ماريان_ Mariana
تحت عرش الجحيم
___________________________________________
ابو شاهين:- اسراء وتالي وي ولدج شلون يعني الحد ما يموتوني وخلص
ام شاهين:- اذكر الله يارجال كلشي ينحل بالتفاهم العصبيه ماتفيد
منين يجي التفاهم من سراج اليهوبز عليه لو من جياد الطكه ونص منين تلكاها
شسوي مادكلي جياد هم اريد اصعد وحجي ويا يشوف حل الهاي السالفه
حليش شو هم ماتعرفين تحجين انت البنيه دخيله عدنه تردين نطلعها على حساب استاذ سراج والله مامرتاح الوجود البنيه هيه هسه يمه بكربا بس ابنج متعارض
خلي يولي يريد يروح يكعد بيت شاهين الحد ما ترجع البنيه البيت اهلها
بعد مادري حجيت ويا واذا لعب بذيله يصير غير تصرف وصلي الحجي هذه السراج وفرشيلي فراش اريد انام
ان شاءلله ماتريد عصير برتقال
لا كلشي ماريد بس خلوني انام ساعه والبنيه شلون صارت
خطيه شوي زينه سويت عصير الها وهل راح اصعد الها
خوش
سمر:- روايه العصر مرت اخوي راح تجي عادي تتعرف عليج
روايه:- رديت عليها ببتسامه خفيفه اي عادي
والله بس شوفينهه ماتنملين منها كلش حبابه تصير بنت خالتي هيه
اها الله يخليها الكم
ويخليج النه يارب
ام شاهين:- ها بنيات كاعدات
هلا يمه تعاي
هذه العصير وهاي نساتل اكلن ونامن
روايه:- خاله ليش تعبتي روحج والله ماشتهي
لا يمه تعبيش هنه برتقالات خلطتهن بالخلاط وجبتهن شربي حبيبتي بالعافيه نازله جوه
روايه:- رحم الله والديج خاله تعبتج وياي
فدوه الحلكج تعبج راحه حبيبتي سمر يمه خاف يصير شي لا سمح الله بس اتصلي علي وصعد الجن
سمر:- نريدج سالمه عمري
نزلت ام شاهين وجت سمر حطت العصير والنساتل كدامي
يلا اكلي لا تفهين والله فاهيه
مو فاهيه بس ماشتهي
وعادي تخلين تعب امي يروح هيج مو هاي الخلطتلج والسوتلج العصير هيج عادي عندج
هههه راح اشرب بسج جنج وحده تريد تبجي
يلا سباعيه روايه شطوره
كعدت شربت العصير بقت تصيح كله شربي
يلا عفيه عفيه معدله روايه
بقت تصفك لان شربت الكلاص كله مره وحده هههههه شبيج حسستيني طفله
جا شني على كبرج على كوله امي فروج بعدج مال دجاج
هههههه ذكرتيني ب ام حمزه
يبوو ام حمزه فد مره معدله من تجينه ثابت وياها الحليب والخاثر والجبن
روايه:- من ذكرتها عيوني دمعن اموت عليها وماتقبل اصيح الها خاله كله بيبي وسميني رويبه
ياااا ههههه عود روايه
ههههه اي كله رويبه بس من تصير عصبيه لو فد موضوع مهم دكول روايه
هههههههه صدك ضحكتيني يلا تنامين راح اكعد ادرس عندي باجر محاضره مهمه
لا مامنعسه خليني كاعده
خوش براحتج
روايه:- طلعت سمر ملازمها واوراق وكعدت بالكاع تدرس كعدت يمها كله تكتب نلكيزي ورموز لفت نضري قلب اصطناعي يمها والشرايين وهاي كله جنه حقيقي بقيت اباوع علي
سمر:- هذه عجبني وشتريته من اني بالسادس صارله تقريبا 4سنين عندي
هواي وانت هسه يامرحله
اني هسه مرحله رابعه بعدلي مرحلتين وتخرج
ان شاءلله تتخرجين وحضر تخرجج
اكيد تجين غير اموتج اذا ماجيتي
ههههه
مر الوقت وصار العصر كلش شدلتي الكانيوله وضربتني الابره بقيت ابجي منها مدري مو منها بس نحصرت بجيه
وسمر تسكت بيها وتحلف بعد ماتضربني بس ماقبلت خليتها تكملها يلل طلعت سمر تكعد جياد للدوام وام شاهين صعدت تشوفني
ها خاله صرتي زينه
الحمدلله
ماتنزلين وياي
بقيت كاعده بمكاني ها عيب خاف الولد يشوفوني
لا يمه نصهم نايمين وبس جياد وهل راح يروح للدوام
خوش بس البس شالي
البسج اني
اكدر البس هاي شوي ايدي احسن من الثانيه
ان شاءلله تصيرين احسن
لبست الشال وطلعت وياها نزلنا جوه
ام شاهين:- نكعد بالحديقه احسن من البيت خنكه
بكيفج خاله
طلعنا بره الحديقه تصير بصف البيت كلش جبيره وبنصها مرجوحه كلش جبيره وكراسي خشب وطبلات صدك المكان يفتح النفس والورد الوان بقيت افتر وباوع ع الورد
ام شاهين:- ها حلوه هههههه
كلش تجنن حديقتكم
هذه عمج ابو شاهين نهار كله معتني بيها روحي شوي بعد وشوفي الشجر مال الرارنج
مشيت مسافه وشوف شجر مال رارنج شكلهن يخبل صحت خاله عادي اخذ وحده
ردت علي اي خاله اخذي عشره ميه هههه
خذت وحده ورجعت كعدت يمها
جيبي اكشرها الج
نطيتها كشرتها
هاي الشتلات ام حمزه جابتهن النه وعمج زرعهن
كلش حلوه بيتنه هم بي حديقه بس هسه ماتت
جرت حسره وحجت ان شاءلله خاله ترجعين وتزرعينها بيدج وتصير حلوه مثلج
مارجع خاله كلشي تغير بس يهدء الوضع عمو جياد كال يرجعني للعماره بس ارجع الخالتي ماروح البيت عمي
اي لا ترحين مامجبوره روحي الخالتج وعيشي عدها
اسئلج سؤال خاله
كولي يمه جواب
لحم ابن ادم ثكيل مو صح
صحيح
فه حته، بيت خالتي راح مايتحملوني راح يطلعون بيه الف سالفه
لا يمه لا دكولين هيج عمر لحم الاضفر ماطلع من صاحبه وانت الصار وياج مو هين وبسبب ابن عمج مو من ذاتج حته مايردونج
خاله كرايبي وعرفهم كلهم خبيثين واني بس ارجع البيت اهلي ابيعه وطلع بغير مكان
وتكعدين وحدج هذه مو حل تبقين عدنه وحالج من حال سمر
ماتقصرين خاله بس ابقه غريبه مو الكل يستقبلني ذاك من ذاك وانتم ناس خيره قله ما ندر الكه نفسكم ونفس طيبتكم
هاي غريبه حطيها بماي وشربيها وانت شعليج بالراح والرجع ابقي يمي واريد واحد يكرب صوبج شوفي يمه خاف تسمعين
روايه:- رادت تكمل حجيها وجه جياد
سلام عليكم
ردينه علي وعليكم السلام
شعجب شو كاعدين هنا
ام شاهين:- ضوجه كلنه خلي نطلع بره بالحديقه
اي زين تسوون يمه طالع للدوام ماوصيج
محروس بأسم الله يمه
بويه روايه خاف تحتاجين شي امي يمج
ماتقصر مشكور
يلا فيما الله
الله وياك
لبس نضارات شمسيه باوع عليه اخر مره وطلع
مادري ليش خفت ونعصر كلبي اجت سمر بيدها صينيه جاي وبسكت
يلا عيني جاي حار وبسكت وبابه جاي وراي
كعدت وقدمت الجاي والبسكت شوي واجه ابو شاهين
ها سلام عليكم
الكل وعليكم السلام
ردت اكوم بس ستحيت بقيت كاعده بس مامرتاحه بمكاني كلش
شلونج عمو
الحمدلله عمو زينه
يالله راح جياد
ام شاهين:-اي هسه طلع
شو كاعدين هنا شعجب مو بارده
ام شاهين:- شوي دافيه اليوم حلو الجو ختنكنه من البيت
ناوشيني ستكين جاي بويه سمر
اي تدلل
روايه:- ردت اكوم وصاح ابو شاهين
كعدي عمي لا تستحين اريد احجي وياج
رديت علي بابتسامه خفيفه كول عمو
شوفي عمي الصار اله حكمه بيها ربج مو صح
صح
وانت هنا كاعده هذه بيتج ولا تستحين هاي امج وهاي اختج وذولاك اخوانج وشتردين انه حاضر شتعتبريني عتبريني
ابو شاهين يحجي واني بقيت ابجي بسكته وسمر لازمه ايدي تسكت بيه
الاريده منج ماتتقيدين ولا تعتبرين روحج بيت غربه خوش عمي
من بين غصاتي والحركه البكلبي رديت علي عمو ماتقصر الله يحفظك ويجعله ثواب بالجنه الك موقفكم هذه مانسي طول عمري
واجب هذه بويه وبعد ماوصيج وان شاءلله تسمعين كلمتي وماتتقيدين واي شي تحتاجينه ام شاهين موجوده مايردج اله السانج
رحم الله والديك عمو ماتقصر لا انت ولا خاله
تدللين عمي
ام شاهين:- اي ليش ماترحن تسون عشه فد شي
اي يمه راح اروح بس اسوي المقبلات وابوي خلي يطلب عشه النه مابيه حيل اسوي
ابو شاهين:- انه خوك چا خربنه
عادي بابه بس هل مره
يلا تدللون شتردون
بكيفك المهم يرهم وي مقبلاتي
خوش
سحبتني سمر من ايدي وكمت وياها دخلنه جوه
شوفي راح اسوي مقبلات تاكلين ايدج وراهن
يلا اشوف ابداعاتج
هسه شوفين عيني وحق الله الياخذني مايخسر اشبعه مقبلات
جا انت بس مقبلات تعرفين
لا اعرف بتيته شوي بتيته سلك بتيته حمس
بس ذني هههههههه
لا لا هههههه اشاقه وياج عيني كلشي اعرف
معدله اني هم كلشي اعرف بس خبز ماعرف
خيه كلنه هيج نصير بيت الرجال ونعرف
هههههه اي
طلعت شغلات المقبلات سمر من الثلاجه والخلاط جهزتن وكعدت تثرم بالمطبخ كعدت كبالها
ثرمت وكملت وراها جهزت الحمص بطحينه انوب الباذنجانيه وبابه غنوج
اكلج اسوي بعد
مو احس صارن هواي
خاف مايكفي بيت شاهين راح يجون
كافي هواي واذا ماتقتنعين بكيفج
جان سويت فته بس مالحك
اكلج اني اريد اصعد ابدل هاي دشداشتي توسخت
روحي راح احط ذني بالثلاجه وصعد
خوش عفتها ترتب بالمطبخ وصعدت فوك صادفني ادم طالع، من الحمام والخوالي على راسه وبس بالشورت شصار بيه بقيت جامده بمكاني مادري وين اودي وجهي ركضت للغرفه مالت سمر وهوه هم رتبك ضل بس يتلفت
دخلت وقفلت الباب وكلبي يدك سريع بقيت ابجي من الفشله مسحت دموعي ورحت للكنتور الي من جهه الحايط طلعت جنطتي خذت تراك اسود عريض جايبته الي فاطمه التشيرت يصير جوه الركبه بدلت ملابسي ولفيت شالي عدل جريت العلاكه الي جايبتها فاطمه مادري شنو بيها فتحتها بيها حلويات وفوطات وخاولي وشامبو وكل الشغلات الاحتاجها وحته عطورات ثنين وركسونه حطيتهن بالكاع وبقيت ابجي طك كلبي عليها يعني حته بهاي ماناسيتني مخليتلي كلشي احتاجه كمت فتحت التلفون جاي اتصل عليها وتصلت علي بسرعه فتحت الاتصال
روايه كلبي شلونج شخبارج
رديت عليها واني ابجي زينه
شبيج تبجين منو وياج
محد بس شتاقيتلج
سوده عليه حته اني والله الضهر شبعت بجي
بقيت ابجي وهيه تبجي وياي
هسه شلون اسكتج لو ابجي وياج كليلي مرتاحه محتاجه شي
اي محتاجتج اريد ابقه يمج
سوده عليه شبيدي عليج
هسه فتحت العلاكه وشفتج كلشي مخليتلي نطيت من البجي والله
ياروحي لا تبجين مو زين عليج
يعني والله فاطمه ماترحين من بالي وياي بكل دقيقه
حته اني وداعت عيونج الحلوه كل شي وجيت طاريج امس دخل حمزه للغرفه شافني ابجي تخبل ولله بس مايكدر يجيبني الكم بقه دخن جكاير
ذبيت حسره وحجيت الله كريم ان شآء لله نلتقي مره ثانيه
ان شاءلله
بيبي شلونها مشتاقتلها
زينه انزل جوه تحجين وياها
لا يروحي شينزلج خليها غير مره احجي وياها
خوش وبيت اهل جياد شلونهم وياج
كلهم زينين ناس حبابين بس استحي منهم كلش والله
جا شسوين خيه تفرج ماتبقه هيج
ان شاءلله واني احجي وي فاطمه دخلت سمر شافتني احجي بالتلفون رادت تطلع اشرتلها تبقه
شوي وسديت التلفون
ها حبيبتي صعدت كلت تنزلين اجو بيت اخوي
جنت احجي وي فاطمه اكلج سمر استحي انزل والله
هههه ولج شنو جاي يخطبونج سلمي وصعدي
لا والله ماكدر استحي وبعدين سمر حته لو شفت بيت اخوج شنو راح دكليلهم بنيه مخطوفه وساعدناها منو راح يصدك
بقت ساكته ماردت علي جرت نفس وحجت هاهيه حبيبتي ماجبرج
فدوه لا جيبين طاري الي كدام بيت اخوج خاف أسبب مشاكل الاخوج
ولج شبيج خايفه هاهيه راح اوصي امي وابوي ومايكون خاطرج اله طيب
اي عفيه ولله كوه كاعده على اعصابي
لا تحجين هيج من صدك تخليني ازعل منج
بتسمت هاهيه بعد ماحجي
يلا نازله شوي وصعد
براحتج
كمت لميت العلاكه والجنطه حطيتهم بالكنتور شلت دشداشتي خليتها على صفحه وقفلت الباب خاف تصعد البنيه بقيت كاعد ع الجربايه فتحت التلفون ردت انزل الفيس اشوف صفحه زينب بس شبكه ماكو باوعت ع الساعة صارت بثمانيه واني بعدني مامصليه شوي وندك الباب كمت تقربت يم الباب صحت منو
اني سمر فتحي الباب
___________________________________________
قراءة ممتعه لا تنسون التصويت
ماريان_ Mariana
أنت تقرأ
تحت عرش الجحيم
General Fictionبين عثرات الحياة هنالك بنت تحارب العيش في وسط مجتمع لا يرحم وتقاتل العيش دون استسلام الماضي شبح والمستقبل حلم وكل ما نملكه هو حاضرنا نشعر جميعاً بالضياع من وقت لاخر ولاكن علينا اخذ الوقت الكافي اجلاً او عاجلاً لتمكن من تقرير الاتجاه الذي تذهب إليه...
