سجينة ابو غريب

البارت ٢

#سجينة_أبو_غريب

#البارت_الثاني

أجمل الأصوات ، صوت العائلة عندما يضحك الجميع في نفس اللحظة.

العائلة هي ملاذ في عالم بلا قلب، عائلتي وطن وأنا بدونهم غريب، السعادة الحقيقية هي الحصول على الكثير من الحب والرعاية والأسرة ،لا أحد يستطيع التخلص من هذه الرابطة ،أسعد اللحظات في حياتي هي قلة قليلة أمضيها في المنزل في أحضان عائلتي.
_____________________________

هيلين :
فتحت عيني على وسعها، باد حيلي، كعدت على الدرج بخيبة أمل ودموعي تنزل على خدي شهالورطه يا الله يارب خلصني من هشام، تقدمت اتجاههم وأنا أشوف بابا لازم هشام من قميصه وضربه كف، هشام رأساً وكع بابا يتكلم بغضب وهو لازم عمليته

_ يا حيوان ... يا عار على الرجال، شون تتجرأ تنهي على بنتي! أمشي أطلع برة، لو تموت لو تفلش راسك بالحياطين ما انطيك هيلين .

_عمي اررررشد ... ابنك بأي حق ينهي على بنتي؟ شلون يتجرأ ويحجي بيهج موضوع؟

رد جدو وهو يحاول يهدي بابا:
_يواشك بوية يواشك، هدي بنت ورادها .

رد بابا بصياح وعصبية:
_لو يموت ما أنطيها اله، لو يموووت ما يلوح أظفرها هالحقير، أنت عمي كل الزين تعرف ابنك شبي.

رد جدو أرشد بزعل:
_أفا عليك يبوية، تعير بمرضه! مشكور ما قصرت، يلا هشام أمشي نطلع.

طلعوا وبابا مامنعهم أبد ولا حاول يصالحهم؛ لأن هم هواي داسوا بالحجي، كعد بابا بتعب فتح ايده وصاحلي:

_تعالي بابا يروح، أبوج تعالي.
ركضت رميت نفسي بحضننة وأني أبجي، أتكلم بصوت شبة مكتوم

_بابا، أني آسفة كل هالشي صار بسببي تزاعلت أنت وجدو أرشد، وأنت ما عندك غير كل الصار بسببي.
مسح دموعي ورد علية بنبرة مليانة حنان:

_يبعد أبوج، شعندي غيرج أني، ماوكف بصفي ساند ابنه لهل سبب أنا ما صالحته، لا تخافين بابا ما راح أسمح لأي أحد يأذيج ولا يفرض رأيه عليج، مسحي دموعج حركتي كلبي.

بست راسه وحضنته حيل، حجيت ببكاء:
_ الله لا يحرمني منك بابا يا أحلى أب.

ردت ماما بتعب:
_كومي ماما كومي عن أبوج، كاعدة بحضنه لا تأذين عمليته.

تركتهم ورحت صعدت لغرفتي، بقيت للعصر ، نزلت جوا، سألت ياسين على ماما وسيرين كال:

_ طلعن للسوك...
استغربت أمس بالسوك! فجأة وإحنا نحجي حسيت الباب تكسر حتى ما لحكنه نفتح الباب، لحظات مثل رمشت الجفن  البيت مطوق بالأمريكان ملو البيت ووجهوا أسلحتهم علينا، واحد من عدهم جان شكله يخوف ضخم ومرعب، صرخ بينا بلغته الأميركية:

Surrender yourself without resistance

ما فهمنا عليه شي، بقينا مصدومين وممستوعبين اللي ديصير، علامات التعجب بينت على وجه بابا وياسين صوفر وبقى بس يباوع بعيونه، أني استغربت وعرفت الشي لماما خايفة منه صار رأساً صبت دموعي وياسين من شاف دموعي نزلت دموعه، بقيت متصنمة ومو فاهمة شنو جاي يصير، وليش صار شنو اللي ديصير شنو اللي ديحجو، حجا المترجم باللغة العربية الفصيحة:
_أرفعوا أيديكم، سلموا أنفسكم، إياكم أن تقاوموا، ارفعوا أيديكم.