استغفر الله العظيم واتوب إليه.
.
فتحيه: نهار اغبر هاده كلام ينقال هو .. والولد مخلي نقاله اهني ..
سلسبيل: خيره هكي هو .. علاش يعامل فيه هكي نبي نفهم .. شن المريض هاده .. يبي علاج راهو .. هناك انسان يكره ولده لهدرجه..
فتحيه سكتت شوي وقعدت تشوف للفراغ..
سلسبيل: نكلم واحد من خوتي يشوفوه؟
فتحيه: لا .. خليه بروحه .. علاش يعامل فيه هكي؟ .. بوك يخاف من عمران .. وميبيش عمران يطلع من طوعه.. هاده علاش يعامل فيه هكي..
سلسبيل استغربت وقعدت تشوف ل امها..
فتحيه: بعد اللي داره فيه من لما هو صغير لتوا .. بيقول كان يطلع من طوعي ويخدم مع خواله ويكون روحه بيقوى .. وبينتقم مني ..
سلسبيل: كيف ينتقم منه؟
فتحيه: بوك رغم انه يوضح انه واعر وديما يعارك .. يحساب التربيه هكي .. الا انه ميقدرش يعيش بلاكم كلكم .. مهووس بالعيله الكبيره .. هاده علاش كان يبي أمنه تقعد تحت طوعه ويمشيها كيف ما يبي..
سلسبيل منصدمه من كلام امها .. معمرهاش فكرت من الناحيه هادي ابدا..
سلسبيل: مهووس! .. يعني بوي مريض..
فتحيه: أدق شيء تقولي عنده عقد نفسيه .. زمان حناك مطلقه قريب اربعه سنين وقعد هو في حوش خواله مع خواته التنين .. وقعد ملطشه بين خواله ونساوينهم لين مشي لبوه وترجاه باش يرد امه وردها جدك .. بس اماليها شبه تبروا منها لما ردتله..
سلسبيل: ماما شن تقولي انتي .. وعلاش احني منعرفوش ب شيء زي هكي ..
فتحيه: حناك قالتهولي انا .. باش نتحمل بوكم .. وقلت مش ضروري نقوللكم ..
سلسبيل: صدمتيني.. بس مستحيل نعطف عليه .. المفروض كان يعامل عمران بطريقه خير منا كلنا دامه عايش نفس موقفه مش يرميه رمية كلاب..
فتحيه: اهوا سمعتي شن قال انتي .. وفهمتي علاش رامي عمران .. اسمعيني كويس يا سلسبيل .. وكانك تحبي خوك بجديات لازم تقتنعي بكلامي..
سلسبيل: شن؟
فتحيه: إسماعيل كذاب وكان في علاقه مع البنت اللي بيتزوجها .. ولازم تنسيه لأن عرسه بعد ثلاته اسابيع من توا ..
سلسبيل قعدت ساكته..
فتحيه: عارفه كويس وفاهمه شعورك .. بس بتتحملي.. الله غالب ربي اختبرك .. بتتخطيه .. وربي حايبعتلك اللي خير منه ..
سلسبيل: ماما اسكتي .. انتي متفهميش .. كلمني..
فتحيه: فيقي للواقع .. حتى خوتك قالوها قدامك انه مقايللهم انه علاقه هو وياها وليهم فتره .. يعني انتي كان يفوت فيك تفويت.. ويضحك عليك ..
