سجينة ابو غريب

البارت ٤١

سجينة_أبو_غريب

#البارت_واحد_وأربعون_ألاخير

يعنبر ياتعب ظهري
زرعتك والشمس تلهب
يا أول حصد للروح
مدلل بالگلب تلعب

_ أنا يا غلطة عمر باكت لذة العشرين

جسمي تصلب من نظرته
آخر شخص كنت اتوقع اشوفةه نصدمت من صار گبال عيوني باللحظة الوحدة صار برأسي كومة اسئلة
شجابه؟
شوصلة إلي؟
شلون اندلني؟
معقول هذيچ الفترة كُلها طيفة مرافقني وهسة صار گدامي حقيقي

اللحظة وهمت نفسي انو هذا حلم وانو بعدني نايمة هذا هم طيف مو حقيقي
صرت افتح بعيوني واسدهم قوي
بدون وعي مني شلت اگلاص المي يمي شمرته على وجهي ودنگت راسي أمسح وجهي بردن تراكي شلت راسي بطئ اريد أتأكد

اي اي هذا قسور لا هذا مو طيف هذا حقيقي واگف
الگاع حسيتها صارت تتحرك من جواي ما ثابتة ورجفة انتابت كل جسمي
گلبي صار مو يدگ ٧٢ بالدقيقة لا وانما طبل ويدگ بصدري عيوني غوشت وصوت وشة بأذني ومن بعدها مادريت بنفسي

سيرين: هيلين شافت قسور واغمى عليها انجنينا كلنا تجمعنا يمها ونحاول نصحيها جبت مي رش قسور على وجهها الماي شووي شوي وبدت تصحصح

وماوعيت غير اني بالصالةمتجمعين علية
افتح عيوني بصعوبة وأمي وسيرين يمي

سيرين، صحت صحت هيلين هيلين حبيبتي تسمعيني

حجيت بثكل قسور قسور
انتبهت اجه وكف گدامي مبتسم وگال

قسور: هيلين تسمعيني أنتِ بخير؟
ياروح قسور هاي اني يمچ.

التفتت واني اتوسل نظراتي تكذب الراح هل المنظر هنا هنا حسيت روحي ركضت قبل رجلي

رفعت ايدي باتجاها لكن مسرع ما تراجعت من انتبهت لنفسي بدون حجاب
گعدت فورًا عدلت نفسي وصحت سيرين حجاب حجاب ركضت سيرين جابتلي حجاب خليته على راسي وقسور گعد گبالي

نزل قسور رأسه وعيونه من يمي، موقف يعني يصدم أنا وماما بس نباوع وسيرين عادية وكأنها تعرفه من سنين

گعدت بصعوبة احس الدوخة بعدها بية
واباوع باستغراب عليه واحاچي نفسي شنو إلي جاي يصير قسور شلون أجه هنا

سألت بخجل من أفعالي القديمة
_ شلون أجيت هنا منين ندليت وليش جاي

قسور: اوگفي وحدة وحدة وسبحان مغير الأحوال تغيرت هيأتچ بس بقيتي أم السان متر

هيلين: الإنسان الظروف تجبره يتغير بس گُلي وين عرفت احنا بالعراق

قسور : عندي تكسي اشتغل بيها على باب الله بيام اجازتي مريت من يم بيتكم القديم الي تاركين عليه قطعة للبيع ورقم

هيلين: بس القطعة للبيع أحنا ما كاتبين عليها عنوان بيتنه هذا بس رقم

قسور: اني اخذت الرقم واتصلت عليه وطلعت الي سيرين وبعد عذاب شهر وحچي وياها انطتني العنوان