اللهم صل وسلم وبارك على سيدنا محمد
.
رياض كان مروح وقتها وجنبه امجد ...
بعد سمع قعمز يبكي على ولد اخته .. بس رد لعقله وجاه إنذار.. انت كبير العيله .. برا خبر بوك واختك بالشوي .. وتعالوا خودوا جثمان ولد اختك وروحوا بيه..
فارس قعد شاد تركينه وفي عالم آخر..
اما خليل ف قعد في المستشفى .. لا مش حايخلي صاحبه بروحه ..
خوته مسمعوش باللي صار ...
خليل: عادي نخشله؟
الممرض: مع ان ممنوع .. بس خش وخلاص مش حانقول ل حد.. تو نعسلك..
خليل هز براسه وخش .. رعشه جاته من تصقيع الدار اللي خشلها ...
" وائل ميحبش الصقع"
فكر هكي ..
لما قرب من جثمان صاحبه رفع الغطى وقعد يشوف لوجه صاحبه الشاحب .. قعد مدقق فيه..
قرن حواجبه وقرب وجها من خشم وائل...
باعد الغطا وشاف لصدره اللي يرتفع وينزل ..
قعد يغمض في عيونه ويفتح فيهم بسرعه..
خليل: شكلي هبلت يا صاحبي ..
وائل قرن حواجبه..
والمره هادي خليل وخر خطوتين.. بس رد قرب منه بسرعه لما قعد وائل يأن بألم..
خليل: وائل.. تسمع فيا وائل؟؟
وائل: ص قع ...
خليل طلع بسرعه وبهمجيه .. الممرض رعش..
خليل: وائل.. ناض ..
الممرض شاف لخليل بشفقه .. يحسابه هبل..
خليل قعد يهز فيه: خش شوففه تربح ..
الممرض خش ورعش لما لقي وائل فاتح عيونه وقارن حواجبه وصدره يتحرك وكأنه يتألم وهلبا..
ليه قريب اربعه ساعات اهني .. حتى المسكن اثره بيمشي رسمي..
نادى باقي الممرضين ونادى الدكتور اللي مسؤول على حالته ..
حطوه في دار .. وخليل قعد ماشي جاي ويفكر كيف بيقوللهم ...
طلع نقاله اللي جابهله ايهم امبكري وحط رقم رياض..
رياض بعد شوي رد عليه: ها خليل..
خليل: خبرتهم؟
رياض: خبرت بوه ..
