حكٍم طغى ماعاد ينفع نظامه

Part 7

في بيت ابو تميم
رجع ماجد بعد ما نزله نواف وكان لبسه و شكله رايح فيها وكان يدعي من قلبه انه ما يصادف ابوه ولا تميم وهو دايم اذا طاح في مثل هذي المواقف ينط من الحوش اللي ورا و يطق دريشة اديم عشان تصرفهم عنه بس هالمره يده ما تساعده انه ينط فقرر انه يدخل و اللي بيصير يصير دخل من الباب و كان ابوه جالس في الحوش و ينتظره وقف ابو تميم بغضب يوم شافه : انت وينك رايح ما تقول لأحد
ماجد : كنت سهران عند واحد من الشباب
ابو تميم : بتسوقها علي انت عند واحد و راجع لي شكلك كذا كأنك متهاوش عند من كنت ؟
ماجد : عند صالح عزمني ولا رديته
ابو تميم : توني ارسلت تميم عند صالح ولا لقاك هناك
انلخم ماجد ولا عرف يتكلم : اءء الا كنت عنده بعدين طلعت من عنده و تمشيت حول الجبال اللي هناك و انا راجع طحت منها و هذا حالي
ابو تميم : انت مريض في عقلك شيء مالك كم يوم طالع من المستشفى تروح تتمشى لي في الشوارع بدال ما تنطق بس الغلط علي انا يوم طلعتك من المستشفى كان خليتك تنثبر فيها
ماجد : خلاص يا يبه انا الحمدلله مافيني شيء
ابو تميم : هذا اللي جيد فيه خلاص يبه قم اذلف عني قم
راح ماجد و حب راس ابوه وراح داخل يدور اديم لقاها في غرفتها طق الباب عليها وصله صوتها تقوله يدخل دخل ماجد و انصدمت من شكله : شفيه شكلك كذا تهاوشتوا !؟
ماجد : لا بس وحنا راجعين نزلنا من الجبل و كذا صارت اشكالنا ترا حتى هو اردى مني
عصبت اديم من اهمال ماجد لنفسه : تستهبل انت على راسي ما تشوف يدك ملفوفه تروح تلعب لي بالجبل و خويك هذا ما يعرف يوقفك
ماجد : هدي يابنت الحلال وش جاتس توني مخلص من محاضرة ابوي تجيني انتي عادي مافيها شيء و ترا يدي الحمدلله تحسنت شوي و نواف قال لي انه ما يصير بس انا تحديته
اديم : مقدي فيك ابوي بعدين وش مبزره انتم تحديته يوم من الايام بتزيد تتحصلها
ماجد : الحين انتي وش فيتس لو اقولتس الحين امشي ننزل مع الجبل ركض تروحين تركضين قبلي
اديم : اي بروح قبلك اذا ماكنت تعبان مو مصاب و اتحداك
ماجد : خلينا الحين من هذا كله لعبت و خلص والحمدلله ما صار لي شيء ليه ما غطيتي علي ابوي بغى يكشفني
اديم : غطيت عليك بس ابوي قال لتميم يروح يشوف عند اخوياك اللي بالحاره و لا قدرت اقول شيء
ماجد : الحمدلله عدت
اديم توها الحين تنتبه على وجهه اللي كله تراب وجلست تضحك عليه : ما ودك تقوم تتروش و تغسل وجهك اللي كله تراب
ماجد : كنت رايح اتروش بس قلت خلني امرتس و اشوفتس
اديم بضحك : قم رح الله يستر عليك
طلع ماجد و راح يتروش و يوم جاء ينام توه بدا يحس بألم في يده بس كان ألم خفيف و يقدر يتحمله
______________•
يوم جديد بالديره
قاموا اهل البيت و افطروا و بعدها كل واحد راح لشغله و راحوا البنات يرتبون البيت و ينظفونه لان اليوم بيجون خوالهم رتبوا البيت و رجعوا العيال بعد صلاة الظهر للبيت و هم ميتين جوع دخل عزيز للبيت وهو يصارخ : يمه يا يمه وينتس
طلعت ام عبدالعزيز على صراخه وهي مرتاعه : وش فيك احد صار له شيء ؟؟
عزيز : لا محد صار له شيء بس اذا ما اكلتونا الحين يمكن يصير
ام عبدالعزيز : الله يقطع ابليسك لا تصارخ زي كذا بغى يطيح قلبي
طلعت الجده منيره على صراخ عزيز : وش بلاه يصارخ وش يبي
ام عبدالعزيز : يصارخ يبي ياكل
الجده منيرة : جاك ما جاء اخوانك صرت تصارخ مثلهم هذا وانا اقول عزيز اعقلهم
دخل فيصل : بلاكم ما شفتوه على حقيقته ترا هذي حقيقته
الجده منيرة : ليه تعلمني بوليدي ما اعرفه انا
فيصل : ترا عادي مو لازم عشانه اول حفيد لكم يصير هو احسن واحد
دخل نواف و الجد مقبل : قاعدين تسولفون انتم لسى ما حطيتوا الغداء
الجد مقبل : لا تصير مغلوث انتظر لين يجون خوالك
عزيز : لا والله ي جدي مرره جوعانين
نواف : خلهم يحطون لنا نواشف و الغداء يكون مع خوالي
ام عبدالعزيز : دايم لو اسوي الغداء بدري ما ياكلون بس هالمره لاني مأخرته جاييني كأنهم شوي و ياكلوني
فيصل : خلي نوف تسوي لنا شكشوكتها و ريم تسوي لنا فول
نواف : ولا تنسون الشاهي
دخلت ام عبدالعزيز داخل تقول للبنات يسون لهم الاكل و راحت جلست بالصالة و البنات سوو الاكل و حطوه لهم و دخلوا جلسوا عند امهم وبعدها رجعوا عشان يشيلون الاكل و لقوهم نفس مكانهم بس نايمين وهم يوم اكلوا و قالو بننسدح بعد الاكل و خذوها نومه
______________•
في بيت ابو تميم
رجعوا من شغلهم بعد صلاة الظهر و كانت اديم مجهزه لهم القهوة و الغداء قعد ابو تميم بالجلسة اللي بالحوش و تميم و ماجد دخلوا داخل يدورونها
تميم : وينها اختي شيخة البنات وينها
اديم بضحكة : شيخة البنات بالمطبخ تزهب غداكم
ماجد : الله يا ريحته كم باقي و يخلص
اديم : عطه نص ساعة و يكون جاهز
تميم : اجل انا باخذ القهوة لابوي و انتم الحقوني
اخذ تميم القهوة و طلع و ماجد حط يده خلف كتف اديم عشان يجاريها بالمشي و طلعوا وراه عند ابوهم و جلس تميم يصب القهوة : الا بسألك يبه بتسوي عشا لماجد عشان سلامته ؟
ابو تميم : اي اكيد بسوي المفروض اني مسويه اول ما طلع من المستشفى بس انشغلت بالمحل و الحين فظيت شرايكم نسويه بكرا ؟
تميم : اي زين بكرا من بتعزم ؟
ابو تميم : بعزم كل الديره و ابيك بكرا تنزل تجيب الذبايح
ماجد : بتعزم جيرانا
ابو تميم وهو عارف من يقصد ماجد : من جيرانك ؟
ماجد : يبه كم عندنا جيران تعرف من اقصد ابو عبدالرحمن و احفاده بتعزمهم ؟
ابو تميم : لا مارح اعزمهم
ماجد : يبه ما يصير مو انت تقول العشا عشان سلامتي و يوم اصابتي من موديني المستشفى و متبرع لي بالدم ما يصير نعزم الديره كلها ولا نعزمهم وانت قول لك شيء يا تميم ولا كلامي غلط
تميم بتأييد لابوه : ابوي صادق ما يحتاج نعزمهم
ماجد شوي و ينجن من الكره اللي طلع فجاءه : لا تجننوني بعدين يا يبه لو عزمتهم مب لازم تروح و تجلس تسولف معهم المجلس وش كبره
ابو تميم : انا مارح اعزم احد كانك انت تبي تعزمهم رح اعزمهم انت
ماجد : يبه فشله اهل الديره تعزمهم انت و بيت ابو عبدالرحمن اعزمهم انا فشله
ابو تميم : بعد الغداء بيروح تميم يعزم اهل الديره كانه يبي يعزمهم يروح يعزمهم ولا رح انت
تميم : رح انت يا ماجد انا مانيب رايح
ابو تميم : ولا انطق لا تعزم احد مب لازم
ماجد : لا خلاص انا بروح اعزمهم
التفت ابو تميم لاديم : وانتي يا اديم وانا ابوتس ابيتس بكرا تبيضين وجهي
اديم : ما يحتاج وجهك ابيض
ابو تميم : يمديتس بكرا تسوين العشا لحالتس
اديم : اي يمدي هو بس عشا رياجيل و بتجيني بكرا خالتي ام عبير و بنتها يعاونوني
ابو تميم : جزاهم الله الف خير
______________•
العصر في بيت ام عبدالعزيز
وصلوا ابو نايف و خاله الهنوف للديره و استقبلوهم اهل البيت باستثناء فيصل و نواف لانهم كانوا نايمين اما عزيز عشان نومه خفيف حس بجيتهم و قام و حاول يقوم اخوانه بس لا حياة لمن تنادي و طلع و خلاهم
ابو نايف و عيونه تدور فيصل و نواف : الا اخوانك وين
عزيز : نايمين
ابو نايف : نايمين هالحزه غريبه
الجد مقبل : ما ناموا زين امس رح يا عزيز قومهم بعدين يسرون علي اخر الليل
عزيز وهو طفش وهو يقوم فيهم : والله انا طفشت وانا اقوم فيهم ما يقومون
الجد مقبل : ياليل الحين وش يقومهم ذولا الحين
نايف : انا الحين اروح اقومهم و اخليهم يسنترون عندك
راح نايف يقومهم ولا قاموا معه و جلس يناظر الغرفه لين وصلت عينه على لي المويه اللي جنب الباب ابتسم بخبث وراح شبك اللي بخزان المويه و فتحه و قرب عند باب المجلس و ركز المويه على وجه نواف عشان يستفتحها عليه و فتح المويه و جت على طول على وجه نواف فز نواف من برودة المويه اللي جت على وجهه و يوم فز نواف صقع وجه فيصل برجله فز فيصل من صقعة نواف له و جلس يرفس نواف برجله و نواف ماكان يدري من اي جهه ينتبه من رفس فيصل ولا من موية نايف و كان نايف ميت ضحك على اشكالهم صرخ نواف بأعلى صوته على فيصل : يا حمار انتظر ثور انت ترافس وانتي يا يمه لازم تقومينا بالمويه
نواف كان يحسب انه اللي يقومهم امه ناسي انه بيجون خواله اليوم سمع ضحكة نايف و فز على رجوله و عطى فيصل ضربه على راسه وهو ماشي و نايف يرش المويه عليه و نواف ماشي له رمى نايف اللي و انحاش ركض نواف وراه و مسك اللي و جلس يرشرش المويه عليه دخلها من فمه وطلعها من اذنه من القهر و ما فكه لين جاهم الجد مقبل بعصاته : يا كلاب اسرفتوا بالمويه ( سحب نايف من شعره ) انت مارحت تقومهم وراك تلعب بالمويه
نايف وهو ميت ضحك : يعني يا جدي ماتعرف عيال بنتك مايقومون على سيره اختصرت الموضوع على نفسي
الجد مقبل وهو وده يصفقه : انت من غصبك تروح تقومهم
نايف : هذا جزاتي ابي اريحك
طلع لهم فيصل وراح ضرب نواف على راسه من ورا التفت له نواف وهو مستغرب ضربته لان اللي المفروض يضرب نواف لانه فيصل جلس يرفسه : انهبلت وراك تضرب !!؟
فيصل : تضربني برجلك على خشمي ليه !؟
نواف : ابك هذا دلخ فهموه الموضوع وانا بروح اغير لبسي كله مويه
راح نواف يغير لبس و طق باب الشارع و راح يفتحه على طريقه و كان لابس سروال و فنيله و كله غرقان فتح الباب وطلع ماجد عنده : شعندك جاي انا احسك من بعد الجبل وانت بايعها شكله من صقعتك على وجهك بالتراب
ماجد قعد يناظر شكل نواف : نفسي مره اشوفك كأنك مب طالع من هوشة متروش بلبسك انت !؟
نواف بعصبيه : جاء السخيف نايف اليوم و هذي اثر سخافته انت وش عندك جاي !؟
ماجد : جاي اعزمك على عشاي بمناسبة سلامتي وحياكم الله كلكم ولا ابي اعتذار تسمع
نواف : ابوك يدري انك عازمنا !؟
ماجد : اي يدري هو اللي قال لي اجي اعزمك
نواف : مع انها ما مشت علي بس يالله
ماجد : مع السلامه
سكر نواف الباب و راح بلغ جده عن العزيمه وانه كلهم معزومين و بعدها دخلوا يغيرون ملابسهم و تجمعوا على الغداء
__________•
في بيت ال غانم
كانوا متجمعين كلهم عند نهيان و كان نهيان مو مره معهم بس جالس يفكر و ينتظر سعود يجي دخل سعود و اطلق السلام بصوت جهوري : السلام عليكم
الجميع ردوا السلام : وعليكم السلام
نهيان : قوموا يا بنات ادخلوا داخل و خلوني مع عيالي شوي
لبى الجميع طلبه و دخلوا داخل و عياله كل واحد فيهم بدا يفكر وش يبي منهم ابوهم
التفت نهيان على سعود : سعود
سعود : سم
نهيان : ما تعرف شيء عن عيال اخوك ؟
سعود : اخوي من ؟
نهيان بعصبيه خفيفه : عيال اماني
سعود : لا ما اعرف شيء اللي انت تعرفه انا اعرفه
نهيان يحس انه سعود كان يعرف مكانهم من زمان ولا قال له : الحين انا اعرف انهم ساكنين بنجد انت بعد تعرف انهم ساكنين بنجد !؟
فز فهد على رجله : لقيتوهم ؟
نهيان بعصبيه : اسكت يا فهد انا اتكلم اسمعك يا سعود
سعود : لا ما كنت ادري انهم ساكنين بنجد
متعب : شلون ما تدري وانت رايح لنجد تدورهم هناك !؟
سعود : رحت سالت عنهم هناك بس محد قال لي شيء و حتى راقبنا اخوها عبدالرحمن ولا طلع معنا شيء
وقف نهيان على رجله بغضب : شلون امانيوه هالساحره تقدر تهرب منكم ولا تلقونها الا بعد ١٥ سنه شلون !!!؟
سعود : اجل يوم جيت ادورهم اكيد اهل نجد غطوا عليهم عشان ما نلقاهم
متعب : سألت عنهم عند من !؟
سعود يحاول يتذكر عند من سأل : اظن عند واحد يقاله ابو تميم
.
.
( انتهى )
اكتبوا لي اراءكم حول البارت بالكومنت 🫶🏻
بارت خفيف بمناسبة العيد
حسابي بالانستا للي سأل -> _deeeem6
#حكمٍ_طغى_ماعاد_ينفع_نظامه