رأفة حب.....روضت المنحرف

الجزء 47

سلعة سيدو حبطت🎉🎊🎇🎆💊💉⚗️كونسوميو غير بالشوية
جازو شهرين بالنسبة ليا برق و بالنسبة لزاكي دهر ههههه، كلامو خرجتهولو من عينيه خليتو صح يجوع ي يعرف قيمة الكلمة و يعرف كيقة كسر الخواطر تربا صح و لا يوزن قبل ما ينطق، قتلو المونك و الوحش و الستراس سيرتو كي كنت لااااتية عليه، جوزت ياماتي. جري و قضيان مع ماما و مرت خويا لي لقيت فيها وقفة اكثر من وقفة ختي، ختي لي خسرت عليا كلمة ما تستناي مني نعاونك في والو، اني تقيلة و نتوحم ما تطمعوش ڨاع فيا و كي عايرتها ماما و داوستها ترطقت قاتلها هي زوجتوها كيما حبت هي و الراجل خيراتو و باينة بلي خرجت معاه و جاباتو للدار و انا اللول لي جاكم خطبني طبعتوني ليه ما خليتوني نخير ما خليتوني نشوف حياتي
ولات ماما تندب قاتلها علاش فورصيناك حنا ياك شاورك باباك و انتي قولتيلو دبر راسك و زيد راجلك دايرك فوق راسو غير لي ما طلبتيهاش واش خاصك معاه
قاتلها خاصني يحبني كيما زاكي يحب مينا و خاصني ديفونديو عليه و تحبوه كيما تحبو زاكي
عرفتها ماما جاها وحامها عليا و غارت ولات تساعف فيها قاتلها يا بنتي زاكي هو طوايشي و يدخل روحو و ڨصايري و انتي راجلك حشام و جابد و شاد قدرو ماشي معنتها ما نحبوهش ولا حاجة برك هو مخلي مسافة و مايحبش الدصارة و باباك دايمن يشكر فيه و حتى خوك يقول نعم الناس
كالم جااتها شوية و كي جا بابا قاتلو يعرض راجلها و فهماتو بلي تتوحم و غارت و بلي مالازمش يدير الفرق بين نسابو الطفلة تتحسس مالا راح بابا عرضو و جابو و دارلو عشا و قاعدين يڨصرو هو و ياه و مروان معاهم.
كل ما نخرج يعيطلي يقولي نجي نوصلك و ماما تقولي١ لالا خليه يتوحشك امبعد وليت ما نخرجش كامل قاتلي ماما باش يطيح عليك السر وليت الشمس ما نشوفهاش و عاودت رفدت صحتي غير مالقاطو و العرضات.
نهار الجمعة جات خالتي و بناتها زوج مزوجين يسكنو في ولاية بعيدة حنا فالشرق و هوما اقصى الغرب مكتوب خالتي و بناتها هملهم بالصح عايشين متهنين و بقينا فالليل نحكو و نقصرو و الصباح ناضو يخملو معايا فالقش و يتبقو و يستفو معايا فالجهاز حتى قاتلي واحدة
-مينا اكي دايرة حسابك على لابيليل و لا حابة متفاهمين على الدراري
-واش من حساب تاني
-ياك تحسبي علاش ما درتوش حساب قبل ما ظيرو لا دات تاع العرس ياك نورمالمون 10 ايام مور ما يروحولك
يروحولي!!!! 🤦ياحي خبطت يدي على راسي نسيتهم ڨاع راحو من بالي
-ايه يا حبيبة فكرتيني فيهم يفكرك فالشهادة نسيتهم ڨاع
بقيت نحسب نحسب لقيت راهم روطار ب زوج سمانات، ما تقلقتش بصك ماني دايرة والو بالصح جاني الخوف من حاجة وحدوخرا، رفدتوالتليفون و دخلت لبيتي و عيطتلو نتمسكن مرققة صوتي (الدرس الثاني ادا شفيتو)
-الو صباح الخير حنوني
-صباح الخير يا الورد شحال بقالنا شحال فرحيني
-بقالنا 8 ايام
-8 ايام يا الورد و نصبح على وجهك الزين و عافسك تحتي اااه يا ربي اه ما درتي فيا هاد الشهرين خرجتيهالي من عينيا
-حنوني حابة نهدر معاك فوحد السوجي و بلا ما تتقلق
-اهدري اهدري اني تقلقت ديجا
-لالا ما تتقلقش غير بالعقل
-اممم
-شوف حنوني انا راني روطار و قادر يجوني السمانة هادي ولا السمانة لي موراها، ياك نورمال لوكان النهار اللول ادا كنت مريضة ؟!
-شوفي يا مخلوقة انا نهار دخلتي يسموني ندخل عليك يا لوكان ندخلو في عينيك مالا غير ديري حل لعمرك بلا ما تهاوشيني
بلعتها و سكت كي الطحانة هاد اليامات لي فاتو من نهار ولينا البوسة حرمتو منها و علابالي بلي راح يخلص فيا الجديد و القديم نهار يديرني تحتو راهو كل يوم يحلف فيا
لبست حجابي و رحت للفارماسيانة فهمتها عطاتني دوا يبلوكيهم و خرجت
في جوايهنا العرس يبدا بالحد و يخلاص بالخميس
تلايمو عماتي و خالاتي و الفاميليا القريبة بالحد و ماما دارت العشا شخشوخة الشواظ و فالليل عادتنا تحنيلك واحدة مهنية في حياتها انا حناتلي عمتي سعيدة و النسا يقدمو و يزغرتو و غدوة من داك ديت العازبات و رحنا لحمام التعرويس بالشموع و الدربوكة و الفال حلوة و مكسرات و كملتها عند الحفافة دارتلي لي ماش و فالليل زدنا العشا و عاودولي الحنة و الغنا بالدربوكة مع خويا و ولاد عمومي و خوالي و بابا معاهم قلبو الدنيا
نهار الثلاثا جابولي الكبش و الخضرة و زاكي نسكين من كل خير بعتلي ماخلا كازيات تاع خضرة ما خلا الفاكية ما خلا الرافيطايمون ما خلا التبناج و الزيت و الملح الفلف كحل و عكري و بعتهولي، حتى من البريكي و الزاليمات و بعتهم.
في عادتنا نهار يجيبو الكبش يتندبح في حضور مالين العريس و ينقام عليه فطور و ياكلو منو البكبوكة، و تاني العروسة ما تخرجش ليهم و ما تقابلهمش بقيت في شمبرة شادة الطراشن و نطوي فيهم و معايا بنت خالتي صغيرة ناضت خرجت تشرب الما و خلات الباب مشقوق حتى نشوف في عجوزتي جات فتحت الباب و جات ليا نضت نسلم عليها سلمت عليا و قاتلي
-يا بنتي يسجيك ما تعرفيش يمات العروسة وين راهي حبيت نهدر معاها
عرفتها ما عرفتنيش المخلوقة مدبدبة على روحها و انا سمنت و بلي ماش ما عقلتنيش
-ماعليه خالتي دوك نروح نقولها تجي ليك
-يسجيك و يزين سعدك يا بنتي اني فالصالون قاعدة
خرجت، جاني الضحك مسكينة نية الله و ماما دايمن توصيني عليها تقولي عجوزتك جنة عاقلة مسكينة بالاكي تاذيها و لا ظوري وليدها عليها ربي من فوق عرشو ينتقم منك و في ولادك العقايب واعرين يا بنتي
و اليوم زدت تاكدت كونفرميت بلي مسكينة منوية لاقصى درجة.
نهار الاربعاء تصديرتي، دوك كي جوايهنا كي جوايهكم كامل يديرو العرس في لاصال بالصح هاداك الوقت لي دارو مستيسعة ما يديرش فيها يدير في دارو
عرسي في بداية سبتمبر 7 سبتمبر تصدرت و 8 داني لدارو
كاين الناس لي يجيبو الكراسا و الكرسي تاع العروسة و الديكور بلاصاوه فالصالون الكبير، و التحت حطينا طوابل للعشا و فالڨراج دارو طوابل الرجال.
تصدرت و لبست لونسومبل و الكاراكو و الجبة قبايل و بداو الناس يفطرو
درنا الفطور للناس شربة و شطيطحة لحم و شلايظ و حميس حااااار و ديسار فاكية و جو
مع الزوج جاو مالين زاكي لبست البينوار و موراه القفطان و جاو زوج عماتو نوضوني شطحو معايا شوية و وراو شوية جهازي و امبعد جات جداه دارتلي الخاتم و زغرتوو شطحو حطينا القهوة بالقاطو ساك و القاطو تاع لي بوات امبعد مع الستة بدينا نحطو العشا لبست الكابيل و دارو البربوشة باللحم (الكسكسو) و المرقة حمرا بالخضرا و القازوز و اللبن و الديسار،
مور العشا راحو مالين زاكي و البراويا و بقاو غير الفاميليا انا لبست الغوب بلونش و جا دخل مروان و ولاد عمي يشطحو معانا و بابا خويا دايرين حالة ودور بيا مروان على قاع الصالة و باسني من راسي و قالي المازوزية ديالي كبرت و راح تتزوج و انا معمن نتناڨر شكون نهبل انا ليمن خليتيني وليت نبكي و هو معنقني جات ماما عنقتنا و بابا يضحك علينا و زاد جا عنقنا و جاب ختي معاه
جازت ليلة عرسي من اروع ما يكون و غدوة الصباح نضنا نتجاراو
رحت الصباح للحفافة مع ماما و ختي ماما و بنت خالتي تمتم و ولات للدار و انا و ختي بقينا ماكياتلي رجعتني واحدوخرا سيرتو كي انا ماشي مالفة بالمكياج بزاف و اصلا ما نعرفلوش مليح بان فيا و لا كيما قالت ماما طاح عليا السر ختي كملت قبلي عيطتلها ماما بعثتلها حاو ظاوها و بقيت انا و بنت خالتي كملتلنا بالعقل لبستلي الغوب بلونش و دارتلي حرقوس تاج في كتفي ليمن و تحتو حرف z
عيطت لمروان قالي دوك نجي
بقيت قاعدو نحكي مع بنت خالتي و نقصروو نضحكو صونا تليفوني
-الو
-وي حبيبي🥰😍
وين راكي
اني عند الحفافة قريب نكمل
و شكون يجي يديك
اني زڨيت لمروان او جاي يديني
اه مرواااان صاااار
-ايه والله هادا وين كنت نهدر معاه قالي اني مديماري
-شوفي مينا انا ماشي عطاي
-؟؟؟؟؟؟
-واللله والللله والله و يشوفك هاداك الن#ش ماكي داخلة داري غير تحرمي عليا ليوم الدين و كملي العرس معاه ياخذك و لا تنا#كي
-شكون هادا واش كاين تاني
كوبا و خلاني نغلي وليت نندب و نبكي
-كل خطرة يخرجلي مشكل جديد كل خطرة يديرلي حكاية تعيي واش ندير يا ربي واش نظير دوك لومان نحكي لمروان والله غير يخلطها معاه
-واش كاين واشبيك دوك يخسرلك الماكياج
حكيتلها واش كاين قاتلي ساهلة دوك انا نريقليها
عيطت لمروان هدرت معاه قاتلو اسمع راجلي شافك كي كنت خارج قالي معاه راجل يرحم بالاك حنوني خليني مالمشاكل معاه شوف كيفاش تليكيدي السيد قالها اوكي ماشي مشكل سمعتو كي قالو يونس حبيبي وين نحطك عندي قضية مع الدار
عرفتها بلي هبل كي شاف يونس، ضحكت على غيرتو الحلوة
جا خويا داني و دخلت لدارنا بالزغاريت و التسلام و الصلاة عالنبي شوية و لحق الكورتاج الدنيا حرقوها خويا و ولاد عمومي و خالاتي و زاكي و خاوتو و صحابهم الدخان ما خلا والو يبان و هوما دايرين الغنا فالطونوبيلات دارو حالة اكثر من عرس هدى بنت عمي و هو يأبر البي كان يهبل يهبل بالكوستيم لكحل و البابيون الغوج و شعرو ممشوط طالع للور علكوتي و معمر بريون و يضحك ضحكتو من قلبو و صحابو يرفدو فيه و يغنولو او دار التاويل او دار التاويل امبعد جا يخرجني جزت تحت جناح بابا و دموعي يسيلو و شدني مروان حطلي يدي في يدو و قالو تزعفها نهار نزعفك الدهر يا زاكي خويا
قالو زاكي لا زعفتها مانيش راجل سلم عليه و شدني و داني مغطية بالبرنوس ركبني معاه و هو يسوق و انا قدامو و يماه و عمتو ماللور و داير اغنية ڨالو ما يسواش ڨالو و يغني و يشطح، شفت فرحة عمري في عينو شفت عشقو في ضحكتو شفت حنانتو في لمستو شفت حياتي الجاية في حضنو...