استغفر الله العظيم واتوب إليه
لا إله إلا الله وحده لاشريك له له الملك وله الحمد وهو على كل شيء قدير.
.
محمد خش على فرح اللي ردت عليه بعد ما طق الباب
فرح شافتله..
محمد: كويسه ولا؟؟
فرح: اي ..
محمد: قالولي نقالك مبطلش مكالمات.. رديتي؟
فرح: رديت على اخته .. وقالتلي راقد في العنايه .. احمد؟
محمد سند روحه على الحيط: لا .. خليل
فرح انصدمت: خليل؟؟
محمد: احكيلي يا فرح .. شن صايرلك .. انا مقصر معاك يا اختي وأن شاء الله تسامحيني..
فرح عيونها تعبوا دموع: لا .. انتم مش مقصرين .. انا ميحقليش نقوللكم شيء .. لأني تزوجته وانتم مش راضيين..
محمد: متقوليش كلام زي هكي .. انتي وضحيلي يا فرح شن صاير .. وانا بنحكم بعدين وبنعرف كيف نتصرف ..
فرح هزت براسها ونزلت عيونها ..
ردت بيها الذاكره للفتره هديكا ...
فرح كانت متحملتهم.. وهادي حاجه مش من عوايدها ..
هي تشوف كيف منير يحب امه .. ويحب خواته .. وخوته .. لذلك مدورتش لقطاتهم..
ولأنها قريبتهم.. ميتحشموش منها .. لا يرمولها في الكلام المسموم وهي ساكته
بس كرههم وحقدهم .. متوقعتاش يوصل لدرجة انهم يشوهوها.. يضربوها.. و يكيدولها..
سلفتها هادي .. دارت فيها شيء كبير...
كيف حصلت صورها؟؟ .. اكيده واخده نقالها ومركزه على رمزها وفاتحاته وباعته التصاوير لروحها.. وباعتتهم لواحد .. باش يخربلها بيتها..
محاولتش تبرر ل منير ... اصلا مخلاهاش تبرر..
للأسف فرح انحطت في موقف .. خلى منير يتأكد انها هكي هي ..
منير يعرف ل شن متعرضه هي في الماضي .. وبسهوله صدف انها هي اللي تبعت في تصاويرها! .. مش بنات حاقدات عليها ويبوا يخربولها سمعتها..
حكت لخوها كل شيء .. وخوها تفهمها ..
محمد: يعني منير .. مجاش قالك او سألك او حتى سمع لرايك؟
فرح تنهدت: الموضوع كان مأكد.. وميه في الميه .. عارف يا محمد .. بدت فيه من بداية زواجي .. طلعت تاخد في نقالي وتبعت في رسايل وتحدف فيهم .. والولد جابلهم المحادثات ك اثباث.. انت كان شفت .. كنت صدقتهم وكذبتني..
