استغفر الله العظيم واتوب إليه
الحمد الله
لا إله إلا الله وحده لا شريك له له الملك وله الحمد وهو على كل شيء قدير.
بعد عرس تهاني والياس اللي كان كبير .. كان قبل عركة خليل وفارس اصلا
هي وياه كانوا متريحين وعايشين حياتهم
بس تهاني مكانتش مهنيه روحها مع زينب ام إلياس...
في يوم كانوا ملتمات الكنات ...
وكلهم لاحظوا كيف تهاني متنرفزه من بعد ما زينب هزبتها قدامهم
ولأنها تهاني مقدرتش تبات فيها..
تهاني: انا منقدرش نسكت .. انا مش ملزومه نجي في كل لمه انتي تقريريها فاهمه!
زينب انصدمت: انا تتكلمي معاي هكي!! .. يا حقيره يا كلبه .. والله لما نوريك ..
زينب جت لتهاني وبدت تريش فيها..
وهما يحزوا تهاني دفت زينب .. وزينب جت طايحه..
كلهم انصدموا وبذات لما زينب انفجرت تبكي..
تهاني مع الدفه سبت سبه المفروض متنقالش .. بس اعصابها انفقدوا ..
كيف عزوزتها تضربها؟؟ كيف تتكلم معاها هكي!!
بس للأسف كله صار قدام إلياس اللي قرب من امه ..
زينب حضنت إلياس وهي تبكي: شفتها شن دارتلي .. شفتهاا اللي منسياتك فينا .. اللي ذاهبتلك شيرتك شفتها!!!
إلياس كان متعفلق وهلبا .. شاف جيهة تهاني اللي كانت تشوف لأمه بكره .. بس نظرتها ارتخت لما شافتله ...
متوقعتش إلياس يشوفلها هكي في يوم!
إلياس: كل شيء .. الا امي يا تهاني .. تجاوزتي حدودك هلبا المره هادي..
تهاني: هي اللي بدت .. هي اللي هجمت عليا انا ...
إلياس قطع عليها: اسكتي!! .. منبيش نسمع ولا حرف بري من وجهي..
تهاني: يعني انت واقف معاها هي مش انا توا!!!
إلياس باعد امه من عليه وقرب منها وهو قارن حواجبها..
إلياس: انتي فايقه ولا بلاش وعي .. انتي مديتي يدك على امي وسبيتيها .. فايييقه!!
تهاني رعشت من عياطه عليها .. بس حتى هي دفاته وبدت تعيط عليه..
تهاني: ادااافعلي على امك العوووجه .. حتى هي مددت يدها عليااا وانا مش غاللطه اللي يضربني نضربه واللي يسبني نسببه..
إلياس ابتسم بهزوه: والله؟؟
تهاني: ايي باش تعرف كيف تتعامل معاي في الجديد ..
