بلشنا تحضيرات طلعنا كذا مرا للسوك اشتريت غراض خطية فهد مبقى شي موصي عمتي اي شي يعجبها تشتري وهي هم مقصرت وإضافة شغلات لغرفتي ترتيبات اخذت تقريبا بالاسبوع يوميا اطلع اشتري شي
عرسي بعد اسبوع الحنة قررنا بقاعة بس بنات بيناتنا وعرس هيج خفيف حجزت بدلة وردي وصخ وإضافة فستان احمر عجبني كلش اني وغزل اختاريناهن
اليوم كاعدة ومتوترة كلش ماادري جتني حالة توتر على كأبة لان حعوف ماما وحدها
ودق ،اووي شنو هاي عود ليش اعوف اهلي ليش ماهو ينتقل يمنا
غزل وبنين ،هههههه متنا ضحك عليها
بنين ،حال الدنيا هيج اكلج اشو من اقترب عرسج يوميا كايلتلنا سالفة
ودق ،اي ميصير ليش بس احنا نضحي
بنين ،اي والله ليش ما احنا هم منولد نفقس
خلي بيض اكعد عليه وشوكت يريد يجي براحته مااجبره
غزل ،ههههه اكلج كأنو طكت فيوزاتجن بهالعصرية
بنين ،اووي صدك ميصير هيج
غزل ،لا مبين عدتج
ودق ،شلون حعوف امي وحدها خطية
غزل ،حبيبي هي لتفكرين هيج وتقهرين نفسج
ام غزل مدمعة على فراق ودق ،
لتحجين هيج حبيبتي ودق خلي حياتج تمشي والسعادة ترافق هاي سنة الحياة بنيتي
بنين ،واني وين رحت احطها بعيوني لعمة
ام غزل ،حبيبتي بنين بنيتي بعد
غزل ،اووي لضلون تحجون هيج لتقهرينا ودق وكامت حضنتها
ودق ،حفتقدكم والله
غزل ،اني موكدامج يوميا ناطة انتي هم تتعودين وتعالي دائما
ودق ،ان شاء الله
الخميس رحنا للصالون من وكت اني وغزل وبنين هم يريدن يحطن اني حطيت مكياج وردي بلون بدلتي وشويا بي سواد كالت يبرز أكثر
وغزل فستان منفوش الضاهر جاسر حاط رأيه بملابسها أو فارض رأيه هههه
وبنين هم لابسة فستان شويا عريض بطنها شويا مبينة كبرانة متريد تبينها
كملنا ورحنا كبل للقاعة الماعازيم واصلين
دخلوني بغرفة انتضار وماما دخلت شافتني ماما تبجي خطية وباركتلي وبقت غزل يمي ورا عشر دقايق شغلة اغنية دخولية الي ودخلت عليها مرتبكة بس شعور حلو لحد ماوصلت للمقدمة وغيرو اغنية حطو رقص والبنات دخلت يركصن وجرني وياهن ضلينا نركص
نص ساعة وجا فهد ضليت واكفة وهم شغلوله اغنية ودخل عليا شايل باقة ورد من وصل باسني من راسي وانطانياها
ودخلوا أهله يباركولنا وأمه تبجي فرحانه بي
