سبحان الله وبحمده سبحان الله العظيم ..
صارت حالة نفير ..
محمد ومحمود واحمد مبطلوش اتصالات بأصحاب خليل كلهم .. بس مفيش حد رد..
حتى أنه الدوه كبرت لما انشغلوا هلبا واتصلوا برياض
رياض انشغل وقعد يتصل بولاد خوته واحد واحد..
بعد محصلهمش ركب في سيارته ومشي للإستراحه اللي عارفهم فيها ..
لما خش وسمع عراكهم ... وقف وقعد يسمع..
ايهم يعارك: كله من عمايل فارس اهوا حتى خليل راح فيها في جرته..
حسين: غر اذكروا ربي يا ولاد .. مستحيل يقتلوهم .. راهو فارس خوته معروفين.. وكذلك خليل والله يقلبوا البلاد ..
اسعد: كلام حسين صح يا ولاد اهدوا..
وائل كان معتزل بروحه ويشوف للفراغ بصدمه .. من لما قالوله وهو هكي ..
فكرة ان خليل ميت .. مخلياته ميستوعبش شيء ...
وفارس .. فارس اللي قبل ساعات كان يتبورد عليه ..
طول خطرت عليه ضحكته .. اللي الواضح انها ضحكه كذب!
رياض خش: شن تخرف انت وياه؟؟ .. وينه خليل اماليه قالبين الدنيا عليه..
زيد حكاله كل شيء ورياض كان منصدم..
رياض: الكلاب اللي ضربوا علاء هادم!! .. وربي كان يطلعوا مدايرين شيء في خليل لما نقلبها على روسهم ولاد الكلب هادم..
زيد: بالله شوف سليمان يشوفهم يا رياض ..
رياض هز براسه وطلع نقاله ..
واتصل ب سليمان ..
اللي قاله تم تو نشوف..
.
.
.
.
فارس: علاش جيت؟
خليل قعد ساكت..
فارس: مش قطعتني .. علاش جيت وساعدتني؟ .. تعرف وين قاعد انت؟ وتعرف انك مرات تموت معاي؟
خليل: اي عارف ..
فارس: يعني ترمي روحك للموت على خاطر شخص قطعته..
خليل: من قال قطعتك؟ .. انا خاصمت لأنك واحد فاسد ومنحط..
فارس قلب عيونه..
