فصل فتاة الكنيسه//

《البارت♡السادس》

((مرحبا بنااات يوم جديد وبارت جديد اتكنى تستمتعون بالقراءه ولا تنسوا التصويت ومتابعه الحساب وعندي الكم مفاجأة انشاءلله باجر بنهايه البارت انتضروني ....))

___________

كيف تحطمت روح نزار قباني حتى كتب::

،،تمنيت حباً دائماً،،

،،استمر الحب؛؛

،،،،ولكن الحبيب قد رحل،،،،

___________

_يله بويه دخلي برجلج اليمين وديربالج تره اكو صبه بالباب ..

هزيت راسي ودخلت للبيت ودخلو وراي استقبلتني مره جبيره بالعمر همين عمرهه بال٥٠ ووياهه ثنين بنات وحده جبيره تقريب ال٣٠ عمرهه والثانيه اصغر شوي يعني مو شابات .. اجن سلمن علي سلام عادي بوستهن من الجوانب وهاي هيه عرفني عليهن عمي وكال..

_هاي مريتي ربه البيت وعمتج ام زوجج وهاذي بنتي الجبيره رانيا اكبر من زوجج والثانيه ميس واصغرهم واخر العنكود هذا الشاب الحليوه سند

اشر على الولد الجان كاعد بصفي عرفته اخوه وهذول اهله يعني عائلتهم متكونه بس من الاب والام وثنين ولد وثنين بنات ... سلمت عليهم وعلى سند ودخلنه للبيت جان عباره عن ديوان جبير خارجي

وصاله صغيره و٤ غرف ومطبخ يتوسطهن صاله جبيره تقريبا نفس تصميم بيت اهلي الطابق الاول بس اهلي اصغر مساحه واقل غرف.. فزيت من صفنتي على صوت عمتي وهي تكول..

_يمه ميس اخذي مرت اخوج خليهه ترتاح بغرفتهه وشوفي شنو تحتاج

_حاضر يمه يله تعالي اا...

_نوران اسمي

_عاشت الاسامي يله تعالي نوران وياي هاذي غرفتج ..

رحت وراهه ودخلتني لغرفه مجهزه ومفروشه وبيهه جربايه غرفه اخشاب ام النفر تفاجات وانتبهت علي ميس وكالت..

_عذرينه حبوبه كلشي صار فجاة ومالحكنه نشتري غرفه كلهه يومين ويجهزون غرفت الاخشاب الكم ماعندج مانع مو..

_لا عادي

_يله حبي هذا الحمام اذا تردين تغسلين او تسبحين وهنا بهذا الكنتور تكدرين تخلين ملابسج هل يومين وانتي نامي عل جربايه ورجلج اجيبله هسه فراش واخلي هنا لمن يريد ينام يفرشه بالكاع لان ماتوسعكم الجربايه صغيره

_تمام

_اذا تحتاجين شي صيحيلي كلحنه يمج تمام حبي

_امم شكرا

_ولو العفو

ابتسمتلي وطلعت وسديت الباب وراهه قفلته ذبيت حجابي والفستان وتمددت عل جربايه وطخ بخشمي عطره حيل قوي وغريب خليت حجابي على خشمي وغفيت هاربه من واقعي من نصيبي من تعب الطريق يلي بعدني ماخطيت خطواتي بي لهسه هاربه من مواجعي هاربه من عدم احساسي هاربه من كلشي بالدنيا مؤذي..