اللهم صل وسلم وبارك على سيدنا محمد ..
.
خليل وين بيمشي في هالليل؟؟
سؤال وجيه .. ويبي اجابه للأمانه .. لذلك حانجاوبكم..
كان يسوق .. وعارف انه مش حايروح لحوش بوه الا بعد الفجر..
لذلك وصل للمكان طق الباب ورن الجرس .. وقعد واقف يستنى..
لما فتح الباب وشاف اللي واقف وراه .. شاف الصدمه في عيونه..
خليل: اطلع نبيك في كلمه..
خليل باعد وقعمز بعيد شوي على الباب..
أيمن كان مستغرب.. هو شاف مكالمات خليل بس مردش..
لذلك قرب وقعمز جنبه..
خليل: في الوقت اللي المفروض نقطعك فيه .. جيت باش نسمع لأني عارف مسيبتش هبه الا وفي شيء صايرلك..
ايمن قعد ساكت .. اصلا متوقعش خليل يجي..
أيمن: مفيش نصيب..
خليل: عليك انت الكلام هاده؟ .. مخاطريش نضحك يا أيمن..
أيمن: مش كل سؤال بتعجبك اجابته .. تو كيف بتروح في الليل علاش جيت بروحك؟
خليل ابتسم بهزوه ورد شاف للقدام: مليكش علاقه ..
ايمن: اطربق معناها..
خليل: يعني مش حاكيلي يا أيمن؟
أيمن: شن بنحكيلك؟ .. خلاص انا واختك متفاهمناش .. ولقيت ان الانفصال احسن حاجه ..
خليل: ميمشيش معاي الكلام هاده انا..
ايمن: معناها نوض روح ..
ايمن وقف وكيف بيخش خليل تكلم..
خليل: متوقعتكش تستسلم بسهوله هكي تحت ضغط محمود..
ايمن تلفتله: بسهوله؟
خليل شاف ل أيمن..
ايمن قرب جيهته: انا مضغوط من كل تركينه يزيدني خوك المريض بالغيره الغبيه متعه اللي جايه في وقت غلط يزيد يضغطني على اكثر حاجه تريح فيا في الدنيا هادي .. مزال بنقدر نقرب من راحتي انا! .. تي بالله يا خليل ما يحس بالنار الا اللي عافس فيها .. مفيش حد حايفهمني ومنبيش حد يفهمني ..
خليل قدر يستفز ايمن وانفجر فيه ايمن بسهوله..
ايمن: حاولت يا خليل بس انا انسان مش حيط .. الله غالب عارف روحي خربت كل شيء..
