حكٍم طغى ماعاد ينفع نظامه

Part 5

في المدينه
وقع عزيز على الاوراق و خلص كل شغله و طلع هو و فارس لمطعم يتعشون فيه و كان فارس هو اللي عازم عزيز و كان مطعم شوي غالي و فخم
عزيز : ياولد ترا هذا بيطلع غالي عليك خلنا نقسم الحساب بينا
فارس : اقول اطلب و انت ساكت انا اللي بدفع في الديره انتم تذبحونا لنا مفاطيح خلنا هنا حنا اللي نكرمكم مع انه ما يجي عند المفاطيح شيء بس عشان التغيير اخترت هالمطعم
عزيز : وانا اقول وش فيه ولد خالتي قلب حكري بدال ما يرص المفطح قدام وجهي لازين وضحت سوء التفاهم
طلبوا و جاء طلبهم و اكلوا وكانوا مبسوطين و بس يضحكون و دفع فارس و طلعوا وهم طالعين شاف عزيز واحد وكان شاك هل هو الشخص اللي يعتقد انه هو ولا مشبه عليه لانه اخر مره شاف هالشخص كان عمره ١٣ سنه راح للشخص وهو يدعي انه يكون هو اللي في باله و لحقه فارس وهو يناديه عشان يوقف راح للرجال و وقف قدامه : انت عمي متعب ؟
التفت عليه متعب ال غانم : من انت ؟
عزيز : انا عزيز يعني عبدالعزيز ولد مطلق اخوك
استغرب متعب وجوده هنا وانه كيف اصلاً طلع فجاءه قدامه بعد ما اختفوا فجاءه ناظر في وجه عزيز و كان بيصد بس جاء عزيز وضمه : اخيراً يا عمي شفناكم وش هالغيبه
متعب بتساؤل : انتم اختفيتوا فجاء وين رحتوا ؟
عزيز : رحنا لديرة نجد العذيه وحنا الحين ساكنين هناك انت ياعم بشرني عنك ما عادكم في بيتكم اللي خبرته غيرتوه
متعب : اي غيرناه اسمع يا عزيز انا الحين مستعجل عطني رقمك و انا اتصل عليك بعدين و سلم لي على الكل
عطاه الرقم و لف بيمشي بس سمع صوت بنت تكلم ابوها لف عليهم وشافها بنته غيداء و على طول عرفها و كيف ينساها كيف ينسى حب طفولته تأملها لين ما توترت من نظراته و هي تسأل ابوها مين هذا ورد عليها ابوها انه ولد عمها مطلق و تذكرته بس استغربت نظراته لها ولا حب متعب انه يطول واقف مع عزيز و اخذ بنته و ركب سيارته و ظل عزيز واقف مكانه و هو حاط يده على قلبه جاه فارس وهو مستغرب السالفه كامله مين هذا اللي وقف معه و البنت هذي من اللي يوم جت خلت عزيز يوقف مكانه كذا
فارس : عزيز فيك شيء من ذولا ؟
عزيز استوعب على نفسه اخذ نفس وهو يبتسم : لقيتها يا فارس لقيتها
فارس بأستغراب : لقيت من ؟
عزيز : حب طفولتي لقيتها هذي هي اللي كانت واقفه هنا مع ابوها عمي متعب اخيراً لقيتها
فارس : طيب هد خلنا نمشي للبيت ننام و بكرا نتكلم بالموضوع
عزيز : انا شكلي بمشي للديره ما اتوقع اني بقدر ارقد
فارس : منت برايح لمكان اقعد تمسك لي خط مع هالليل صاحي انت !!؟
عزيز : ياخي من الفرحه مقدر اقعد بمكاني خلني اروح و اول ما اوصل ادق عليك اطمنك
فارس عرف انه مارح يقدر يمسكه : ياويلك ما تدق ترا مارح انام
سلم عزيز على راسه من الوناسه و ركب سيارته و راح متجه للديره
_________•
في الديره
وصل عزيز للديره على الساعة ٦ و دق على فارس وبلغه انه وصل و راح لبيتهم دخل ولقاهم قاعدين يفطرون سلم وجلس معهم
الجد مقبل : ماشاءالله امداك تجي
عزيز : اي خلصت شغلي وجيت
فيصل بضحك : ماشاءالله حافظ وصيت امي خلص شغلك و ارجع
ام عبدالعزيز : اجل مثلك لو انك ساكت ابرك وانت يا عزيز وراك ماسك لي خط مع هالليل ما تعرف انه الطرق تخوف بالليل !!!؟
عزيز : ماكان فيني نوم وقلت اجي و يوم مشيت كان الفجر بيطلع
الجد مقبل : لا تتعودها
عزيز : ابشر
كملوا فطورهم و يوم خلصوا راحو لبيت الشعر و قعدوا فيه مع شبة النار و ريحة القهوة و بداية اجواء الشتاء في الديره وكان عزيز في داخله وناسه مو قادر يمسكها و كانوا العيال ملاحظين و يغمزون له و قرر عزيز انه يتكلم : بسألك يا جدي
الجد مقبل : اني داري انه في بطنك علم وانا اشوفك من اليوم تتبوسم قل وش عندك
عزيز : تعرفون شيء عن عماني يعني مكانهم و كذا ؟
كلهم التفتوا عليه وش السبب اللي خلاه يجيب طاريهم بعد ٢٨ سنه و توترت ام عبدالعزيز فجاءه و صارت ترجف يدها وتحاول تسيطر عليها
ام عبدالعزيز : ما نعرف شيء عنهم ماعاد تقابلنا بعد ما مات ابوك راحوا بحالهم وحنا رحنا بحالنا
الجد مقبل : ليه وش اللي خلاك تسأل ؟
عزيز : امس تعشيت انا وفارس و حنا طالعين قابلت عمي متعب و سلمت عليه و يسلم عليكم
ام عبدالعزيز بغضب : وش تقول وين قابلته !!؟ انا مو قلت لك خلص شغلك ولا تروح لمكان ياربي ليه ما تفهموني انتم
قام نواف وهو استغرب ردة فعل امه : هدي يمه وش فيتس ترا عادي عمانه
ام عبدالعزيز بغضب : لا مب عمانه يا ويلكم لو اشوفكم مقابلينهم او مدورينهم
قام ابو نايف و اخذ عياله و زوجته و طلعهم برا وهو اصلاً يعرف السالفه بس عشان ام عبدالعزيز و عيالها ياخذون راحتهم بالكلام
ام عبدالعزيز : وش قلت له و وش قالك ؟
عزيز يرد عليها وهو مستغرب من ردة فعلها : ما قلت له شيء اصلاً تقابلنا على الواقف حتى مامرت خمس دقائق
ام عبدالعزيز: سألك عنا علمته وين حنا ساكنين !!؟
عزيز : سألني و قلت له
وقفت ام عبدالعزيز وهي تدور في مكانها و تردد يارب لا يارب لا يارب لايصير اللي في بالي التفت الجد مقبل على عيالها وهو يشوفهم كيف منصدمين من ردة فعل امهم طلعهم برا حوشه و دخل ابو نايف و قفل الباب اللي بينهم وصار في بيت الجد مقبل مافيه الا الجد و الجده و ابو نايف و ام عبدالعزيز و العيال و البنات كلهم برا و كانت ام عبدالعزيز تدور كأنها مجنونه دخل الجد مقبل لبيت الشعر بعد ما قفل الباب : يبه تكفى يبه خلنا نروح بيجون هنا انا اعرف بيجون تكفى
الجد مقبل : تروحين وين انهبلتي انتي بتقعدين تتنحشين
ابو نايف : يا اماني ترا عيالتس كبروا لازم تعلمينهم باللي صار انتي شفتي كيف كلهم انصفقت وجيهم من ردة فعلك و الحين بيبدون يسألونتس عن اللي صار
ام عبدالعزيز ببكاء : تكفى يا اخوي افزع لا تخليهم يعرفون بعدين انت تعرفهم تعرف عيالي كيف بنمسكهم نواف اللي يجي براسه بيسويه و عزيز مارح يسمعني و فيصل بيتبع اخوانه تكفى يا اخوي طالبتك انهم لايدرون قفل الباب لحد يطلع
ابو نايف : لمتى بتقفلين البيبان خلاص يا اماني لازم تواجهون الامر
طلعت ام عبدالعزيز من عندهم وفتحت الباب اللي بينهم و كانت تدور بعيونها على عيالها بس مالقتهم مالقت الا فيصل كان واقف و متكتف على الجدار راحت له وهي تتكلم بهدوء : وين اخوانك
فيصل وهو يشوف اثار الدموع بعيون امه  : راحوا
ام عبدالعزيز بصراخ : وين راحوا وين راحوا راحو لعمانك صح ؟
فيصل بهدوء : مدري ركبوا السياره و راحوا
جلست ام عبدالعزيز على عتبة الباب وهي تصيح و تبكي
_________•
في بيت ابو تميم
قامت اديم من الصباح و جهزت الفطور وحطته بالحوش و قام تميم وهو يضبط القهوة و يشب النار اجتمعوا و ابتدوا يفطرون
ابو تميم : عسى كتفك زين يا ماجد
ماجد : لا الحمدلله اشوى بس لو افك الحمالة تصير توجعني مره
ابو تميم : بسيطه بسيطه
ماجد بتساؤل : ماعرفتوا من اللي طعني يا يبه ؟
ابو تميم وهو يطالع الفطور و ياكل : لا ما عرفنا
لا تفكر انت بالموضوع حقك بيجيك من الدوله وانت يا تميم اخلص ورح افتح المحل
طلع تميم و ابوه للمحل و ما بقى بالبيت الا اديم و ماجد
اديم وهي ما تدري كيف تسأله : ماجد بسألك شيء
ماجد : اسألي
اديم : كيف علاقتك انت و ولد جيرانا ؟
ماجد بطفش : وش فيتس انتي و ابوي علقتوا عليه ترا عادي شيء طبيعي تصرفه حتى لو انه ما نحب بعض
اديم : يا ماجد لا تلعب علي انا على الاقل انا بنفسي شفت كيف خاف عليك ابوي ما شاف عشان كذا صدقك قول لي ترا مارح اقول لاحد وانت تعرفني
ماجد عرف انها كشفته و قرر يقولها : صح عليتس انا و نواف مو بس جيران انا ونواف اصدقاء و اخوان و تراه معي من جوا للديره وحتى يوم تهاوش ابوي معهم ما تفرقنا كنا نتقابل من وراهم حتى هو اهله ما يدرون
اديم : كنت حاسه طيب ليه ما قلت لي ؟
ماجد : قلت انه بتكون ردة فعلتس مثل ردة فعلهم فاحتفضت فيها لنفسي
اديم : طيب وش سبب هواش ابوي معهم ؟
ماجد : انتي وش فيتس صرتي فجاءه تسالين ماكنتي كذا قبل
اديم بتصريفه : اييي انا يوم رحت لهم ونمت عندهم لو تشوف كيف جوهم تخيل حتى خوات نواف كانوا يعاملوني كأنهم يعرفوني من زمان يتهاوشون و يضحكون و يحشون عندي كأنهم يمونون علي
ماجد : هم طيبين بس الله يهدي ابوي اصلاً حتى سببه الي خلاه يتهاوش معهم انا لحد الان مو مقتنع فيه تخيلي انه ... قطع كلامهم تميم اللي كان ناسي مفتاح المحل ورجع ياخذه و دخلت اديم بمواعين الفطور و راحت تغسلها و دخل ماجد ينسدح داخل
_________•
طلعوا عزيز و نواف للعزبه وراحوا لها بدون لا يبلغون احد وصلوا لها و فرش نواف الفرشه في نص العزبه و راح يضبط القهوه و عزيز راح يشب النار تجمعوا على الفرشه وعزيز ماسك بيده سبحته و يقلبها و نواف ملاحظ توتره وكان ساكت و ماسك فنجاله بيده
عزيز وهو لحد الان منصدم من ردة فعل امه : وش تسمي بالله ردة فعل امك هذي اكيد وراها سالفه
نواف : ياخي الحين انت هد شفيك متوتر بعدين امي ما تكلمنا معها عشان نشوف وش اللي صاير
عزيز بغضب : ليه امك خلتنا نتكلم معها فجاءه قعدت تصارخ و ياويلكم لو تقابلونهم
نواف : خلاص خلنا نهدى شوي بعدين نرجع البيت و نسأل امي واذا مره مصره انه ما نقابلهم مارح نقابلهم يعني هم ماكانوا موجودين لين الوقت هذا عشان لازم يصيرون موجودين
عزيز : طيب حنا موافقين ما نقابلهم بس تعلمنا السبب مب كذا تطيرنا بالعجه و صراخ و مدري وش
نواف وهو يضيق عينه بشك : انت مو مشتط كذا عشان عمانك وراك بلاء
عزيز بهدوء و ببتسامه  :  شفتها يا نواف شفتها
نواف وقف على رجله من الحماس : بذمتك متى شفتها و وين شفتها وانك ما قابلت عمك الا خمس دقايق تكذب علينا يا الخسيس
عزيز وهو يضحك بصخب : هد هد والله انك ما تباعد امك يوم قابلت عمك لفيت بظهري الا فجاءه اسمعها تكلم ابوها لفيت الا هي عرفتها يا نواف عرفتها
نواف : طيب يمكن مو هي يمكن عنده بنت ثانيه ولا بنت اخوه ولا اخته لا تتحمس على طول
عزيز : لا انا متأكد انها هي و بعدين عمك ربي ما رزقه الا بنت يعني مافيه غيرها
نواف : طيب وش بتسوي اذا امي كذا طارت يوم سمعت اسمهم اذا درت انك تبي بنتهم وش بتسوي ؟؟
عزيز وهو ياخذ نفس عميق : ما ادري بس الي اعرفه اني مارح اخليها بعد ما لقيتها و بخطبها من ابوها
نواف بضحك : لا انت صامل مافيك حيله لو بيدك تروح الحين تخطبها انا اقول انتظر خلنا نشوف امي و موضوعها بعدين تعلمها عن موضوعك
عزيز : هذا اللي بيصير
نواف : طيب انت ما تذكر شيء على ايام وفاة ابوي ياخي انا اتذكر مقطع مو مره اذكر اللي اعرفه انه بعد وفاة ابوي امي طلعت من البيت
عزيز وهو يحاول يتذكر : ما اذكر مثلك كل شيء مقطع اذكر صراخ امي و بعدها انتقلنا هنا ولا اذكر وش كان السبب
نواف : تهقى لو سألنا ريم تقولنا يعني تتوقع انها تذكر شيء ؟؟
عزيز : والله ما اتوقع اذا حنا ما تذكرنا اكيد هي بعد ما تذكر
نواف : اجل مافيه الا امك كلمها قم الحين خلنا نصلي الظهر و بعدين نرجع للبيت ترا طلعنا بدون ما نقول لأحد 
عزيز : قم قم الله يسهلها
قاموا صلوا الظهر بعدين شالوا الفرشه و العزبه و تحركوا متجهين للبيت
_____________•
في مكان اول مره نزوره في بيت " ال غانم "
دخل متعب ال غانم وراح متجه لمكتب ابوه نهيان دخل للمكتب بس ما لقاه موجود فيه طلع منه وراح سأل الخدم عنه وقالوا انه جالس بالحديقه الخلفيه طلع متجه له و لقاه جالس مع اخوانه و يتكلمون عن الشغل طالعوا اخوانه في وجهه وكان شوي منخبص على فرحان
فهد : وش فيك يا متعب وش صاير معك
متعب مارد عليه وهو يناظر نهيان لحد ما وقف نهيان و قالهم يطلعون و ضرب عصاته بالارض طلعوا كلهم بس بقى متعب و نهيان : لقيتهم ؟
متعب : لا ما لقيتهم هم اللي لقوني
نهيان وهو يناظر عصاته : شلون صار ذا كله
متعب وهو يفرك يدينه ببعض : كنت طالع امس اتعشى مع بنتي و انا طالع ورايح اركب السياره الا صادفني عبدالعزيز و عرفني
نهيان : وكيف كانت ردة فعله ؟
متعب : كانت عاديه حتى رحب فيني وضمني وكانوا يدورونا وهو كذا قال حتى قال ليه غيرتوا بيتكم القديم
نهيان : اجل اماني ما قالت لهم شيء بما انه رحب فيك اسمع يا متعب ابيك تعرف لي وين ساكنين و بأي ارض هم تسمع
متعب : هو قالي انهم ساكنين بديرة نجد من يوم نقلوا من هنا
وقف نهيان وهو معصب : ليه انتم ما دورتوا بالديرة قبل
متعب : الا دورنا بس اللي دور في ديرة نجد هو سعود مو انا
نهيان بعصبيه : رح ناد سعود
جلس نهيان على كنب الحديقه وراح متعب يدور سعود بس ما حصله موجود يوم طلعهم ابوهم كل واحد ركب سيارته و مشى عشان كذا ما لقاه رجع لابوه وقاله انه ما حصل سعود و قال نهيان لمتعب ينصرف وجلس هو لحاله يفكر
_____________•
في بيت ام عبدالعزيز
وصلوا نواف و عزيز للحاره و صادفوا ابو نايف ماشي و دعوه و ودعوا العيال بعض بعدين دخلوا للبيت و كانت ام عبدالعزيز تنتظرهم في حوش البيت دخلوا و فزت لهم امهم : وين كنتوا رحتوا لعمانكم صح تكلموا ليش ساكتين!!!!؟
كان عزيز يناظرها و يتأمل ردات فعلها و يفسرها بمخه انه وش السبب القوي اللي خلاها تصير معاديه لهم حط عينه بعينها و بهدوء : مارحنا لأحد و الحين نبيك تقولين لنا السالفه كامله
ام عبدالعزيز تنفست براحه و رفعت راسها له : مافيه شيءٍ ينقال
لفت و مشت و وقفها كلام عزيز : ترا اذا ما قلتي لنا السبب انتي بروح لهم و اخليهم يقولون لي السبب لمتى بتقعدون تخبون عنا لنا حق نعرف لا تتوقعين انه بتقولين لا تقابلونهم و بنقول لك طيب مارح نقابلهم قولي لنا السبب و ابشري باللي تبين
ام عبدالعزيز بغضب : من متى و انت تقول هالكلام بوجهي يا عبدالعزيز انا كذا ربيتك ما عندي شيء ينقال و اذا تبي تروح لعمانك رح تهددني بوجودك
دخلت ام عبدالعزيز داخل مستعجله عشان لا تسمع رده وهي اصلاً ما تدري كيف قالت كذا و عرفت انها مارح تقدر تمسكهم ولازم تقول لهم السالفه بس تدور الوقت المناسب
________•
في بيت ابو تميم
كانوا متجمعين و ينتظرون العشا و اديم في المطبخ تجهزه وكانت حايسه لانها سوته متأخر و كانت ناسيته
تميم وهو يناديها و الجوع واصل عنده : يا اديم وين عشاتس متنا جوع
اديم من المطبخ تصارخ : يالله جبته انتظروا ٥ دقايق
ماجد بضحك : تقول يالله جبته بعدين تقول انتظروا ٥ دقايق وانت انتظر شوي البنت حايسه من اليوم قم رح ساعدها
قام تميم و توجه للمطبخ وهو يشوف شكل اديم كانت لافه الطرحه على راسها ورافعه لبسها بيدها و الملاس باليد الثانيه طالعت فيه وفجاءه انفجر يضحك على شكلها
تميم وهو ميت ضحك: انتي وش مسويه بحالتس
اديم رمت الملاس من يدها بطفش : اففف تعبت من اليوم وانا احوس هنا
تميم وهو يطق صدره لها : ولا يهمتس انا جاي افزع لتس
اديم : اجل خذ السفره و الطفريه و افرشها و انا بغرف الرز و اجي
اخذ تميم الاغراض و فرشها وبعدها طلعت اديم بالصحن و حطته و قعدوا ياكلون
ابو تميم بضحك: بغيتي تموتينا من الجوع يا بنيتي شكلتس كنتي ناويتها !؟
اديم بتبويز : افا وانا بنت ابوي هذي الفعول تطلع مني بس جتني اليوم عبير بنت جيرانا وجلست تسولف معي و نسيته اركبه بدري
تميم : ياحبتس للبربره ترا لولا الله ثم فزعتي لها كان لحد الان انتم ميتين جوع اشكروني
اديم وهي تضحك بقوه : والله انت اللي يبي لك من يفزع لك ترا مانسيت شكل المطبخ يوم اصابة ماجد طلعت انت ما تنترك لحالك
تميم بغمز لاديم : استري علي
اديم : اي خلها بالقلب تجرح وما تطلع لبرا و تفضح
ماجد وهو يصفر : اكشخ يا ام شوشه طلعتي راعية حكم
اديم وهي ترفع طرف غرتها باصبعها : ما نجي الا من بعدك يا اخوي الفاضل بس لو نحذف كلمة ام شوشه من قاموسك تراها سالفه و عدت
ماجد : طيب وش بيطلع الموقف من مخي عشان كذا ما مقدر احذفها من قاموسي
تميم وهو مب فاهم شيء : وش السالفه خلونا نفهم
ماجد جاء بيقول السالفه وكل ما جاء يبدا ضحك وهم يضحون من ضحكه ولاهم فاهمين شيء لين عاد عصب ابوه بمزح وقرر يقولها ويحاول ما يضحك
اديم وهي مستغربه ضحك ماجد على السالفه : ودي اعرف الضحك ذا كله ليه و السالفه ما تضحك لهذي الدرجه
ماجد وهو مستمر يضحك : اي لان السالفه تخصك و على فكره ترا انا اللي حضرت الموقف مو انتي المهم بقولها كنت يا طويلين العمر ذيك المره كنت راجع من لعب الكوره بالحاره و دخلت بتروش يوم طلعت و لبست و كنت ميت جوع وكان الوقت تقريبًا متأخر هالمره هي الوحيده اللي لعبنا كوره متأخر المهم دخلت المطبخ ادور لي شيء اكله الا اشوف الثلاجه مفتوحه ولا فيه احد عندها ورحت دفيت بابها برجلي صقع بشيء ورجع ما تسكر الا اشوف شخص يوقف على رجوله و شعره منكش ويالله يالله اشوف وجهه وقتها عاد جتني ام الركب قلت خلاص جني وانا كان بيدي صحن و اصقعه براسه واخر شيء طلع ذا الشخص اديم ومن ذاك اليوم و الشكل لحد الان بمخي و سميتها ام شوشه
اديم : ترا على فكره انا شعري ناعم بس عشان انا بعد كنت متروشه و انتظرته ينشف و مشطته وهو ناشف انتفش لا وترا بعد ماجد سبب لي اصابه براسي طلع لي صعرور
تميم بضحك : زين ما ذبحتس ولا انتي سببتي له نوبه قلبيه
اديم : احلا شيء بالموضوع اني خرشته لو تشوفون وجهه تموتون من الضحك
ابو تميم : لايجوز ترويع اخاك المسلم لو اخوتس وقف قلبه و لا انتي فقع راستس اخوتس وش بتستفيدون لاعاد اشوفكم متعودينها
ماجد : يا الغالي تراك فاهم غلط الماضوع كله صدفه بدون تخطيط
ابو تميم : المهم علمتكم و يالله ادخلوا ناموا وانتي يا اديم استعجلي ثم ادخلي ارقدي
نفذوا العيال كلام ابوهم وراحوا لغرفهم و اديم اخذت المواعين للمطبخ و طلعت لها صحن بلاستيك و حطت فيه باقي الاكل للقطاوه وهي دايم تسوي كذا بعد كل اكل تطلع لهم الباقي راحت اخذت جلالها و طلعت لهم
______________•
في بيت ام عبدالعزيز
تجمعوا البنات في المطبخ وكل وحده في صدرها كلام ودها تقوله جتهم ندى ببريق شاهي وحطته قدامهم و جلست : وش فيكم كل وحده ساكته
نوف : انتي اللي وش فيتس جايبه الشاهي الحين بيجي جدتس يدخلنا نرقد
ندى : لا معليتس بعد السالفه اليوم جدي ناسينا حتى هو بنفسه ما دخل يرقد
ريم بتوتر : بنات
التفتوا عليها البنات وكل وحده تنتظر وحده منهم تفتح السالفه اردفت ريم : وش تتوقعون سالفة عماني وليش امي عصبت مره من عزيز يوم درت انه قابل عمي متعب !!؟
ندى : والله هو انه نعرف شيء مانعرف حتى اصلاً ما قد تكلمنا عنهم بس اكيد وراهم سالفه قويه
ريم : اي اكيد على كل هالصياح والبكاء اللي جاء اكيد السالفه كايده
نوف : بنات انا كني اتذكر شيء على ايام ابوي بس كأنه خيال
ريم و ندى بتسأول : قولي
نوف : يوم كنت بزر تقريباً كان عمري 8 واتذكر كخيالات يعني مقطع اذكر انه ابوي كان بيطلع مكان و انا مسكته من يده وقال لامي شيء بعدين طلع وامي جلست تبكي
ندى : ليه تبكي
نوف : بس هذا اللي كنت اذكره
ريم : حاولي تتذكرين
نوف : بس هذا اللي اذكره ما فيه شيء اصلاً كن... انقطع كلامها بعد ما دخلت أم عبدالعزيز ولا كانها كانت تبكي قبل شوي بالعكس كانت تمشي بالبيت ولا كأنه صاير معها شيء قامت دخلت البنات للنوم و راحت هي تنام
___________•
طلع من بيتهم و وقف جنب الباب و مركي رجله على الجدار و ماسك القطوه بيده و يلاعبها و فجاءه نقزت القطوه من يده و راحت لريحة الاكل اللي تشمها و وقفت جمب باب بيت ابو تميم التفت لجهة الباب و عرف من وراه بسبة جلالها اللي طاير : ترا هذا ظلم اخذتيها من بين يدي
وقفت اديم بخوف ورا الباب : من انت
نواف : انا نواف
اديم : وش تبي
نواف : ما ابي شيء بس انتي اللي وش تبين ؟
اديم بتعجب منه : انت اللي طاب علي
نواف : ما اذكر اني طبيت عليتس انا واقف عند بابي و ماسك قطوتي و انتي اخذتيها
اديم بضحك : قطوتك !!! هذي قطوتي انا حتى اني مسميتها سويدون اذا كنت تحبها و على قولتك حقتك اكيد انك مسميها قول وش سميتها
نواف : بعد تسميتس ما نسمي دامتس قلتي سويدون اجل سويدون
ضحكت اديم و كمل نواف كلامه : قد قالتس احد ضحكتس حلوه !؟
انخرشت اديم من جراءته و سكرت الباب ودخلت للبيت طيران و قلبها كان يدق من الخوف وهي اللي ما تدري كيف فجاءه دخل حياتها ضحك نواف على ردة فعلها و دخل للبيت وهو مبتسم و وقف بالحوش يضحك فجاءه طلع صوت الجده منيره : درينا انه عندك سنون من وينك جاي
نواف بضحك : ولا شيء كنت قاعد عند الباب مع القطاوة
الجد منيرة : اقطع لك تونه بعد تاكلها معهم وش مقعدك مع القطاوه ما كفوك الاوادم
نواف : والله يا جديده طلعوا القطاوة احسن من الناس بس وكليهم و يسنترون عند بابك
جاء بيجلس نواف وضربته الجده منيرة على رجله : جاي تجلس بعد قم رح انخمد بعدين ما تقوم لصلاة الفجر
نواف : مقبوله منتس الطرده يا منيرة يالله تصبحين على خير
الجده منيرة : وراك بلا بس رح امرح
دخل نواف المجلس وراح ينام و بعده بشوي دخلت الجده منيرة تنام
.
.
( انتهى )
اتمنى انه البارت نال اعجابكم 💕
اكتبوا لي اراءكم حول البارت بالكومنت 🫶🏻
#حكمٍ_طغى_ماعاد_ينفع_نظامه