعيه لو يقولي امس جدي رح هد الجبل بيدك اني لاروح و اهده
نايف : انت مب مصاص دماء انت مصاص طاقه
عزيز بضحك : لا يا عيال انتم ما شفتوه امس و الله اني مدري كيف امي كانت ماسكه نفسها عنه تخيلوا وش سوا اخذ سلطان وحطه قدام ماجد ( غير صوته عزيز يقلد نواف ) هذا ولد عمتي سنافي محامي قضايا اسعاره رخص التراب مجاني اخر شيء زبدله ماجد والله لو بيده انه ليقول لماجد طلق اختك من راشد و زوجني اياها
نايف : رخص التراب اخر شيء مجاني طيب قل مجاني من البداية و خلاص يحب يطول الكلام
عزيز : والله اني امس ميت ضحك عليه على كثر ما امي تفشله الا انه صامل ما يعوقه شيء
قام نواف و حضن نايف : انت شفت ابو تميم كيف حضني !!؟ عجزت اتكلم او ارد عليه ربط لساني و يدي
فارس : لو ندري كان ناديناه من امس يربطك ولا وجع هالرأس
جاء فيصل و تركي و كانت وجيهم ما تتفسر القوا السلام و جلسوا
عزيز : فيكم شيء !؟
تركي و هو يناظر نواف : الكلب راشد مشوه سمعتك في الديره
عقد نواف حواجبه : وش يقول ؟
تركي : يقول انك على علاقة ببنت ابو تميم و انه ضاربها عشانه شافها معك و انك يوم تضربه قبل تنسجن عشانه تزوجها
___________•
في بيت ام عبدالعزيز
خلصت اديم فطورها و اخذ الورقه من غيداء و هي مبتسمه فتحت الورقه و كانت بدايتها :
( ما دام انا وانتي على الأرض حيين
يا سعد عينتس لو بكيتي شويه
والله لأنسيتس الزعل لين ترضين
و امهد لتس الدنيا فجوجٍ فضيه
و احماتس مثل حماية الجفن للعين
و كلش فداتس اليا بغيتي شِريه )
ان شاءالله هالكم بيت يقدر يسعدتس لو شوي و الله انه ودي بمقابلتس و اني اسولف معتس و اكلمتس بس الظروف محكمه و الظروف شحاح
على راسي واقفه ام عبدالعزيز لو تشوفني بس امشي بالحوش انها لتحش رجلي حش عاد انا ابي اكون قطعه وحده في اشياء كثيره ببالي بنسويها انا وياتس ولازم اكون كامل و عندي لتس بشاير
و اول بشاير الخير طلاقتس من الكلب قريب سلطان رفع لتس شكوى عليه
و ابشرتس انه ابوتس اليوم جاني وحضني انا متخيله انتي نقول فال خير ان شاء الله
الامور بدت تزين يا روح نواف انتي بس ناقصها ضحكتس
انتبهي على عمرتس يا روحي انتي و مب اخر تواصل بيني وبينتس و اي صح حاولي تقردنين غيداء عشان تصير هي حبل التوصل بيني و بينتس كلميها انتي لو جيت و كلمتها انا بتفصل علي تراها صايره تخوفني اخذت طبوع اهلي
المهم طولت عليتس انا لا مسكت خط ما سكت انتبهي لعمرتس فمان الله
انتبهت غيداء لابتسامة اديم اللي ما فارقت وجهها من اول ما فتحت الرسالة : اخيراً شفنا سنونك الله يجزأ نواف خير اللي قدر يوريني اياها
اديم : انتي وش فيتس مخوفه نواف ؟
غيداء بضحك : انا مخوفته ؟
اديم : اي انتي يقول اقنعيها تكون حبل التواصل بينا و انتي كلميها لانها صارت مثل طبوع اهلي و صايره تخوفني
غيداء : ياربي مب صاحي يبي يتكلم معك بس مب عارف كيف يفتح سالفه المهم دام نواف قدر انه يبين ضحكتك شرايك ننادي البنات و نقعد نسولف هنا و نضحك ؟
اديم : كيفك
قامت غيداء و راحت للبنات و نادتهم كلهم و كلهم طمروا للمرايه يضبطون اشكالهم
الجدة منيرة وهي زاريه عليهم : والله لو اني راسله وحده منهم تسوي لي شغله انهن ما يفزن كذا
ام عبدالعزيز بضحكه : اكيد للبربره و الهروج يطمرن
طلعوا البنات و دخلوا على اديم و سلموا عليها : عاش من شافتس يا اديم
اديم : عاشت ايامتس
ندى : ماشفتي لنا عنتر يمشي من ولا من !؟
اديم بتفكير : من عنتر ؟
ندى بضحكه : و من غيره نوافوه له كم يوم مجننا امي تشوفه امس يدور بالحوش تقول مقروص اخر شيء رحمه جدي و نومه بحضن عشان لا يتحرك
غيداء : وراء هالمود الحلو و الضحكه اللي ما فارقت وجهها عنتر
جمانه بصدمه : يهبى مجنون ذا كيف وصل لها !!؟
غيداء : رسايل و انا المندوب الحب بينهم
ندى : يا قدمكم ما انقرضتوا انتم ؟
نجلاء و هي حاطه يدها على بطن ريم : اسحبي عليها غيرانه منكم خليتس على هذا الصغير اللي في بطنها اللي انا اكون عمته
ندى : يا قرده دامتس عمته
نجلاء : اقول اسكتي يا قرده دامكم خواله
ندى : اها سبتنا كلنا غيداء دافعي بلسان عزيز و انتي يا اديم دافعي بلسان عنتر و نوف تدافع عنها وعن تؤامها و عاد انا اللي بغسل شراعها
جمانه : تهبى اثرها ما تباعد اخوانها اجل انا اعتبروني عمته بوقف مع نجلاء
ندى بضحكه : والله لو توقفين من هنا لبكرا مب طالع بيدتس شيء الولد لا طاب طيبه على خواله و لا ردى حظه على عمانه
انقهرت نجلاء منها و فصلت على غيداء : انتي متى تحملين عشان لا طلع ولدهم ردي يصير على عمانه
ندى : طيب ولا طاب طيبه على خاله اللي هو سلطان انتم وش دخلكم
جمانه : والله ضغطتنا الكلبه
نجلاء : خلاص اجل لا تحملين
ندى : ليه ان شاء الله ناويه تقطعين ذرية اخوي !!؟
توترت غيداء من هالسالفه و تناظر حولها تحاول تغير هالسالفه و شافت لوحاتها اللي راسمتها و راحت لها توريهم : شوفوا انا هاللوحه راسمتها هدية لسلطان و ما تدرون كم قعدت اشتغل عليها عشان تطلع بهالشكل و هو كان وقتها يترجاني عشان يشوفها و اخيراً خلصتها عاد باخذ رايكم فيها
لّفت غيداء عليهم اللوحه وهي تشوف تعابير وجههم مب عارفين من اللي في الصوره : وش فيكم مب حلوه ؟
ريم : الا حلوه سلطان و عرفناه بس من اللي معه بالصوره ؟
غيداء : هذولاء عمتي و عمي الله يرحمهم امه و ابو ه طبعًا هم ماتوا وهو صغير و مالهم صور مع بعض فحاولت اجمع صورهم مع بعض و طلعت بهالشكل شرايكم
نوف : مرره تجنن
اديم : تستاهل الوقت اللي راح عليها
جمانه : يا عمري عليه اكيد بيستانس اذا شافها
غيداء بغمزه : يا عمرك عليه اكيد بيستانس
جمانه بتصريف : طيب هاللوحه الثانيه لمين !؟
راحت جمانه و كشفت عن اللوحه و كانت صورة عزيز
ندى بتصفير : توني ادري انه اخوي حلو كذا
اخذ غيداء اللوحه و غطتها : وش اسوي طفشت ما فيه احد ارسمه قلت ارسم عزيز
جمانه : انا من تزوجتي عزيز و انا اقولتس ارسميني بس بالتس مع عزيز
اديم : وش فيكم عليها عادي زوجها و ترسمه
ندى : قلتيها يا اديم زوجها ليش هي قعدت تبرر كذا
تقدمت غيداء لندى : حبيبتي ندى مب تروحين و تقولين لعزيز اني رسمته
ندى : ابشري بس بشرط تقنعينه يوديني انا وياتس السوق ولا البقاله ولا اي شيء اهم شيء نطلع
.
.
( انتهى )