وقف عزيز بغضب : وش جايبهم ذولاء ؟
وقف ابو نايف و مسك عزيز : هد و لا تنسى ترا لهم بنت عندنا
طلعوا كلهم عند الباب الخارجي و شافوا نهيان واقف و خلفه عياله : وش عندك يا نهيان !!؟
نهيان : جايين نشوف عيالنا ولا مالنا حق فيهم !!؟
الجد مقبل : لا مالك حق و يالله توكل ولا اشوفك تحوم هنا
نهيان : انت وش تقول يا مقبل بتمنعونا من عيالنا !! و تراكم ماخذين بنت من عندي و يحق لي اشوفها
عزيز : بنتكم اذا تبيكم بتجيكم اما انتم مالكم مكان هنا
نهيان بأستعطاف : انت وش تقول يا عزيز تطرد جدك من بيتك !!!؟
نواف بأندفاع : اي يطرده مال للقاتل مكان عندنا و حسابنا معك بالمحاكم و يالله توكل
ضحك نهيان ضحكه ساخره لدرجة انها استفزتهم : اخيراً مابغت اماني تعتبركم رياجيل و تقول لكم
تقدم له نواف بغضب : والله انا اللي مارح اعتبرك شايب و اكفر فيك بس وش نسوي رجل بالدنيا و رجل بالقبر توكل يالله
نهيان : والله و طلع لكم لسان يا عيال اماني !!!
نواف : السِنتنا بتشوفها بالمحاكم لا تلوك قدامنا و رموبك بالسجن
تقدم مشعل من ورا نهيان : بلاكم ما عرفتوا عائلة ال غانم بنشوف من اللي بيضحك بالاخير
عزيز بضحكه : طلع لك حس ي كلب نهيان
جارى نواف عزيز بالضحكه : ابك طلعت تعرف تقدح من راسك
تقدم نهيان بتهديد : ان ما بكيت امكم عليكم ما اكون نهيان
نواف : يقالك تهددنا الحين!!! توكل بس توكل
نهيان : مب انتم مره مشتاقين لابوكم !!!؟ بلحكم فيه اشبعوا من بعض هناك
انفعلوا العيال من استهزاء نهيان من موت ابوهم و تقدموا له ناوينه و كان قدامهم الجد مقبل و ابو نايف و عرف ابو نايف انهم مارح يسكتون و دفهم على ورا داخل البيت و سكر الباب عليهم و صفى بالشرع بس ابو نايف و الجد مقبل
ابو نايف : توكل على الله يا نهيان الحين رديت العيال عنك بس مره ثاني مارح اردهم
نهيان : العيال هذولاء ما ربيتوهم انتم و انا اللي بربيهم لكم
التفت ابو نايف لناحية سعود : اخذ ابوك يا سعود لاتصير مشاكل
نهيان : بروح بس ان ما لويت ذراعكم بعيالكم اصبروا علي
_____________•
عند العيال في حوش
فيصل بتعجب : انتم سمعتوا وش قال !!؟ هذا يتشمت فينا
راح عزيز بغضب بيفتح الباب : بعلمه انا كيف تكون الشماته
و قبل ما يفتح عزيز الباب و قف سلطان بين الباب و عزيز عشان يمنعه انه يروح لنهيان : بعد عن الباب يا سلطان
سلطان : اسمع يا عزيز لا تطلع هذي حركات نهيان هو يحاول يستفزكم لا تخلون الحق معه بعد ما كان الحق معكم
نواف بحده : بعطيه وحده في وجهه اخليه ما يعرف يمينه من يساره
سلطان : طيب طلعت و ضربته يا نواف تحسب نهيان بيمد يده عليك !!!؟ ولا واحد من خوالي بيجي يفرقكم !؟بيجلسون يناظرون فيكم لين ماتخلص و اذا جيت تحط راسك على المخده اخر الليل الا الشرطة تدق بابك و معاهم نهيان و تقرير الضرب معهم شغلوا مخكم يعني نهيان ليه يبي يستفزكم و يثوركم عليه عشان يفتك منكم من البداية و خالك و جدك فاهمينه عشان كذا دخلوكم
فيصل : يعني وش بيجي هنا و يرمي كلامه و نسكت له !!؟
سلطان : انا ما قلت اسكتوا له بس لاتعطونه شيء ضدكم انا عشت مع نهيان سنين و اعرف طريقة تفكيره تراه مب ادمي يبلي الواحد بنفسه
قطع كلامهم دخول الجد مقبل : سلطان صادق محد يعرف نهيان كثري هو عارف انه اذا تكلم عن ابوكم كذا قدامكم بتهجمون عليه و كان رح يصير هالشيء بس الحمدلله تدخل خالكم قبل ما تعطونه اللي يبي
نواف : طيب كيف بنلقى التسجيل !!؟
سلطان بتفكير : الشركة و البيت انا دورت فيها مافيه ولا تسجيل يخص خالي مطلق
عزيز : طيب الحين كيف بنلقاه اكيد انه كسره ولا حرقه
سلطان : الشيء الوحيد الحلو في نهيان انه مايرمي شيء يحس انه في يوم بيحتاجه فاكيد انه مخبيه و اللي يعرف مكانه يا مشعل ولا احسان
عزيز : مشعل نعرفه بس منهو احسان !!!؟
سلطان : هذا واحد مصري نقدر نقول انه صندوق نهيان الاسود اكيد هو اللي يعرف وين التسجيل
نواف بحماس : طيب حلو وين بيته نروح نجيبه منه !؟
سلطان : هنا المشكله انه ماله مكان محدد ولا رح تعرف وين بيته ما يطلع لك الا اذا نهيان يبيه
نواف : اجل نخليه يبيه
ابو نايف : وش اللي براسك ؟
نواف : بتشوف
_____________•
في بيت ابو تميم و تحديداً في غرفة تميم
دخلت بشائر للغرفة و جلست عند تميم و هي ذابحها الفضول و تبي تعرف الموضوع اللي دار بين ابو تميم و عياله : وش كان يبي منكم عمي امس ؟
تميم : في واحد متقدم لاديم و يقول لنا عنه
بشاير : طيب غريبه ما قاله قدامه ليش يطلعنا ؟
تميم : عشان اديم ما تنحرج
بشاير : طيب منهو اللي متقدم لها !!؟ نعرفه ؟
تميم : راشد تعرفينه ؟
بشاير بصدمه متخالطه بالفرح : راشد البخيل !!؟
تميم : اي بس لاتقولين عنه كذا الرجال تغير
بشاير : و انتم وش رايكم فيه ؟ احس وافقوا لان صدق سمعت الناس يقولون انه تغير مره و مصلي و مسمي
تميم : انا و ابوي ما عندنا مشكله بس ماجد هو اللي معترض
بشاير : عشتوا يا ماجد هو اللي رافض !! اذا ابوها و اخوها الكبير موافقين هو يخلي اعتراضه لنفسه
تميم بتفكير : هو الصدق ماجد معه حق
قطعت كلامه بشائر : الرجال الحين ماشاءالله ما عاد تسمع عنه الا العلم الطيب و بعدين ترا الناس بيفكرون انه اختك فيها شيء عشان كذا كل ما تقدم لها احد رفضتوه
سكت تميم ولا رد عليها بعد ما عبت بشاير براسه
لّفت بشاير للجهه الثانيه عشان لا تبين ابتسامتها لتميم و هي فرحانه انه اديم بتاخذ واحد زي راشد و انها اكيد بتكون تعيسه بحياتها و بشاير بتحط اللي قدامها و دونها و تخلي هالزواج يتم
_____________•
في بيت ام عبد العزيز
دخلت غيداء للمجلس و شافت سلطان جالس في صدره و راحت له تحضنه : ما بغيت تجي
بادلها سلطان بالحضن : وش اسوي اغراضتس واجد
ضربت غيداء على كتفه : تكلم زين
سلطان بضحكه : وش فيتس والله انه كذا الكلام حلو بالسين احس بدفئ
غيداء : سخيف
سلطان : تعالي اجلسي و قولي لي كيفك و كيف عيشتك هنا !؟
جلست غيداء جنبه : والله الحمدلله كلهم يعاملوني بطيبه مع اني احس انهم يكرهون عائلتنا بس يحاولون ما يبينون لي
سلطان : و انتي قلتيها توه قبل شوي نهيان و خوالي جايين عند الباب و لو ما مسكت عيال خالي مطلق عنه كان فركوا بوجهه الارض
غيداء : ليتك ما مسكتهم عنه ... ابوي جاء معه !؟
سلطان : اكيد مريضه انتي تبين ابوي يخلي نهيان لحاله !!!؟
انصدمت غيداء انه ابوها جاء الى هنا ولا قال حتى انه يبي يشوفها : ما سأل عني ؟
عرف سلطان بوش غيداء جالسه تفكر ولا حب انه يأكد كلامها : ما امداه من اول ما وصلوا تهاوشوا و عزيز قال لنهيان اذا بنتكم تبي تشوفكم هي بتجيكم مب انتم اللي تجون
غيداء : لا واضح انهم ارتاحوا مني كانوا يبونها من الله
سلطان : طيب انتي فكري من الجانب الإيجابي الحين و انتي متزوجه عزيز لو تقولين له بترجعين لوظيفتك ما اتوقع انه بيمنعك و نهيان ما اتوقع انه بيقول شيء دامك تزوجتي
غيداء بتفكير : والله احساسي يقول انه نهيان بيعاند دام انه انطرد من هنا و الله يعينهم عليه
سلطان : والله انا احساسي يقول انه بيجيب له مصيبه قريب الله يستر بس
غيداء : انا ابي اعرف هو وش سوا لعمي مطلق لان اشوف عياله اذا جاء طاري نهيان يعصبون
سلطان : اي هذا اللي كنت ناوي اقوله لك امس الله يسلمك نهيان هو اللي قاتل خالي مطلق و موتته شنيعه و اتوقع انه عيال خالي مطلق عرفوا بيوم زواجك لانه من بعدها تغيروا على نهيان
شهقت غيداء و حطت يدها على فمها من قساوة قلب نهيان في ولده و تحس انه سبب اختفاء عزيز بيوم العرس له علاقة بهالموضوع : تستهبل صح يا سلطان !!!؟ مستحيل انه يكون ذابح ولده !!! ما توصل معه لهدرجة
سلطان : توصل و الله يعين لا يجيب مصيبه جديده لهالعائلة يوم جاء هنا يتوعد فيهم
غيداء : وانت وش ناوي تسوي بتوقف معهم !؟
سلطان : اكيد اذا احتاجوني بيحصلوني معهم و يوم جاء نهيان قبل شوي مايدري اني هنا و انا الحين ابي ابين لنهيان اني معه و بديت امسك كذا قضيه له عشان يصدقني بس قبلها اتأكد انه القضية ما تورطني بشيء و هو اصلاً مارح يعطيني قضاياه اللي احتمال تدينه بالمستقبل لين ما يثق فيني
غيداء بخوف على سلطان : تكفى انتبه لنفسك يا سلطان ترا نهيان جني يورطك و انت مب حاس
سلطان بتطمين : معليك بس خليني احصل اوراقك و فديوهاتك و يبشربي لأخليه يشوف نجوم الليل بعز الظهر
_____________•
في بيت ابو تميم
دخلت اديم للمجلس و كانت منحرجة من ماجد و تبي تراضيه بس ماجد كل ما شاف وجهها صد عنها و كانت بشاير ملاحظتهم و تبي تعرف وش بينهم
دخل ابو تميم و جلس و كان شاهد على الموقف اللي دار بين نهيان و عيال ام عبدالعزيز
اما تميم كان لحد الان يفكر بكلام بشاير و يبي يخلي اديم تتزوج راشد
طق الباب و قام ماجد يفتحه و كان خلف الباب عمتهم فاطمه و عيالها دخلت للمجلس و شافت كل واحد جالس في جهه و محد صوب احد سلمت على اخوها و قامو عيال ابو تميم يسلمون على عمتهم و جلسوا
ابو تميم : زين انتس جيتي يا وخيتي كنت برسلتس ماجد يزهمتس
العمه فاطمه : ليه وش عندك !؟ و انتم وراكم جالسين كذا صاير شيء!!؟
ابو تميم : ما صار الا كل علمن طيب ابشرتس اديم متقدم لها واحد
العمه فاطمه بفرح : عالبركة الله يوفقها و يكتب لها اللي فيه الخير و منهو اللي متقدم لها
ابو تميم : راشد
العمه فاطمه : راشد !!؟ و انتم وش تفكرون فيه بتعطونه بنت من عندكم ؟
تميم : ان قاله ربي بنعطيه لمتى بتقعد اديم عندنا !؟
ناظرت اديم في ماجد وهي لحد الان ترتجي منه انه يوقف معها بس كان ماجد يسولف مع عبدالله ولا كان يمها : ليه يا اخوي متضايق من جلستي عندكم !!؟ لهدرجة ثقيله على قلبك اذا كان بيت ابوي و اهلي مضايقتهم قعدتي عندهم اجل الناس الغريبه وش نرتجي منهم
ابو تميم بتبرير لموقف تميم : اديم و انا ابوتس اخوتس ما يقصد كذا خانه التعبير
اديم و الدموع متجمعه في محاجرها : لاتبرر موقفه يا يبه اصلاً تميم متى وقف معي عشان الحين انصدم منه ؟
العمه فاطمه : يعني انتي يا اديم منتي موافقه ؟
لّفت اديم لجهة عمتها و هي ما صدقت على الله احد يسألها هالسؤال : لا ماني موافقه يا عميمه بس تشوفين هم متضايقين مني لدرجة انه اي احد بيرموني عليه
ابو تميم بحده : انا وش قلت لتس يا اديم
ماجد : ليه وش تحسين يا اديم تحسين انه بيجيتس نصيب احسن منه !؟
شافت اديم انه ما فيه امل فيهم و طلعت من المجلس و دموعها تنزل
العمه فاطمه : الحين انت يا اخوي متاكد من راشد وراكم محسسين البنت انكم ما تبونها و بترمونها على اي واحد
تميم : اتركيتس منها يا عمه اديم كذا مدلعه لو اقعد اخذ رايها بأي احد يتقدم لها مارح توافق
وقفت العمه فاطمه : انا عندي كذا غرض بالسوق بأخذه و كنت جايه ناويه اخذ اديم و جود معي بس ما اتوقع انه اديم بتطلع بعد اللي صار الحين
ابو تميم : معليتس منها اخذيها و شوفي وش ناقصها يمكن لو تمت ملكتهم تجي ام راشد تشوفها
_____________•
في بيت ام عبدالعزيز
رجعوا العيال من العزبة و دخلوا الأغراض اللي جابوها من العزبه في المطبخ و كانوا اهل البيت كلهم متجمعين في المطبخ
فيصل : هذا الحليب اللي وصيتينا فيه و الذبيحه بينزلها تركي الحين
ندى : يالله يا يمه يا حبتس للشقى الحين الذبيحه لوش مافيه احد زايرنا و خوالي بيكملون الشهر عندنا لوش هذي ابي افهم !!؟
حطت نجلاء يدها على قلبها : كلمة خوالي بيكملون الشهر عندنا حسيت انها تجرح
جمانه : اي شكلها تبينا نطس لبيوتنا بس نعتذر منتس مارح نطس لين ما تنتهي الإجازة قاعدين على قلبتس
ندى : يحوول وش فيكم فهمتوني صح انتم على قلبي زي العسل
ام عبدالعزيز بطفش منهم : ابك دبلتوا تسبدي قوموا كل وحده تمسك لها شغله تسويها
عزيز : ندى سوي لي اي شيء ينشطني راسي مصدع
تخصرت ندى : لا والله و حنا يا حبيبي ليش مزوجينك عشان انا اللي اشتغلك !!؟ سبحان الله اخواني يدبلون تسبدي يرحمون حريمهم ولا يرحمون خواتهم
فيصل : متى امداتس تقيم اخوانتس و حنا ما تزوج منا الا عزيز !!؟
ندى : الكتاب باين من عنوانه واضح مافيكم رجى
مسك عزيز راسه منها : سدي فمتس فقعتي راسي ندمت اني قلت لتس سوي لي خلاص ماعاد ابي شيء بس اسكتي
الجدة منيرة : وينها غيداء يا عزيز !؟
عزيز : مدري توني جاي من العزبه المفروض انا اسألكم
نوف : في المجلس عند اخوها
فيصل : سلطان لحد الان موجود ؟
هزت نوف راسها : اي موجود
ام عبدالعزيز : انا مب عاجبني وجهك يا عزيز شكل حرمتك معديتك رح ارقد لك شوي يمكن يروح عنك الصداع و برسل لك مسكن مع وحده من خواتك
طلع عزيز من المطبخ و راح متجه لغرفته و كان صدق ما يشوف اللي قدامه من الصداع اللي جاه و كان اول مره يجيه صداع قوي زي كذا
دخل لغرفته و انسدح على السرير و كان يحاول ينام عشان الصداع يخف بس مافيه فايده و بعد تقريبًا ربع ساعة دخلت غيداء للغرفة بعد ما مرت من المطبخ و شافتهم متجمعين ولا حبت انها تضيق عليهم و راحت لغرفتها ترتب اغراضها بس شافت عزيز نايم بس هو بالاساس ما كان نايم بس ماحب انه يربشها و يدخلون في نقاش وهو ماله خلق لشيء
درعمت ندى للغرفة و كانت معها علبة موية و مسكن و هي كانت تحسب انه غيداء في المجلس مع سلطان بس انصدمت يوم شافت عزيز منسدح على السرير و غيداء واقفه عند التسريحه و ترتب اغراضها اللي جابها سلطان و طاح وجهها ولا تدري وش تسوي و اقرب شيء شافته انه منطقي انها تنحاش و حطت رجلها و راحت تركض للمطبخ
جت غيداء بتلحقها عشان تشوف وش كانت تبي بس وقفها صوت عزيز : البسي جلالتس قبل تطلعين
شافت غيداء انه كان قايم و اخذت جلالها و راحت تدور ندى
اما ندى اللي اول ما حطت رجلها و انحاشت دخلت المطبخ و جلست عند جمانه و نجلاء و نوف و وجهها تقول مصفوق
جمانه : وش فيتس !!؟ وراه وجهتس كذا !؟
نوف : دامها جايتنا تركض زي كذا اكيد انها مسويه لعزيز شيء و عصب عليها يعني ابد ما يمديها تعطيه العلاج و تطلع بهدوء
جمانه : ما تكون ندى اذا ما سوت لها مصيبه
ندى ضربتهم : لاتفسرون على كيفكم
نجلاء : طيب قولي عشان ما نفسر
ندى بإحراج : درعمت على عزيز و غيداء بالغرفة
دخلت غيداء المطبخ و شافت ندى جالسه مع البنات : وش فيك يا ندى خوفتيني وراك طلعتي كذا نناديك ولا تردين تبين شيء
ندى بإحراج : لا سلامتس
غيداء كانت فاهمه انه ندى منحرجه من دخلتها عليهم زي كذا بس كانت تبي تبين لها انه الموضوع عادي : كنتي تبين عبدالعزيز بشيء ؟ تراه قايم مب نايم بس منسدح و انا عادي اطلع اذا تبينه بشيء خاص اصلاً كنت ارتب التسريحه
ندى : لا بس عزيز كان مصدع و انا كنت جايبه له المسكن ولا كنت ادري انتس بالغرفة عشان كذا درعمت
غيداء : و انا احسب وراك سالفه الله يهديك خليتيني اركض وراك احسب صاير معك شيء طيب و اذا دخلتي وش فيها عادي قومي تعالي معي
ندى : وين ؟
غيداء : ما تبين تعطين عبدالعزيز المسكن بعدين بغيتي تطيرين عقله المسكين بغى يلحقك بس شافني لحقتك و جلس
قامت معها ندى و راحوا لغرفة غيداء و عزيز و دخلت ندى و شافته منسدح : عزيز قم خذ المسكن
جلس عزيز و شاف ندى ماده له المسكن و كان واضح على وجهها كمية الإحراج و كانت غيداء واقفه وراها و كانت ميته ضحك عليها : وراتس انتي دخلتي علينا و طلعتي كانتس مقروصه !!؟ بغيتي تطيرين عقولنا
ندى : اعتذر منكم انتم يا الاثنين و ان شاءالله مارح تتكرر و الحين اكيد امي تتحلف فيني خلوني اروح عشان تشوفوني على العشا قطعه وحده
طلعت ندى و كانت غيداء مييييته ضحك عليها و كان عزيز يناظر ضحكة غيداء اللي اول مره يشوفها على وجهها من تزوجها و وده يقول لندى كل يوم درعمي زي كذا اذا كانت بتضحك كذا
_____________•
في اسواق الديرة
كان شغل المحل اليوم على نواف و راح هو و نايف للمحل اما عزيز و فيصل و تركي راحوا للعزبه يشوفون امورها و خلصوا و رجعوا للبيت
طلع نواف عند باب المحل بعد ما حس انه جدران المحل تضغط عليه و سلم الزبون لنايف يشوف طلباته
خلص نايف من الزبون و طلع جلس عند نواف : انت وش صاير معك !!؟ بس اشوفك تهوجس !!؟ لا تقولي عشان سالفة ابوك لاني ادري فيه سالفه ثانيه بعد ما طلعت و جيت ذيك المره وانت متغير
نواف : هذا انت قلتها سالفة ابوي مافيه سالفه غيرها
مر ماجد من قدامهم و قام نايف بيروح يسلم عليه : هذا ماجد ؟ بروح اسلم عليه و اجي
جلسه نواف عشان ما يروح خاف انه ماجد يكرش نايف او يفصل عليه : اجلس لا تروح له ما يحتاج
نايف : فهمت الحين انت متهاوش مع ماجد ؟
نواف بنفي : لا وش دخل ؟
نايف : اجل ليه ما تخليني اروح اسلم عليه يا تقولي السالفه يا اروح انا افهمها منه
نواف : ياليل النشبه
نايف : عرف انك تحب ؟
لّف نواف على نايف و تعابير الصدمه مرسومه على وجهه : وش دراك انت !!!؟
نايف بضحكه : يا حبيبي واضح قعدتك بالسطح و هواجيسك و قصايدك اللي متغيره
نواف : هاه طلعت تعرف السالفه و ناشب لي و ماجد عرف و قطع علاقته فيني
نايف بتفكير : وش دخله ماجد يقطع علاقته فيك !!؟
نواف : مو البنت اللي احبها اخته
نايف شهق شهقه تدل على صدمته : انت تحب اخت ماجد !!!؟
ضربه نواف على فمه : سد فمك لحد يسمعك بعدين وراك منصدم مو توك تقول انك تعرف !؟
نايف : انا اقولك اعرف انك تحب بس ما اعرف انك تحب اخت ماجد
نواف : المهم هذا اللي صار
نايف : طيب وش سوا ماجد يوم عرف ؟
نواف : قابلته بالجبل و كل كلمه قالها لي صادق فيها و انا والله اني ما ودي انه يصير كذا بس كنت ابي علاقتي مع اهلها تزين و بعدها يصير كل شيء طبيعي وانا ما ادافع عن نفسي و اقول اني صح طريقتي من البداية غلط اني اكلمها و اسولف معها و اهلها ما يدرون
مسك نايف راسه بصدمه : كنت تكلمها انت !!!؟ ياويلي انت وراك تعطيني الصدمات ورا بعض تبيني انصرع عليك هنا عطني اياها دفعه وحده
نواف : مب وقتك تنصرع عطني حل وش اسوي !؟ اروح اخطبها من ابوها ؟
نايف : اي رح اخطبها و ابوها من حبه لك بيقلطك بصدر المجلس حتى من شدة حبه لك بيعطيك بنته بدون زواج دامهم بيناسبون الشيخ نواف وش هوله الكلاف ؟
نواف : والله انا اللي بكلف على نفسي و بعطيك مخمس من قفى يدي تطقطق علي انت !!؟
نايف : انا ادري عنك يعني ابوها اذا شافك بس تمشي بالشارع كانك تمشي على قلبه تبيه يعطيك بنته بعد يعني انت يالله فكر لو ...
قطع كلامه وقوف نواف اللي سحب عليه ولا رد و هو شاف شيء يخليه يسحب على نايف و على ابوه بعد
مرت من قدامه اديم وهي طالعه مع عمتها و جود عشان يتقضون لأغراض عمتها و كانت اديم معاهم بس تفكيرها و قلبها مو معهم كان مع نواف اللي شافت فزته يوم شافها و تناظر فيه و دموعها تنزل بدون صوت
نايف : ورع انا اتكلم
نواف و هو ماشي و ساحب عليه : يا رجال سر امها
راح نواف لنفس الجهه اللي فيها اديم و كان يحاول يوصل لها و يكلمها بس بدون لحد ينتبه
بس وقفته البساطه ام مقرن : تعال يا وليدي خذ اغراض امك و جدتك من عندي
نواف : برسلتس اخوي يجي ياخذها منتس
ام مقرن : انا بسري لبيتي ماني بمحتريتك
نواف : طيب يا ام مقرن الله يحييتس عجلي علي لاني مشغول
ام مقرن : اذا انت مشغول يعني انا فاضيه انطق لين اخلص شغلي
شافت اديم انه ام مقرن استقعدت له و قالت لعمتها انه بتروح تشوف بسطة ام مقرن و تجي و غمزت لجود عشان تغطي عليها عند امها و رفعت جود عينها على بسطة ام مقرن و شافت نواف واقف عندها
اومئت جود و راحت اديم لبسطة ام مقرن و وقفت ورا نواف عشان تقدر تكلمه و كانها واقفه في سِرا
بس خربت عليها ام مقرن اللي شافتها واقفه ورا نواف و تحسبها زبونه : وخر يا العامود الزباين وراك
بعد نواف من قدام البسطه ولا التفت وراه و تقدمت اديم و هي تبي تكلمه بس ما تدري كيف : ام مقرن مافيه طلبية باسم ابو تميم ؟
قالت اديم كذا عشان نواف ينتبه انها واقفه عنده و اول ما سمع نواف الاسم التفت لاديم و شافها تهز راسها له بهدوء
ام مقرن : ماعندي شكلتس غلطانه بالبسطة يا بنيتي
نواف : دامني واقف عندتس يا ام مقرن و بحتريتس لين ما تقضين تعرفين وش يقول الشاعر ؟
ام مقرن : وش يقول
نواف :
( وصلتس يخيط الصدر و البعد يفريه
و يابري حالي كان صديت برياه
ويلي على ادري حُبنا ويش تاليه
ويلي على ادرى وش ورا الغيب ويلاه )
ام مقرن : والله مدري وش تخثردز على راسي خذ اغراض امك و عود مع دربك
نواف : افا يا ام مقرن تطرديني !!؟
ام مقرن بتعجب : مب توك تبي تغدي عندك اشغال ؟؟
نواف عشان اديم تسمعه : دامتس تبيني اطس عنتس اجل بغدي من هالطريق
ام مقرن : طس من وين ما تبي سكرت البسطة علي اذلف
راح نواف من نفس الطريق اللي قال عليه و بعده بثواني عشان محد ينتبه لحقته اديم و كان نواف كل ما يحاول يوصل لها و يكلمها يمر احد ولا يقدر يكلمها لين ما طفش و مسك له طفل يمشي من الشارع و قعد يسولف معه بس انه بالكلام يقصد اديم : لا يضيق صدرتس يا عيون نواف بتزين الأمور ان شاءالله و اكيد تدرين انه ماجد عرف و اكيد انه جاتس و كلمتس بس لا تضيقين ماجد اتركيه لا تضغطين عليه خليه علي انا بكلمه وسعي صدرتس ترا باين لي انتس ضايقه ولا ضقتي انتي ترا يضيق صدر نواف و نجد العذبة بكبرها تضيق
الولد اللي ماسكه نواف : وش تقولي انت يا نواف ما فهمت عليك
طلع نواف من جيبه ١٠ ريال و عطاها الولد : رح و انا ابوك اشتر من بقالة ابو عباس و اذا ما كفتك الفلوس قول له سجلها على نواف
كانت اديم تسمعه ولا هي قادره ترد على كلامه لان كل شوي احد يمر و تخاف يسمع الكلام و هي تبي تقول لنواف عن خطبة راشد لها بس ما قدرت و رفعت يدها له وسوت كذا 👍🏻 و مشت من دربها و هي تفكر و تشوف كمية الحب اللي في قلب نواف لها و خايفه انه يجي يوم و تفقد هالشيء و تكون حليله لواحد غيره
_____________•
بعد صلاة المغرب في الديرة
قفل نواف و نايف المحل و راحوا متجهين للبيت بس عكس قبل اللي اذا كان المحل على نواف و يروح معه نايف كان الكل يسمعه صوت سوالفهم و ضحكهم عكس هالمره اللي يمشون و يهوجسون ولا يطلع لهم حس
و هم راجعين للبيت كان يمشي عكس اتجاههم ماجد و قال نايف لنواف انه بيروح يسلم عليه و كمل نواف طريقه للبيت و نايف راح لماجد : ارحب يا ماجد صاير ما عاد تنشاف
ماجد وهو ماشي : تبقى
مسكه نايف : وراك طاير وش فيك
ماجد : مافيني شيء بس لا يشوفني ابوي
نايف : لايشوفك ابوك ولا تبي تقطعها معي بعد ماقطعتها مع نواف
ماجد : حلو اجل انت تعرف وش سوا نواف ليكون بعد جاي تدافع عنه عندي !!!؟
نايف : انا مانيب جاي ادافع عن احد بس الحين انا اشوفك معصب ولا تفكر زين اهداء لك كم يوم و تكلم انت و نواف ما يصير كذا
ماجد : لاعاد تجيب طاري نواف عندي هو الوحيد اللي احبه و اغليه و اعده اخوي اخر شيء انصدم فيه !!؟
نايف : شف يا ماجد انا ما ابرر لك فعلة نواف بس انا اشوف اجلسوا مع بعض و تفاهموا بتهدمون عشرة سنين بسبة موقف !!!؟ وكلنا نعرف بغلاتك بقلب نواف وغلا نواف بقلبك
ماجد : عشرة سنين اللي تقولها انت ولد عمتك بيدينه هدمها و انا الحين ما اعده غير واحد غريب ما اعرفه
نايف : صل على النبي يا ماجد انا اقولك هد و تكلموا لا تاخذ موقفك من الحين و تعلن الحرب
ماجد : ( يا صاحبي دام الهوا ما ذبحني
ما همني لو نار الاشواق كبرا
المشكله تدري من اللي جرحني
اللي لو تحطه على الجرح يبرا ).
قال ماجد هالابيات اللي استرجل فيها و لّف وراه وراح وهو اصلاً ما يدري كيف طلعت هالابيات معه بس من قهره وهو اصلاً زعلان و ضايق صدره يعني بالنهاية هو و نواف عشرة سنين ولا كان يضن بيوم انه رح يصير شيء و يفترقون زي كذا
_____________•
في بيت ام عبدالعزيز و تحديدًا بالمطبخ
كانوا البنات كلهم يشتغلون بالمطبخ مع ام عبدالعزيز و كانت غيداء تساعدهم و كانت غيداء تشوف اشياء عمرها ما شافتها في بيتها يعني بحياتها ما شافت زوجات عمانها يجلسون مع بعض جلسه كذا و يسولفون بدون نفس ثقيله و تشوف قد ايش البساطة هنا و هناك قمة التكلف و هنا كل وحده قلبها على الثانيه و هناك كل وحده شايله بقلبها على الثانيه ولا فيه تحكم او احد يتأمر على الثاني
طقت اصبعها جمانه لغيداء عشان تنتبه لها : حبيبتي وين وصلتي
انتبهت غيداء : معكم معكم طلعت هالصحن يكفي ؟
جمانه : اي يكفي بس طلعي واحد ثاني نفسه
غيداء : ليه هذا ما يكفي !؟
جمانه : الا يكفي بس هذا بيكون للرياجيل و الثاني لنا
راحت غيداء تطلع الصحن الثاني و شافت اختلاف ثاني بين العائلتين
دخلت نوف و بيدها الطفريه بعد ما حطت الاغراض بالسفره برا : يمه فيصل يقول فيه لوحات بيضاء عند باب الشارع يقول تبونها ولا يرميها !؟
غيداء : هذي لوحاتي جابها سلطان اليوم نسيت ادخلها
ام عبدالعزيز : لوحات وش بتعلقينها على الجدران !؟
غيداء : لا لوحات رسم
جمانه بتصفير : اكشخ طلع في بيتنا رسامه ولا ندري عنها
غيداء : عاد مو لهذي الدرجة حبيبتي
جمانه : تكفين ارسميني بشوف وجهي يختلف بالرسم ولا نفسه
غيداء : ابشري خليني الحين اروح ادخلها عشان لا تتوصخ
ام عبدالعزيز : اجلسي يا بنيتي و انتي يا نوف قولي لفيصل يحطها لين باب غرفة اخوه و انتي يا بنيتي دخليها داخل و اي صح شلون عزيز لحد الان راسه مصدع ؟
غيداء : مدري والله يا عمه اخذ المسكن و نام و عليها
ام عبدالعزيز : اجل روحي قوميه العشا خلص
طلعت غيداء من المطبخ متجهه لغرفتها و دخلت اللوحات اللي حطها فيصل عند الباب
و ناظرت في السرير و شافته لحد الان على نومته و راحت وقفت عند طرف السرير و تناديه عشان يقوم : عبدالعزيز قم تراك من اليوم نايم حطوا العشا قم اكل
فتح عزيز عينه يوم عرف انه نام كل هالساعات و الصلوات ما صلاها و فز من السرير
خافت غيداء من فزته : بسم الله وش فيك ؟
مارد عزيز عليها و راح للحمام يتوضى و طلع فرش سجادته و صلى الصلوات اللي فاتته و يوم خلص سلم و شال سجادته : وراتس ما قومتيني على الصلاة !!؟
غيداء : ليه اجل انت تسمع انبح صوتي و انا اقومك بس لا حياة لمن تنادي
عزيز : و انتي وش فيتس ضايقه !؟
غيداء بعصبيه خفيفه : مدري عنك اجل ابوي جاي لين هنا اخر شيء تطرده من انت عشان تطرده مب انت جاي و ماخذني بإرادتك !!؟ اجل لازم تحترم اهلي اللي هم يكونون عمانك
عزيز وهو يحاول يضبط نفسه وهو يشوفها تتكلم معه بعصبيه : اسمعي يا غيداء كلمه و رد غطاها اهلتس مالهم جيه هنا و ان شفتهم هنا حشيت رجولهم حش
غيداء : من انت عشان تطردهم و الحين البيت هذا يعتبر بيت بنتهم و ابوي اذا كان يبي يشوف بنته بيجي و يشوفها
عزيز بضحكه ساخره : اصلاً ما اذكر انه ابوتس اصر انه يبي يشوفتس هي كلمه وحده قالها نهيان حتى ما اصر مره عليها اما ابوتس ما طلع له حس حتى
غيداء بعصبيه : وش قاعد تتطنز علي انت !!؟ و نهيان وش يعتبر بالنسبه لي ماهو جدي و بحسبة ابوي و اذا كان ناوي يزورني بدخله و اذا كنت ناوي تطرده اطردني معه بسيطه
عزيز بعصبيه مبالغ فيها و هو تجمع عليه كل شيء صداعه و دفاع غيداء عن نهيان : اسمعي يا غيداء جربي بس يوم اجي و القاتس مدخلتهم و الله ما يحصلتس علمن طيب و القاتل نهيان ماله مكان في بيتي و ان كانتس تبين تشوفين ابوتس ولا تفقدينه سوي اللي اقولتس عليها و اذا ميته مره على نهيان و اللي معه تذلفين عندهم تشوفينهم
خافت غيداء من وجه عزيز و عروق وجهه اللي برزت فجاءه من صراخه و تعبه و ندمت اصلاً انه فتحت هالموضوع و كان سلطان قايل لها عن ردة فعلهم تجاهم نهيان بس ما حبت انه تصدق انه ابوها جاء لهِنا ولا سأل عنها و طلعت حرتها في عزيز راحت له غيداء و حطت يدها على كتفه : خلاص طيب مارح يصير الا اللي انت تبيه بس اجلس يا عبدالعزيز شف وجهك كيف قلب لونه
عبدالعزيز : وخري عني بطلع
غيداء : لاتطلع كذا بتخاف خالتي من وجهك
عبدالعزيز : الناس ينتظروني على العشا
غيداء : لسى ما حطوه اجلس انت و خذ من هالمسكن اللي جابته ندى
عزيز : من اليوم وانا اكل فيه ولا فيه فايده
غيداء : طيب تعال اسويلك مساج لراسك
جلست غيداء على السرير و حطت يدها على رجلها : تعال حط راسك هنا و بسوي لك مساج
ناظر فيها عزيز بدون رد و اردفت : والله بيفيدك ترا دايم سلطان اذا صدع ما ياكل مسكنات يجيني على طول اسوي له مساج فيعني قدمت لك عرض ما يتفوت
حط عزيز راسه على فخذها و بدت غيداء تمسج راسه و مع المساج كان يغط عزيز لين ما داهمتهم ندى بس هالمره طقت الباب و بغت تطير قلوبهم : بسم الله من ذا ؟
غيداء : ما ادري رح شف
راح عزيز و كانت وراه غيداء و فتح الباب و شافها ندى : انتي ناويه تذبحيني اليوم !!؟ وراتس تطقين الباب زي كذا
ندى : وش اسوي ارسلنا زوجتك تقومك بس شكلها نامت معك الناس تعشوا و انت نايم
طلعت غيداء راسها من ورا عزيز : وش فيك يا ندى ؟
ندى : ولا شيء الناس ينتظروني رجالتس على العشا هذا اذا ما تعشوا و اتحداك الحين تلقى لقمه تركي و فيصل و نواف و نايف اول من جلسوا على الصحن و عاد انت تعرف الباقي
طلع عزيز : لا عز الله ما بقى لي شيء
ندى : وانتي امشي خلينا نتعشى العشاء لكم بس انتم مب موجودين
غيداء : وش اسوي قومت عزيز و راسه كان يذبحه من الصداع و سويت له مساج خفيف
دقتها ندى من كتفها : اجل بدينا نختصر الاسم عزيز اجل هاه و مساج و حركات
غيداء وهي توها تنتبه : طلعت من فمي فجاءه
ندى بغمز لها : تصير ي عمري تصير الحين فهمت ليش طولتوا
قالت ندى كلمتها و انحاشت و غيداء تناديها من وراها عشان تبرر لها
_____________•
بعد العشا في بيت ام عبدالعزيز
فيصل : وش قررتوا تسوون بموضوع نهيان ؟
وقف نواف و اخذ جواله : اي زين انك ذكرتني من منكم معه رقم سلطان ؟
فيصل : محد منا معه الرقم
نواف : اجل انقز يا عزيز جب الرقم من مرتك
دخل عزيز و اخذ الرقم من غيداء و عطاه نواف
و اتصل نواف على سلطان و وصله صوته : الو
نواف : ارحب يا سلطان انا نواف
سلطان : تبقى تبقى امرني وش بغيت ؟
نواف : بعلمك كيف نخلي احسان يطلع بس انت قبلها وصلت لمدينتك ؟
سلطان : لا لسى باقي لي تسعين كيلوا
نواف : حلو اجل اسمع لا وصلت لبيتك رح لنهيان و قوله انك كنت عندنا
سلطان بتعجب : تستهبل انت !!؟ كذا بيدري اني معكم
نواف : عادي قول له انك جايب اغراض اختك و انه حنا يوم جيت ما دخلناك حتى للبيت و قابلت اختك عند الباب وانه الكلام اللي بقوله لك الحين اختك هي اللي قالته لك
سلطان : اسلم وشهو الكلام
نواف : ابيك تقول له انك سمعت و عرفت انه عندنا تسجيل صوتي لنهيان وانك ما تعرف هالتسجيل وش داخله و قول بعد انه بنودي التسجيل للشرطة قول له هالكلام لا تزيد ولا تنقص وهو كذا بينادي احسان و يتأكد منه و حنا كذا نصيد احسان
سلطان : خلاص اجل اذا وصلت للبيت بروح اقول لنهيان و نشوف وش بيطلع معه بس لاتتأملون انه احسان بيطلع لان يمكن نهيان اذا تأكد انه التسجيلات كلها عند احسان و انه في تسجيلات زياده معكم ما ينادي احسان و يشوف له طريقة ثانيه
عزيز : حنا بنقدم على هالخطه و نشوف وش بيطلع منها و انت يا سلطان بكرا بتداوم بالشركة ؟
سلطان : اي ليه ؟
عزيز : اجل حاول تتأكد اذا فيه تسجيلات تخص ابوي يمكن انت ما انتبهت
سلطان : تبشرون على خشمي
عزيز : عليه الشحم
قفلوا من سلطان و قالهم عزيز انه يمشون بكرا للمدينه و لا تركهم الجد مقبل يروحون الا و خالهم معهم
_____________•
في بيت ال غانم
دخل سلطان للبيت بعد ما وقف سيارته برا و شاف جدته و زوجات عمه جالسين بالصاله مر من عندهم بعد ما القى السلام بس وقفته امه مريم : تعال وينك طاير قولي اخبار غيداء ؟
سلطان بعجله : بخير الحمدلله
مر سلطان وراح لين مكتب نهيان و كانوا متجمعين كل خواله و يتكلمون عن موقفهم اللي صار اليوم مع عيال ام عبدالعزيز و قطع كلامهم دخول سلطان
نهيان بعصبيه : وش تبي انت بعد !!؟
سلطان : سمعت انكم انطردتوا من بيت عيال خالي مطلق !!؟
مشعل : وانت جاي تطقطق علينا !!؟ و بعدين وش عرفك !!؟
سلطان : رحت لهم انا بعد
نهيان : و دخلوك !!!؟
سلطان : بالبداية لا لين ما كلمت غيداء و طلعت لي عشان تاخذ اغراضها و قالت لي عن موقفهم معكم
متعب : و غيداء رضت انه ابوها ينطرد من بيتها !!!
سلطان : وش تبيها تسوي فيها تعناد الرجال !!
نهيان بحده : اي تعانده و تدافع عن اهلها ولا بس جيده تعاندني انا و تتحداني
سلطان : لو كنتوا ما تهمونها كان ما قالت لي اشياء و تبيني اوصلها لكم
نهيان بفضول : وشهي !!؟
سلطان : تقول انه عيال خالي مطلق معهم تسجيل كانوا يسمعونه و انه يخصكم و بيروحون بكرا يسلمونه للشرطة
نهيان بقلق : وش اللي داخل التسجيل !!؟ و من الي طالع صوته فيه !!؟ بعدين مستحيل غيداء تدافع عني اكيد لعبه من العابكم
سلطان : الي داخل التسجيل تقول ما تدري وش و هي سمعت عبدالعزيز و اخوانه و هم يتكلمون جنب غرفتها وانت صادق غيداء و هي تقولي هالاشياء ما كانت قاصده انها تدافع عنك بس لانها سمعتهم يقولون اسم ابوي و قالت لي اقوله عشان ياخذ احتياطاته عاد انا بلغتكم و انتم بكيفكم
طلع سلطان بعد ما زرع الشك في قلب نهيان و اتصل على العيال يبلغهم بأنه الخطه مشت زي ما يبون
اما بالنسبه للنهيان بان على وجهه اثار التوتر و القلق وهو كان شايل من باله انه يكون فيه تسجيل صوتي عند ام عبدالعزيز و الحين طلع له فجاءه و هو يتذكر يوم مطلق قاله انه سجل صوته و التسجيل فيه كل اعترافه يعني لو طلع فيه صدق بيروح ورا الشمس
طلع جواله نهيان و ارسل لاحسان انه يكون الصبح يكون عنده
فهد بخوف : يبه وش ناوي تسوي اخاف يطلع كلام سلطان صح و نروح فيها
نهيان وهو يتصنع البرود : ما اتوقع صح بعدين متى شفتوا انه سلطان و اخته يفزعون لنا او يحذرونا !!؟ هم يدورونها من الله انه ننسجن
متعب : صح بس التسجيل اللي يتكلمون عنه يقول سلطان انه يخصني انا بعد فاتوقع عشان كذا غيداء قالت له يعني لازم تاخذها بعين الاعتبار عشان لا تنصدم بكرا
نهيان : عيال مطلق ماهم بدا يغلي و لازم نطفي عليه
_____________•
في صباح يوم يوم جديد مسكوا العيال خط المدينه و معاهم خالهم عبدالرحمن عشان لو طلع لاحسان طرف يصيدونه و وصلوا للمدينة و راحوا لبيت خالهم عبدالرحمن و فجاءه جت نواف رسالة على جواله و مضمونها " انا اعرف انكم تدورون دليل ضد نهيان عشان تسجنونه و حتى انا ودي اني اسجنه فعشان كذا بساعدك بس اسمي ما يطلع لاحد و اذا كانك صامل و تبي تعرف تعال على العنوان اللي برسله لك "
شاف نواف هالرساله و بالبداية شك فيها بس قال انه مارح يخسر شيء لو راح و اخذ معه زي الشريط الصغير عشان لو كان نهيان و شاف الشريط بيظن انه الشريط هذا يخصه و كذا بيعرفون اذا نهيان يخفي التسجيل و لا احرقه او كسره
فطلع نواف متجه للعنوان اللي ارسله له و حط الشريط في سيارته
وصل للمكان و نزل ينتظر عند سيارته اي احد يجي و مر واحد من قدامه و نزل من سيارته و تقدم لنواف : انت نواف ولد مطلق ؟
نواف بملامح حاده : اخلص قول وش عندك !!!؟
الشخص : ماعندي شيء بس نهيان يسلم عليك
قال الرجال كلمته و طلع ابره من جيبه و طقها في رقبة نواف ولا امداه نواف يسوي شيء الا و الابره منغرسه في جلده
تألم نواف منها و طاح على الارض و يحس انه يدينه و رجوله ما تشيله و راح الرجال يفتش السيارة و حصل شريط موجود و اخذه و شال نواف و ركبه في مكان السائق و راح هو ركب سيارته و مشى
اما نواف كان اخر لقطة شافها يوم الرجال تركه و راح يفتش السيارة و بعدها غاب عن الوعي و بعد حوالي تقريبًا ساعة صحصح نواف و حط يده على راسه و يحس انه بينفجر بعدين انتبه و راح ناظر في مكان الشريط ولا لقاه موجود فتأكد انه التسجيل اللي سجله ابوه موجود
اخذ جواله و شاف الاتصالات اللي فيه و كانوا كلهم متصلين عليه و من بينهم سلطان
طلع رقم سلطان و اتصل عليه : وش فيك يا سلطان ؟
سلطان بخوف : انت اللي وش فيك !!!؟ اتصل عليك ماترد و ادق على اخوانك يقولون مايدرون وين رحت !!؟ صاير معك شيء ؟؟
نواف : التسجيل الصوتي حق ابوي موجود يا سلطان
سلطان : و كيف تاكدت !!؟
نواف : بقولك بس اول شيء قول لي كيف جو نهيان !!؟
ناظر سلطان من دريشة غرفته اللي تطل على الحديق و شاف نهيان يضحك : والله مزاجه عالي يضحك و مجمع خوالي عنده ليه صاير شيء ؟
نواف : اليوم ارسل لي واحد رساله ... و كمل لسلطان كل اللي صار معه
سلطان : و انا اشوف نهيان مبسوط بس انتبه يا نواف رح للمستشفى الحين و شف وش اللي طقوك اياه برقبتك
نواف : اتوقع انه شيء يخليني ادوخ لان اول ما بديت ادوخ راح الرجال يدور بالسيارة على راحته
سلطان : حتى تأكد
نواف : ابشر فمان الله
قفل نواف من سلطان و اتصل على اخوانه و قال لهم انه جايبهم بس ما قال لهم اللي صار معه و اخذهم و راح متجه للديره و هم بالخط قالهم كل شيء صار معه بس بدون قسم الابره
و طبعًا كلهم عاتبوه انه كيف يروح لحالها و هو ليش طايش ولا يفهم و لو انه صار له شيء و كان طول الخط عتابات له
_____________•
في الديرة متجمعين حريم الديره في بيت ام عبدالعزيز عشان يقهوونها بعرس عزيز و ريم
ام مازن : الا يا ام عبدالعزيز بتروحين لبيت ابو تميم اليوم ؟
ام عبدالعزيز : وش عندهم اليوم اشوف بيتهم اليوم ما هجد ؟
ام مازن : أخيرًا بيزوج بنته اديم لراشد ولد ابو راشد
ام عبدالعزيز : الله يكتب لهم اللي فيه الخير و يوفقهم و يبني بيتهم يارب
اما في المطبخ دخلت ندى تركض بعد ما سمعت كلام ام مازن : بنات تدرون وش سمعت داخل !!!؟
البنات بفضول : وش !!؟
ندى : اديم بتتزوج
البنات شهقوا و بكلمه وحده : كذااابه
ندى بزعل : والله ولا بعد بتتزوج راشد ماغيره البخيل
نوف : غريبه وافقوا على راشد !!؟
ندى بعصبيه : انا ادري عنهم
غيداء وهي مب فاهمه السالفه : طيب و اذا تزوجت وش فيكم ؟
جمانه : اي انتي ما تدرين سلمك الله نواف اخوهم اللي يكون ولد عمك يحب اديم و اديم تحبه عاد هذا على تحليلنا ما ندري هل هو جانب الصواب ولا لا
ندى : تستهبلين انتي !!؟ ما تذكرين كيف كان نواف يسأل عنها و لا هي اذا شافته قعدت تتبوسم و البشت و الشماغ هذا كله نسيتوه !!!؟
نجلاء : خلي هذا كله السالفه مب هنا السالفه هي نواف يدري انه اديم بتتزوج ولا لا !!؟
جمانه : طيب دامنا نقول انه اديم تحب نواف يعني بتكون مغصوبه على راشد
غيداء : طيب وش ناوين تسوون !؟
غيم : انا جتني فكرة مب علاقتكم مع اديم صارت قوية بالفترة الاخيرة روحي يا ندى و شوفي الوضع اذا كنتي تحسينها عادي يعني ما تحب نواف باركي لها و اطلعي
ندى : امي ان خطيت خطوة برا البيت بتحش رجلي لازم احد يقنعها
كلهم ناظروا في غيداء : وش فيكم تناظرون فيني !!؟
ندى : غيوده شرايك تروحين تقنعين امي انه نطلع
غيداء : ابشروا بس كيف اقنعها !!؟
جمانه : عاد هذي بنخليها على قدراتك
طلعت غيداء لام عبدالعزيز و قالت لها انه تبي تطلع للسوق و تبي ندى تروح معها و وافقت لها بس تستأذن من عزيز قبل
رجعت غيداء للبنات : هاه وش صار معك ؟
غيداء : وافقت بس قالت استاذني من رجالك اول
نجلاء : طيب دقي و استاذني عشان تروحون و تجون بسرعة
غيداء ببتسامه خفيفه : لا هذي الحين حبيبتي ندى بتاخذ الجوال و تدق على عبدالعزيز تستأذن منه
ندى وهي تغمز : رجع عبدالعزيز بعد ما كان امس عزيز
ضربتها غيداء على يدها : ترا والله لا اقول لعمتي اني غيرت رايي
ندى : نمزح الحين ادق لك عليه
اخذت ندى الجوال و اتصلت على عزيز و بعد ثواني وصلها صوت عزيز : الو
ندى : هلا اخوي وينك فيه ؟
عزيز : ماسكين خط الديره راجعين بغيتي شيء ؟
ندى : والله مب انا اللي ابغى مرتك تبي تطلع للسوق تبي تشتري لها شيء ناقصها
عزيز : خلاص لاجيت انا وديتها
ندى : لا هي تبي تطلع معنا حنا
عزيز : وانتي ليه تتكلمين عنها ما عندها لسان !!؟
ندى : انا ادري عنها شكلها مستحيه منك ( ناظرت في غيداء ) خذي كلمي رجالتس يبيتس
اخذت غيداء منها الجوال وهي تتوعد فيها : هلا عبدالعزيز
عبدالعزيز : اذا بغيتي شيء مره ثانيه قولي لي انتي من نفستس يعني انا بمنع عليتس شيء !!!؟
غيداء : تمام
قفلت غيداء من عزيز و راحت هي وندى يتجهزون عشان يروحون لاديم و بعد ما تجهزوا طلعوا و وصلوا لبيت اديم
غيداء باستغراب : بهالقرب !!!؟
ندى : اي بينا بس جدار
طقوا الباب و فتحت لهم بشاير : هلا والله
غيداء : اديم موجوده ؟
بشاير : اي موجوده بس ماعرفتيني بنفستس ؟
غيداء : انا غيداء صديقة اديم و هذي اختي
بشاير : حياكم الله تفضلوا
دخلتهم بشاير للمجلس و راحت لغرفة اديم تناديها : قومي شوفي صديقتس و اختها تحت يبونتس ولا تطولين معهم ورانا شغل
اديم : صديقتي من ؟
بشاير : غيداء و اختها
استغربت اديم لانه على حد علمها ما عندها صديقة بهالاسم بس راحت تشوف يمكن له علاقة بنواف اول ما فتحت باب المجلس شافت ندى و على طول قفلت الباب وراها و راحت تحضن ندى : هلا ندى تو ما نور البيت
ندى : هلابتس يا اديم جينا نبارك لتس بزواجتس و هذي غيداء زوجة اخوي عزيز
اديم ما ردت على المباركة و رحبت بغيداء : هلابتس يا غيداء تشرفت فيتس
غيداء : اهلين يا روحي
ندى : اي اديم متى الزواج !!؟
اديم وهي تحاول ما تنزل دموعها : ما تحدد لسى
ندى وهي بترمي كلمه يا تصيب يا تخيب : نواف يدري !!؟
رفعت عينها اديم لندى و نزلت الدموع لا شعوريًا قامت ندى و حضنتها : هدي يا اديم وش فيتس
اديم ببكاء : حاولت انا حاولت اقول لنواف بس نواف وش بيطلع بيده !!! اصلاً بسبتي خربت علاقته مع ماجد و مالي مفر دام ابوي و اخواني مصرين انهم يزوجوني لراشد يعني بالله يا ندى وش يطلع بيدي او وش بيطلع بيد نواف اذا قلت له بيجي يخطبني من ابوي !!!؟ اصلاً اذا اهلي دروا انه نواف يبي يخطبني رح يصرون على زواجي من راشد
غيداء بمواساة لها : هدي ي قلبي ما تدرين ربي وش كاتب لك لو بنصيبك انك بتاخذين نواف لو يتقدمون لك رياجيل الدنيا بتكونين لنواف خلي املك بالله كبير
اديم : انا خايفه انه نواف يدري اليوم و اذا كانت اعرفه لو قليل مارح يجلس و بيفشل نفسه فانا طالبتس يا ندى انتس ما تقولين له
ندى : طيب لو درا مارح ينقهر ان كاني اعرف اخوي انه ما يقعد لو عرف
اديم : امس ما كان بيني و بينه الا خمس خطوات ما طاوعني قلبي اني اقوله و يفشل نفسه و انا ادري انه نواف يسوي اللي براسه ولا يهمه احد فطلبتس لا تقولين له
ندى : طيب انتي تدرين انه اذا نواف درى انه انا كنا ندري ولا قلنا له انه ليزعل علينا عاد انتي ما تعرفين زعله
اديم : طيب وش اسوي يا ندى قولي لي يعني الحين انا فرحانه اني باخذ واحد غير نواف و انا عارف انه محد رح يحبني كثر نواف لدرجة انه حبه لي باين من عيونه انا لحد الان ما استسلمت ان شاءالله بقدر اغير رايهم بهالزواج
ندى و هي اصلاً ما كشفتهم الا من عيونهم اللي فاضحتهم : والله انتس صدقتي مير نواف تشوفين عيونه تعرفين انه يحب انتي الحين وكل امرتس لله و ان شاءالله بتفرج
_____________•
في حدود وقت المغرب في بيت ام عبدالعزيز
وصلوا العيال للبيت و دخلوا و قالت لهم نوف انه فيه حريم عندهم عشان لايدخلون و هم ما يدرون و راح عزيز لغرفته و كانت غيداء فيها
فتح الباب عزيز و شاف غيداء ترسم سكر الباب بس غيداء ما سمعته و هي حاطه السماعه باذنها وقف عزيز بمكانه يتأملها لحد ما طاحت الفرشه من يدها و نزلت تاخذها و هي اشوف طرف شخص واقف عند الباب
صرخت غيداء اول ما تاكدت انه شخص واقف عند الباب و اللي تعرفه هي انه عزيز مب موجود في الديرة يعني من بيكون
اول ما سمع عزيز صراخها راح و مسكها عشان يسكتها : وش فيتس انتي تصارخين هذا انا عزيز
دفته غيداء عنها : انت اللي وش فيك واقف بدون لا تطلع صوت بغى يوقف قلبي
عزيز : والله انا طلعت صوت بس شكلتس تعمقتي بالرسم ولا تدرين باللي حولتس
غيداء بحركة عفوية اخذت يده و حطتها على قلبها : شف كيف ينبض بسرعة كلها بسببك
سرح عزيز من حركتها و انتبهت غيداء و نزلت يده : اي ما قلت لي متى جيتوا ؟
جلس عزيز على الكرسي : تونا واصلين انتي وش شريتي ؟
غيداء و هي تشيل اغراض الرسم : وش اشتري !!!؟ مارحت السوق
انتبهت غيداء انها جابت العيد : قصدي انه طلع نفس الاغراض اللي عندي بس تمشيت مع البنات
اما في الطرف الثاني من البيت /
جالسين كل عيال ام عبدالعزيز بعد ما راحوا الحريم و كانوا العيال يلعبون مع بعض في طرف و البنات في الطرف الثاني ساكتات و هذي اول مره يقعدون كذا بدون لا يحارشون احد و هذا كله صار بعد ماجوا غيداء و ندى من عند اديم و قالوا للبنات كل اللي صار و كلهم زعلانين على الاثنين
الجدة منيرة : وراتس يا اماني ماتروحين تحضرين الملكة ؟
توتروا البنات من طاري الملكة و كلهم خايفين انه نواف يدري
ام عبدالعزيز : ما انعزمنا ليه نحضر
الجدة منيرة : البنت ما عندها ام خلينا نروح نوقف معها
ام عبدالعزيز : عمتها عندها
نايف : منهي ذي يا جديده !!؟
الجدة منيرة : بنت ابو تميم اليوم ملكتها على ولد ابو راشد
رّفع نواف بعينه على الجدة منيرة و يبي ينفي الكلام اللي يسمعه منها شلون اديم بتتزوج واحد غيره امس كانوا مع بعض ما جابت له طاري زواج ولا شيء
وقف نواف و متجه للباب و ما يهمه من او وش بيقول اللي يبيه الحين انه بيتأكد منها هي
نقز نايف وراه لانه عارف انه نواف بيسوي اللي براسه لو بيدخل للبيت عندها و مسكه قبل ما يفتح باب الشارع : نواف استهدي بالله يا اخوي وش بتسوي بتسحب البنت من بيتها !!!؟
نواف وهو ماسك وجه نايف بيده : نايف بيزوجونها يا نايف اديم بتروح لواحد غييييري كيف تبيني اجلس ولا اسوي شيء !!!؟ انا امس مقابلها بالسوق ما قالت لي شيء اكيد مغصوبه تكففففى يا نايف طالبك انك توخر
الجدة منيرة : هذولاء وراهم قحصوا كذا !!؟
كانوا كلهم يسمعون نواف و نايف بس مو فاهمين من يقصدون الا البنات اللي عارفين الموضوع و اول ما شافوا فزت نواف بدت دموعهم تنزل خصوصًا انهم شافوا كيف كانت حالة اديم اليوم
نايف : طيب هد انت و اقصر حسك بيسمعونك
دف نواف نايف عن طريقه وفتح باب الشارع و طلع شاف اهل راشد يدخلون لبيت ابو تميم و سمع باب البيت يتسكر و كانه تسكر على روحه ما امداها ينزل من عتبة البيت الا و عزيز اللي طلع من غرفته على صوت صراخ نواف و نايف و مسكه من ياقة ثوبه و دخله للبيت : بعد عني يا عزيز فكني
عزيز : افكك وين تروح !!؟؟
نواف بعصبيه : بيزوجونها يا عزيز اديم بتاخذ واحد غيري عزيز انا قلبي حاس انها مغصوبه تكفى يا عزيز خلنا ناخذها !!!؟
عزيز بحده : صاحي انت فعقلك شيء تاخذها من بيت ابوها وين توديها !!!؟ و البنت اذا اعرست و اهلها موافقين انت وش بيطلع بيدك !!؟ بعدين وش يضمنك انه البنت موب هي موافقه من نفسها ليه حطيت انها مغصوبه !!؟
مسك نواف عزيز بغضب و رجع فيه على الجدار : انااا عاااارف هي ما تسوووي كذا اكيد ماجد منقهر مني و غاصبها اديم ما تخوني ما تخون الوعد اللي بينا تتتسمع !!!!
وقفت ام عبدالعزيز بغضب بعد ما فهمت الموضوع : نواف نزل يدك عن اخوك انت وش تقول وش مهبب انت
نواف : يمه تكفييين لا يزوجونها تكفييين يا يمه انا ابيها روحي وقفي الملكه طالبتس يايمه لا تكسرون قلبي فيها تكفين يا يمه
ام عبدالعزيز : صاحي انت في عقلك شيء اروح اوقف الملكه بصفتي وش !!؟ بعدين انت متى شفت البنت و حبيتها يوم جايني و تبيها !!!؟ طول المده اللي راحت ما عندك لسان تتكلم و تقول ابيها زوجوني اياها !!؟ بعدين لو ما اخذها راشد بتاخذها انت !!؟؟ مصدق انه ابوها بيزوجك بنتها !!!؟
نواف بعصبيه : راشد مارح ياخذها دام راسي يشم الهواء انا وعدتها اني انا اللي بتزوجها و رح اوفي بوعدي لها
وقفت ندى و راحت لنواف تحضنه : اسمعني يا نواف انا اليوم كنت عندها
بعد عنها نواف : مغصوبه صح !!؟
ندى : اي مغصوبه بس هي تقولي نواف لا يدري تقول انا كنت اقدر اقول لنواف بالسوق بس ما تبيك تفشل نفسك عشانها و هي عارفتك انك مارح يهمك احد لو تدخل عليهم و لو لكم نصيب ببعض لو يجيها مليون واحد مردها لك
وقف الجد مقبل بغضب : نواف انثبر فمكانك و اياني و ياك اشوفك معتب الباب البنت الحين تلقاها صارت حرم راشد انثبر لا تفشل عمرك ولا تفشلنا
بدأ نواف يضرب يده بالجدار بس من سمع كلمة " حرم راشد " : يعقب و يخسى هي مارح تكون الا حرم نواف بن مطلق
رفع نواف راسه لجهة بيت ابو تميم بعد ما سمع التباريك طالعه منه و طاح على ركبته بعد ما تاكد انه خلاص اديم راحت لغيره : راحت راحت نديمة القلب
و نزلت دموعه و هو يقولها هالابيات :
( مصير ربي يجمع الحي بالحي
تبقى نديم القلب و اصدق نواياه
حتى ولو حظي معتس ما وقف لي
و يبقى غرامتس داخل الروح مبناه
يالله عسى مع الزمن تنكتب لي )
طق باب بيتهم و كانوا عزيز و نايف و اقفين خلفه عشان نواف ما يطلع فتحوه و طلع بوجههم الشرطة : انت نواف بن مطلق
عزيز بخوف : لا انا اخوه فيه شيء ؟
الشرطي : اخوك موجود بالبيت ؟
عزيز بخوف : اي موجوده ليش سألت ؟
الشرطي : نواف متهم بتجارة المخدرات طلعه لنا ولا بندخل ناخذه
عزيز : اكيد تمزحون انا اعرف اخوي مستحيل يسويها
دخل نايف للبيت وعزيز كان يتكلم مع الشرطة : نواف الشرطة يبونك
فزت ام عبدالعزيز من طاري الشرطة : ياويلي وش يبون فيه !!؟
وقف نواف بهدوء و طلع مع الشرطة بس و هو طالع شاف راشد بعد طالع من بيت ابو تميم و صار ما يشوف قدامه ولا امداه عزيز و نايف يمسكونه الا وهو منقض عليه يضربه لحد ما مسكته الشرطه و دخلته السيارة
.
.
( انتهى )
عطوني رايكم على البارت (:
أنت تقرأ
حكٍم طغى ماعاد ينفع نظامه
ChickLitبقلم الكاتبه ديم ✍ . جوهر الإبداع هو ألا تكون خائفًا من الفشل. اول ابداعي ( حكمٍ طغى ماعاد ينفع نظامه )
