ياوجهٍ ملاه الحسن سبحان باريّه ‏تاهت وصوف الشعر في جل حسنه

البارت الثاني

شيم بنقده:يقول ماعاد يعرف يحتسي كلامنا
الجده عصبت:وش تعرف تحسي اجل عنقليزي
الكل فطس ضحك
مطلق حب راسها:معليك منها ياجده اعرف احتسي عربي احسن منها
شيم شمقت له وصدت تسولف مع روح
راح مطلق جمب خوف وعزيز
روح:خوف بما انكم هينا بنروح نسلم على جدي
خوف بصوته الرخيم:روحوا
روح اخذت شيم ولحقوهم البنات
شيم:روح اخوك يخوف صدق اسم على مسمى
روح ضحكت ودخلوا المجلس
-بمجلس الرجال-
شيم وهي تفك النقاب والحجاب:افففففف انكتمت
روح وهي تفك نقابها وتضحك على شيم:استغلينا الفرصه شفنا العيال عند جدتي قلنا نجي عندكم
الريم وباقي البنات دخلوا وسلموا على جدهم مع روح وشيم وبدوا روح وشيم يتهاوشون ويتضاربون
روح بعصبيه:شيوم تقلعي انا ابي جمب جدي
شيم وهي مرتفع ضغطها:انا بجلس جمبه
الجد:انا ابي نوره وسحر جمبي
نوره وسحر:موتن قهرر
الجد ابتسم:اقول تقلعوا نجيد الريم تعالوا
الريم ونجد جلسوا جمب جدهم وهم يضحكون
شيم وروح:عادي اصلاً
جلسوا مع الجد لين الساعه 10:30
-بحوش الرجال-
خالد:اصبر يابزر انت وهو بشوف بناتي متغطين ولالا
العيال ضحكوا
دخل خالد المجلس :يابنات تغطوا بدخل السلق
البنات ضحكوا وتغطوا
خالد:ادخلوا
دخلوا العيال يضحكون
الجد:وش عندكم تتضحكوون
مطلق:بدور وولده جو
روح لا شعوريًا فزت:قل والله
مطلق ضحك:والله
روح بفرحه:وينه؟
مطلق:بحوش الحريم
طلعت روح ركض وشافت بدر حضنته ودموعها نزلت
بدر وهو شاد عليها:وشفيك يابنتي
روح بعدت عنه وفكت نقابها:اشتقت لك ولجلستنا ابي افضفض ياخوي في شي جالس على صدري
بدر ابتسم:ابشري بس اسلم واخطفتس ونروح البيت
روح:يابعد قلبي ياخوي وين مجيد اجل
ماجد:هينا مجيد كرفوه ياعميمه موتوه
روح ضحكت:تعال يانور عيوني
ماجد راح وحضن روح
روح:بدر العيال بالمجلس مع جدي
بدر:وافنان داخل
دخلت روح لمجلس الحريم
-بمجلس الحريم-
روح ابتسمت:ياهلا ياهلا بافنان
افنان ضحكت وحضنتها:ياهلا بروح
روح حضنتها وجلست جمبها وكسروها سواليف لين الساعه 12:30 ببيت الجد الكل كان موجود
-بمجلس الحريم-
ارسل بدر لروح جيبي عبايتك وتعالي لاحد يدري الا امي او الريم
راحت روح وقالت لامها وراحت لبيتهم ركض
-ببيت هاجر-
جت روح واستقبلها بدر
بدر:وش فيك وجهك مو عاجبني
روح ابتسمت:اصبر اسوي قهوه سوداء وجيب حلا واجي ونسولف
بدر ابتسم:بسرعه
راحت روح وسوت لهم قهوه وجابت حلا ونزلت تحت وجلسوا بجناح بدر الي معزول عن البيت شوي
بدر:بتقولين وش فيك ولا اسال امي
روح:بقول
بدر:صح ووش كسر يدك
روح نزلت دموعها:انت الوحيد الي تعرف ان ابوي يمد يده علي
بدر بصدمه:هو الي كسر يدك!
روح:اي
بدر بنرفزه:شلون؟
روح بدت دموعها تنزل:كنت اشطف البيت وجاء ورما شماغه علي وقال اكويه قلت بشطف واذا خلصت كويته عصب ودفني وطحت عليها وقمت وكملت شطف وهي تعورني جاء خوف وشافها منتفخه واصر يوديني المستشفى وقلت لهم اني زلقت بس امي والريم واليوم رابح عرف وقلب الدنياء
بدر عصب وقام يبي يروح بيت جده:وقسم لا اذبحه
روح مسكته ودموعها تنزل:تكفى لا تروح لا تروح وتكسرني قدامهم انا قويه وطيبه قدامهم مابين لهم ان ابوي يمد يده
بدر حضنها:ماعاش من يكسرك ياخيتي غسلي وجهك وامشي نتقهوى بصاله وناكل حلا
روح غسلت وجهها وابتسمت ونزلوا تحت يتقهوون
وجلسوا شاي وقهوه وسواليف ويتابعون فلم
-بصاله الساعه 3:30-
هاجر كان توه جاي من برا ابتسم:ياهلا بولدي بدر
بدر سلم عليه وحب راسه
هاجر بعصبيه:قومي قومي سوي قهوه
روح ابتسمت:ابشر
هاجر بصوت عالي: ابشر وابشر وجالسه وجودك وعدمه واحد
روح بعصبيه وصوت عالي:يبه ممكن اسالك سوال انا بنتك ولا مو بنتك وش الفرق بيني وبين الريم وبين نوره وش الفرق بيني وبين بدر ولا رابح ولا خوف ليه تعاملني كذا يبه انا صار لي اكثر من 19 سنه انتظر كلمة يابنتي ياحبيبتي يبه ليه تعامل بنات عمي وعمتي احسن مني انا بنتك بنتك
هاجر ضحك وصد
روح تنرفزت:تدري دايم وش ادعي يا الله ياخذني يا الله ياخذك
هاجر بعصبيه ضربها كف:تدعين علي يابنت الذينا
بدر وقف بوجه ابوه
بدر بصوت عالي:يبهههه وقسم بالله والي رفع سبع ونزل سبع اذا مديت يدك عليها لا اخذها ونروح المدينه ولا تشوف لا وجهي ولا وجهها
هاجر ضحك:توقف بوجهي عشان هاذي؟
بدر قال وهو يرص على سنونه:اوقف بوجهه الدنياء عشان الروح
هاجر كشر بوجههم وراح
روح بدت تبكي وبدر حضنها: روح اذا مد يده مره ثاني علميني
روح هزت راسها وغسلت وجهها وجلست مع بدر بالحوش ويناظرون القمر وشابين نار
-عند بدر وروح-
روح:بدر عادي اقولك شي
بدر:قولي يا نظر عيني
روح ابتسمت:تدري اني احسك ابوي مو اخوي وبس
بدر:ابتسم احبك يابنتي
-ببيت الجد وتحديدًا حوش الرجال-
مطلق:هلا قلبي
احلام:مطلق
مطلق:عيوني ياحبيبتي
احلام:اخطبني
مطلق:افهمي يابنت الحلال ماقدر اخطبك
احلام:ليه يامطلق ليه ماتقدر انا بنت خالتك هاذا اول شي ثاني شي اذا ماتبيني قول
مطلق راح وركب سيارته وطلع دخانه وحط زقارته بين شفايفه ونفث بعصبيه ؛لو مابيك قلت لك مابيك افهمي يا احلام انا احبك لو ما احبك ليش اكلمك وابشري بكره الظهر بكلم ابوي وجدي
احلام ابتسمت:طيب لا تكلمني لين تخطبني
مطلق عصب وقفل بوجهها ونزل لبيت جده بس قابله عمه خالد بعصبيه
مطلق ابتسم:وش فيك عمي؟
خالد بعصبيه:مطلق ابيك امش
مطلق ضحك وراح وراه وركبوا السياره وحرك للحديقة وصلوا ونزلوا
مطلق ضحك:عمي شفيك؟
خالد:نفسي افهم انت اهبل ولا تستهبل!
مطلق ضحك:عمي مو وقت مزحك
خالد بعصبيه:منهي الي تكلمها بالجوال ؟!!
مطلق انصدم:هاه من اكلم كنت اكلم خويي
خالد عصب:سمعتك تقول عيوني حبيبتي
مطلق رقعها بسرعه وضحك:هاذي اخت خويي يسور الصغيره اسال عزيز او خوف عنه يعرفونه
خالد بعصبيه مسكه من ياقته:ماني بزر تضحك علي فاهم ولالا
مطلق ابعد عنه ودفه:لو عندي هل خرابيط كان قلت لك ولا بان علي
خالد بعصبيه:بدون ماتقول انا اشوف واسمع عاد اخطبها لا والله تشوف شي ماشفته
مطلق دفه وضحك:اي مثل ما انت حبيت ساره وخطبتها وبيوم عرسكم راحت هجت منك تدري ليش هجت منك لانها ماتحملت رجال متخلف ورجعي وظالم وكذاب وحقير مالومها
خالد صفقه كف:اسمع لا يخاطب لسانك لساني
دفه وراح ركب السياره وراح لابعد مكان وحس انه يبي يصرخ
-عند مطلق-
مطلق جلس ومسك راسه واستوعب وش قال بدا يضرب نفسه:حمار يامطلق حمار
راح مطلق ركض بحكم ان البيت قريب وصل وطق باب بيت عمه هاجر لانه يعرف ان خالد قريب من روح وكان يبي يعتذر منه فتح له بدر
بدر بستغراب:مطلق وش فيك
مطلق ودموعه بعيونه ويحاول ياخذ نفس:عمي خ خا خالد وينه
بدر بستغراب:ما كان عندكم !
مطلق طاح غشيان بحضن بدر
بدر:مطلق مطلق ولد قم
مطلق كان بحضن بدر مايتحرك
خذاه بدر ودخله المجلس جت روح من شافت اخوها طول وكانت حاطه شيلتها على وجهها:بدور في احد ولا ادخل
بدر:ادخلي ادخلي
روح خافت من شافت مطلق طايح:وش فيه
بدر:مدري مدري نادي افنان
روح:لالا لانشغلهم ونخوفهم افنان لما كانت تطيح امي تقيس الضغط والسكر وبعدين تشممها عطر واذا ما قامت نوديها المستشفى اصبر
راحت روح وجابت جهاز الضغط وكان الضغط طبيعي بس السكر نازل رش عليه مويه وشممه عطر بس ماكان يقوم
روح:بدور وده السياره البس عبايتي واجي
بدر هز راسه وشاله وركبه السياره وروح طلعت وراهم ركبت روح قدام وبدر جمبها ومطلق ورا غشيان ويردد اسم عمه خالد
وصلوا المستشفى واخذوه للاسعاف
روح:بدور ارتاح انا بكلم عمي برا واجي
بدر هز راسه
طلعت روح ودقت على خالد ٢٤ مكالمه ورد على اخر مكالمة
خالد كان معصب من كلام مطلق واذا عصب مايعرف امه وابوه:نعم ياروح ليش مليون مكالمة
روح:مطلق جاء سال عنك وطاح قدام باب بيتنا
خالد بخوف:وش فيه وينكم هو وينه
روح:مدري طاح وجينا المستشفى
خالد خاف:دقايق وانا عندكم
وبالفعل ما اخذ دقايق الا وهو موجود
خالد راح للاستقبال:لو سمحتي
احلام:هلا
خالد:غرفة مطلق الهاجر وينها كم رقمها
احلام انصدمت:م مين عد الاسم
خالد:خلاص خلاص هاذا ولد اخوي
راح خالد ركض لروح وبدر
وجلسوا ينتظرونه
خالد:بدر
بدر:سم
خالد:سم الله عدوينك رح للبيت لا يفقدونا واذا سالوا عني او عن روح قل يتمشون ومطلق قل مدري
بدر:ابشر
راح بدر وبقاء روح وخالد
روح:عمي انت تعبان بقلبك شي
خالد:عادي تمسحين على شعري
روح ابتسمت من تحت النقاب:عادي
خالد انسدح على رجولها وبدت تمسح على شعره:خلود عمي وش فيك
خالد نزلت دمعته غصبن عنه مسحها بقوه:ابي اعرف ليه ساره راحت وخلتني محد صحاني الا مطلق ضربته عشان وحده مثل ساره في اشياء جواي كثيره مدري كيف ارتبها
روح زعلت على عمها:عمي انسها ساره راحت هي الي خسرتك مو انت خسرتها عمي انت كبرت صار عمرك ٤٠ سنه تنتظر ساره والله لا ساره ولا طوايف ساره يسوون ظفر رجلك
خالد مسك يد روح:انتي ملاك انتي ملاك انتي قطنه انتي نقيه يابعد قلبي يا روح
روح نرلت دموعها وقالت بينها وبين نفسها:لو تعرف الحقيقه راح تعرف اني مو ملاك
-عند مطلق-
قام مطلق وهو يشوف وحده جميله جنب سريره وماسكه يده وتتامله سحب مطلق يده:انا وين؟
احلام:قمت ياعمري بالمستشفى
مطلق بتعجب وهو منزل راسه وصاد عنها:من انتي؟
احلام:اكيد نسيت احلامك
مطلق طير عيونه:احلام؟
احلام ابتسمت:اي احلام
مطلق بعصبيه:احلام انا حلفت ما امسك يدك لين نتزوج
احلام ابتسمت:بس انا روحك وحبيبتك وخيرتنا بنتزوج
مطلق ابتسم:طيب تحجبي ونادي اهلي
احلام ابتسمت:ابشر ياعمري
(معلومة احلام محجبه)
طلعت ونادت روح بحكم ان خالد قام يجيب لهم قهوه
روح توهقت قامت ودخلت
-عند مطلق-
مطلق تعجب من شاف وحده منقبه داخله عليه:من انتي ؟
روح بخجل:روح
مطلق:ياهلا انتي لحالك هينا؟
روح:لا عمي معي
مطلق فز كان بيروح:وينه
روح:اقعد بيجي بس بقولك شي قبل يجي
مطلق قعد:سمي
روح:اعتذر من عمي لانك فتحت مواجع عمي بدون ماتقصد ادري بس اعتذر وهو طيب وبيسامحك وانت سامحه ترا عمي خالد يحتاجنا من فقد ساره وهو مو على بعضه ويسالني عنها انا اعرف انها سوت حادث وماتت بس مقدر اقوله انها ماتت مابي اوجعه
مطلق مسك راسه:ماتت
روح:اي
مطلق:هي ليش تركته؟
روح:ساره كان معها مرض خطير وماتبي عمي يتعب من بعدها تركته عشان مايتعذب من بعدها تقول عادي يدعي علي وعادي انه يكرهني لاكن ماينقهر بعدي ولا يتعب
مطلق بقهر:طيب انتي ليش ساكته ليش ماقلتي له كيف ترضين صديقة عمرك يندعي عليها ترضين عمي يحس نفسه ناقص ترضينها ياروح ترضينها عمي لوكان مكانك مستحيل يقبل عليك
روح ودموعها نزلت:ساره ماتبي عمي يعرف مطلق انا قلت لك لاني واثقه فيك ومابيك تعايره مره ثانيه تكفى يامطلق
مطلق نزل راسه:ابشري يابنت العم
دخل خالد:ماشاءالله محد قالي ان الزين قام امسكي ياروح
روح مسكت كوبين قهوه
خالد راح وحضن مطلق:خفت عليك ياجربوع
مطلق:والله انك انت الجربوع
روح ضحكت عليهم
خالد:وجع عمك عمت عينك وانتي لاتضحكين
روح مدت له قهوته:طيب ياعمي امسك
خالد اخذ القهوه وبدا يشرب وروح شربت قهوتها من تحت النقاب
مطلق:ماشاءالله وانا
خالد:وشبلاك انت ؟
مطلق:ابي قهوه
خالد:مافيه
مطلق:عمي نخيتك بس شوي
خالد:لا
مطلق:روح صبي لي شوي
روح:احلم انا اقتلني بس ما اشارك احد بقهوتي مستحيل لا تفكر حتى تفكير
مطلق مثل الزعل:ابي اطلع طيب
دخلت احلام ابتسمت لمطلق:اخ مطلق تقدر تطلع
مطلق ابتسم ونزل راسه:تمام يعطيك العافية
قاموا وطلعوا وركبوا مطلق وخالد قدام وروح ورا
مطلق:في احد يدري غيركم
خالد:لا بس بدر
مطلق:مو لازم احد يعرف طيب
خالد:طيب
وصلوا البيت ونزلوا وتوجه كل واحد بيتهم
دخلت روح بيتهم منهلكه
هاجر قابلها:منين جايه
روح:مابي اتكلم اضرب وخلصني لاني لو بررت او ما بررت بتمد يدك
هاجر بعصبيه:تكلمي منين جايه الساعه ٥:٣٠ الفجر
روح:كنت مع عمي خالد رايحين نتقهوى
هاجر:كذابه شايفك نازله من السيارة مع مطلق
روح:لو ركزت شفت خلود
هاجر:بدق عليه وبشوف
اتصل هاجر على خالد وساله وبحكم انهم متفقين ردوا نفس الرد
هاجر قفل:انقلعي عن وجهي
روح صعدت فوق وبدت تبكي لين نامت
-صباح اليوم الثاني-
ببيت ذيب
كان جالس ذيب يتقهوى مع شيم
دخل مطلق:السلام عليكم
ذيب:وعليكم السلام
شيم:وعليكم
مطلق جلس جمب شيم:شيوم زعلانه
شيم ناظرته وشمقت:وش رايك
مطلق كشر:تدرين عشانك امس زعلانه علي طحت قدام بيت عمي هاجر
شيم لقت وشافته يبتسم:لا تكذب
مطلق:والله العظيم اسالي روح
شيم:روح! وش دخلها
مطلق لف عليها:اسمعي يا طويلة العمر والسلامه امس تهاوشت انا وعمي وجيت ادوره ببيت عمي هاجر بحكم ان علاقته مع روح قويه زي ماقلتي لي ومالقيته ونزل سكري عندهم مسكني بدر ووداني هو وروح المستشفى وجاء عمي ورجعنا البيت وبس
شيم بدت تبكي
مطلق حضنها:والله اسف اني خوفتك علي بس تعرفين اخوك قلبه رهيف ماقدرت اخلي عمي يروح زعلان علي
شيم ضربته وضحكت
مطلق:تدرين مشتهي حلاك هذاك
شيم ضحكت:ابشر بعزك غالي والطلب رخيص
قامت شيم تسويه
مطلق جلس جمب ابوه:يبه
ذيب وهو يقرا الجريده:سم يبوك
مطلق:سم الله عدوينك ابي اخطب
ذيب ترك الجريده:انت صادق ؟
مطلق ابتسم:ايه يبه بس تعرف مراح يتم زواجي لين جدي يعرف او يوافق
ذيب:قم نروح له
مطلق:يله يبه
راحو متجهين لبيت الجد
———————————-
هاذا بارت طويل لين اخلص اختبارات الاسبوع هاذا احبكم وتصبروا بالبارت هاذا والسب الجاي بيجيكم بارت يغير مودكم ترقبوا احبكم احبكم 🩷🩷🩷🩷🩷🩷
———————————