حكٍم طغى ماعاد ينفع نظامه

Part 4

بعد ما دخلت اديم و نزلت عبايتها فجاءه سمعت صراخ شخص عند الباب وراحت قريب من الباب و كانت لافه طرحتها على وجهها فتحت الباب و شافت واحد طايح على الارض وكان واضح على وجهه انه مضروب من احد دققت النظر فيه وطلع انه اخوها ماجد صرخت يوم شافته وطلعت له و هي طالعه طاحت طرحتها من على راسها وراحت جلست عنده ورفعت راسه على فخوذها وهي تحاول تناديه بس ماكان يرد عليها وكان في هذي الاثناء نواف راجع و هو شايل الدلال كلها بيده عشان ما يروح و يرجع و كان يتحلطم و يسولف مع نفسه وشاف وحده من بعيد جالسه تصارخ و تستنجد في الناس و تقول اخوي مات ساعدوني
رمى الدلال اللي بيده وراح ركض له و يوم وصل عندها شافها و عرفها و شاف صديقه غرقان بدمه راح شاله وصارخ على اديم عشان تدخل : ادخلي داخل
اديم ببكاء : والله ما اخليه بروح معه
جاها نواف وهو غاض البصر عنها بحكم انها ما عليها عبايه تسترها و هي واقفه قدامه كذا ولا انتبهت اصلاً من الخوف كان معه بشته حق العرس و شماغه لبسها البشت وحط الشماغ على راسها وركبوا للسياره وراح للمستشفى وكانت المستشفى تقريباً تبعد عنهم نصف ساعه وكان نواف طول الطريق يردد : يارب لا تفجعنا وكان كل شوي يلف يشوفه و فجاءه صرخت اديم وهي تصيح و تقول : نواف مافيه نبض تكفى بسرعه اخوي بيروح من يدي تكفى
نواف بغى يوقف قلبه وطار للمستشفى بسرعه مجنونه و صلوا للمستشفى ولا استنى الممرضين يجون ياخذونه هو راح شاله و دخله عليهم و قالهم انه فحصه و ما كان فيه نبض
طلع لهم الدكتور وقال انه فيه نبض بس خفيف مره وجوا عيال الديره عشان يشوفون حالة ماجد ونواف ما حب انه اديم تكون جالسه بينهم وراح لها : يا اديم اسمعي اخوتس بخير طلع الدكتور وقال انه فيه نبض و دخلوه للعمليات و ان شاءالله انه بخير وانتي جلستس هنا وبكاتس مارح يساعده امشي نرجع الديره و اذا صار شيء انا بنفسي بطمنتس
اديم هزت راسها ببكاء : لا هو مارح يخليني انا اعرف الحين بيطلع الدكتور و يقول مافيه شيء و بيطلع معنا
نواف : اسمعي بعطيتس جوالي وانا كل شوي بدق اطمنتس
بعد عناء من الاقناع وافقت انها ترجع  للديره و اخذت جوال نواف عشان يطمنها
___________•
في الديره
انتشر الخبر في الديره بس ما انتشر صح كانوا الناس يقولون انه نواف ذبح ماجد بسبب كرهه لابو تميم بعدين خاف و اخذه للمستشفى و وصل الخبر في بيت ام عبدالعزيز و انفجعوا وكلهم مو مصدقين الخبر و الجده منيره طاحت عليهم وهي تردد : راح الولد راح الولد
فجاءه سمعوا اصوات برا في الشارع وطلعوا العيال يركضون وكان سبب هالازعاج وصول نواف اللي شافه ابو تميم و دخل لبيته واخذ سلاحه وطلع لنواف : انت اخذت من ولدي بسبب عداوتك لي وانا باخذ روحك
نزلت اديم من السياره و وقفت بين نواف و ابوها : يبه هو ماله دخل
ابو تميم وهو يسحبها من قدامه : وانتي وش مركبتس معه تبي تقضي على بنتي بعد
اديم ببكاء : يبه انا طلعت و شفت ماجد على الارض نواف جاء يساعدنا لولا الله ثم هو كان الحين ماجد مو بخير تدري يوم وصلنا للمستشفى ماجد ما كان فيه نبض بغى يومت اخوي لولا لطف ربي
طاح ابو تميم على ركبه و هو يبكي على ولده عرف السبب اللي خلاه يصير بهالحال وقف على رجوله وهو ناوي يروح عند ماجد : دخل اختك البيت و الحقني
نواف : خلها تتفضل عندنا تقعد مع الاهل لايصير لها شيء
ناظره ابو تميم بدون ما يقول شيء و فتح نواف الباب لاديم و دخلها ونادى ندى لها : ندى يا ندى
جت ندى وهي خايفه من منظر نواف اللي كان ثوبه الابيض كله دم ماجد : وش فيك يا نواف ؟
نواف : اخذي اخت ماجد وخليها معتس لاتروح لبيتها ابد انتبهي تخلينها تطلع
اخذت ندى اديم و دخلتها داخل وكانت اديم بس تبكي و كل ما مرت خمس دقائق دقت على نواف تسال وكان نواف يرد عليها بنفس الكلمه لسى ما طلع من العمليات و تصير تبكي من جديد و كانوا يشوفونها  تدق بس ماكانوا يدرون انها تكلم نواف
ام عبدالعزيز: يا بنيتي ارحمي حالتس و ارحمي اخوتس اللي كل شوي تدقين عليه كل مامرت خمس دقائق دقيتي هم اذا صار شيء بيعلمونتس
اديم : انا حاسه ان صاير شيء اجل ليه طول كذا ؟؟
ام عبدالعزيز: لا ان شاءالله يا بنيتي مارح يصير له شيء و بيرجع لكم
__________•
في المستشفى
كانوا بالانتظار و كل واحد يدعي بجهه انه الله يحفظه طلع لهم الدكتور : انتم عائلة ماجد ؟
التموا كلهم على الدكتور : اي انا ابوه
الدكتور : ولدك جانا وكان نبضه ضعيف فتحنا له مجرى للهوا و سيطرنا على النزيف وكان ذلك نتيجة اصابته بطعنتين في الكتف الخلفي يوم وصلنا كان نازف مره و اللي جابه جابه بالوقت المناسب ولا كان الحين ما اقولكم هذا الكلام و الشيء الوحيد اللي تضرر منه عضمة الكتف اذا ما صار مضاعفات بعد العملية و الحين نحتاج منكم شخص يتبرع له بالدم فصيلة A
كان من عائلة ماجد مافيه احد نفس فصيلته الا اديم ولا يقدرون يروحون يجيبونها وطلع لهم عزيز وقال انا فصيلتي A وراح يتبرع لهم بالدم و جوا الشرطة وسالو انه مين اللي جاب ماجد للمستشفى وراح معهم نواف وجاء ابو تميم معه عشان يعرف الموضوع وقال لهم نواف انه كان راجع من الحفل بعد ما رتبوا المخيم و بعدين سمع صوت احد يبكي و ينادي وراح و شافه ماجد و اخذه للمستشفى طلعوا من عند الشرطي وراحوا ينتظرون
__________•
في بيت ام عبدالعزيز
كانت اديم فارشه السجاده و تدعي لاخوها وكانت حاطه الجوال جمبها بحيث اذا دق ترد على طول و دق نواف و ردت على طول : هاه طمني وش صار عليه ؟
نواف : لا ابشرتس انه بخير و الحين بيطلعونه من العمليات و بيودونه غرفة بس كان يحتاج تبرع بالدم لانه نزف
اديم : انا انا نفس دمه اجي اعطيه
نواف بضحك : ما يحتاج ما يحتاج عزيز تبرع له بالدم و ان شاءالله انه بخير و يطلع لكم باقرب وقت
اديم وهي فيها العبره : شكراً مره يا نواف ما اطلع من جزاك وقفتك هذي عمري مارح انساها
نواف : ابد ما سوينا الا الواجب و ماجد عزيز و غالي
سكرت اديم من نواف وطلعت لهم وقالت لهم انه طلع من العمليات و انه بخير : عاد انا استاذنكم بروح للبيت
ندى : هذي عاد اعذرينا منها نواف منبه و محرص انتس ماتروحين للبيت لحالتس
ابتسمت اديم من طاري نواف اللي فجاءه صار يطلع لها من كل مكان : طيب ما عندي لبس لحد الان انا على لبس العرس بروح اخذ لبس و اجي
ريم : اجل روحي معها يا ندى و ارجعوا بسرعه
جمانه : وانا بعد بروح
نجلاء : وانا
نوف : انتم مطافيق ترا بيروحون للبيت اللي جمبنا و يرجعون
جمانه : عادي يختي نحرك رجيلاتنا
نجلاء : يلا امشوا
راحت كل وحده تلبس عبايتها وكانت اديم ما معها عبايه معها بس بشت نواف و شماغه وكانت تقدر تاخذ عبايه منهم بس هي حبت تاخذ البشت و الشماغ وهم طالعين شمت ندى ريحت عطر نواف وعرفت انه البشت له وقعدت تفكر انه وش اللي خلاها تاخذه ومتى تقابلوا هي كانت تحسبها اغراض اخوها وحطتها عليها دخلوا للبيت ودخلتهم اديم بالمجلس وراحت تغير لبسها و بتجيهم
ندى وهي تناظر المكان : ماشاءالله ما كانهم متجهزين للعرس بيتهم ارتب من بيتنا اللي العرس فيه
جمانه: هذا وفيه بنت وحده بس مرتب كذا وحنا عشرين وحده وكانه ساحة حرب
نجلاء بصوت واطي : ماتحسون انكم فليتوها قصروا اصوتكم بتسمع
جمانه : عادي ما قلنا شيء بالعكس مدحناها
رجعت لهم اديم بعد مالبست و اخذت عبايتها و جهزت ملابس لماجد وحطتها بالمجلس لانها بتروح هناك عشان لو احتاجوها يلقونها جاهزه
_________•
رجعوا الكل وقعد بس مرافق واحد وهو ابو تميم ورجع تميم معهم بالسياره لانه ترك السياره لابوه لو احتاجها وصلوا للبيت و نزلوا من السياره
تميم : كفيتوا و و فيتوا يا عم نادوا لي اختي
الجد مقبل: اختك تلقاها نايمه الحين خلها تنام و بكرا تاخذها حتى انت تعال عندنا لا تقعد بالبيت لحالك
تميم : لا ما يحتاج انا بروح لبيتي
الجد مقبل : الله يستر عليك
راح تميم لبيته و دخلوا هم للبيت وراح نواف ياخذ المفارش و يقول لهم يسوون اكل لعزيز عشان الدم اللي سحبه و يغير ثوبه اللي كله دم كان رابطه على خصره عشان مايخافون بس كان مبين دخل عند باب المطبخ و تنحنح : ولد فيه احد ؟
خاله الهنوف : من انت يا يمه
نواف : انا نواف
الجده منيره : تغطنٍ يا بنات
تغطوا البنات وكانت اديم جالسه بينهم دخل نواف و انصدموا من شكل لبسه و شعره المحيوس وهو يوم جاب اديم ما شافه غير ندى
الجده منيره : يا ويلي وش هالدم ؟
نواف : هذا يوم شلت ماجد طبع فيني
ام عبدالعزيز: عسى ماجد بخير ؟
نواف : لا الحمدلله بخير بس كتفه شوي تضرر يمكن يمكن يجبرون يده او يعطونه حمالة اليد
خاله الهنوف : انت لازم نعطيك عصفر لايطير قلبك
الجده منيره : اي والله سمعتي يا بنيتي اخوتس بخير
اديم هزت راسها و ابتسم نواف وندى كانت تناظره وهو مبتسم وتقول من داخلها اكيد بينهم شيء
نواف : المهم احد منكم يسوي لعزيز اكل لانه تبرع بالدم ولازم ياكل و انتي يانوف عطيني لبس نظيف وطلعوا لنا المفارش
راحت نوف تجيب لنواف لبس وريم راحت تسوي اكل لعزيز و الباقين راحو يطلعون المفارش للعيال فرشوها العيال وراحوا صلوا الفجر بعدين سحبوها نومه بعد ليله كانت متعبه
____________•
في بيت ام عبدالعزيز
صحوا البنات و راحوا يجهزون الفطور و هالمره الكل قام قبل صلاة الظهر عشانهم ما ناموا الا بعد صلاة الفجر وكانوا الحريم الكبار قاعدين بالصاله و يسولفون
و البنات في المطبخ كانوا قد ما يقدرون ما يطلعون صوت عشان اديم موجوده و نايمه وكانوا كل شوي يسكتون جمانه اللي صوتها عالي و كل الديره تسمعه قامت اديم وراحت جلست شوي عند الحريم بعدين طلعت من عندهم عشان تساعد البنات دخلت عليهم اديم : صباح الخير
كلهم : صباح النور
جمانه : صباح النور و النوير و اوراق الشجر و الطير صباح الخير يا حلوه
ضحكت اديم : والله انتي الحلوه
جمانه : ياربي يابنات بأكلها يختي انا من عرفت نفسي وانا اجي للديره ليه ماقد شفتس او عرفتس طلعت مظلومه بس مجلسيني مع ندى و نجلاء
نجلاء : وش فيهم ندى و نجلاء !!!؟ ترا بنادي ندى
جمانه : مافيهم شيء
اديم : وين ندى ؟
جمانه وهي تضحك على ندى : تخيلي اخذتها عمتي و خلتها تاخذ السلم و تروح تمسح الدولاب من فوق تقول لها عمتي هذا عقابتس عاد مدري وش مسويه الجنيه عشان تعاقبها امها اللهم لا شماته
دخلت عليهم ندى : اففف تعبت ياخي امي خلتني ارتب الغرفه كامله لحالي بغى ينكسر ظهري مو بغى الا انكسر كأن الغرفه حقتي لحالي عشان بس انا ارتبها
نجلاء : ليش معاقبتس امتس وش مسويها ؟
ندى : والله مدري وش مسويه بس اذكر اني ماسويت شيء
نوف : حبيبتي اجل انتي تقعدين عاقله عشان تذكرين وش مسويها كل شوي شيء جديد وعقاب جديد وأمي ماشاءالله عليها جالسه و تسجل
ريم : خلص الفطور
نجلاء : وين نحطه هالمره اديم فيه
ريم : فطورنا حطوه بالصاله و فطور العيال في بيت الشعر
جمانه : الله الشكشوكه مررره تجنن من مسويها ؟
ريم : نوف اللي سوتها
جمانه : اكشخ يانوف طلعتي سنعه من ورانا
نوف : حبيبتي سنعه من قبل لا اشوف وجهتس تعلمي مني بس
نجلاء : يختي بنات وعيال خالتي ابد لا تمدحينهم ترا تاخذهم العجه ويصدقون انفسهم
جمانه : والله انتس صدقتي
اديم كانت ميته ضحك عليهم وعلى جوهم كانوا على طبيعتهم عندها ولا تصنعوا بالعكس كأنها تعرفهم و يعرفونها من زمان ودوا البنات فطور العيال و قوم الجد مقبل العيال و البنات راحوا يفطرون داخل
________•
افطروا العيال وبعد ما خلصوا قام فارس وقال لهم انه بيرجع للمدينه وراح يشيل اغراضه و ينادي امه و خواته و العيال كملوا فطور وجاهم الجد مقبل ونادى فيصل : فيصل قم خذ هالحافظة و ودها لتميم اخته هنا و اكيد ما فيه احد يسوي له فطور
فيصل : ابشر اخذ فيصل الحافظة و طلع طق الباب على تميم و كان وقتها تميم حايس بالمطبخ و يحاول يسوي له فطور زين وهو قالب المطبخ فوق تحت الشيء الوحيد اللي سواه صح هو الشاهي : الله يذكرتس بالخير يا اديم تسوين لي اصناف اكل و انا صنف واحد ولا قدرت اسويه
سمع الباب يطق وراح فتحه وشاف فيصل واقف و بيده حافظه و معطيه ظهره : تفضل
فيصل : تفضل هذا فطور لك
اخذه تميم : تعبتوا انفسكم ماكان له داعي
فيصل بضحك : والله من ريحة الشي اللي يحترق كان له داعي
راح تميم يركض ترك الباب مفتوح ما سكره و لقى البيض محروق سكر فيصل الباب وراح لبيته دخل عليهم وكانوا جالسين ببيت الشعر و يتقهون
الجد مقبل : عطيت الاكل تميم
فيصل : اي عطيته
الجد مقبل : اسمع يا عزيز
عزيز : سم
الجد مقبل : سم الله عدوك ابيك تنزل للمدينه و تشرف على محلنا اللي هناك فيه توقيع اوراق وقعها و ارجع
عزيز : ابشر متى تبيني اروح ؟
الجد مقبل : لو تمشي الحين مع فارس ازين عشان الخط
قام عزيز وراح يبلغ امه انه بيروح للمدينه يوقع اوراق و يرجع وكانت امه مثل كل مره يروح تحلفه انه يروح يخلص الشغل و على طول يرجع ما تبيه يطول في المدينه طلع عزيز و فارس و اهله كلهم الا نجلاء اللي قالت بترجع مع خالها و كانت امها رافضه بسبب انه سيارة خالها بتكون زحمه و عياله معه بس توسط لها خالها و قعدت و راح الجد مقبل و فيصل للمحل و نواف راح للمستشفى يزور ماجد هو و تميم
________•
في المستشفى
قام ماجد بعد ماراح مفعول المنوم و مفعول المسكن و هو يحس بالم قوي في كتفه ناظر في ارجاء الغرفه و شاف ابوه نايم على الكرسي و هو قاعد و متلطم بشماغه حس ابو تميم من حركة ماجد و فز له : ماجد يا ابوك تحس بشيء يوجعك شيء ؟
ماجد وهو يقاوم الألم : لا ما فيني شيء بس كتفي فيه الم خفيف
راح ابو تميم ينادي ممرضه تعطيه مسكن و جوا تميم و نواف و تميم شاف ابوه و راح له و نواف دخل على ماجد : له له له حصان ماشاءالله عليك مأجور يا ابو نواف ( نواف ينادي ماجد ابو نواف و ماجد ينادي نواف ابو ماجد )
ماجد بضحك خفيف من الالم : تسلم شكلك منجن دامك جاي هنا و انت تدري انه ابوي هنا
نواف : اوووه يا ابوك صارت لنا امس سوالف مع بعض لازم تطيب عشان اقولها لك
ماجد : ما امداني اغيب عنكم و صار لكم احداث عساه شيء زين
نواف : نص و نص تقدر تقول
كان ماجد يعني لنواف الشيء الكبير و ماجد بعد مع انه نواف يوم جاء للديره كان عمره ١٠ سنوات و كان متأثر من فقد ابوه بس قدر ماجد ان يصادقه و كان اول صديق لنواف يدوم معه و هو صديقه الوحيد اصلاً و مع انه بينه و بين ابو تميم مشاكل بس ما اثرت على اخوتهم و صداقتهم بالعكس قوتها
جاء تميم و ابوه وشاف نواف موجود و دخلت الممرضه تعطي ماجد المسكن
نواف : كيف صارت الحادثه يا ماجد
ماجد : ما ادري انا جيت اخذت اختي من عندكم و رجعتها للبيت بعدين كنت رايح للمخيم و تذكرت جوالي بالبيت و رجعت اخذه و قفت عند الباب و احاول اطلع المفتاح الا فجاءه احس بطعنه على كتفي و لفيت عليه كان بيطعن مره ثانيه بس اختي فتحت الباب و انحاشوا
نواف : طيب شفت وجهه ؟
ماجد : لا كان متلطم و كانوا اثنين مو واحد
جو الشرطه و اخذوا اقوال ماجد و استأذن نواف ورجع لبيته
ابو تميم : بسألك شيء يا ماجد
ماجد : تفضل
ابو تميم : وش العلاقة اللي بينك و بين نواف ؟
ماجد : علاقة جار لجاره
ابو تميم : لا احلف ليه انا ماشفت الولد كيف كان منخبص امس كأنه اخوه اللي مطعون مو انت
ماجد حب يستغل الفرصه و يحاول يرجع العلاقات : يا يبه ترا هم طيبين و قلوبهم مافيها ذرة حقد او حسد شف كيف في موقف بس نسوا كل المشاكل اللي بينا و فزعوا وانا متاكد انه نواف لو كان ماسك اللي طعنوني انه ليقطعهم بسنونه
ابو تميم كان يعرف و داري انه مافيه مثل طيبة قلبهم لف و ناظر ماجد : والله لو ادري او يطلع انه لك علاقة معهم ما يصير علمٍ طيب
لف ماجد راسه بغضب : طيب انا ابي اطلع مارح اقعد بالمستشفى
ابو تميم : اقعد وش يطلعك على وش مستعجل على جيرانك ؟
ماجد : الله يهديك يا بيه وش هالكلام انا بخير و ابي اطلع
راح ابو تميم يوقع اوراق خروجه و اخلاء مسؤوليه و رجعوا لبيتهم
_________•
في الديره
وصلو و قفوا عند باب بيتهم نزلوا و قال ابو تميم لتميم انه يروح يجيب اخته من عندهم جاء بيروح تميم بس وقفه ماجد : انتظر يا تميم انا بروح اجيبها و مره وحده اتشكرهم و اتشكر عزيز على تبرعه لي
ابو تميم و هو يناظره من طرف عينه و بتهديد : انتبه لوضعك يا ماجد انتبه
راح ماجد لبيت أم عبدالعزيز وهو كان يالله يالله يمشي من الالم و يده كانت ملفوفه بالحمالة الزرقاء وقف عند الباب وطقه فتح نواف الباب له ببتسامة واسعه : يالله انك تحييه تو ما نور بيتنا
ماجد ببتسامه : منور باهله
نواف : اقلط اقلط يالله انك تحيي رفيق عمري
قلط نواف ماجد في المجلس و راح داخل يقول لهم يسوون القهوه اخذ القهوه و دخل للمجلس و قعد يصبها
ماجد : انا حبيت ياعمي اني اتشكركم على وقفتكم معي و تبرع عزيز لي بالدم لو احد غيركم ما سواها و وقفتكم هذي برقبتي ما انساها لين اموت
الجد مقبل : ما سوينا شيء حق الجار للجار وانت يا ماجد مثل هالعيال اللي تشوفهم قدامك عندي
وقف ماجد وهو يستئذن : انا استئذن نادوا لي اختي خلوني اتيسر و اشكروا عزيز بدالي
الجد مقبل : يوصل يا ولدي
طلع ماجد و وقف برا بالحوش وهو ينتظر اديم تجي ودخل نواف داخل و بلغهم يقولون لاديم تجهز عشان تروح مع اخوها بعدين رجع يسولف مع ماجد بالحوش و اديم طارت تتجهز خصوصًا يوم درت انه اللي جاي ياخذها ماجد وكانت تلم اغراضها وهي ترجف و تطيح منها و ترجع تاخذها و البنات كانوا يشوفون لهفتها على اخوها و هم اللي شافوا حزنها عليه امس
ندى وهي تبي تلطف الجو : والله و طلعتي يا اديم منتي طايقتنا شوفي كيف تلمين اغراضتس ما صدقتي على الله تطلعين من عندنا
اديم تركت اللي بيدها و طالعتهم : انا اخت ماجد والله انه ودي بجلستكم بعد بس شسوي الشوق
ندى : نمزح معتس روحي و الجايات اكثر اهم شيء لاتقطعين
اديم : لا ان شاءالله خلاص تعودت عليكم وانتم بعد تعالو عندي لو تنطون علي من الجدار مثل ما نط اخوكم
نست اديم نفسها من فرحتها و هي تطلع تركض من عندهم و وجهه محمر من الخجل وقفوا البنات على الدريشه وهي طلعت و دخل نواف داخل يوم شافها طلعت وهي راحت تركض و ضمت ماجد و نست جرح ماجد وهو متألم بس صابر وهو يسمع بكاءها وهي تضمه : افا وانا اخو لاديم تبكين ليه هذاني قدامتس و بخير بس لو كملتي تضميني بعد مارح اضمن اني اكون بخير
بعدت اديم عنه وهي تمسح دموعها : بسم الله عليك بس بغيت اموت يوم شفتك بهذاك المنظر الله لايعيده
ماجد : بسم الله عليك خلينا نروح لبيتنا لانه زودناها في بيت الناس شوي و يطردونا ترا ضحكت اديم وطلعوا
_______•
الليل في بيت ام عبدالعزيز
كانوا جالسين في الدكه اللي في الحوش و كانوا العيال يلعبون و يضحكون مع بعض و الجد مقبل و ابو نايف و الجده منيره و ام عبدالعزيز و ام نايف كانوا يسولفون مع بعض و كانوا البنات لابسين جلالاتهم وقاعدين بالزاويه و يسولفون
ندى بعد تفكير انها تقول لهم عنه شكها : بنات ودي اصارحكم بشيء
لفوا عليها البنات بأهتمام : قولي
ندى وهي تراوغ بالكلام : وهو الصراحه ما ادري كيف اقوله او يمكن انا اطلع غلطانه و كلها اهواهم
ريم : تكلمي خبصتي قلوبنا وش فيتس
ندى غمضت عيونها وتكلمة بسرعة : احس اديم و نواف يحبون بعض
شهقوا البنات و كلهم بصوت واحد : من يحب من
ندى : الله يقطع اشكالكم وحده وحده اللي سمعتوه انا كذا احس
نوف : و ليش حسيتي شفتي شيء؟
ندى : اوووه شفت اشياء مو شيء
جمانه : طيب قولي
ندى : تخيلوا يوم العرس بعد ما جت عندنا اديم من كان جايبها
البنات بصوت واحد : من
ندى : اللي جابها نواف
نجلاء : يمه كيف جابها شكله يحسب انه متزوجها عشان يجيبها
ندى : انتظري يجيتس العلم المهم جابها و قالي انتبهي لا تروح لبيتها وشدد عليها ويسوي نفسه ما يعرف اسمها يقول اخذي اخت ماجد المهم بعد ما طلعت و طمنتنا عن اخوها رحنا لبيتهم ويوم رحنا كان عليها بشت و شماغ وانا كنت احسبها ماخذتها من اخوها الا اشم ريحة عطر نواف و شماغه واضح انه هو انا اطلع اشمغة اخواني من بين ١٠٠ شماغ هنا عاد قلت لا ستوب لين هنا وبس لازم اعرف القصة ( سكتت شوي بعدين تذكرت ) اي وصح نواف يوم جاء من المستشفى يوم اديم فيه جدتي طمنت اديم و نواف جلس يبتسم و اديم كانت مستحيه و منحرجه خلاص انا متاكده بينهم شيء و بنهي كلامي بأخر حدث صار و شفتوه يوم هي غلطت قدامنا و قالت نطوا علي مثل ما نط اخوكم يعني واضح بينهم لقاءات و انتهى كلامي وشكراً لحسن استماعكم اووه تعبت
جمانه : اي انا شكيت يوم قالت كذا قلت اكيد انه شافها لان هو يوم جاء من عندهم قال محد شافني اجل هي شلون شافته
ندى : بالضبط
نجلاء : وانتي يا ندى ما شاءالله عليتس تعرفين ذا كله وساكته كيف قدرتي تصبرين
ندى : اول شيء كانت اديم فيه مقدر اتكلم و ثاني شيء كنت بأكد شكوكي بعدين افجرها بوجيهكم
ريم : شوفوا هو يوم جتنا اديم هنا كان فستانها كله دم واضح وانا سمعت نواف وهو يكلم امي و يعلمها بالسالفه انها كانت تصايح و تنادي يمكن هو شافها كذا برا و سترها ترا عادي يعني يمكن ما فيه حب بينهم
ندى : اي صح تذكرت يوم كانت عندنا و تكلم انا شفت الجوال و حاولت اتذكر هو لمين اخر شيء تتوقعون طلع لمن ؟
نوف : من ليكون لنواف
ندى : مع الاسف هو
جمانه وهي تناظر نواف اللي كان يلعب مطارح مع العيال : الله و اكبر عليك يا نواف طلعت تحب و تتمعشق
نجلاء : عاد بنات تبون الصدق ترا اديم تجنن تاخذ العقل
ريم : في هذي صدقتي شفتوها حتى وهي كانت تبكي كانت تشلع القلب ما الوم اخوي اذا حبها
جمانه : هيييه حبيبتي انت شبكتيهم و خلصتي لازم نتأكد و نتحقق من الموضوع
نجلاء : عاد طلعت لجمانه سالفه حبيبتي ترا انتم احتمال تمشون بكرا متى بتتحققين من الموضوع اذا تزوجوا ؟
جمانه بقهر : اففف ماجينا نمشي الا يوم طلع لنا شيء نتونس فيه
نوف : لاتخافين تنقلتس الاخبار ندى
ندى بطنازه : أنقلها الأخبار بوش حمام زاجل ؟
نوف : فيه اختراع اسمه جوالات تعرفين عنه ؟
ندى : اعرفه بس من وين اكلمها من جوال امي و يسمعون كل العائله خليها لاجت الاسبوع الجاي نحقق بالموضوع و انا بحاول ما أوعدكم بحاول اني ما اتدخل
________•
في جهة العيال كانوا متسدحين على بعض نواف منسدح على رجل فيصل و نايف منسدح على بطن نواف و تركي على رجل نواف و فيصل كان متركي بالمركه و يسولفون وكانوا في ضحك هستيري
نايف وهو يالله يتكلم من الضحك : تذكرون يوم انا و نواف فكينا الكلب اللي في العزبه و نسيناه وهو راح لجهة الحريم وصار صياح و صراخ و اخر شيء يوم جت عمتي حطيناها على راسكم
فيصل بقهر : اي نذكر ما أكلها غيري انا و تركي وانتم انحشتوا
نواف : وين انحشنا اخر شيء جاء الدلخ ذا و يقولي ( غير صوته يقلد صوت نايف) الحمدلله ما كشفونا اكلوها فيصل و تركي و سمعته امي وهي تلحقنا
نايف بضحك : اييي كنت مستانس انه ما انكشفنا و يوم لحقتنا عمتي ما تشوفون غير غبرت نواف و رجوله تصافق في ظهره
نواف : الغبي امي تلحقنا وانا انحشت وهو يركض وراي و امي ورانا الاثنين وانا رحت دقيته عشان نفترق و ما تمسكنا امي بس انه ما توازن وطاح
تركي : وانت بعد غبي يا نواف واحد يركض و انت تدفه فجاءه اكيد انه انصدم و طاح
نايف : عاد وقتها يوم مسكتني عمتي جلدتني جلد و كنت اقول بداخلي انه نذل طيحني عشان امه تضربني بعدين ما تضربه
نواف بضحك : كيف اصارحك انه هذي كانت نيتي دقيتك يا انك ما تطيح و تناحش او انك تطيح و تاكلها من امي بس ترا بعدين امي يوم جينا نرجع للبيت خلتكم كلكم ترجعون الا انا خلتني اقعد و انظف شبك الغنم ما رجعت الا بعد صلاة الفجر لا وكعابي بعد و لا كنت ادري وين نعالي
تنحنح فيصل : اتوقع انه حنا كنا ماخذينها عقاباً لك
تركي بضحك : طلعنا كلنا نذول
جلسوا يضحون العيال على مواقفهم و غباء نايف و كان دايم هو اللي ياكلها
نايف : وش يقول نواف
نواف : يقول نواف يا طويل العمر
( اهديت باقة ورد من ضمن الابواق
لا اقول لاحد خذها ولا اقول ذقها
ودي بالانفس كلها اصحاب و اصداق
ولا اخشى عقايبها و لا ارجي نفقها
خلقت الاراضي و السموات بأطباق
وتسع الاوادم طبقه من طبقها
فالادمي لولا المكارم و الاخلاق
كالحنظله من عرقها لا ورقها )
العيال صفروا كلهم مع بعض بعد ما انتهى
تركي : والله وطلعت فنان يا ولد عمتي وراك ماتعطينا شيء بس ساكت
نواف : هي خواطر تروح و تجي
جاء الجد مقبل و دخلهم كلهم للنوم و هالمره كلهم دخلوا و ناموا بعد الضحك اللي جاء
________•
في المدينه
وقع عزيز على الاوراق و خلص كل شغله و طلع هو و فارس لمطعم يتعشون فيه و كان فارس هو اللي عازم عزيز و كان مطعم شوي غالي و فخم
عزيز : ياولد ترا هذا بيطلع غالي عليك خلنا نقسم الحساب بينا
فارس : اقول اطلب و انت ساكت انا اللي بدفع في الديره انتم تذبحونا لنا مفاطيح خلنا هنا حنا اللي نكرمكم مع انه ما يجي عند المفاطيح شيء بس عشان التغيير اخترت هالمطعم
عزيز : وانا اقول وش فيه ولد خالتي قلب حكري بدال ما يرص المفطح قدام وجهي لازين وضحت سوء التفاهم
طلبوا و جاء طلبهم و اكلوا وكانوا مبسوطين و بس يضحكون و دفع فارس و طلعوا وهم طالعين شاف عزيز واحد وكان شاك هل هو الشخص اللي يعتقد انه هو ولا مشبه عليه لانه اخر مره شاف هالشخص كان عمره ١٣ سنه راح للشخص وهو يدعي انه يكون هو اللي في باله و لحقه فارس وهو يناديه عشان يوقف راح للرجال و وقف قدامه : انت
.
.
( انتهى )
اتمنى انه البارت نال اعجابكم 💕
اكتبوا لي اراءكم حول البارت بالكومنت 🫶🏻
#حكمٍ_طغى_ماعاد_ينفع_نظامه