حط نواف المحافظ عند الباب اللي داخل و راح وقف عند باب المجلس و كانت عيونه على اديم لين دخلت و هو مستغرب وش اللي قلبها فجاءه و كانت اديم مرجعه لهم المحافظ و هي معبيه بعضها اكل كشكر لهم و دخلت سلمت عليهم و تشكرتهم على الشيء البسيط اللي سووه معها و جلست معهم شوي
ندى بترحيب : تو ما نور البيت يا اديم
اديم : بنورتس
جمانه : وين الغيبات يا اديم ولا بس تجينهم اذا ما كنا فيه
اديم : ما جت فرصة ولا جمعتكم ما تنمل
نجلاء : ان قاله الله عندنا عرسين و كلها معزومه عليهم
جمانه : عرس اخوانهم و لازم تحضرين واحد بعد اسبوعين و الثاني لسى ما تحدد يمكن يروح يخطب بكرا
تجمعت الدموع بعيون اديم و هي حاطه انه واحد منهم بيكون عرس نواف و جمانه كانت تقصد بأخوانهم انه فارس اخو نجلاء و عزيز اخو البنات : الله يوفقهم
قامت و كانت بتطلع جمانه : وينتس رايحه توتس جايه
اديم وهي تداري دموعها لا تنزل : اخواني ينتظروني بالبيت مقدر أتأخر عليهم اشوفكم بعدين
طلعت من عندهم اديم و البنات كانوا مستغربينها اليوم
ندى : تحسون فيها شيء !؟
جمانه : اي كأنه ضايق خلقها
نوف : خلوا البنت يمكن صاير لها شيء مع ابوها ولا اخوانها
ندى : ولا اخوتس نواف ولا نسيتوا سالفتهم !؟
جمانه : الا صادقه
نجلاء : انتم شفتوا عيونها امتلت دموع فجاءه
قطع كلامهم نواف اللي ينادي ندى قامت له ندى وطلعت له : وش فيك !؟
نواف و هو ما يدري كيف يسألها : من اللي جايتكم
ندى و هي تحاول تسيطر على ابتسامتها : بنت جارنا
نواف : غريبه تزوركم و ابوها ما يدانينا
كانت ندى تبي تأكد شكوكها و تشوف اذا بيسأل عنها ولا لا : والله مدري حتى ما طولت كانت كأنها زعلانه و ياقلبي عليها الدموع بعيونها
نواف بتساؤل : ليه وش صاير !؟
ندى : و انت وش دخلك تسأل عنها
نواف : بس كذا احاول افتح موضوع معتس احس اني من زمان ما سولفت معتس
ندى : ودني البقاله و اسولف معك باللي تبي
نواف : دزيها بس اوديتس بعدين و الحين روحي جهزي لنا شنطة ملابس انا و اخوانتس عشان اليوم بنمسك الخط
ندى بفرح : الله اليوم بتروحون تخطبون لعزيز !؟
نواف : لا بكرا بس اليوم بنمسك الخط و بكرا نخطبها
ندى : اخيراً بديتوا تتزوجون عشان افتك منكم واحد واحد راحت ريم و عزيز و باقي انتم
نواف : بنزوجتس قبلنا
تنهدت ندى : خله يجي اول
نواف برفعة حاجب : اكشخ يا التنهيده عاد تدرين انه انتي اذا جاء احد و تقدم لتس مارح اوافق مارح اخليتس تروحين عني
تخصرت ندى : ليه !!؟ ليكون بتوقف بنصيبي بعدين انت بتتزوج و انا اقعد عانس عند امي
نواف : اي هذا اللي ابيه عشان تقعدين مع زوجتي ولا تطفش المسكينه لحالها هنا
ندى : يعني انتم تبوني بس لحريمكم امحق اخوان
جاهم فيصل و شافهم واقفين : وش عندكم هنا و انتي كل ماشفتس بس تتكلمين فمتس ما يسكت !؟ روحي رتبي اغراضنا ترا الحين بنمشي
ندى : تعال شف اخوك يبي يوقف بنصيبي اذا تقدم لي احد بيرفضه
فيصل بضحك : انتي الحين خليه يتقدم لتس بعدين نشوف اذا بيوقف بنصيبتس ولا لا و بعدين اللي بيخطبتس امه داعية عليه
تحمست ندى : الا والله داعية له دعوة بليلة القدر يبوس يده وجه و قفى اللي بياخذني
فيصل : هدي يا الطيبه وراتس متحمسه ترا لسى محد تقدم لتس
نواف : لو ادري انتس ميته على الزواج زي كذا كان ما قلت الكلام اللي قبل شوي و الحين تراني سحبته و اول واحد يطق بابنا عشانتس بنوافق و نخليه يبلش معتس
لفت ندى وراها و شافت امها واقفه تسوي القهوة : ليه طايحه بكبدكم عشان ترموني على اول واحد !؟ يممه تعالي شوفي عيالتس بس يطقطقون علي
ام عبدالعزيز : انتم وش فيكم عاقبتوها اتركوها عنكم
فيصل : نطقطق عليها
نواف : صايره ما عاد تتقبلين مزح
ندى : الا اتقبل بس ودني البقالة و بعدها بأتقبل كل شيء
نواف : يالله روحي البسي نعالتس و تعالي
راحت ندى تركض تلبس عبايتها و نعالها و ضحك نواف عليها : الدلخه صدقت
ام عبدالعزيز : حرام عليك وراك تلعب عليها
نواف : مقدر تضحكني
ام عبدالعزيز : الله يصلحكم بس
راح نواف للسطح لانه قال لاديم انه بيكلمها رقى فوق و صوت عشان يشوف اذا فيه احد بالسطح ولا لا بس ما كان فيه احد ولا كان يدري كيف يناديها تعلق على الجدار و طل على سطحهم و كان بيده احجار صغيره رفع نفسه لين جلس على الجدار من فوق عشان يرمي الاحجار على الباب و تسمعه اديم رماها على باب السطح حقهم ولا كان فيه رد و ظل يرمي لين سمعته اديم و جت و كانت عارفه انه نواف لانه قالها يبي يكلمها
جت و كانت لافه عليها جلالها و يوم فتحت الباب انصدمت من نواف اللي كان جالس على الجدار : غبي انت انزل قبل لا احد يشوفك
نواف : قبل ما انزل ابيتس تقولين لي وش اللي قلبتس كذا فجاءه
اديم بتحفظ : ما فيه شيء قلبني و خلاص ما عاد ابيك تكلمني !!
نواف و هو منصدم منها : كذا فجاءه !؟
اديم : اي كذا فجاءه و انزل قبل لا احد يجي يشوفك بعدين انت ما عندك مشوار تروح له !!؟
نواف : الا عندي
اديم وهي تداري دموعها : خلاص رح اخاف اذا تاخرت على الناس ما يوافقون عليك و تصير تمشي و تطقطق على بنات الناس
نواف وهو مب فاهم شيء : انتي فعقلتس شيء من ما يوافق علي و من بنات الناس اللي طقطقت عليهم !!؟
اديم : لا تحاول تخبي انا سمعت كل شيء
نواف بعصبيه خفيفه : وش سمعتي قولي بسرعه لا تراوغين بالكلام !؟
انفجرت اديم عليه و هي تحاول تسيطر على دموعها لا تنزل : سمعتك و انت تكلم اخوك و تقوله انك تحب بنت عمك و تقول انه لازم مشاكل لين تأخذها بس شكل المشاكل هذي راحت و تسهلت لك الأمور و الحين رايح ناوي تخطبها و كنت تتسلى معي و اصلاً انا الغبيه شلون اكلم واحد مب محرم لي و مكلمني اكيد مكلم غيري بس خلاص انت علمتني و عطيتني درس مارح انساه ابد ( سمعتهم اديم ينادون نواف عشان بيمشون ) رح قبل لا تتأخر عليهم
ضحك نواف بصخب و عطته اديم نظره : صادق انك تضحك لقيت وحده تلعب عليها
نواف : انتي وراتس تفسرين الأمور على كيفتس !؟تعصبين و تزعلين بدون لا تسأليني !!؟ صح اللي سمعتيه انا احب و ان شاءالله انها تكون من نصيبي و الله يعيني على المشاكل اللي بتصير لين اخطبها بس البنت هذي مو بنت عمي يا بنت انا عماني ما اعرفهم عشان اعرف بناتهم البنت اللي ابيها تكون حلالي انتي و انا قصدي بالمشاكل هي اللي بيني و بين ابوتس ما اتوقع اني بجي اتقدم لتس و ابوتس بيعطيني اياتس بارده مبرده انا ابيتس انتي مب احد ثاني
( ما بغيتس بالحرام و ما بغيتس بالظلام
ما بغيتس غير بالعز الشريف المهتدي
ما بغيتس بالتلاعب ما بغيتس بالكلام
ما بغيت الا اخوتس يكون خال لـولدي )
اي والله ما ابغى الا اخوتس يكون خال لولدي
انحرجت اديم من كلامه و ندمت انها تسرعت و ظلمته ولا رفعت راسها له لانها كانت منحرجه مرره منه ناظر فيها نواف ثم اردف : ما عرفتس طلعتي تستحين وين لسانتس اللي قبل شوي
سمعتهم اديم للمره الآلف ينادون نواف عشان بيمشون : لساني موجود بس انت رح قبل لا ينفجرون عليك
نواف : والله و طلعتي تحبيني و تغارين
اديم بتصريف للموضوع : مب قصة حب بس انت اللي مسليني اخر فترة و ولا كنت ابي صديقي يروح عني
نواف : اي صدقتس المهم صديقتس بيمشي قبل لا يكفرون فيه اللي تحت تبين شيء
اديم : لا سلامتك
نواف : يالله مع اني ما شبعت منتس لسى بس وش نسوي استودعناتس الله
اديم تدعي انه الارض تنشق و تبلعها منه : توقع للطريق
____________•
في بيت ال غانم و تحديداً بالحديقة
جالسين و يفطرون بالحديقة و كان كل شوي واحد من عمانهم يدخل عند نهيان ولا هم عارفين وش السالفة وانتهوا بأخر واحد دخل اللي هو مشعل و قفل الباب وراه
التفتت غيداء لسلطان بفضول : تتوقع وش عندهم ؟
سلطان : الفتره الاخيره اسمعهم بس يتكلمون عن عيال عمي مطلق اكيد انه الموضوع عنهم
غيداء بتساؤل : انا ودي اعرف هم ليش يدورون عليهم زي كذا !!!
سلطان : يعني اكيد انه نهيان ما يدورهم زي كذا عشانه يحبهم ولا عشانهم عيال ولده المرحوم اكيد يبي شيء من وراهم
غيداء : الحين وش يقعدني لازم اعرف وش الموضوع
سلطان : ولا تاكلين هم بروح عندهم و اشوف الموضع وش و ارجع لك
غيداء : لا تتمشكل معهم
سلطان : معليك بس انتي روحي سوي لي قهوة لين ما افهم الموضع و اجيك
قام سلطان من عندها و راح بأتجاه مكتب نهيان عشان يشوف وش الموضوع و كانوا كل خواله متجمعين هناك فتح الباب و التفتت عيون اللي بالمكتب عليه
دخل و قفل الباب وراه : كملوا وراكم سكتوا !
نهيان : انت وش جايبك هنا ؟
جلس سلطان وحط رجل على رجل : مو تقول اهتم بأشغالنا و عاون ولد خالك هذا انا جيت
التفت نهيان لمتعب : كمل وش قالك ؟
متعب : اتصل علي عبدالعزيز و قال انه بيجونا بكرا
نهيان : ما قالك من اللي بيجي !؟
متعب : لا ما قال
نهيان : غريبه اماني سمحت لهم يجون !!
فهد : يمكن هي جايه معهم ولا ما اتوقع انها بتخليهم يجون
نهيان : المهم ابيكم تسوون لهم بكرا استقبال حسسوهم انه مافيه بينا مسافه ( التفت لمشعل ) و ابيك انت تروح تحجز لهم في احسن فندق عندنا ... ولا رح انت يا سلطان احجز لهم و انت يا مشعل ابيك بشغله و ابيك تقول لي وش صار معك يوم كنت عندهم
بدأ مشعل يسرد لهم اللي شافه هناك : مثل ما قال عمي متعب لقيتهم في نجد و لقيت عندهم خالهم عبدالرحمن و ماخذين لهم بيتين هناك واحد لعيال عمي مطلق و امهم و الثاني لجدهم و البيتين جنب بعض
نهيان : وشلون كانت ردة فعلهم يوم قابلوك !؟
مشعل : كانت ردة فعل عاديه استقبلوني و رحبوا فيني
نهيان : طيب مقبل و عبدالرحمن كيف كانت ردة فعلهم يوم شافوك !؟
مشعل : يوم دخلت طلعوا مع عزيز و كانوا عادي ما تكلموا معي كثير بس نواف احسه ما بلعني مره لانه ماكلمني ابد ولا قابلته و حتى النوم ما نام معنا عكس اخوه عزيز يعني عبدالعزيز كان يرحب فيني
هز نهيان راسه بهدوء : يالله كل واحد يروح يشوف شغله و يسوي اللي وصيته عليه
طلعوا من عنده و كل واحد راح يسوي الشيء اللي وصاهم فيه نهيان الا سلطان راح يدور غيداء عشان يتقهوى معها راح و حصلها في نفس المكان اللي كانوا جالسين فيه : سويتي القهوة ؟
غيداء : اي تعال
جلس سلطان و مدت له غيداء كوبه : وش صار داخل ؟
سلطان : زي ما توقعنا الموضوع عن عيال عمي مطلق
غيداء : وش يبون منهم !؟
سلطان : وش يبون منهم ما ادري بس حبيب قلبك مشعل اليومين اللي اختفى فيها نهيان كان راسله لهم
غيداء : يعني حصلوهم
سلطان : اي محصلينهم حتى اليوم ولدهم عزيز مدري عبدالعزيز داق على ابوي و قال له انه بيجي بكرا
غيداء : جدتي تدري ؟
وقف سلطان يوم شاف متعب يأشر له عشان يروح معه : والله ما اتوقع انه نهيان شايلهم من ارضهم عشان يقول لهم
غيداء : طيب اجلس وينك رايح
سلطان : ابوي يناديني و انتي ادخلي لا تبردين هنا
راح سلطان لمتعب و جلست غيداء شوي بالحديقة بعدين دخلت
____________•
في محل ابو تميم
كان ابو تميم جالس على الحسابات و تميم كان يهتم بزباين المحل و ماجد معه
ابو تميم : يا ماجد اهتم انت بالزبون و انت يا تميم تعال ابيك
ترك تميم الزبون لماجد و راح لابوه : سم يبه
ابو تميم : لمتى و انا ابوك بتجلس بدون حرمه ترا عمرك يمشي متى بتجيب لك ولد يشيل اسمك لا قضى عمرك ؟
تميم : مالك لوى يبه بس تكفى فكني من هالسالفة
ابو تميم : افكك ليه يا انك ترجع حرمتك ولا ندور لك وحده غيرها
تميم : حرمتي مارح ارجعها و الزواج من وحده ثانيه اعفني عنه انفداك انا مانيب ناقص مشاكل كذا عايش و مرتاح
ابو تميم : ترا والله لازعل عليك زعل اذا ما اخترت وحده من الثنتين بعدين امك الله يرحمها كانت تبيك ترجع زوجتك ما ودك تلبي رغبت امك هذي
سكت تميم بدون رد و اردف ابو تميم : فكر و انا ابوك فكر بس الكلام اللي قلته حطه بين عيونك و انت تفكر
حاسب ماجد الزبون ثم راح جلس معهم و طالع فيه ابوه و كمل عليه : وانت بعد متى ناوي تتزوج
ماجد : يبه رجعنا على الطير ياللي توني جالس ما قلت بسم الله بعدين توني صغير انت الحين خلص من تميم بعدين عود علي
ابو تميم بتأفف : صدق اللي قال يكبرون العيال و يكبر همهم معهم
____________•
صباح يوم جديد بالمدينه
في اليوم اللي وصلوا فيه للمدينه جت رساله على جوال عزيز من متعب انه انحجز لهم في فندق بس الجد مقبل و ابو نايف رفضوا انهم يروحون له و راحوا لبيت ابو نايف اللي بالمدينه و كانوا كلهم جايين الا تركي و فارس جلسوا عند الحريم عشان لو بغوا شيء و جلسوا اعقل واحد لانه ما يقدر الجد مقبل يعتمد على نايف و يخليه هو اللي يهتم فيهم و يوم وصلوا للمدينه و انتظروا لين الفجر صلوا و ناموا لين الظهر قاموا و راحوا صلوه و رجعوا العيال يكملون نومهم لانهم تقريباً وصلوا للمدينه متأخر
و قطع نومهم عصاة الجد مقبل اللي يضربها على الباب : قوموا لحد الحين نايمين لو انكم في الديرة كان من الفجر وانتم واقفين اثاري المدينه تخرب الواحد قم انت وياه
فيصل : يا جدي الله يهديك تقومنا ليه يعني لا فيه خاروفٍ نطرده ولا ناقةٍ نحلبها ولا نارٍ نشبها بس تقومنا عشان نقابل بعض !!! عاد من الزين السوالف اللي بسمعها
الجد مقبل : انا ولدك يا ابوي تسب سوالفنا !!
نايف حب انه يفزع عشان يسكرون السالفه و يكمل نومه قبل لا يطير : ما يقصد
الجد مقبل : و انت من حاطك محاميه له قوموا اخلصوا علي الناس مواعدينهم العصر على بال ما تقومون و تبلعون قدهوا مأذن ترا ما يذوق العز خمام الوسايد
مسح نواف وجهه بيده : مستحيل جدي يقومنا بدون لا يقول هالكلمه
الجد مقبل : طيب قوموا عشان لا تسمعونها
قاموا العيال و راحوا ضبطوا لهم قهوة و جلسوا مع جدهم و التفت نواف على مكان عزيز : اشوف العريس متحمس شكله ما رقد
نايف : بدري على كلمة عريس ما ندري يعطونه ولا لا
نواف : ابك فيه احد صاحي بيرفض عزيز !! صاحي انت علي بالملازيم لو انه مب اخوي و عندي بنت ما ازوجها الا عزيز
نايف : عاد انت شهادتك مجروحه فيه
نواف : انا اشهد انها مجروحه
قطع كلامهم دخول عزيز و ابو نايف بالأكل و راحوا غسلوا يدينهم و فرشوا الاكل على السفره و بدوا يأكلون
____________•
في بيت ام عبدالعزيز
كانوا الحريم جالسين مع فارس و تركي عشان ما يكونون لحالهم و البنات كانوا يتمشون بالشارع الخلفي و ماخذين راحتهم لانه مافيه احد من اخوانهم بيكشفهم انهم طالعين
و كان عليهم برد مرره و كانت ندى ماخذه فروة فيصل و لابستها و من البرد متحاشره معها جمانه : اففف يا جمانه ما لقيتي الا تحاشريني !!! لو اني داريه كان جبت فروة عزيز اكبر من فروة فيصل هالمسكين اللي يالله تاخذني انا لحالي
جمانه : وش اسوي بررررد بعدين تكسبين فيني اجر ترا
نوف : كان جبتي فروة نواف تأخذكم
ندى : ابك هذي دلخه انا اقول لو ادري انها بتحاشرني بجيب فروة عزيز مب عاد نواف
جمانه : بعدين نواف هالمعصقل فروته بتاخذنا !!!؟
نوف بضحك : هو يشتري فروته اكبر منه عنده اعتقاد انه اذا شراها كبيره بتدفيه اكثر لانه بيقعد يلفها عليه لين ربي يفرجها
ندى : ما لقيتها شكلها بالسطح و مالي خلق ارقى السطح اجيبها الا على طاري نواف تدرون انه جاني امس يوم طلعت اديم من عندنا و جلس يسأل عنها
جمانه بحماس : كذاااابه وش قال !!!؟
ندى : يقول من ذي اللي عندكم و بعدين انا عشان أتأكد و اتخلص من شكوكي قلت له انها اديم و قلت بعد انها كانت شوي و تبكي عندنا و تأكدت و تخلصت من شكوكي
نجلاء : وش طلعتي من هالموضوع ؟
ندى : طلعت بأنه نواف يحب اديم و تأكدت بعد لو تشوفون كيف سأل عنها يوم قلت انها كانت تبكي
نوف : و انتي وش قلتي له
ندى : قلت له وش تبي تسأل عنها
نوف : و وش قالتس هو ؟
ندى بضحك : قال احاول افتح سالفه معتس من زمان ما جلست و سولفت معتس و اخر شيء قالي بروح اوديتس البقاله البسي نعالتس و تعالي و سحب علي
جمانه بضحك : و انتي دلخه صدقتي
ندى : و انا دلخه صدقت رحت لبست و يوم طلعت لقيتهم منحاشين
نجلاء بضحك : والله و طلعتي مخفه كنت خابرتك ذيبه
نوف : هذاك اول ذيبه الحين يجونها نواف و فيصل يطقطقون عليها و يمشون
طقت الحميه عند جمانه : حدكم عنها تراها ذيبه حتى هي تطقطق عليهم
صفقت ندى لجمانه : كفوووو كفك
جتهم ريم و هي معصبه : وينكم انتم امي تدوركم وتراها معصبه امشوا قدامي
ندى بضحك : انتي ليتنا ماعطيناتس لاخو نجلاء الخايس من تالي و انتي متغيرة
ريم : امشي و انتي ساكته
ندى : ابشري
جمانه : ابوك يا العصبيه
نجلاء : الله يعين اخوي شكلها بتمشيه صح
____________•
في بيت ال غانم بعد صلاة العصر
وصلوا الجد مقبل و احفاده للبيت و استقبلهم نهيان و عياله و كان يرحب فيهم و هم منصدمين من الأشكال اللي اول مره يشوفونها بأستثناء الجد مقبل و ابو نايف اللي اول ما دخلوا المجلس جلسوا لانهم عارفينهم و جايين مجاملة لعزيز
راح نهيان للعيال عشان يتعرف عليهم و راح لعزيز لان من شكله بين اخوانه كان باين انه هو الكبير فيهم : انت عبدالعزيز؟
عزيز : اي نعم
ضمه نهيان بدون مقدمات عشان يعبر عن اشتياقه لهم و كانوا وراه عياله و يسلمون عليهم التفت لنواف و انصدم من قوة الشبه اللي بين نواف و ابوه : انت اكيد واحد من عيال مطلق يا سبحان الله يا انك تشبه ابوك تقول نسخه منه
نواف بتحفظ : تسلم
نهيان بضحكه : طيب عرفنا بأسمك انت نواف ولا فيصل ؟
نواف : نواف
جاء نهيان بيضمه بس نواف صافحه بيده استغرب نهيان هالحركه من نواف و كان نواف ما يبي يحتك فيهم و يبي يحط بينهم مسافة لين يعرف السالفه من امه و بعدها يقرر
التفت نهيان لفيصل : اجل انت اكيد فيصل ؟
فيصل : اي فيصل
ضمه نهيان و طول وهو يضمه كأنه كذا يعبر عن شوقه لهم
بعد عن فيصل و كان واقف جنب فيصل نايف استغرب نهيان وجوده يحسبه اخوهم بعد
لاحظ نايف تعابير الصدمه بوجهه وضحك : لا تخاف انا مو اخوهم ولد خالهم
نهيان : حياك الله
نايف : الله يبقيك
جلسوا و نهيان بس يسأل عن احوالهم و كيف حياتهم و كان فيه قهوجي يصب لهم القهوة
نهيان : شفتك بخير يا مقبل السنين ما غيرتك
الجد مقبل : هذا بفضل الله
نهيان : اخبار اماني ليه ما جت معكم و جابت البنات يشوفون عمانهم ؟
الجد مقبل : ام عبدالعزيز بخير و تسلم عليك بعد
نهيان : الله يسلمها والله كان ودي بشوفتها بس مره ثانيه ان شاءالله
قاطع كلامهم دخول سلطان اللي ما توقع انهم بيجون الحين و كان عنده قضية خلصها و يوم رجع شاف المجلس مفتوح و دخل شافهم فيه
آشر نهيان على سلطان : وهذا سلطان يكون ولد عمتكم حصة الله يرحمها و هذولاء يا سلطان عيال عمك مطلق الله يرحمه
اقبل سلطان على الجد مقبل يسلم عليه و من بعده على العيال : اعذروني كان ودي اني استقبلكم بس كان عندي قضية ولا قدرت استقبلكم
الجد مقبل : معذور يا وليدي اهم شيء شغلك
سلم سلطان على العيال و جلس
نهيان : ما شفت مشعل وينه ؟
سلطان : لا ما قابلتها
فهد : دقوا عليه من الشركة و راح لها و يتعذر منكم
همس ابو نايف للجد مقبل انه يكلمهم عن الموضوع عشان ينتهون منه و يمشون هز الجد مقبل راسه و التفت لصوب نهيان : حنا يا نهيان جايينك و قاصدينك بطلب و نتمنى انكم ما تردونا
نهيان : طلبك منفذ قل و ابشر به
الجد مقبل : نبي نطلب يد كريمة متعب لولدنا عزيز
انصدموا كل اللي في المجلس من الطلب لانهم كلهم عارفين انه نهاية هذا الاسبوع بيجي مشعل و يخطبها و كانوا متوقعين الرد اللي بيقوله نهيان لانه يحب مشعل بس صدمهم نهيان برده : ابد ماهي الا لكم
وقف سلطان بغضب : وش ماهي الا لكم مارح تسألها !!!؟
نهيان بغضب : انا قلت كلمتي و ما اتوقع انه غيداء بتكسرها !!!
سلطان بضحكه ساخره : بلاك ما تعرفها ( التفت لمتعب ) وانت يا يبه مارح تقول شيء ؟ عادي عندك يزوج بنتك زي كذا على الاقل روحوا اسألوها
ابو نايف : صادق الولد اسألوا البنت وان كان مالنا نصيب ماهيب مشكله
طلع نهيان وهو معصب و طلعوا وراه عياله و قدامهم سلطان دخلوا لمكتب نهيان و مسك نهيان سلطان من ياقته : انا ماني معبي عينك يوم انك تتكلم كذا قدامهم !!!؟
وخر سلطان يده عن رقبته : اذا بتعطيهم اختي كذا بدون لا تسألها ولا تأخذ رايها لا مانك معبي عيني
رفع نهيان يده و كان بيعطي سلطان كف بس سلطان مسك يده قبل لا تنزل على خده : بعدين مب انت تحب مشعل عادي عندك تزوج البنت اللي يحبها لواحد ثاني !!!! والله اني داري انه حبك له مبني على مصالك ( التفت لسعود ) وانت يا خالي مارح تقول شيء ولدك مارح ينقهر اذا عرف انه البنت اللي يحبها بتأخذ واحد ثاني !!!؟ ( التفت لمتعب ) طبعًا انت يا يبه متعودين عليك زي كذا الكلام اللي يقوله نهيان توافق عليه لو انه على حساب سعادة بنتك فماني مستغرب منك
نهيان بعصبيه : رح ناد لي غيداء اسالها
طلع سلطان ينادي غيداء و قالهم نهيان يروحون للجد مقبل و احفاده
دخل سلطان للبيت و مر من الصاله ولا شاف غيداء فيها و راح متجه لغرفتها و كان يرقى الدرج درجتين فتح الباب عليها بدون لا يطقه طلعت غيداء من مرسمها و شافته : وش فيك ؟
سلطان : تعالي اجلسي مافيه وقت بقولك شيء و بعدها يبيك نهيان
جلست غيداء بفضول : وش فيك ؟
تنهد سلطان : جدي يبي يزوجك ولد خالي مطلق
وقفت غيداء : وشهووو على كيفه الشغله !!! و بعدين وين راح مشعل مب هو اللي بيتقدم لي !؟
سلطان : ما ادري عنه ولا عن مشعل قومي معي الحين و قولي له رايك و ارجعي لغرفتك
طلعت غيداء معه و توجهوا لمكتب نهيان ودخل نهيان غيداء لحالها للمكتب و ترك سلطان برا
نهيان : اكيد سلطان قال لك
غيداء : اي قال لي و انا ماني موافقه
نهيان بضحكه : ومن اللي يبي موافقتك اللي انا اقوله بهالبيت هو اللي يصير ولا ناسيه يا غيداء !!!
غيداء : وش يعني بتجبرني على الزواج !!!؟ اذا اجبرتني وقلت للناس اني موافقه و جاء الشيخ و سالني بقوله لا و انا اطالع في عينك
نهيان : لا مارح اجبرك بس الملف اللي تدورين عليه انتي و سلطان رح اسلمه بيدين للشرطه بس قبلها بسلم الاوراق اللي تدين امك و ابوك للشرطة و بعدها انتي عشان تعرفين كيف تتحدين نهيان
غيداء وهي ماسكه نفسها عشان ما تبكي : ياخي انت ما عندك قلب وين مشعل اللي تحبه عادي عندك تزوجني لغيره !!!
نهيان : انتي ما تستاهلين مشعل و خطبة ولد عمك لك جتني هدية من الله عشان افك مشعل منك و الحين ابيك تطلعين و تقولين لسلطان انك موافقه لا يفشلني عند الناس تسمعين لو يصير شيء عكس اللي قلته اني ما ارحمكم
____________•
في المجلس
بعد ما طلع نهيان و عياله عشان يسألون غيداء ولا بقى في المجلس الا الجد مقبل و احفاده
التفت لهم نواف : ابك انا ما فهمت شيء وش علاقة سلطان ببنت متعب !!!؟ هو ما يكون ولد اختهم ليش يقول لمتعب يبه !!!؟ لحسوا مخي
فيصل : هم شكلهم كلهم على بعض يعني عكسنا مب حنا البنات يتغطون عنا هم لا البنات ما يتغطون عنهم بالعكس يجلسون ياكلون معهم بعد
نواف : تمزح !!
فيصل : والله حتى يوم جاء مشعل عندنا كان يقول وين عمتي و البنات بسلم عليهم و كرشته
نايف بضحك : لو انكم عايشين معهم كان الحين انتم كذا بعد
نواف برفعة حاجب : اعقب
التفت فيصل لجهة عزيز وضحك : شكل عزيز قمط العافية خايف انه البنت ترفضه
التفت له عزيز : ورا ما تسكت
ضحك نواف : والله لو اني ماكانك اقمط شف كيف كلهم قاموا لها ياخذون رايها شكلها شخصيه مهمه و صعبه
قطع كلامهم دخول عمانهم بعد ما قال لهم نهيان يروحون لهم
سعود : حنا حجزنا لكم في فندق ليه ما رحتوا له
ابو نايف : بيتي موجود ما يحتاج فندق
متعب : انا اذكر انه عندك ولد اكبر من هذا صح ؟
ابو نايف : لا هذا نايف الكبير و اللي اصغر منه تركي
جاء نهيان و جلس : البنت لكم يا مقبل
حاول عزيز انه يخفيه ضحكته بس انها باينه قاموا كلهم باركوا لعزيز
الجد مقبل : و متى تبون الملكه و الزواج !؟
نهيان : الملكه اليوم
انصدم الكل من موعد الملكه و قرب نايف و همس لنواف : نخطب اليوم و الملكه بنفس اليوم هذي ما صارت حتى في الديره شكل البنت كانت مطيره عيونهم و يبون يفتكون ما اقول الا الله يعينك يا عزيز
نواف بضحك : اسكت لا يسمعونك
الجد مقبل : ما كأنك استعجلت
نهيان : قلت يمكن انكم ما تبون تطولون في المدينه و تبون ترجعون لديرتكم عشان كذا ولا اذا تبون نأخرها عادي
الجد مقبل : و الزواج متى تبونه ؟
نهيان : هذا حددوه انتم
الجد مقبل : يناسبكم بعد اسبوعين مع عرس ولد بنتي ؟
نهيان : اي بالله يناسب
دخل سلطان و جلس و بعده على طول دخل فهد و معه الشيخ اللي بيكتب الكتاب انصدم سلطان على تسرع نهيان وهو لسى ما عرف موعد العرس متى
اخذ الشيخ موافقة عزيز و قام سلطان اخذ الدفتر عشان غيداء توقع وراح لها بغرفتها : غيداء انتي متأكده !! و مشعل وش صار عليه وانك تحبينه !!؟
غيداء : اي متأكده بعدين انت ما كنت تبيني اخذ مشعل
سلطان : يعني عشاني انا ما ابيك تاخذينه مارح تاخذينه !!
غيداء : تبي الصدق نهيان وراني صورة الرجال اللي خطبني و طلع مزيون احلا من مشعل و عاد انا ما يرضي غروري شيء
اخذت غيداء الدفتر و طالعت في توقيع عزيز و تقشعر جسمها وقعت و كانت وهي توقع تحاول تمسك دموعها لا تبكي خلصت توقيع ولا ناظرت في عين سلطان لانه بيكشفها و اتجهت لمرسمها على اساس انها بتكمل الرسم
سلطان : متأكده يا غيداء !!؟
غيداء تتكلم من المرسم : اي متأكده
.
.
( انتهى )
أنت تقرأ
حكٍم طغى ماعاد ينفع نظامه
ChickLitبقلم الكاتبه ديم ✍ . جوهر الإبداع هو ألا تكون خائفًا من الفشل. اول ابداعي ( حكمٍ طغى ماعاد ينفع نظامه )
