انا عارفه اني اتأخرت جداا بصراحه وبقيت بارده ...
بس عشان كنت ف ثانوي والحمد لله عدت ع خير ونجحت بفضل ربنا من الدور الاول
انتو بجد مش متخيلين كانت قاد اي فتره صعبه عليا
مش هقول اني الدحيحه اللي طول السنه بتاكل الكتب بس عملت اللي عليا وزياده
ايوا كنت بذاكر اللي باخده ف الدروس وكنت باخد تقديرات كويسه ف الدروس الحمد لله
انا عمتاا كنت شايفه ان عادي سنه تالته زي اي سنه وعايشه حياتي عادي ومش فاهمه البنات كانو ازاي شايفينها اخر العالم وازاي اصلاا بيكتأبوا ف السنه دي ....وكنت بقول هيا زيها زي اي سنه عدت علينا وخلاص
جيت ف اخر شهرين او تلاته ...وكل تفكيري اتغير ...بقيت حاسه بخوف وتوتر رهيب ..اربعه وعشرين ساعه خوف ...مفيش نوم...مفيش اكل ..علي طول عياط مستمر ...بكون ماشيه ف الشارع عادي اتكلم انا واصحابي ان فاضل شهرين او شهر ...واللي تقول خلصت مذاكره كام ماده ...ودي تقول فاضل ماده واحده واكون خلاص ذاكرت المواد كلها وراجعتها..ونا اصلاا ليسه بستوعب ...انتو بتقولوا اي
جيه اخر شهر ...ودا حرفيا اللي النوم فعلاا طار فيه ...بقيت امسك الكتاب اعيط اشوف الكتب ونا ماشيه ف الشقه عادي اعيط بردو ...اروح الدروس وابقا ماشيه ف الشارع اتخنق واعيط ..حاجه اخرر زفت بجد ...
وبقيت بقااا ف كميه ضغط مابين مذاكره متواصله بقيت اخاف انام واسيب الكتاب اصلاا
دا غير مشاكل البيت ..مش هحكيلكوو بقاااا 😔🙂💔
لما الامتحانات جات بقا ...كنت بنام ساعتين ف اليوم..بجد دي مش مبالغه ..انا فعلاا كنت بنام كداا ...ودا تعبني جدااا...ويوم الامتحان دا عمتاا كنت بفضل اذاكر لحاد ما ادخل الامتحان ..يعني اصلاا كنت بفضل اذاكر كدا واقول لو مخلصتش مذاكره مش داخله الامتحان اصلاا
بصواا هو مش هقول مفيش غش ...لاهو اكيد في ...بس اكتر حاجه تحطوها ف دماغكوو عمتاا يعني واكتر حاجه كنت مقتنعه بيها ..اني ابقا معتمده ع نفسي ...يعني مينفعش اكون مش مذاكره وادخل الامتحان اقول دانا هغش ..معلش ولما تنجحي بمجموع مش مجموعك اصلاا وتدخلي كليه مش مناسبه ليكي ...يعني كليه فوق قدراتك فاهمه ...دا كله بيجي بنتيجه عكسيه ف الاخر ...انا بقا كنت مقتنعه بكداا..اني احل ع قد ماقدر كل اللي انا عرفاه صح وف نفس الوقت مكنتش بسيب سؤال فاضي حتي لو ههبد ..بس بردو كنت بهبد حاجه خاصه بالماده ..حاجه نا عارفه انها ليها علاقه بالسؤال بس انا اصلاا مش عارفه الاجابه ...فاهم..وكمان ف الامتحانات كل واحد بيبقا خايف ع نفسه انه ينسي كلمه حتي ..واه انا ازهر اصلاا ...وبالله محدش يقولي الازهر سهل...تعالو خدوا اللي احنا بناخده بس وشوفوا
المهم هو انا مش عارفه بقول ليه بس بحس اني برتاح ونا بحكي يعني وكدا كدا في بارت جايلكوو ف السكه اهوو 😂💙
خلصت بقاا الثانويه بخير الحمد لله ..ف اليوم دا بقااا نا اخر واحده جابت النتيجه يعني متخيلين بجد ..كله بيبقا قلقان وخايف ومستنيها بفارغ الصبر ..نا اه كنت خايفه جداا ويومها منمتش اصلاا ...بس انا اهلي مثلاا مكانش حد معايا وقتها وانا بجيبها ..هيا ممكن ظروف عادي ..بس كنت رايحه لصاحبتي بقاا ..دي اقرب حد ليا ..لقيت صحابي بيكلموني واي بقاا..مش عارفه مين جابت دور تاني ومين ومين ومين ...لقيت كتيررر بجد واتصدمت...محاولتش وقتها حتي اشوف انا عملت اي ..هو من التوتر مش هوصفلكوو اللي حصل فيا بجد
وصلت عند صحبتي لقيتها قالتلي تعالي نطلع فوق نجيبها بسرعه وكداا ..فانا اصلاا خايفه ومتوتره ومرعوبه وقلقانه وكل معني التوتر كدااا...طلعنا بقاا بسرعه لقيت بنت عمها بتسقفلي كدا وبتقولي الناجح يرفع ايده وزرغطت ...فانا بصالها اصلاا اللي هو انتي بتقولي اي ...فعلاا قولتلها بتهزري انا نجحت وببص لصحبتي بقولها وانتي..فهي حضنتني وقالتلي انها نجحت ...وانا بقا جسمي ساب بجد يعني مش عارفه ازاي وقعدت اعيط جاااامد واشكر ربنا بقاا..حتي متخيل مسألتش ع مجموعي ...قعدت اعيط بقاا ونا قاعده عالارض منا رجلي مشالتنيش اصلاا...بجد دي بتبقا اكبر فرحه في العمر زي ما بيقولوا فرحه النجاح... اول حاجه بعد ما فوقت لنفسي طبعاا كلمت والدتي وقولتلها وكنت بعيط من الفرحه وكداا وعيطت معايا بقاا وزرغطتلي وفرحنا كلنا ...هيا بصراحه الفرحه مكملتش عشان صحابنا الباقيين ..بس الحمد لله هما كمان عدت ع خير ونجحوا ف الدور التاني
كنت متخيله بقاا ان مرحله الثانويه هتخلص وكداا
انا اصلاا ليسه بتعافي من اللي حصلي فيها
هو اه مش المجموع اللي كنت بحلم بيه ولا حتي اللي سعيت عشان اوصله بس الحمد لله انا راضيه بكل اللي ربنا كاتبهولي واكيد دا الخير 🐣💙
بس بجد الثانوية طلعت كابوس مش بينتهي والله فعلًا
يعني تبقي مبسوطه انك خلصتي وراضيه بقضاء ربنا وقدره
ويهزمك شارع كُنت بتمشي فيه وانت رايح الدرس او تهزمك ورقة موجودة في دُرج المكتب كُنت مواعد نفسك فيها انك هتوصل لـ اللي انت عاوزه و ورق غيره كتير من بتاع "انت تقدر .. وهانت ...والـTo do list بتاع كُل يوم"
تقريبًا كدا طالب ثانوية اللي ماقدرش يحقق حلمُه بيفضل في صراع دائم ما بين يارب انا راضي بالمكان اللي بقيت فيه وبين يارب انا كان نفسي ابقي في مكان غير دا
والصعب في الموضوع ان الإنسان مش عارف هيتأقلم وينسي امتى!!
الحمد لله علي كل حال 💙💫
