ماريان_ Mariana
تحت عرش الجحيم
ما تراه مني أنت من أخترت أن تراه
___________________________________________
روايه:- ستوني سديت الماي ودخل ابو شاهين ويا ابنه سراج ستحيت بقيت واكفه بمكاني وعدل بشالي خاف طالع مني شي شمرت التكي من ايدي
سلموا عليه سراج فات جوه وابو شاهين وكف
ابو شاهين:- سلام عليكم
وعليكم السلام شلونك عمو
الحمدلله عمو انت شلونج
زينه على الله
اليوم ام شاهين كربتج
لا هههه خطيه بالعكس تونست وياها
يالله ان شاءلله دوم نفسيتج مرتاحه
رحم الله والديك عمو
والديج بويه اذا كملتي دخلي جوه بارده
اي لفيت الصونده رجعتها بمكانها ودخلت جوه كبل صعدت فوك توضت وغسلت اديه ودخلت للغرفه صليت وكملت شفت قرآن ع الميز اخذته وكعدت أقرأه سوره يس بثواب اهلي واني اقرأ دموعي ضلت تصب لا ثواب مسويه الهم لا خميس ذاكرتهم بي غير بس سوره الفاتحه الله لا ينطيك عدنان كل دماري بسببك كملت السوره تصدقت ودخلت سمر
هلااا ياحلو يا مشمش
هههه هلا بيج سمر
شلونج عيني لج شنووو هاي اليوم امي دكول سوت سوالف يابو سوالف
فتحت عيوني ع وسعهم اني شسويت
لج شبيج بكتي هوه هههههه مسويه زلاطه ومركه فاصوليه وهالله هالله
ولج الي يسمعج يكول مسويه مفطح
وشنو يعني ذني مو نعمه
لا هههههه نعمه بس مايحتاج كل هل مدح
امداج جا ابقي محد يحمد بيج
ههههه عادي كلشي منج حلو اي اليوم شكو ماكو بالكليه
والله جاوبت امتحان عملي عدنه تشريح وكذا
اييع
لا بالعكس حلو يعلموج شلون تخيطين وهاي ابدل وننزل نتغده وراويج المقطع صورت
خوش
نزعت الجادر ولبست شالي فتحت تلفوني راسلت فاطمه راح بس صح واحد ماعدها نت يمكن
نتضرت سمر تطلع من الحمام حته ننزل جوه
كملت ونزلنا كبل رحت للمطبخ واني مدنكه استحي ارفع راسي ام شاهين ماكو بالمطبخ طلعت الزلاطه خليت فوكاها الرمان والخلطه الي سويتها وسمر تفتح بالجدوره تشوف شنو الطبخ
لج شنو هاااااي ام الرير ماتوقعتج هيج
هاا شسويت
طبخ كلش كلش نايس
هههه عافيات
بعد شيفكج من سراج المركه الي يحبها ضابطتها
منو اخوج
ايي ولج
عادي يدلل هههههه
ام شاهين:- يلا بنات صبوا الغده الجماعه جوعانين
اي يمه روحي بعد احنه نحضر الغده
روايه:- حضرنا الغده ودخل ادم يدردم ويحجي شلون الغده باميه
ادم:- وانت ست سمر فرحانه اليوم باميه شني هل لعبان نفس هذه
اكلك لا تبقه تصيح وتحجي ترا فاصوليه مسوين
اي فاچوليه (يعيب عليها)
ترا ستحي شوي هنا روايه
روايه:- يتعارك وي سمر ونسه اني واكفه بقيت بس اباوع عليم وبتسم
ها خويه العفو نسيت بس امي واختي ماخلن عقل براسي سون باميه ويدرن بيه اكرها واحد يجي تعبان يشوف هيج خبر شتردين يبقه عقل
رديت علي لا حقك
ها شوفي حته البنيه دكول حقك
سمر:- ولك الفاصوليه روايه مسويتها وتخبل
حشه ماكول بوجهج بس خاف هم تطلع ماي حار ومعجون هههه
لا خويه اكلها وحكم
يلا نشوف بعد هههههه
حضرنا الغده الصينيه حطتها سمر ع الكاونتر وجه ادم شالها وشالت صينيتنا خلتها بالهول رحت وره سمر كعدنا تغدينه وسمر تاكل وتصيح شهل اكل الطيب
ولج كافي هواي حمدتي بالمركه اكلي وسكتي
جا طاح حضج مو صوجج صوج اليحمد بيج
عادي بس سكتي
شنو عيني زعجتج بصوتي
لا ابد اصلا صوتج راحه نفسيه
اممم احاول اصدك هههه
صدكي صدكي
كملنا الغده شلت الصينيه اني كبل رحت للمطبخ وسمر راحت تشوف اهلها مكملين لو بعدهم
عزلت المطبخ وخليت الماعين الي اكلنه بيهن ع السنك فتحت الماي ع الجلاف وجت سمر
هاي شنو منو كلج توكفين ع السنك
اني كلت الروحي اوكفي
دوخري بابه ايدج الكانيوله لا تأوت
مأتاوت
اوو شلون تريد ادفرها وخري
بقيت اني الح وهيه تلح اله اوخر تالي غزلت الماعين وهيه تجلف ماقبلت اعزلهن واني اصلا ماندل مكانهن وين بقيت واكفه يمها الحد ما عزلتهن ورتبت المطبخ صعدنا فوك للغرفه سمر تمددت ع الجربايه واني بالكاع خليت مخده ونتجيت عليها وبحضني التلفون
سمر شعجب اهلج وره الغده مايشربون جاي
العصر يشربون ليش تردين جاي اسويلج
لا ولج بس اكول لان احنه اهلي الله يرحمهم يشربون كله وره الوجبات
هنا اني مرتاحه من هل قوانه الصبح يشربون والعصر وبالليل حسب نوع الأكل مو دائماً بس جياد يمه يا جياد نطي جاي اربع كلاصات خمسه
اعع اهواي يشرب
اي كلش جكاير وجاي ويمته ماتجي نار اعصاب مره صارت مشكله ويا بالدوام وخطيه ستوه نازل وخابروا يردوا يرجع بوقتها جان يداوم بتكريت ولعب لعب بالتلفون الصياح والغلط واني ردت اهدي الوضع ركضت سويت عصير ليمون ترسته ثلج ودكيت الباب عود نطيته اله كلت يشربه بلكت يبرد
اي
خيبه وماحس اله كسر الكلاص وكام الفشار والغلط بالتلفون يتراكع اريد اندل دربي ماكو
هههههه خطيه شصار بيج
شصار فلتت للغرفه بعد ولا طلعت الحد ما صاح عليه لميت الكزاز ورجع علي يكلي اني بركان منفجر وانت جايبتلي عصير ردت اشمره بخلقتج اله شوي
يااا فوك ماسويتي اله هيج يكلج
ولج هوه كلامه هم صح بس اني هم خطيه
ههههه حيرتيني ولج ساعه خطيه ساعه كلامه صح
الطرفين خطيه
اي صحيح ههههه نامي خيه تعبانه من الدوام
اي والله راح انام شوي وكعديني وانت اذا هاي نامي
اشوف فاطمه شو ماكو اليوم ونام
براحتج حبيبتي
نامت سمر وتصلت على فاطمه ماكو يتصل ويفصل ضل بالي يمها الرسائل ماشايفتهن انوب لا عندي رقم واحد من اهلها بقيت افتر بالغرفه اجت ابالي افكار كلت خاف خطفوها خاف كتلوهم الف فكره عوجه اجت ابالي بقيت كاعده اكلب بالفيس ادور ع زينب هم ماكو خذاني الوكت باوعت الساعة بالخمسه كلبي نمرد ماتحملت لبست شالي ونزلت اشوف بلكت ام شاهين كاعده بلكت عدها رقم حمزه جابر باوعت ماكو بالصاله دخلت للمطبخ ماكو سمعت صوت من باب الديوانيه جاي باوعت كاعده ام شاهين والولد وابو شاهين
تعاي يمه ليش واكفه بالباب
ها خاله مساء الخير
الكل مساء النور
شبيج محتاجه شي
خاله تكدرين تجين شوي
اي يمه تدللين
انتظرتها تطلع بقيت بالصاله شوي وجت
ها يمه قلقتيني شصاير
خاله فدوه ماعندج رقم واحد من اهل حمزه جاي اتصل ع فاطمة ماكو
هسه اشوفلج الولد لا تخافين ان شاءلله ماكو شي
فدوه خاله شوفيها الي كلبي نمرد عليها من الصبح الهسه اتصل وماكو
لا تخافين تدللين هسه اشوفهم
راحت ام شاهين للديوانيه بقيت كاعده ع حافه الدرج وهز برجلي من كد التوتر
ها روايه هاج تلفون عمج حمزه ع الخط احجي ويا
كمت خذت التلفون سلام عليكم
وعليكم السلام شلونج خويه
الحمدلله شو اتصل على فاطمه ماكو
ها فاطمه تلفونها طاح بالماي
ليش ماتتصل منك علي كلبي يمها فدوه خل احجي وياها
هسه مشغوله من تفرغ تحجي وياج
بس احجي وياها شوي
ماتكدر مشغوله من تفرغ اخليها تخابرج
دمعن عيوني وفشلت من كلامه تمام الله وياك
هلا بيج خويه
سديت التلفون وكعدت ع الدرج ابجي
يااا يمه شبيج شكلج ليش تبجين
خاله حته فاطمه بعد ماتريدني
شنو ليش ماتريدج
اناشغ وحجي خاله كتله بس احجي وياها يكلي مشغوله تفرغ وتحاجيج والله كلبي يكلي صاير شي مو من فراغ هيج تتغير عليه البنيه وعدتني ماتفاركني ومن اول خطوه هيج سوت
اسم الله يمه لا تبجين الله لا يكولها يجوز صاير شي يجوز صدك ملتهيه تفرغ وتحجي وياج ان شاءلله مابيها شي لا تخافين مسحي دموعج وكومي غسلي وجهج
جرتني من ايدي كمت غسلت وجهي ورجعت كعدت بالصاله نزلت سمر تباوع مستغربه
شصاير شبيهن عيونج حمر
مارديت عليها
ام شاهين:- خابرت على فاطمه چنت ام حمزه وماكو انوب حجت وي حمزه كلتله وين فاطمه كلها تلفونها طاح بالحمام رادت تحجي وياها يكلها مشغوله من تفرغ تحجي وياج
شدعوه علي جان خلها تحجي وياها
ردت عليه بخزره امي يجوز مريضه يجوز صدك ملتهيه شني فرخ جهال حمزه ويجذب
بعد الله اعلم يلا حب وانت صغيره تبجين تفرغ وتحجي وياج وحضري روحج حته اضربج ابره
روايه:- مو كلتي بالليل
مابقه شي وتضربيها هيه اخر وحده ضربيها وخلصي منها
اي بس توجع
جرت نفس وحجت تحملي عمري جا شسوين
ام شاهين:- اذا زينه خلي تولي غلسي منها
ياا يمه تحجين صدك شتغلس منها غير علاج كامل
بعد اندري غير اذا زينه تعوفه
لا مايصير تكمله احسن
روايه:- بقينا كاعدين شوي. وصار المغرب الولد طلعوا بقه بس ابو شاهين كاعد بالغرفه يقراءة قران وسمر كاعده دكلب بتلفونها وام شاهين تسبح بالسبحه صار الصلاة وكمنا صلينه ورها العشه محد راد لليل يلا كلمن طلب شغله طلبت سمر النه بيتزا وصاج وبيبسي اكلنا وضربتني الابره ونص ساعه وشلعتها حسيت نفسي تحررت ومر اليوم كلش ثكيل عليه بقيت ادكلب بفراشي مايجيني نوم باوعت تلفون سمر الشاشه تشتغل وتطفه رجعت المكاني انوب هم رجعت مره ثانيه وثالثه كمت شفت منو لان سمر نايمه ومسويته صامت باوعت مكتوب الجياد الغالي ويمه صكر ردت اندها خاف يريدها ضروري انوب تراجعت كلت خطيه نايمه هسه يمل ويروح جاي ارجع التلفون وجت رساله سمر اذا كاعده جاوبيني ضروري
عفت التلفون ع الميز رجعت وهم اتصل تأفئفت وكمت فتحت خط وبس انفاسي تنسمع
الوو
مارديت
هاي شبيج سمر شنو نايمه شكد اتصلت
كوه الحرف يطلع من حلكي ها سسمر نايمه
روايه... شلونج شخبارج
الحمدلله زينه
صحتج شلونها
زينه
شعندج كاعده الهسه
مايجيني نوم
ليش بيج شي يوجعج
لا بس ماكدر انام
محتاجه شي
اي
كولي
يمته تلكه بيت عمي
جر نفس قوي وحجه جاي ادور ان شاءلله الكاهم
جياد عوفني اروح الخالتي
خالتج تندلين مكانها
اي اندله
تمام ارجع وان شاءلله اخذج الها بس ليش العيشه وي اهلي مو مريحه!!
لا بالعكس ناس كلش حبابين بس اني ماتحمل جاي اتقيد احس نفسي ثكيله عليكم
لا مو ثكيله جنج ريش لو فيل جا كلت صدك ثكيله
ههههه لا مو هيج بس والله خلي نفسك بمكاني
فاهمج بويه ان شاءلله جم يوم ارجع ويصير خير
ان شاءلله
وهسه اقري الفاتحه ال ام البنين ونامي لا تبقين تفكرين السهر موزين عليج
اي تصبح على خير
هلا بيج وانت من اهل الخير راويتي
سديت التلفون واني صافنه كال روايتي لو مشتبهه نمت بفراشي وصفن شنو صح كال هيج لو غلطانه وليش هيج يكول هزيت راسي لا تتخيلين روايته شنو من بعد معانات يلا نمت
كعدت الصبح سمر ماكو الساعة بالعشره هواي نايمه فزيت خذت تراك من ملابسي ودخلت سبحت وطلعت مشطت ضفيره وخليت عطر لبست الشال ونزلت سمعت صوت مره غريبه بالبيت ردت ارجع اصعد وطلعت بوجهي ثنين نسوان وام شاهين من المطبخ بقيت بمكاني واكفه
ام، شاهين:- هههه صباح الخير خاله
رديت عليها صباح النور
هاي بنت اختي جانت بالخارج وهسه اجت
ردت علي المره شلونج خاله
الحمدلله
فدوه شو ماتشبهكم
اي تشبه ابوها اهواي
ربي يحفضها شحلاتها دكول غزال
هههه فدوه الكلبج خيه ام ياسر
بقت تسولف وي خالتي والبنيه الي وياها تباوع عليه من فوك الي جوه لازمه بيدها عبايه ولابسه دشداشه كلش ضيكه لونها وردي والكحل خاطه عيونها بي
ام ياسر:- شعجب اجت عدكم هل بنيه
خيه سالفه طويله علاقتها مو قويه وي اهلها وماتحب احد يحجي بهيج طاري فه اجت عدنا
اها الله يستر عليها
خاله حبيبتي روحي للمطبخ تريكي
بتسمت الها ورحت للمطبخ شغلت العين ع الجاي ودخلت ام الوردي
هلاو
رديت عليها هلاو
شنو اسمج
ليش
شنو ليش ميصير اتعرف عليج هسه اني اسمي رنا
كل الهلا بيج واني اسمي روايه
واو فديت اسمج حلو
شكرا عيني
امممم صارلج شكد هنا
اتوقع مامجبوره ارد ع هيج سؤال
لا هههه شبيج عيني فهمتيني غلط بس هيج اسئل
اها
اييي شنو درسين لا
اي ادرس
حلو حرامات اني مقبلت مامي ادرس ضليت اطرك وياها بالبيوت
شنو يعني شسون بالبيت
نطك اصبع
رفعت حاجبي بمعنى ماعجبني ردها
شبيج خيه ع العيشه نضف البيت ونخبز
ابد مارتاحيت الها بقيت اسايرها بالحجي وسؤال ارد وسؤال لا
يلا عيوني ماما تصيح ان شاءلله نتشاوف هواي كلش حبيتج
هههه كل الهلا بيج طلعت وتنفست بقوى شنو هاي لزكه صبيت جاي وخبز وجبن حطيتهن ع الميز وجريت الكرسي كعدت اكل ودخلت ام شاهين
ها خاله جاي تتريكين بالعافيه
الله يعافيج حبيبتي
هاي ام ياسر الكتلج عليها
اها بس خاله هاي بتها ماتنهضم
هههههههه فلشج جنج سمر هم ماطيقها شو اشوفها حبابه مالها صوت
اني اول مره اشوفها بس اهواي تدخل ليش لابسه اسود ويا دولة جنتي بيها خليتيني خاله اجذب وكلها جنت بكندا كاعده واني بغداد ماشايفتها
هههههههههه فلشج جا شسوي غير سميره تهد عليه كلتلي والله اذا حجيتي الاحد ع روايه ماتقبل احد يدري
صح خاله بس بعد مشت الجذبه شنسوي هههههه
ههههههه يمه موتيني ضحك فلش السانج
دوم خاله حبيبتي هههه
بعد كلبي
شنو رادت هاي المره
خطيه خابرتها كتلها تعاي عندي جم شغله الج نطيتها القاسمه الله تجيب غده الها والبنيتها
شعجب ماعدهن معين
بس ياسر ومايجي دائماً كلش كلش مره بالشهر
خطيه ليش عايفهن هيج وحدهن
يمه يروح بعيد يشتغل مادري ب يا مكان يجي ينطيهن فلوس وملابس واكل بس مايقبه وياهن شنو يشتغل ماندري الله اعلم بس ام ياسر من النوع الصرافه ع رنا ماتخلي شي بنفس بتها وايجار البيت يادوب يكفيهن وحبوب سكر خطيه
الله يكون بعونهم خطيه والله انقهر ع هيج ناس
الحمدلله والشكر
اني خاله بس ارجع ادرس وتخرج وتعين امنيتي يصير عندي مبلغ مالي ابقه كل شهر اوزع للفقره
ياعيني ان شاءلله تحققين الي بالج وجبرين كسرج واهلج
رديت عليها بابتسامه ممزوجه بحزن ان شاءلله خاله
كملت ريوك غسلت الكلاص والماعين الي ع السنك
ام شاهين:- امس ابو شاهين والولد يحمدون بمركتج وادم تخبل ع زلاطتج
ههههه بالعافيه
ابو شاهين عاف الباميه وطاح ع الفاصوليه ليش هيج روايه خسرتي سوكي
هههههه لا خاله انت الاصل
بعد كلبي هههههه يلا ماكو فرق
اليوم اذا تردين اسويلج كيكه
اه تعرفين
اي سهله
جا خوش العصر اودي ادم يجيب بيض وسوالف الكيكه وسوينه وحده
تدللين بس مو تتخبلون من كد ما طيبه
لا تحسدين روحج وتطلع احجار
خااله هبطتي معنوياتي
ههههههه لا سباعيه ومره معدله
شكرا ع المدح خاله ههه
___________________________________________
ماريان_ Mariana
لا تنسون التصويت لطفا ♡
أنت تقرأ
تحت عرش الجحيم
Aktuelle Literaturبين عثرات الحياة هنالك بنت تحارب العيش في وسط مجتمع لا يرحم وتقاتل العيش دون استسلام الماضي شبح والمستقبل حلم وكل ما نملكه هو حاضرنا نشعر جميعاً بالضياع من وقت لاخر ولاكن علينا اخذ الوقت الكافي اجلاً او عاجلاً لتمكن من تقرير الاتجاه الذي تذهب إليه...
