حكٍم طغى ماعاد ينفع نظامه

Part 2

وقعد نواف يسحبها لجهته و نايف يسحبها له و بدون سابق انذار انكبت القهوه على رجل الجد مقبل ويد نواف ورفع راسه نواف يناظر نايف وهو داري انه الجد مقبل بيفصل عليهم : انحش
وركضوا كل واحد راح بجهه نايف فتح الباب وانحاش و نواف من الخوف شقح جدار بيت ابو تميم وهو مو حاس على نفسه من الخوف
الجد مقبل بردت عظامه يوم شاف نواف على جدار ابو تميم خاف انه يشوفه و طبعاً ابو تميم يدورها من الله : انزل يا السلوقي انزل
نواف ماكان يمه طلع على الجدار وشاف وحده تغسل الحوش و مشغله اغنيه من الراديو و قاعده ترقص وهو ماكان ثابت مره على الجدار و طاح وصاح : ظهري
فزت اديم من سمعت الصوت ورفعت نظرها الا تشوف واحد طايح على الارض و متمدد و راحت تاخذ جلالها وجت عشان تشوفه : هيييه انت وش تسوي هنا !!؟
ما امدا نواف يتكلم و يرد عليها الا وطق باب بيتهم ودب بقلبها الخوف لو شافه ابوها وش بيقول او وش بيفكر : قم رح ورا جراكيل المويه بسرعه
قام نواف وهو يالله يمشي من ظهره وراحت اديم تفتح الباب
تميم : ساعه عشان تفتحين !؟
اديم بقلق و توتر : اء مدري ما سمعت انت ليش مفتاحك مو معك ( تحمد ربها من داخلها انه المفتاح مو معه ولا كان ذبحها و ذبحه )
ماجد : اديم فيتس شيء كانتس مو مرتاحه ؟
اديم بتصريف للموضع : لا ولا شيء بس حايمه كبدي من الصبح
ماجد بانتباه راح لجراكيل المويه و اديم شوي وتدوخ : انا عرفت وش اللي موترتس و محوم كبدتس
اخذ الراديو و رفعه : اكيد انتس مغير تترقصين لين دختي
طق الباب و قالوا لاديم تدخل داخل وراح تميم يفتح الباب : خير اللهم اجعله خير وش عندك
عزيز بتوتر وهو يناظر ارجاء البيت : ابد بس بسال عندكم سكر ؟
تميم بداخله وش هالغبي اللي يدور سكر عند اللي متهاوش معهم !! : اي عندنا وش تبي
عزيز من توتره : وش ابي فيه بصور معه الله يحيك بسوي براد شاهي يحبه قلبك ولا ما تبي تعطي جارك
عطاه تميم نظره وراح يجيب له سكر وجلس عزيز يناظر يحاول يدور نواف بس ما لقاها وجاء تميم وقدم له السكر : خذ
اخذه عزيز وقعد يناظر وجه تميم
تميم : مضيع شيء بوجهي يا الغالي !!؟
عزيز : لا ابد شكرا على السكر
____________•
دخل عزيز بيتهم و استقبله الجد مقبل : لقيت الكلب
عزيز بخوف من ردة فعله : لا مالقيت نواف بس لقيت سكر
الجد مقبل شوي و يلعن شكله : تستهبل على راسي يعني مستحيل انه تبخر ولا انهم دخلوا ولا شافوه
عزيز بتطمين : لا انا اخذت السكر من تميم وكان عادي يعني ماكان معصب لو انه شاف نواف كان الحين من يمسكهم عنا
____________•
ودخل تميم داخل : ما ادري هالعائلة غبيه ولا يتغابون
ماجد : ليه وش صار ؟
تميم : جا عبدالعزيز يسال عندنا سكر ولالا
ماجد : طيب عادي حق الجار و الرسول اوصى بسابع جار
وهذا كله تحت مسامع نواف وهو وده يقوم ويضرب تميم طلعت اديم بجلالها استغربوا ماجد و تميم انها لابسه جلالها بالبيت : وراتس انتي لابسه جلالتس ترا مافيه احد
دخل ابو تميم البيت بغضب من تميم : لا قالب الصدر شمالي و قاعد تسولف وانا راسلك تجيب الجراكل و تجي!!
تميم مستحيل يقول لابوه انه عزيز جاء ولا عطاه سكر بعد بيفصل عليه ابوه و حب يصرف الموضوع : يوووه والله نسيت الهوني الحين اطلعها
اديم شوي وتموت يعني طول هالايام ما كانوا يبون الجراكل والحين بغوها : ابد ولا تتعب يا خوي الحين انا اطلعها كلها لك واحطها عند الباب وانت تحطها بالسياره
تميم باستغراب منها اول مره تبادر : مع انها غريبه منتس بس لا انا بطلعها
اديم بتوتر : لا انا بطلعها فيني طاقه خلني اطلعها عليها وانت ادخل لو تبي شي من داخل اخذه وتراني مسويه ذاك القرص اللي يحبه قلبك رح خذ قبل ما يخلصه ماجد عليك
دخل تميم داخل وراحت اديم تشوف نواف وش صار عليه و تحاول تطلعه راحت له و شافته منسدح على جمبه : لا يبيلك شاهي و فصفص بس
نواف : والله طولتي علي انتي واخوانتس ما تخلص سوالفكم و سبكم فينا
اديم بغضب منه : كان ما نطيت بيتنا ولا كان صار هذا كله و انت تدري لو شافك ابوي وش بيسوي فيك و وش بيسوي فيني
نواف بتفكير : لاحظت شيء انكم انتم كعائله تحبون تسولفون يعني لو انك مطلعتني من يوم ما دخل اخوتس و لا جلستي تهذرين على راسي كان الحين انا طالع
اديم برفعة حاجب : لو انك ما طبيت بيتنا ماكان صار ذا كله بعد شين و قوي عين
نواف بتبرير : انا ما طبيت بيتكم انا طحت عليكم
اديم : لا والله وش مطلعك على جدارنا !!!؟
نواف بطفش : اف منتس كنت منحاش وطحت خلصتي اسئله طلعيني قبل ما يجون
اديم : اخلص اطلع بدخل و الهيهم وانت اطلع بسرعه
نواف بطنازه : اطلع بسرعه !! ما تشوفيني متحرول هنا ولا وش مصبرني على بيتكم
اديم بغضب : هيه لا تخليني اصرخ الحين و اقول انك طاب علي و مندس ورا الجراكل احمد ربك اني اساعدك
نواف بطفش : خلاص يرحم امتس روحي ادخلي وخليني اطلع
راحت اديم ودخلت داخل عشان تلهي اخوانها عشان يطلع نواف وطلع نواف وخلص تميم اكل وراح يطلع الجراكل بس انصدم انه اديم ما غيرت مكانها ابد : اديموه يا حماره ما كنتي بتطلعين لي الجراكل !؟
اديم : يوه نسيت طلعها انت ودخلت داخل
تميم : لا ذي انا ذبحها ذابحها
___________•
طلع نواف من عندهم و شافه نايف و قعد يأشر له يجي وراح له نواف وهو يالله يالله يمشي من ظهره وحاط يده عليه
نايف بأستغراب انه طالع من بيت ابو تميم : هيه يا ورع وش مطلعك من بيته
نواف وهو لحد الان وده يذبحه : اسكت اخر من يتكلم انت من الخوف شقحت الجدار وطحت
نايف بشك : الجدار مو عريض من فوق كيف طحت ولا شايف لك شيء
نواف توتر يحسب انه نايف يقصد انه شاف اديم وطاح بسبتها بس نايف كان يقصد انه يمكن شاف ابو تميم او واحد من عياله و خاف و طاح : يعني وش بشوف جدك كان يلحقني بعصاه و فجاءه طحت المهم خلنا نرجع وناخذ نصيبنا من الضرب و يعدي الموضع
نايف : يالله انا ما ادري ليه كل ما جيت هنا لازم انضرب من جدي
ضحك نواف عليه لانه نايف مستحيل يجي للديره ولا يخرب شيء لازم ينضرب من الجد مقبل
___________•
مشوا وراحوا لين عند الباب و يتعازمون من اللي يدخل اول
نواف : اقول انت السبه وانت اللي تدخل اول
نايف : لاولله البيت بيتك وانت متعود على الضرب من جدي يعني مارح تفرق معك
فتح نواف الباب و دف نايف قبله بعدين دخل هو
الجد مقبل وهي واصله معه : وصل المتعوس و خايب الرجاء اخيراً شرفتوا
راح وهو يمصع اذن نواف و اذن نايف : انا مو قلت لك انثبر وخل القهوه يعني لازم تسوي نفسك
نايف باستعطاف لجده : شسوي شفت نواف كانه تعب قلت اروح اصبها عنه اعتذر ولن تتكرر
الجد مقبل : وانت يا الخايب الثاني يومنك تقوم و تشقح جدار جارك ليه وليتك شقحت وبس طبيت بيته وش اسوي فيك انا
نواف : اول شيء انا ما طبيت بيته انا طحت بعدين يا جدي كلها منك ليه تخوفني كذا
الجد مقبل : يعني انت ما تعرف نايف و نشبته كان رميت القهوه عليه وخليته يصبها لازم تسوون مصيبه بعدين جاء اخوك عند جارك يدورك ماحصلك وين كنت
نواف قال لهم كل اللي صار بس طبعاً ما قال انه اديم شافته و وخبته : بعدين دخلو داخل و طلعت
الجد مقبل : انقلعوا لا تشوفكم عيني اذلفوا
نواف : جدي ما كانك كبرتها شوي يعني خلاص تعاقبنا انا طحت على ظهري و لحد الان يعورني و نايف وهو يناحش صقع رجله في حصاه كبيره و بغت تنكسر عليه يعني خلاص اخذنا عقابنا
طنشه الجد مقبل وقعد
نايف : السكوت علامة الرضى اجلس يا نواف
الجد مقبل : بتروحون لعرس خالد ولد ابو خالد ؟
الجده منيره : اكيد  عرس وحيدهم و اكيد انهم متكلفين فيه وانا اقترحت عليهم يكون عرس الحريم عندنا بيتهم ما يشيل
الجد مقبل : زين على زين اهم شيء لاتقصرين معهم عاونوهم
ام عبدالعزيز: اي يبه ما يحتاج توصي
الجد مقبل: الله يرضى لي عليكم
__________•
بعد صلاة العشاء الجد مقبل اعلن وقت النوم ودخلهم كلهم للغرف وكانوا كلهم ببيت ام عبدالعزيز لان بيت الجد مقبل عباره عن غرفتين مسروقه و حمام ( ما ادري اذا تعرفون نظام الغرف المسروقه ولا لا ) وكانوا العيال ينامون في المجلس و البنات داخل
دخل فيصل داخل عشان يطلع الفرش و يفرشها عشان النوم : ولد فيه احد ؟
ريم : اي فيه
قامت نوف من مكانها وراحت له : وش بغيت
فيصل : عندي طلبين واحد حلو و واحد خايس اختاري وش ابدا فيه
نوف بطفش منه : اخلص علي ترا مالي خلق
فيصل : نفسي مره اجيتس ويكون لتس خلق اختاري واحد
نوف : اف منك بسرعه الخايس
جاء بيتكلم فيصل بس صاحت ندى لنوف بانه عبد الحليم  حافظ طلع على الراديو وراحت ركض للراديو وسحبت على فيصل
فيصل يصارخ : هيييه انا هنا
راحت له ريم : هلا ياعيوني وش فيك ؟
فيصل : الدلخه ذي راحت تركض كانها تيس منحاش مدري وش بلاها
ريم بضحك : اشتغلت اغنية عبد الحليم حافظ وعاد انت تعرف نوف و حبها لعبد الحليم
نوف جته بزعل : كلها منك فوته وانا من اليوم انتظره عشان اسمع
مرت من عنده وهي زعلانه وراحت تغسل المواعين
فيصل بأستغراب : هذي وش فيه زعلانه عادي واذا فوته يجي بكرا
ريم : لا مسكينه من اليوم تنتظره
فيصل : المهم نبي المفارش وكنت ابي اكل بس سديتوا نفسي
اخذ فيصل المفارش وراح عند العيال و فرشها
عزيز : انت وراك ابطيت ساعه تجيب المفارش
فيصل : الدلخه اختك كنت اكلمها و جاء عبد الحليم وراحت له و سحبت علي بعدين جتني وهي زعلان تقول فوت اغنيته بسبتك مب صاحيه
عزيز : افا هذا اللي مزعلها يحضر لها احلا من عبد الحليم الحين
راحو يدورن نوف عشان يراضونها
عزيز تنحنح : فيه احد ؟
جتهم ندى : وش فيكم ؟
نواف : نادي لنا نوف
ندى بفضول : ليه وش تبون فيها ليكون بتعطونها شيء وانا لا ترا والله انا بعد ازعل لو جبتوا لها شيء و نسيتوني
فيصل : اعوذ بالله منتس ما تسكتين على طول السيناريو اللي يجي براستس تقولينه اخذتينا بالعجه ناديها و تعالي معها
ندى : يالله بناديها و بجي
راحت ندى طايره تناديها وهي اللي الفضول ذابحها نادت نوف وجت معها ريم : يالله جت وش تبون منها
عزيز : سمعنا انتس زعلانه فحبينا نطير زعلتس
غمز لهم عزيز وبدوا يغنون اغنيه لعبد الحليم
( ليه بيقولوا الحب أسيه
ليه بيقولوا شجن و دموع
اول حب يمر عليّا
قدلي الدنيا فرح و شموع
افرح و املى الدنيا اماني
لا انا ولا انت حنعشق تاني
اول مره اول مره )
نوف شوي وتبكي من اخوانها اللي بس حسوا انها زعلانه وجوا يراضونها مع انها ماكنت زعلانه بس فيصل كذا فسر تعابيرها راحت تضمهم : الله لايحرمني منكم يا سندي في هالدنيا
نواف : اوووه صاير يطلع كلام حلو
ندى : هيه ضموني انا بعد
فيصل : روحي وراتس حضني بس لتؤامي
نواف : افا تعالي انا احضنتس اذا ما كفاتس حضني احضنتس بعيوني بعد
راحت ندى تحضنه : تلموني اذا تعزويت وقلت اخت نواف
نواف : انا ما الومتس
عزيز : افا تعالي يا ريم شكل انا وياتس محد يحبنا
ريم حضنت عزيز : اي وحده مع توأمها و وحده مع عزوتها
ندى بغرور : اففف ياشين الحساد
وقطع جمعتهم الحلوه زبيريات الجد مقبل اللي شطفتهم : انا قبيل ما قلت امرحوا ولا ما تفطنون العلم !؟
عزيز : ابشر طال عمرك رايحين الحين
راحو العيال و البنات دخلوا وكل وحده جلست على فراشها وجلسوا يسولفون قبل النوم
نجلاء : يحليل اخوانتس جو يراضونتس
جمانه : اي والله يا حليلهم لو اخواني كانو اخذوني طقطقه
غيم : صدق بسال سؤال الحين انتم عندكم محل جوالات ليش انتم ما معكم جوال يعني بدال ما نوف تنتظر عبد الحليم على الراديو تصير تشغله على الجوال !؟
نوف : والله السؤال هذا اساليه امي وانا اصلاً عبد الحليم اسمعه في المسجل فيصل شاري لي اشرطة لكل اغانيه بس انتس تسمعينها من المسجل بدون ما تحطينها كانتس تسمعينه مباشر يعني كانه توه ينشرها
غيم : وجهة نظر
جمانه بطفش : اقول خلوا ذا وذا انا طفشت مرره ملل ابي احرك رجلي ودي اسوي شيء
ندى : يوه يا جمانه حطيتيها على الجرح حتى انا طفشت
ريم : عاد انتي تدورينها من الله انا اقول انثبروا و ناموا ابرك ورانا قومه من الصبح
نامت ريم و نوف و غيم و الباقين جلسوا يسولفون وهم مشغلين كشاف واحد بينهم
نجلا : الكشاف هذا ليش مشغلينه بتحضرون جنون !؟
ندى : هههه ظريفه عشان نشوف بعض انا مضيعه الفانوس ولا كان شغلته
جمانه : لو اني جايبه السوني حقي كان الحين نلعب
ندى : حبيبتي السوني وين بتشبكينه كل التلفزيونات برا و امي لو شافتنا لعنت اشكالنا
نجلاء : انا جتني فكره
ندى و جمانه : وشهي 
نجلاء : شرايكم بكرا نروح للعزبه حقتكم و نركب جنهام ؟
جمانه : اي والله مره مشتاقه له
ندى بتفكير : بكرا ما اتوقع يوافقون
جمانه برفعة حاجب : ليه ان شاءالله ما يوافقون
ندى : هدي هدي وراتس تدورين هوشه بكرا عرس ولد جارتنا ام خالد و بنروح لها بدري عشان نساعدها لان مالها احد فما اتوقع رح يوافقون يخلونا نروح للعزبه وانا اليوم رايحه اشوف جنهام فمره احس مستحيل يوافقون
نجلاء : بنات عادي اقولكم شيء
البنات بخوف من نبرة صوتها : وشو
نجلاء : انا جوعانه
جمانه : الله يقطع شكلتس خبصتيني
نجلاء : تراني ما تعشيت
ندى : حتى انا جوعانه خلونا نقوم نسوي لنا عشيوه ( تصغير لكلمة عشاء ) و منها نحرك رجولنا ونرجع ننام
__________•
راحوا العيال ينامون وكل واحد راح لفراشه و تسدحوا جنب بعض و الجد مقبل نام معهم و ابو نايف كان نايم جنب الجد مقبل و الباقين جنب بعض
الجد مقبل : من منكم عليه الدور بكرا بالمحل ؟
نواف عشان الدور عليه بكرا : مدري ناسين خلنا نعيد و نبدأ من عزيز مره ثانيه
عزيز : على كيفك عشان تسحبون علي زي اليوم الدور بكرا على نواف هو اللي يفتح
نواف بطنازه : يحظك
الجد مقبل : اجل نواف رح بدري لان بيجي ابو محمد بدري بيستلم طلبيته
نواف : اكره حظي دايم و الطلبيات تكون على يومي
نايف : لا تخاف انا بروح معك و اساعدك
الجد مقبل : لو اشوفك بس موطوط معه لااحش رجلك حش انطق بمحلك
نايف بخوف : ابشر
عم السكوت وكل واحد بدا يدخل بنومه وكان فيصل مخطط انه اذا ناموا بيطلع هو وتركي يجلسون بالحوش اللي ورا عشان يسهرون بس خرب كل مخططاتهم نواف اللي تذكر كل اللي صار معه اليوم و طمرته الجدار ورقص اديم و هوشتها معه وفجاءه قعد يضحك ونايف عرف ليه نواف يضحك و ضحك معه و تركي و فيصل يضربونهم برجولهم يحاولون يسكتونه عشان ما يقوم الجد ويخرب مخططهم وفشلت محاولاتهم لان نواف اذا ضحك محد يقدر يسكته و فجاءه اشتغل عليهم كشاف الجد مقبل : انا ما اقول امرحوا يعني ما تطعمون العلم !!؟
نايف وهو يحاول يسكت ضحكته : نواف اسكت
الجد مقبل بعصبيه : تعال انت امش ارقد بيني و بين ابوك
نايف : انا وش دخلني اللي يضحك نواف مو انا
الجد مقبل و صبره بدا ينفذ : اقولك تعال تفهم
نايف : تجيك التهايم و انت نايم
راح وانسدح بينهم و نواف شوي شوي لين اختفى صوته ونام و فيصل و تركي كانوا بيكنسلون بس يوم شموا ريحة اكل جاي من المطبخ قامو بعد ما حسوا انهم ناموا وطلعوا
_________•
في بيت الجار ابو تميم
جلس ابو تميم و عياله حول الضو وكانوا يقولون لبعض وش صار بيومهم وهذي الجلسه لازم تصير كل يوم قبل النوم
ابو تميم : بتروحين يا اديم وانا ابوتس للعرس ؟
اديم : اي بروح طفشت بالبيت بغير جو
تميم : ترا اتوقع انه عرس الحريم بيكون ببيت ام عبدالعزيز لان بيت ابو خالد صغير مايشيل الحريم وعرس الرجال نصبنا خيامه في الساحه اللي وراء
ابو تميم : شدراك انه العرس بيكون في بيت ام عبدالعزيز ؟
تميم : اليوم قابلت خالد و انا راجع من المحل وقالي انه عرس الحريم ببيت ام عبدالعزيز هم اللي تكفلوا فيه
ابو تميم : اجل ماله داعي تروحين وانا ابوتس اقعدي في بيتس ابرك لتس
اديم بزعل : لا تكفى يبه والله طفشت بالبيت انتم تطلعون من الصبح و لا ترجعون الا اخر الليل وانا اقعد لحالي ترا تطق روحي وانا جالسه لحالي اقعد اسولف مع نفسي ولا فيه احد يسليني وانتم اذا رجعتوا تنامون محد يقعد معي خلني اروح
ماجد : يبه عادي خلها تروح وانت لمتى بتكون متهاوش معهم حتى ما علمتنا وش سبب هوشتك معهم
ابو تميم بتصريف الموضوع : روحي بس لا تحتكين مره معهم ولا تطولين بيجيك ماجد يرجعتس
اديم قامت وحبت راسه : تسلم يا الغالي
ابو تميم بتساؤل: جو عاونوكم بالخيام ؟
تميم : من يبه ؟
ابو تميم : عيال ام عبدالعزيز ؟
تميم : بس جاء جدهم و خالهم و عبدالعزيز واخوه فيصل و عيال خوالهم
ابو تميم : نواف ماجاء ؟
اديم توترت من سمعت طاري نواف
تميم : لا ماجاء لاهو ولا ولد خاله نايف سمعت عزيز يقول لخالد انه نواف طاح على ظهره و نايف وهو يركض صقع برجله الحصى ولا قدروا يجون
ابو تميم : عزالله مايخلي الطفاقه
ماجد بغمز : وراك تسال عنه ليكون بترجع العلاقه !؟
قام ابو تميم من مكانه و تجاهل سؤال ماجد : ادخلوا ناموا لا تبطون بالسهر بعدين تفوتون الفجر
اديم بضحك على ماجد : سحب عليك ههه
ماجد : يمون الغالي
_________•
طلعوا البنات من الغرفه وكانت الجده منيره و ام عبد العزيز ينامون بالصاله
ندى : طلعنا من الغرفه بسلام باقي المهمه الثانيه
جمانه بحماس : الله بيتكم كله مغامرات وش المهمه الجايه ؟
نجلاء : هذي شكلها تحسب انها في شريط لعب
ندى : امي و جدتي نايمين بالصاله ولازم نمر من عندهم بدون ما يحسون وترا امي نومها خفيف على طول تقوم يعني انتبهوا
طلعوا البنات وجلسوا يتسحبون يحاولون يطلعون من الصاله بدون ما يحسون وطلعوا و وصلوا للمطبخ دخلوه و سكروا الباب
جمانه : يلا وش بنسوي اكل
نجلاء : نسوي توست و جبن
جمانه : لا وش توست وجبن خلونا نسوي توست و بيض
ندى : ماطحت غير انبطحت كل هالطلعه و التسحب اخر شيء توست لو اني نايمه ابرك
نجلاء : وش بتسوين ي قلبي
ندى : شرايكم نقلي بطاطس ؟
جمانه : قدام
نجلاء : بس البطاطس ريحته قويه اخاف تشمها خالتي وتقوم علينا
جمانه : لا معليك افتحوا باب الحوش عشان الريحه تطلع برا و قطعوا البطاطس انتم لاني ما اعرف اقطع و انا اللي اقليها لكم ازهلوني
وراحوا يقطعون البطاطس وهم مره يقطعون و مره ينسون ولا يجلسون يتهاوشون لين ما قطعوها كلها
ندى : افف تعبت يلا جمانه تعالي اقليها حررتي الزيت
جمانه : اي انا ما قلت ازهلوني
حطت جمانه البطاطس بالزيت وهي ترميها من بعيد و الزيت يفرقع عليها جتها ندى و اخذت البطاطس منها : انتي ما عمرك قليتي بطاطس ببيتكم ؟
جمانه : الصراحه لا بس سويلي هالمهمه و ازهليني  بالباقي
جلست جمانه تحرك في البطاطس لين قلب الزيت فيه رغوه بيضاء وجت بتكلمها نجلاء الا فجاءه طق الباب عليهم من الخوف كل وحده تخبت بمكان جمانه دخلت في الدولاب و نجلاء ورا الباب و ندى دخلت تحت الطاوله
فيصل شاف انه محد رد فتح الباب و دخلوا ندى شافته من تحت الطاوله و ارتاحت يوم شافته فيصل وجت بتطلع بس شافت تركي معه : هيه انتم اطلعوا بنلبس جلالاتنا بعدين تعالوا
فيصل : بسم الله اللهم سكنهم مساكنهم انتي من وين طلعتي
ندى : من بير امي ممكن تطلعون بعدين تجون تستظرفون
طلعوا برا ينتظرون البنات يلبسون جلالاتهم بعدين يدخلون طلعوا البنات من مكانهم و لبسوا جلالاتهم
جمانه بصراخ : تعالوا
فزت ندى و نجلاء و سكروا فمها : تصارخين ليه انتي تبين خالتي تقوم؟
دخل فيصل وتركي : من ذا الغبيه اللي تصارخ تبي تقوم جدي علينا ؟
جمانه : وش تبون ؟
فيصل : جوعانين نبي ناكل وشمينا ريحة البطاطس وجينا نبي ناكل
البنات صرخوا مع بعض يوم تذكروا البطاطس وانهم نسوه : البطاطس
فيصل بصراخ خفيف : انا ما قلت اسكتوا جدي بيقوم توه لاعن شكل نواف و نايف
ندى بفضول : ليه وش صار
فيصل : تعرفين اخوك اذا ضحك وش يصير والخبل الثاني شبك معه واخذه جدي نومه بينه وبين ابوه
جمانه : قهر ليتني شفت شكله و صورته عشان اطقطق عليه
تركي : بسال سؤال البطاس من مسويه ؟
جمانه بفخر : انا
تركي : اني داري انها انتي البطاطس وراه يسبح برغوه مو بزيت
ندى : صدق انتي وش حاطه ؟
جمانه : وش بحط مثلا !! حطيت زيت هذا هو
ندى مسكت راسها : ياويلي هذا زيت امي حق شعرها صبيتيه كله ما الومه اذا طلع رغوه
تركي : الصراحه الشرهه مو عليها الشرهه عليكم انتم انكم اعتمدتوا عليها اجل هذي تعرف المطبخ او قد دخلته ؟
نجلاء : شنسوي صدقناها من دخلت المطبخ وهي تقول ازهلوني ازهلوني ليتنا ما زهلناك
جمانه بتصريف للموضع : شرايكم نسوي توست و جبن
فجاءه درعمت عليهم ام عبدالعزيز وهي تشوفهم كلهم متجمعين بالمطبخ و المطبخ حوسه و الزيت اللي متكبك على الارض وقشر البطاطس اللي مترمي حول المجلى : انا ماكنت داخله عليكم وكنتوا نايمين يا الحمير وانتم وش جايبكم هنا ابوي مو مدخلكم تنامون من اليوم
فيصل : انا كنت نايم وشميت ريحة الاكل وجيت اشوف خفت انكم ناسين الفرن شغال وتركي ...
تركي : اي وانا كنت عطشان وجيت بشرب مويه وبرجع اكمل نومي ويلا نستأذنكم
انحاشوا العيال و مابقى الا البنات ولعنت شكلهم ام عبدالعزيز وخلتهم يرتبون المطبخ من جديد وهم وصل النوم حده عندهم وقالت لندى اذا خلصوا تجي تنام عندها عشان ينامون وجلسوا ينظفون لحد ما اذن الفجر
وطلع الجد مقبل من المجلس ولقاهم بالمطبخ ينظفون : ليكون لحد الان ما نمتوا ؟
ندى بخوف : لا نمنا بس قمنا قبل الفجر بعشر دقايق وقلنا ننظف على بال ما يأذن
الجد مقبل : الله يرضى عليكم
_________•
طلع الجد مقبل وراح يقوم العيال عشان الصلاه وكلهم قاموا الا نواف و نايف بعد الموت قاموا و راحوا صلوا
وبعد ما رجعوا جت الساعه ٦ و قام نواف وهو يترنح بمشيته من النوم اللي فيه دخل تروش وطلع للمحل وحصل ابو محمد ينتظره عند باب المحل : ابطيت عليك ؟
ابو محمد : لا مو مشكله انا اللي اعتذر اشغلتكم وخليتكم تفتحون المحل من بدري
نواف : تمون يا ابو محمد
ابو محمد : الله يرحم من رباك
نواف : امين
طلع نواف الاغراض لابو محمد بعد ما وقع على اوراق الاستلام وهو ماصدق على الله انه سلمه الاغراض وراح قفل المحل عليه ودخل لمستودع المحل وطلع المفرش الصغير اللي في المستودع و طلعه برا و فرشه ورفع على المكيف ونام وهو اصلاً دايم يسويها ولا مره قفطه الجد لان فيصل و عزيز يدقون عليه اول ما يقومون
.
.
( انتهى )
اتمنى انه البارت نال اعجابكم 💕
اكتبوا لي اراءكم حول البارت بالكومنت 🫶🏻
#حكمٍ_طغى_ماعاد_ينفع_نظامه