اللهم صل وسلم وبارك على سيدنا محمد..
.
سكينه كانت تراقب في ملامح محمد اللي امه اتصلت بيه ورد عليها ..
ومن المكالمه فهمت ان في شيء سيء صاير..
محمد: خلاص جاي .. متخبريش لا أحمد ولا محمود .. خبرتيهم!!! ..وخليل وين؟؟
تأفف بعد ما صكر من امه وقرب جيهة سكينه ..
سكينه: محمد.. صاير شيء؟؟
محمد شافلها: لا .. بنمشي لحوش بوي .. وصليهم انتي الصغار للمدرسه..
سكينه مبتش تضغط عليه: تمام ..
محمد خدي مفتاح سيارته وطلع من الحوش.. مشي جيهة حوش بوه وفتح الباب وخش ..
سمع صوت هرجه لذلك سرع خطواته ومشي جيهة الصاله..
احمد يعارك: ماهو هاده اختيااارها الفاااشل اللي خليتوها تمشينا بييه.. ياريتني قتلتها وتريحنا منها ومن عفنها!
مفتاح: صكر فمك يا احمد وصوتك وطيه .. اختك اللي فيها سادها ..
محمد: السلام عليكم...
هما كلهم سكتوا وشافوا ل محمد ..
ردوا السلام واحمد مشي جيهة اول صالون قابله وقعمز يراجي في خطوة محمد وكيف بيتصرفوا..
محمد: شن قالتلك هي يا بوي؟
مفتاح: قالتلي.. منير بيطلقني..
محمد: حاجه متوقعه .. علاش منحرق انت يا احمد ..
احمد: كله من جراير الفرخ خليل اهوا .. كله منه هو .. بنقتل منير وبنقتله تو تشووفوا!
محمد تنهد: كان خليل مزوجهاش .. كانت هربت معاه اختك .. كان اغراها بأي طريقه وخداها..
احمد: منعرفش .. منعرفش .. اهواا توا ضحك علينا كلنا .. ودار شيء احني متوقعينه يصير .. اهوا بيطلقها ..
احمد كان يعارك .. ومحمد حاول يهدي الوضع .. ومحمود كان ساكت ومش قادر يتكلم..
فرح كانت ترعش فوق وجنبها هبه .. سمعت كلام احمد العالي ..
وزادت خافت اكثر واكثر..
هبه: المفروض قلتيلهم انه ضربك ...
فرح تبكي: بيقتلووه يا هبه ..
هبه: في الحالتين بيقتلوه هما..
فرح: لا ميقدروش .. ميقدرش محمد يخرب الصلح .. جدي مش حايخليه ..
