اللهم صل وسلم على سيدنا محمد ..
الله اكبر
الحمدلله
استغفر الله
سبحان الله وبحمده سبحان الله العظيم
عاودوا اقروا الروايه باش تذكروا الأحداث..
عارفين بمرور الشهور ..
عمران قعد اغلب وقته مسافر للمدينه اللي فيها جمعه باش يكملوا المشروع..
اما إلياس قعد لاصق فيه لين قعد عمران يجامل فيه .. ومع الوقت تقبله .. لأنه درس شخصيته ولقاه ولد كويس رغم انه لصقه وميخليلكش وقت خصوصيه..
نزار قعد مدرب في الكاراتيه .. وقعدوا يجوه هلبا طلبه ..
وفي الشهور هادم زاد راح ضخم مخلي خوته ينقصوا من الكلام معاه باش ميلقوش عضامهم مكسرات
بس عامر قرر يخش للصاله لأنه مستحيل يقدر يشد لسانه ..
قبل يومين مقايل ل بوه جمله خلت بوه ياخد عصا ويبدي فيه ضرب كسر ثلاته مكانس عليه ..
الجمله كانت بسيطه ..
بس فتح الله فهمها اهانه ..
الولاد ميتكلموش في حضرة بوهم .. بس عامر كان ميعبرش واللي يجي في خاطره يقوله .. عادي اضربني اكفخني المهم نعبر عن مشاعري اللحظيه في وقتها..
" الرجاله لما ياخدوا ثلاته ولا اربعه ويرموهم يحسابوا روحهم قعدوا رجاله .. الراجل ياخد وحده وكان قادر ياخد اثنين ويعدل ما بينهم.. العدل في كل شيء لبسهم كسوتهم وماكالتهم ويشبح لصغارهم"
هو كان يهدرز .. بس لقح لبوه .. وبوه فهمه طول.. وكذلك خوته اللي عرفوا ان الليله بتمشي وهو معش حايقدر يمشي..
سلسبيل مزالت عاشقه ولد عمها واكثر من مره قريب شدوها خوتها معاه مره نقذتهم وصال .. والمره الأخرى باسمه .. بعد ما وزعت ياسين جت ل إسماعيل..
وقفت بعصبيه قدامه وهزباته وفي الأخير ختمت تهزيبها بتهديد .. يا تخطبها يا تخليها في حالها منبيش نضيع ثقة خوتي على خاطر كلب زيك..
ومشت من بحداه مخلياته راعش منها ..
هي اصلا مش راضيه على علاقة سلسبيل ب ولد عمها ..
تبي تنتلف هي وخواتها من العيله هادي لأن عارفه سلسبيل كان تزوجت إسماعيل مش حاتعيش حياتها وكلهم بيحكموا فيها .. ولأنها عارفه سلسبيل وشخصيتها .. عارفتها من الضغط حاتركبها حاله نفسيه وتمرض..
لأنه مره انفجرت بعد شافت بوها يضرب في عمران .. قعدت تخبط وتعيط مخليه بوها يهرب من الحوش يحساب بنته هبلت .. هي قريب فقدت عقلها هداك اليوم بجديات ..
