رأفة حب.....روضت المنحرف

الجزء الاول

مريحة على فراشي راسي مسنود على التاقة و نشوف فالفراغ، قاعدة عالجمر قلبي يخبط و متحيرة من جيهة عندي يقين و من جيهة خايفة، نتمتم بين شواربي و ندعي لربي ما يخيبنيش، و الوقت حلف الا يجوز 3 سوايع حسيتهم سنين و ما خلاصوش غير كلاكصون تاع خويا و عياطو التحت و موراه زغاريت ماما، جبت الباك يا ناس اوووف اللهم لك الحمد من الفرحة فشلت ما قدراش نوقف ياك انا هكدا الخلعة تمشيلي في رجليا تشلهملي، دخل بابا يجري فرحان وجهو منور جا عنقني و رفدني يبوس فيا و يدور فيا، فرحة داك النهار ماكانتش غير بالنجاح فرحتي اكثر كانت بنظرة الفخر و الفرح في عين بابا و خويا و ماما.
انا امينة، المازوزية تاع الدار بنت بابا العزيز و نور عين خويا حبيبي عندي 18 سنة، عايشة حياة هااانية مع خويا و ماما و بابا لي كان هو اول حب في حياتي و كل حياتي علاقتي ب بابا منقدرش نوصفها بكلمات كان سند و حب و حنان و ثقة و امان عندي ختي كبيرة عليا ماعندهاش عام زواج، ساكنين في حومة شعبية ماديا لاباس علينا الحمد لله بابا حنوني موفرلنا كل حاجة لي نتمناوها نلقاوها و عاطينا الحرية الكاملة لي مقيدة بالثقة و التربية الصالحة لي غارسها فينا من نهار خلقنا، و ماما كانت اليمات لي تحب و تزير يعني الوسط المعتدل لي مشاتنا على الصراط المستقيم، و خويا يا روحي على خويا العز و الحنان و الفشوش هو الكبير و بيناتنا 8 سنين يعني كان اب ثاني ليا ،صح بلاصة بابا ماكاش لي يديها بالصح خويا مروان كتافي و ضهري و سندي ما عمرو عز فيا حاجة و لا قلقني بكلمة و على مد عليا باليد بالعكس دايمن واقف معايا و واقف عليا و لي نطلبها يديرها بالفرح و السرور، و هاد الشي لي خلاني حتى انا نديرهم تاج على راسي و نمشي فخورة و فرحانة بيه شادة في صلاتي و قرايتي و عمري ما نخمم في حاجة تقدر تزعف ولا توجع واحد فيهم علاقتنا فالدار كانت قوية و كلها حب و على هادا تقدرو تقولو عائلة سعيدة.
في عوايدنا ما كاش هادي الحفلة و منا عادي ماما دارت الرفيس بالعسل و بعثت للجيران و لي يحب يجي يباركلي يجي هاديك السمانة جاية ختي هاجر ضيفة فرحت لي.
وجدت الفطور مع ماما و نقصرو و تقولي خلاص دوك تهنيت عالباك هاد الصيف تدخلي معايا للكوزينة تتعلمي طيبي شوية
جاوبتها : ايه يا ماما غير علميني راني خايفة ماكلة الجامعة ما تكونش مليحة و تخلاص عليا بالخبز و الفرماج
قاتلي : شفتي مالا من دوك حطي راسك معايا و شدي غير العفايس الخفاف تلقايهم و بالشوية تتعلم بنيتي و تولي لالات النسا و اصلا يديك بنان
كان بابا دخل واقف عالباب تاع الكوزينة : و منين راح تجيبو باينة يديها عسل كي يدين لي جابتها
انا ضحكت رحت بستو و ماما حطت راسها تتبسم و حاشمة
هي فالصح علاقة بابا و ماما تهبل هو كبير عليها ب10 سنين هو راهو فال55 و هي فال45 بالصح كيما تحكيلنا هي داها مولات 18 سنة مازالو يعاملها بنفس الطريقة و مازالو يشوفها الصغيرة ديالو، والله علاقتهم تالمون شابة تشهيك فالحب و الزواج ربي يحفضهملي.
حطينا الفطور و جات ختي و راجلها و خويا فطرنا كامل كيفكيف راجل ختي ريح مع بابا و خويا شوية و راح، هاجر شراتلي حوايج مسكينة كساتني قالتي دوك تطلعي للجامعة تلقاي واش تلبسي مسكينة جابتلي روبة تاع الورد شابة و ليكات 3 و زوج صراول قماش و واحد جين و صندالة و باسكات بستها و شكرتها و بحكم هي كانت تسكن في سونطر و احنا جابدين شوية على لا فيل
قاتلي : هكا بقالك تشري شوية كوسميتيك اخطفي غير بالشوية و وجدي روحك
قوتلها : علاش مقلقة واقيل نوجد فالتروسو وانا لا خبر رايحة نقر ولا رايحة ندير الديفيلي و زيد على قرعة شامبوان و جال دوش و ديودوغون من دوك وانت نشري
قاتلي : اسكتي اسكتي انتي ما تعرفي والو انا لي قريت وعلابالي بكلش تولي لاتية بقرايتك ما عندكش الوقت و زيد تشري في غرضك ولا نقولك اني شفت كوسميتيك فالدخلة العشية احبطي اشري كلش مام انا خاصني نعطيك جيبيلي معاك.
سكت و خليتها العشية هاديك قاتلي روحي اشري قوتلها روحي انتي شوفي واش خصك انا عندي نهار نجي رايحة نقرا نشوف واش خصني نشري
حبطت راحت شرات و جابت معاها قاطو وجات لقاتنا انا وماما نحطو فالقهوة
حطت القاطو قاتلها ماما : علاش جيبي اي ختك دارتلنا البغرير
قاتلها: برافو اي تعلمت والله جا شباب مثقب الله الله
هاكاك اتعلمي باش تجيبي زوج ديبلومات
ريحنا نشربو فالقهوة و زاد دخل خويا قعد معانا قاتلو ختي : وقتاش فتح هاد الموسميتيك روعة عندو كلش و ماشي قاع غالي
قالها :تاع زاكي ؟
قاتلو : والله ما علابالي لي فالدورة مور دار الحاجة
قالها : ايه هاداك هو تاع زكريا صاحبي علاش كاش ما خصك
قاتلو : لالا خلاص روحت شريت و جيت والله ماشاء الله عجبني عندو من كل خير و زيد مايبيعش غالي و شاطر رحت نشري حاجة وليت في 5 حوايج
حنا هكاك و دخل بابا
رحت عندو : حنوني ايا تشوف واش تعلمت نديرلك اليوم
عنقني قالي فرحيني بنتي
قاتلي ختي : شوف اسيدي زعما حنا ما نسالوش فيه ولا كيفته درتيلو غير هو
قوتلها : لالا كولي بصحتك بالصح الصح في حنوني ادا عجبو هو راس المال
خويا : شوف الستوتة شوف كيفاش تعرف تبلعط
ناضت ماما تضحك عنقني بابا و قال: ربي يخليكم ليا والله غير انتوما راس مالي فالدنيا و فاللخرة
قعدنا نشربو القهوة و نقصرو
يومين موراها دخل بابا عيطلنا انا و ماما و ختي جابلنا كوفري تاع ريحة لكل واحدة فينا فرحنا بيهم و بسناه
و قولنالو صحة بابا صحة حنوني
قالنا : تستاهلو الوردات ديالي وعلاش عندي عشرة منكم و ربي يقدرني نفرحكم دايمن
قاتلو ماما : بالصح يا حنوني و الله بزاف عليك
قالها: والله ما تغلى عليك حاجة و زيد يكثر خيرو الطفل مسكين حسبهملي سومة الجملة
قاتلو ماما يكثر خيرو
قالها والله طفيل ما شاء الله راجل و مربي و يقادر.
هادي الخطرة الدوزيام لي نسمعهم يحكو على السيد هادا، حبيت نقرعج عليه جاني الفضول نشوفو و نعرف كيفاش داير.
وليت نحوس عالسبة باش نخرج نشوفو الله غالب نموووت و نقرعج و ماكانش عندي هدف واحدوخر برك نعمر الفيد بصك كي تجي للصح حياتي كانت فارغة بيني و بين ختي غير الصلاة و السلام عالنبي و الصحابات ما عنديش و الخرجات و الدخلات قلال غير لقرايتي تسمى حياتي كانت فارغة و مافيها حتى حاجة مشوقة.
خرجت 3 خطرات نشري و ماشفتوش كرهت حياتي و زدت شحنت عليه حتى قريب نروح نقرى و كانت الجامعة في ولاية وحدوخرى تسمى رايحة للاقامة و خرجت ديك السمانة نكمل نشري واش خصني و بقالي غير الكوسميتيك.
لابسة روبة غوز كلاغ و صندلة بيضة و خيمار بيض و صاك فاكتور غوز لا ماكياج لا والو غير غيسيل انا بيضا بالصح ما نشوفش روحي شابة بزاف يعني عادي نمشي داخلة للحانوت ديالو بعد ما كملت قاع الدوران و بقالي غير نكمل هادو و ندخل للدار، نشوف فيه قاعد على رجليه يستف فالقرع مالكرطونة لي زيطاج تاع البريزونتوار رفد راسو شافني وقف🫣، شفتو وياريتني ما شفتو اااااااه يا ربي (شوفو هاداك الوقت ماكانوش فلام الترك لي راهم دوك و الانستغرام و الفيلتر يعني الزين كان طبيعي و انا انسانة عادية) ماكانش زين يهبل بالصح يهبل اسمر و كور و حطة و هاديك اللبسة تشعل شعيل ضارب واحد الحطة كلش يشعل يا ربي تم خليتلو قلبي اه يا يما خلاصت عليا مال مال مال ياك تعرفو العشق من النظرة الاولى؟ ختكم عشقت من الوقفة الاولى و من داك النهار بداو مغامرات مينا و زاكي .....