رأفة حب.....روضت المنحرف

الجزء 51 و الاخير

لبست و خرجت هو خبط باب الطونوبيل و انا شفت حلوف ماشي راجل الكفير و العياط و السبان و اللخرة يرفد يدو و يخبطلي راسي مع الكابو و السبة يعلم ربي.
-اي واش بي جدك هبلت !!!!!!!
-اششششششت شوفي من دوك و انتي مبلعة نلحق للظار و نهدرو خير ما نقلب ر...الطونوبيل على راسك و نروحو في زوج
شفت وجهو يخوف شديت راسي سقمت روحي و زيرت صاكي لصدري و ريحت مكمشة عمري ما حسيت بالخوف منو يضربني هادي ماشي خصايلو الحكاية هادي فيها ان
لحقنا للدار حبط بلا ما يشوف فيا و خبط الباب سقمت خماري و ستغفرت و تبعتو خلي نقبل على عجوزتي و لواساتي و كي نروحو لدارنا نشوف واش كاين واقيل هبل بالصح معليش كي نروح للدار نهدر.
دخلت لقيت عجوزتي مسكينة لابسة الجبة لي شريتهالها انا و فرحانة بيا انا و سلفتي (مرت لوسي) غاضتني مسكينة عاقلة فوق الحد والله لوكان تضربيها ما تقولك كلمة و تخاف من شيخي تمووووووت منو و هو البليزير ديالو يقهرها و يقيسها بالكلام و هكاك و لاسقة فيه تخوس غير يرضى عليها غير واش يحب و قبل ما ينطق تجري ليه سبحان الله مام يكون ظالم تلقايها معاه ما فهمتش هادا حب و لا خوف و لا واش.
سلمت و قعدت نقصر معاهم ختى جا ليا زاكي
-مينا ارواحي للبيت نسحقك، يهدر و مشنف وجهو مقلوب و خرج
خزرت فيا عجوزتي
-واش كاين يا بنتي واش بيه مقلق
- والله ما علابالي دوك نروح نشوف واشبيه
لحقتو للبيت مغلوقة حطيت يدي عالباص تنهدت، استغفرت، فتحت و دخلت عندو, لقيتو واقف فالتاقة و يتكيف
قعدت عالكانابي و قوتلو
-زاكي خير واش بيك واش راك تحوس عيد و عواشير
-عيد و عواشير!!!! شوفي انا ما تساعدنيش هاد السيرة يا بنت الناس دوك تعيطي لباباك ولا خوك يجو يدوك عليا نا نسحقكش عندي و اكي قولتي عيد و عواشير مانيش حاب نبدا نخلط
-واشنو ؟! ماتساعدكش واش لي مايساعدكش هادا ؟
-انتي لي ماتساعدينيش! ابدسارة تاع قس....م وليد عمك و الجياحة ديالك لي ما تساعدنيش، يهدر و يعيط
-واش مالدصارة؟ اك تتمسخر بيا وليد عمي قصر معانا كامل و في وسط الجماعة و في دارنا و في عيد ولا يداصر الراجل اكبر مني و منك و زيد مزوج و بولادو قريب قدي تتبهلل عليا و تقولي عبطيلهم يجو يدوك واقيل حسباتلك انا نلعبو
-ما يهمني فيه لا كبير لا صغير هو رخيس و ما يقادرش و انتي جايحة و سايبة و بهلولة و ماشي دايرة قيمة لراجلك و انا المراة لي ترخسني الله لا يردها ما عندي ما ندير بيك مالا روحي عيطي لباباك يجي يديك
كان صوتو جايب لبرا حتى دخلت عجوزتي
-يا وليدي خير واش بيك تعيط اليوم عيد
-ماكان والو يما اخرجي
-لالا كاين كيفاش ماكاش يا خالتي وليدك او يحاوز فيا حابني نعيط لدارنا يجو يدوني
-بسم الله الرحمان الرحيم واشبيك يا طفل
دخل شيخي موراها
-بديتونا بالعياط واش كاين
-ماكان والو والو الدراري برك تناقشو شوية
-ماكان والو بابا بيني و بين مرتي
-باينة ياك انت لي حبيت ماشي انت لي خيرت اشبع من رايك دوك
خزرت فيه خلعني يا لطيف يستشفى فينا عيناني و في وجهي و زيد عينو في عيني
-واش راك تستنى من بنت الجامعة
خزر فيه و فيا حسيت النار اي تخرج من عينيه
-علاش واش شفت مني عمي باش اك تهدر هكا، و درت لوخر، مالا شوفو في زوج انا كنت في دارنا و انت لي جبتني لهنا ما جيتش وحدي مالا دوك ترفدني تديني لداري و هاد الدار منزيدش نحط رجلي فيها كي وليت نانيش مشرفتكم و باباك ماشي عاجباتو و انت كي معجبتكش كيما جبتني من دار بابا بشاني ترجعني انت بروحك لدار بابا و تماك انت قولهم علاش رجعتني و اتفاهم معاهم
خرجت و لبست حجابي و رفدت صاكي سلمت على النسا و خرجت جبتها فالطونوبيل و قعدت نستنى فيه، شوية و لحقتني عجوزتي ب طبسي قاطو فيدها
-يا بنتي وسعي خاطرك مقلق برك بالصح قلبو بيض و يحبك و خليك مالشيخ يهدر برك
-سامحيني خالتي جينا هرجناك الناس تعيد فرحانين و حنا عيدنا اللول بديناها بالمشاكل
-معليش بنتي عين و صابتكم وسعي بالك و ما تجاوبيهش اي هدرت معاه جداه دوك يتكالما.
-ماعليه خالتي يعيطك الصحة و سامحوني والله
راحت عجوزتي و جا هو ديمارا ساكت
لحقنا للدار رحت ديراكت جبدت الفاليزات و بديت نلم في حوايجي و دوزاني و الدموع في عينيا
-واش راكي ديري ؟!
-كيما راك تشوف
-بركاي مالتبهليل لي راكي تتبهلي فيه
-لالا حنوني ماشي ما نساعدكش و مانيش دايرتلك قيمة و الله لا يردني و بانتلك لعبة تلعب شوية و كي تكره عيطي لباباك يجي يديك تقول ربحتني في باكي اومو
-شوفي عيد و عواشير بركاي ما تقودي على ز....
-اتقود و لا مووووت الله لا يردك انت تاني حتى انا الراجل لي يحاوزني و تبانلو يكره مني الله لا يردو و ماعندي ما ندير بيك لاك حاسبني مقطوعة من شجرة اك غالط ماليا ماهمش راميين و صباطي ما تقطعش عند باب داركم كي ولات على وليد عمي لي مربية معاه حياتي ڨاع و لوكان غير كاش ما دار و لا قال حاجة خاطية ياك قدامك و كنت حاضر و زعمة لوكان جا عيان راح يخليه بابا و لا خويا يهدرو معايا و ديجا انت كنت حاضر دير في بالك لي ما دارش قدر و قيمة هو انت بصك لوكان صح غلط صالح كنت تم تقدر تحكي معاه و لوكان غلط بابا و خويا تم يحبسوه مانيش جاية من دار الزغاريت انا بابا سيد الرجال و خويا سبع بن سبع لا نسيت ماشي ناليا لي يسكتو على عرضهم و حتى وليد عمي راجل و سبع و يخاف على عرضو و انا عرضهم و عرضك.
بقا واقف و يخزر فيا و انا نغلي نهدر و نرفد في دوزاني و الدموع يحبطو
حتى حسيتو مورايا دورني ليه و جبدني عنقني و دار راسو في رقبتي باسها و زاد بالشوية من بلاصة لبلاصة خدي نيفي عيني يدي و يبوس و انا نبكي و نعزز في روحي و هو يبوس فيا و يبلعط و يطلب فالسماح حتى حبست البكا و دخلت معاه في اجواء عالمنا الخاص لي وليت مدمنة عليه انحراف زاكي يخليني ننسى اسمي عليه حركات يعرف مليح الحاجات لي نحبهم و الحاجات لي يتلفولي عقلي و خصوصا كي درت واش قالي و نحيت معاه الحشمة و وليت انا نحوس عليه كيما هو يحوس عليا اكتشفت جانب في شخصيتي منحرف اكثر منو و ولينا مشاكلنا نحلوهم بهاد الطريقة كي يزعف مني نرضيه هكا و هو تاني كي يزعفني يرضيني هكا و مشاكلنا يدوبو فالفراش و نحكو بالعقل و الحنانة و نعذرو بعضانا و نلقاو الحل تم في نفس الوقت و لقيتها طريقة ناجحة باش نحافظ على راجلي و نشدو و نكسبو و نجبدو ليا و جازو اليامات و انا عايشة معاه معيشة فوق السحاب بالصح كانت حاجة مقلقتني.
مور ستة اشهر زواج لقيت روحي ثقيلة و زاكي طااااااار مالفرحة هبل هبل هبل هو من قبل متهاي فيا و زاد ولا يغسل و يطيب و ينشر يعاوني في كلش يد بيد بالصح كان الخدمة من نهار تزوجنا و هو ينوض عال11 باش يروح يخدم و كي هدرت معاه قالي الخدمة ناقصة الصبح و زيد دلير خوه الصغير في حانوت و خدام في حانوت كي يروح هو يروح الطفل يريح مع خوه (صح خوه الصغير فحل على فؤاد بالصح هو ما ولاش يامن ) مالا وليت ناكلو في راسو انا هادا المنواض تاع الحداش ما يخرجش عليا الارزاق تتوزع الصباح و بقيت عڨابو حتى لقيتلو صرفة و تشارك هو و صاحبو شرا طونوبيل تاع خدمة و ولا يخدم لومبالاج و ينوض بكري يسربيه علحوانت و كي يكمل يروح للحانوت تماك تهنيت و بدات كرشي تكبر و كان عندي طفل كبرت كرشي بزاف ثقلت وليت نتحرك بالسيف ولا هو يديرلي كلش و فرحان يقولي اتفشي و زيدي لحق وين الدوش هو يدوشلي و زاد شرالي لاباراي تاع براون و انا مالڨري ماوليتش نحشم بالصح قد ما قتلو لالا والله هو مسكين ينقيني بصك ما نلحقش.
ولدت و جبت براء و خرج يشبهلو في كلش حتى في تر.... هههه اصلا كنت نتوحم عليه ندخل ندوشلو غير باش نكحل و هو فيه طبيعة يدور بالبوكسور فالدار و يلبس غير Calvin Klein يا قلبي😍 و بسلامتو حدايدي يهبل نريح غير نكحل (و مازالني نكحل عليه لليوم نشوفو اجمل رجل فالعالم و الرجال قدامو يبانولي ذبان) و مام هو كان فرحان بوليدو هو قد اللقمة و يقولي نشريلو فيستا كوير كيما ديالي و نشريلو باسكات كيما ديالي و انا غير نضحك.
كبر وليدي 6 اشهر و دار عجوزتي قريبة وليت نقولو يديني نريح معاها و فالليل كي يكمل خدمة يجوز نتعشاو و نروحو للدار اصلا القضيان هو لي يقضيه و هو لي يصرف و لوستي لي فالدار تقولي طيبي و علميني و عجوزتي تقولي هنيتيني مالكوزينة و هي لاتية ب براء و الحق حق مام شيخي يحبو يموت عليه بالصح اكتشفت امور تحبس العقل.
عجوزتي مابيهاش الحب و عايشة مع شيخي غير خوف و نهار لي ضربها و سبها لحق وين بال عليها بصك جابولها الهدرة بلي او يروح لدار وحدة هجالة تماك و طي قاتلو ناض دار فيها ما دار، الحمد لله لي ماكانش زاكي فالدار و هي مسكينة غير تبكي انا كي شفت هكاك جمدت و كي خرج دخلتها دوشتلها و بدلتلها و بقات في عبوني ترعش مايتة بالخوف و انا ماني فاهمة والو
-خالتي احميلي واش صرا علاش دارلك هكا
-يا بنتي حڨار و لقاني ساكتة وكيلو ربي
-علاش بالصح واش صرا حتى لهاد الشي
-يا بنتي من منهار تزوجت بيه و هو يدير هكا الضرب و السب و الحقرة و دوك زعما تهد شوية قبل كان هايج اكثر
-بالصح هكا بزاف راكو كبار كيفاش يضربك و زيد واش داه هو لدار المراة
-يا بنتي بكري كان يعريني و يحكمني بالسبتة و يربطني و ي... سكتت مسكينة فهمت
-يا لطيف اخاه واش هاد الشي و انتي علاش ساكتتلو علاش ما رحتيش
-وين نروح يا بنتي انا منهار دخلت عندو من ليلتي بداني بالضرب و الهمجية و كنت كل ما نحكي ليما و لا نحب نروح تقولي شدي دارك ما عندك وين تجي تحملي و تبلعي اكي تاكلي و تشربي و عايشة في دارك وحدك مهنية
-كيفاش هادا علاش كلبة ؟!
-ايه يا بنتي ايه بصك في دارنا كانو 3 خاوتي مزوجين بيت بيت بنساهم و ولادهم حتى كبرو ولادهم باش قدرو يخرجو و انا كنت وحدي فالدار عجوزتي ما طولتش و ماتت و شيخي ما لحقتش بيه و لواساتي كبر منو كانو تزوجو و هو بقا فالدار وحدو
-علاش هادي دار شيخك ماشي دارو
-بووووه عليك واش من دار يا بنتي النار تجيب الرماد و انا الشيخ الله يرحمو نسمع عليه كان راجل فحل و بدراعو بالصح وليدو بذرة فاسدة خرج عاصي الوالدين مام عجوزتي مسكبنة بدراهمها و كان حاقرها مادارش الخير حتى في يماه لي ولداتو كان يديلها دراهم الشيخ و يخليها هكاك و لحق حتى ضربها ساعات نقول مزية لي ماتت تهنات منو و انا اصلا مانقدر ندير والو نخاف من. بزاف حتى كي نشوفو يحڨر فالدراري قلبي يتقطع عليه بالصح من خوفي نسكت ما نقدر نهدر ما نقدر نتحرك معاه و هو حياتو ڨاع عايش على ظهر الناس يا ظهر باباه يا ظهر يماه و كي جاب الدراري ولا عليش على ظهرهم و اللي زادت قهراتو كي الناس يشوفو زاكي من صغرو يقولولو خرجت لجدك ما خرجتش لباباك و الحمد لله لي جا لي يخلف بوعلام و هو يهبل يجي ليا يربطني يعريني و يتعدى عليا بالسيف و يقولي نسحق تجيبيلي لي يشبهلي انا لي راني ناخذ فيك ماشي بوعلام.
حكات و فرغت قلبها و من كلامها فهمت بزاف حاجات اهمها بلي شيخي انسان مريض سادي و نرجسي و يغير من وليدو بصك يشوف فيه ضعفو و الحڨار دايمن يكون مذلول بين الرجال علابيها يستقوى على الوليات و عجوزتي ظلموهاوماليها و ظلمت روحها و ظلمت ولادها معاها بخوفها و سكوتها. بزاف بنات تقولك نسقمو انا و مادامو يحبني راح يتسقم و كي نجيبلو دراري يتسقم عجوزتي اكبر دليل على العكس بصك لي تقبل تعيش مع انسان مريض نفسي اي كان المرض لي عندو هي اختارت تعيش معاه و تتحمل مسؤولية خيارها بالصح لي صح راح يعاني و الضحية هوما الدراري بصك المريض راح يشوف ضعفو في ولادو و راح يحسهم خير منو و يفرغ زعافو فيهم و ماكاش راجل يتبدل على جال ولادو و لا على جال مراة الرجال والله ما يتبدلو الا من رحم ربي بالاك 1 فالالف لي يقدر يتبدل على جال مراة و لازم يكون صح فحل و راجل و صح يحبها باش يقدر يتبدل.
ديك الليلة شيخي ما جاش و عي قاتلي خاف تكوني حكيتي لزاكي و يضارب معاه و هو ديك الليلة زاكي كان راح يسلع ماجاش و غدوة كي جا و رحت للدار بقيت نخمم نحكيلو ولا لالا و فاللخر ديسيديت نقول بالصح ماشي كلش باش يوقف مع يماه باش يحبس لوخر ما يحڤر فيها عيب عليه و ميما قالت عجوزتي راح دار معاه ڨيرة
جازو اليامات و عجوزتي مسكينة بكات و مرضت سمانة و ناضت و تقومو و تخدمو تقول ما دارلها والو و هو كلمة سامحيني ما خسرهاش عليها. وحد النهار درت الفطور و ديتهولهم و بقينا نقصرو حتى حكمتني مرت لوسي
-مينا شوفي اني حابة نحكيلك حاجة و خايفة
-خير احكي احكي واش درتي يا موصيبة ، هدرت بالضحك
-ماشي عليا انت ما درت والو...المشكل على راجلك
سڨمت روحي و زبطت وجهي
-واش بيه زاكي ؟ خير واش كاين واش بيه؟
-اصبري ما بيه والو او لاباس بيه بالصح عندها واحد اليومين....والله غير خفت احلفيلي ما تجبدينيش انا ختك و الله ماشي نيتي ندي و نجيب بالصح تبانلي لازم تعرفي حرام نخليك هكا
-انطقي خلعتيني
-يا مينا بالاكي تجبديني و الله غير نطلق
-يا ربي احكي والله ما نجبدك
-عندها يومين جا زاكي جاب القضيان ليماه و قعد قصر شوية معاها
-ايه علابالي قضا ليها و ليا
-كي جا خارج تلاقا ب باباه داخل حكمو عرشلو
-علاش عرشلو زاد دنا للعجوزة
-ياودي الشيخ لي عرش الزاكي
-علاش خير ما قاليش
- باينة ما يقولكش بصك الشيخ بهدلو قالو انت ما تحبسش التبهديل و لا سوكارجي من صغرك واش خاصك تربي في وليدك خدام و بدارك كاش ما بقالك شراب انت حتى تولي تتلاوح و ناس يجيبولي خبرك ماشي عيب عليك.
انا سمعت كلامها و انا الفشلة حكمتني حسيت الدوخة جاتني ما عرفتش لاني قاعدة لا راني نوم
معرفتش كيفاش رفدت وليدي و لبست حجابي و خرجت اصلا بين دار شيخي و داري يا ربي 20 دقيقة مشية نلحق، طريق نمشي و نخمم مخي يدي و يجيب انا كيفاش ما شفتش كيفاش ما فقتش بقيت نربط فالخيوط مالقيت والو محال تكون تكدب المراة و هو لوكان باباه تبلاه او هدر كي ما هدرش معنتها ماشي حابني نسمع.
دخلت لداري بقيت نخمم نروح و لا نريح، نهدر و لا نسكت، ماعرفتش واس ندير و شكون نشاور ما عرفتش شكون يقدر يسمعني و يفهمني، زاكي غلطاتو كبار و ادا انا سامحت الناس ما يسامحوش.
حكمت سجادتي و صليت ركعتين استخرت ربي و شكيتلو و طلبتو يبينلي طريقي، حسيت بالراحة و حاجة داخلي تكالمات
بقيت في داري نخمل لحق المغرب دخل هو يقصر و يضحك مع براء و معايا و انا ساكتة ما قلت حتى كلمة سقساني واشبيك قتلو وتلو راسي او يوجع برك و هو امني
تعشينا و خملت الدنيا و حكمت براء بدلتلو و رضعتو و بقيت نرقد فيه حتى شفتو لبس و خارج، هو مالف ساعة ساعة يخرج و يريح ساعتين 3 و يولي بااصح عمري ما جاني بيزاغ و لا متبدل على واش خرج يقول كنت مع صحابي و حالتو ما تبينش العكس بالصح الخبر تاع اليوم خلاني نتوسوس خلاني نشوف مور الهيئة خلاتني نتعمق في تفاصيل علاقتو بيا كلامو معايا و نتفكر بلي كي يدخل يكون حنين بزيادة و يكون يضحك بزيادة و يكون حساس بزيادة و ساعات يكون حزين و واحد النهار عنقني و بكا و رقد بلا حتى كلام و غدوة من داك كي سقسيتو قالي صاحبو ماتت يماه غاضو، بالصح البكا لي بكاه ماشي تاع صاحبو غايضو. كلام سلفتي صحيح.... زاكي مازالو يشرب.
هاد الفكرة هيجتني ما عرفتش واش خذاني كنت ناوية نعسو و نتبعو و نحكم عليه كاش بروف بالصح ما قدرتش نصبر
-وين رايح عندك سهرة و لا تشرب بو خفيف و تدخل
-كيفاش
-قتلك عندك سهرة و مطول ولا تشرب غير بالخف و تدخل
-واش نشرب
-تشرب الشراب واش يشربو الناس هاد الوقت و في سهرة
-واش راكي تخلطي
-انا لي نخلط و لا انت لي خرجت كداب و 6 سنين و انت معيشني معاك في كدبة و انت عمرك ما خطيت الحرام
-واش راكي تهدري منين جاتك هاد الهدرة
-من داركم و من باباك لي حكمك غسلك البارح و قالك تربي في طفل و مازالك في خماجك.
خزر فيا مخلوع فمو مفتوح ما لقا ما يقول
-اسكت بيانسور تسكت علاش بقات هدرة، اخرتها معاك يا زاكي نرفد وليدي و دارنا و مانسحقك لا تزيد تحوس عليا لا تقول وليدي ما عندو ما يدير ب بابات سوكارجي مول قرعة
بقيت واقفة نشوف في عينيه و هو يخزر فيا مركز في عينيا و هاديك الخزرة قسمتلي ظهري، تمنيتو يكدبني، يداوسني، يضحك عليا، يسبني، تمنيتو حتى يضربني و يزعف عليا، كلش كنت راح نقبلو منو كلش يجوز كلش نعذرو عليه، كلش من غير هاد الحاجة.
درت بلا ما نزيد كلمة لخزانتي فتحتها جبدت حوايجي و حوايج وليدي نستف فيهم فالفاليزة و انا مشوكية مانيش قادرة نتخيل حياتي بعيدة عليه مانيش مستوعبة بلي خلاص اني رايحة و ادا رحت و الله ما نرجع بقيت نحط فالحوايج و الوقت ثقيل حسيتو دهر و كنت حاباتو يزيد يثقال حاباتو يفطن و يجي يفسرلي يحبسني يدير حاجة بالصح هو كان جامد صنم حجرة و عينيه محلولين فيا.
غلقت الفاليزة و درت نجبد حجابي و كوفيرطة لبراء باش نخرجو فالليل، حسيت بيدو جبدتني ما هدر حتى كلمة جبدني خرجني للصالون قعدني عالفوتاي و انا مسلمة و جا قعد على طرف الفوتاي و حكى بلا ما يخزر فيا
-مقدرتش نحبسو سييت و نقصت بالصح باش نحبسو ديفينيتيف ما قدرتش
جيت نهدر رفد يدو سكتني
-علابالك شحال عندي و انا نشرب ؟ علابالك شحال كان في عمري كي بديت نشرب؟11 سنة كان عندي 11سنة انعم ايه حليب يما مازال في سنيا و تعلمت نشرب و نزطل، علابالك كيفاش بديت؟ كنت نهرب مالدار بصك ملي ندخل و هو يسب و يضرب ادا ماشي فيا في يما و ادا ماشي في يما يسب و يداوس في يماه و لا الناس جاو يشكو و يداوسو فيه و الزعاف لي يكون فيه يخرجو فيا بسبة و بلا سبة و عمري ما فهمت علاش، كنت نخرج نهمل فالنهار و فليل غير باش ما يشوفنيش و ما يضربنيش، و الزنقة واش راح نلقا فيها كانو غير الزوافرا لي ما يحاوزونيش الناس ڨاع تزڨي عليا و يحاوزوني باش نروح للدار غير السوكارجيا لي ما يدوهاش فيا وليت نروح للبلايص الخاليين باش واحد ما يحاحيني و لا يحلوزني و لا يضربني و لا يسبني و نريح مالبعيد مخبي نشوف واش يديرو و بالشوية وليت نستناهم كي يروحو كاش ما يخلو شوية شراب فالكانيطات يا لوكان قطرة و ساعات يخلو القرع منصفين نكمل نشربهم انا فاللول كان يجبدني الجوع نضل هامل نحوس كاش ما ناكل امبعد عجبني الشراب واحد النهار لقيت قرعة كاملة و قارو مبروم و ماشي شاعل نساوه بيه بالبربكي شعلتو و تكيفتو وشربت القرعة كاملة، هاداك النهار حسيت الموت دخلتني رفدت روحي بالسيف لدار ماني يمات يما غير شافتني قاتلي لاه جايني باباك تهنى من حسكم و انا جايين تصدعولي راسي ما هدرت حتى كلمة دخلت ديراكت لبيت فارغة دايرينها للخردة مور ما خرجو خوالي بديارهم فرشت حصيرة و رقدت يومين باش فطنت و نحكيلك الواعرة ڨاع ماكاش لي حوس عليا من غير جدة يمات بابا لي تقلقت عليا، يما لي ولدتني و ما حوستش عليا و ماني ماجابتليش ڨاع خبر بلي راني مرمي في ديك البيت
حسيت قلبي وجعني عليه كفل صغير في عمرو 11 سنة و ماكاش لي لاتي بيه مخليينو للزنقة تربي فيه، يماه كنت عاذرتها و غايضتني بالصح اليوم عرفتها بلي انسانة ضعيفة و جايحة و انانية تخمم غير في روحها تحوس غير تسلك من قهر الراجل لي طاحت فيه تسكت على حقها و حق ولادها مالخوف منو علاش جابتهم كي ماهيش قادرة تقومهم علاش ظلمت روحها و ظلماتو معاها بقيت نخمم طلعت راسي نشوف فيه لقيت دموعو حابطين على خدو
-علابالك علاش حبيتك و نحلفلك بالله يا مينا لوكان نتسيباراو و تسمحي فيا غير نقدر نموت ما عنديش وجه نقابل بيه انا لي غالط بالصح ما عندي ما ندير بالدنيا هادي وحدي مور ما عرفت الحنانة و الهنا و واش معنتها بنادم يعزك و يحبك و يخاف عليك و انا لي عشت والديا رامييني و هامليني علابالك يما علاش حافي معاها بصك نكره ضعفها نكره نشوفها مذلولة لراجل رخيس و حقار مايسواش فراك في سوڨ الرجال و هي حاملة ذلو و الحڨرة تاعو و ذالتنا معاها لحقنا ناكلو الحشيش و هو يعمر القفف و يديهم لصحاباتو و عيني تشوف
خزرت فيه
-تاكلو الحشيش؟!؟!
-جاتك بيزار؟ والله غير كلينا الحشيش مالا ورق الشجر دارتهم شلادة و قاتلنا هاكو كولو و كلينا ماشي خطرة ماشي زوج حتى فاض الكاس و ماوليتش نقدر نحمل رفدت روحي و هملت من بلاد لبلاد نحوس على لقمة ما يهمش حلال ولا حرام المهم لقمة و 14 سنة لقيت روحي في بلاد غير بلادي و طايح في حجر الق...حاب غير هوما لي يحنو عليا وليت نفحت لرض و نهمبر و لي نجيبها نروح ليهم هوما يحنو عليا و عندهم واش راح نلقا زعمة باينة شراب و زطلة و خماج لي راسك ما يتخيلوش و مانيش حابك تعرفيه.
-و دوك واشنوها سبتك علاش مازالك تشرب
-ما علاباليش، نكدب عليك نقولك مالقنطة، قبل منك صح كنت نشرب مالقنطة تاع بابا، بالصح دوك لالا ما علابالي بيه ماني معمر راسي بيه تامنيني الحمد لله تهنييييت منو تقول حياتي معاه عندها قرون ملي خلاصت
-مالا علاش ؟
-ساعات مالفرحة و ساعات نحسد روحي عليك بليس واعر و انا ضعيف نقول علاش ربي عطاني هاد الطفلة و هاد الحياة و انا مانستهلهاش
-ضعيف قتلي ايه مالا ابق...
-لالا ما نبقاش خلاص والله غير خلاص والله ما نبقا
-علاش نامنك و انت حلفت من قبل و كدبت
-بصك ما كنتيش في داري و بصك ما كنتش مجرب المعيشة معاك و الهنا في داري كيفاش
-و هاك جربت واش تبدل علاش قر فيك
-لالا دوك ما نقدرش نصبر
-ماتقدرش تصبر عالشراب ايه بالصح عليا انا و وليدي تصبر بلا مزيتك
-لالا ينعل بو الشراب لي يخربلي داري و يحرمني منكم, شوفي نديرلك لي حبيتي اقسم بالله غير قابل بكلش والله و ديريني نشاف عند رجليك قابل بالصح تريحي هنا معايا و نعاهدك قدام ربي ما يزيد يدخل فمي
-ما نقدرش نامنك
-واشنوها الحاجة لي تريحك واش ندير باش تقدري تامنيني قوليلي والله غير لي هيا نديرها
بقيت نخمم حتى جاتني في بالي
-صلاتك تصليها كاملة فالجامع ماكاش حاجة تربيك قد الصلاة فالجامع
خزر فيا وقف راح جاب المصحف و جا فتحو و حط يدو
-نعاهدك قدام ربي مادامو عاطيني الصحة ما نفرط في وقت و ما يزيد الحرام يدخل فمي و لا داري و لا كاش ما حكمتي عليا روحي راكي مسامحة.
- نشوفو! شوف راح نقعد بالصح ماتستنى مني والو طحت من عيني بزاف و انا ماشي لي نقدر نلعبها
-ديري فيا واش تحبي بالصح ما تروحيش ....
5 اشهر جازو و انا poker face لي تعني وجه الخشب يعني زابطتلو وجهي قايماتو من كلش حتى من حقو فالفراش و يديه بالصح ما عيا ينوض فالنص و يروح يدوش و هو ساكت بصك تقول راهو مع بوبية ما نتحرك ما نتفاعل ما نحس بيه و انا لي نمووووت و نفنا عليه بالصح مادام القلب ماشي راضي ماكان حتى بنة، و هو مدامو عارف روحو هو لي غالط دار كلش باش نرضى و نسامحو و اهم حاجة شد في صلاتو ولا يروح مع بابا للحامع و انا بابا الصلاة فالوقت ما يراطيهاش و هادي علمتهالي ماما
(ان الصلاة تنهى عن الفحشاء و المنكر ) و صح وين تغيب عينك عين الله حاضرة و سبحان ربي الانسان لي يوالف صلاتو يولي يتجنب الحرام قد نا يقدر باش ما يضيعش صلاتو و يولي يحس ربي راهو يشوف فيه في كل وقت مالا يحشم يعصيه و هو يشوف فيه و زاكي هاد الحاجة فادت فيه
لحق عرس لوستي و مع التوجاد و العرس رحت قعدت عند عجوزتي 10 ايام و الغاشي و الحس وليت نتلاقا بيه كي الضياف حسيت روحي توحشتو و بزااااف.
نهر العرس عندهم قاراج فيه دخلة مالدار و دخلة من برا رحت نجيب فالكازيات تاع الما و القازوز، مطلعة الجبة فالسليب من و من و طابست نرفد الفاردو حتى حسيت بيه مورايا، ما خفت ما تقلقت علابالي بيه ريحتو و تفاصيلو مغروسين في عقلي و قلبي درت ليه نضحك
- جابك ربي ايا السبع ارفد ارفد
هو كي شاف الضحكة في وجهي تقول اليوم لي طلت عليه الشمس
حكمىي وجهي بيديه و باسني بوسة طوييييييللة و حلوة سكر ولات في حاجة اخرى رفدني و حطني فوق الطابلة لي تم و طلعلي الروبة و بلا احم لا دستور دخل فالمفيد و انا ما قلتش لالا اصلا حتى انا توحشتو و حسيت بيه ندم و تاب و هداه ربي تفاعلت معاه بشوق تاع سنين جازت روعة شوية من الوحش و شوية مالضحك و شوية مالخوف تاع كاش واحد يدخل علينا و كيما يقول هو تاع السرقة تجي بنينة.
عاودت حياتي معاه تجددت تقول عروسة علاقتنا ولات خير من قبل الثقة بيناتنا زادت و هو راحلو الهاجس لي كان مخوفو و طريقتي فالتعامل مع ماضيه ريحاتو ما كومونتيتش ما حكمتش عليه سمعتلو و خليتو يفرغ قلبو ما تعاليتش عليه ولا وحدو يجي يريح في حجري و يحكيلي كل خطرة على حاجة و ساعات نضحك ساعات نبكي بالصح الاكيد مغامراتو ما يخلاصوش.
بعد عام و نص من هداك النهار وليدي كبر عندو عامين جا مروان داه لماما، مسكين خويا مرتو رفدت 3 خطرات زوج طاحولها و واحد مات في كرشها، كي خويا كي هيا يموتو على وليدي و بنت ختي يجي يديهم في كل وقت يونسوهم و ينحو بيهم الشوق.
دخل زاكي مور الظهر راح صلى و جا لقاني وحدي
-اليوم الحفلة مالا
-تاع واش الحفلة هادي
-تاعك انتي
رفدني و داني معاه للشمبرة
بقينا لتم حتى مور العصر و هو عڨابي حسيت الدوخة حكمتني منو جبدت روحي و تغطيت بليزار نستعفى
-واش الزين علاش بعدتي ايا نزيدو كاس
-يا ديني ما تعياش انت ما تحبسش ماشينة خلاص عييت اطلقني يا محمد سيدي خلاص عيييت
ما عرفتش ڨااااع باش تبليت م فقت غير عالقفزة لي قفزها لبس شورت و جا قابلني نفضني نفضة جيت واقفة و انا عريانة جبدت الدرا راح نتغطى و تجيني زعطة كيفاش عييتي عيتي مني
-ايه عييت منك و خلاص بزاف ليل و نهار و انت لاصق فيا ما تكرهش انت انا مليت والله
وجهو كحال
-ما عينكش فيا مالا وليت نعيي و مليتي و كرهتي عندك الحق انا لي عطا..ي و محروق عليك
-ايواه اك قلتها
و يدور معايا بكف و راح جاب المونش ا بالي قتلني بيه ما فهمت والو الضرب لي في حياتي ما تخيلتوش كليتو داك النهار
طلقني كي الميتة و ناض للدوش
- نخرج مالدوش نلقاك واجدة ايا روحي تروحي داركم يربوك تحكي مع راجلك ولا يلقاولك صرفة
قعدت نشوف فيه مخلوعة مالشوك ما عرفتش واش ندير
-نوووووضي
عيط عليا قفزت نضت نجري لبست و وجدت حوايجي و حوايج وليدي ديت قيس يومين ماعرفتش واش ندير
شفتو كي تكونو تقصرو تولي فالصح و تولي في مشكل ما تعرفوش كامل مين خرج؟! هكاك صرالي
ركبنا فالطونوبيل و انا مشوووووكية بالعة لساني
-وصيتك النهار اللول قتلك ما تعكسينيش ماعكسيش ز.... ما عكسينيش
-فاش عك....
-بلعي بلعي بلعيييييه رب فمك هاداك
بلعت لساني ضربة وحدة، تمتم لحقنا للدار حطني سلم على ماما قالها عندي خدمة يومين نروح نسلع و نجي نديها
هاداك النهار جاز تمتم و انا غير ساكتة و غايسة و فالليل ما رقدت ما بكيت ما هدرت حسيت روحي في كاش منام كي شغل ماشي صح بقيت غير غايسة نشوف فالفيد، فاتو اليومين و انا بنفس الحالة بالصح الضربات لي في لحمي رجعوني للواقع السطر قتلني لحمي مدقدق، قلت الحمد لله لي كان يضرب للتحت ما قاسنيش في وجهي و يديا كان يضرب للرجلين و لي فاس بقيت ساترة روحي باش ما يبانش بالصح ماما حست بحاجة بقات تبع فيا و تعس فيا حتى قاتلي
-يا طفلة انتي ماكيش ثقيلة ؟!
-اه!!!
-دايخة و مطلوقة و تحوسي غير ترقدي و عينيك يبرقو لا ما خفتش نكدب راكي بالجوف اكي تحسبي لروحك
-والله ما علابالي يا ماما ياك علابالك بلي يتخلطولي ساعات
-خلاص مالا اصبري نبعث حمزة يجيبلك تاست و نشوفو
درت التاست و خرج بوزيتيف و زادت داتني ندير لي زاناليز و منهم للجينيكو دارتلي ليكو و لقاتني في 4 سمانات جوف و انا لا خبر
زاكي النهار الرابع باش جا و كان داير في بالو جاي للدواس و بابا و مروان يستناو فيه بالشواقر بصك مور ما تكالما تكاكا باللي زاد عليها بزااااف و ماكانتش تستاهل كامل هاداك الضرب و انا من جيهتي فهمت علاش درت هكاك فالحقيقة ريحتو كانت تقلقني و انا ما فهمتش واش بيا و هو الوحم
قابلاتو ماما بزغاريد و خبر يهبل و انا فالفراش و كي شفتو زدت عليها و هو قلبو خرج فرحان و خاف عليا و غايضاتو و كبرت في عينو كي ما شكيتش منو لدارنا مالقري غلط معايا.
من داك النهار زاكي وعدني عمرو ما يزيد يحط يدو عليا و عمرو ما ينقص من كرامتي و اليوم بعد 13 سنة زواج جبت رهام و رحيل لي نهار الاول ما حبهاش و قالي نجيب زوج و نربيهم مليح خير ما نجيب كازيرنا و نرمي للزنقة تربي بالصح من نهار خلقو بناتي و هو عاشق فيهم مع براء مزير و معاهم مطلوق يقولي الطفل لازمو التزيار باش يخرج راجل و البنات لازم الحنانة باش ما يحوسوش عليها برا.
حياتنا مستقرة شرينا تراب و بنينا دارو رانا قريب نكملوها
زاكي عمرو ما فرط في صلاتو وعدني و وفا و عمرو ما زاد غلط في حاجة
ولادي ناجحين قرايتهم و صلاتهم و تربيتهم الحمد لله الناس يتماثلو بيهم، جازت علينا فترة زاكي خسر كامل دراهمو و دار اكسيدون و هاديف الفترة انا خدمت بديبلومي و تعاونا حتى وقفنا من جديد على رجلينا و ما مديناش يدينا للناس و الحمد لله راجلي شاطر و خدام و قدر يولي خير ملي كان و نهار ولا قادر قالي تحبي تحبسي الخدمة و تريحي فالدار قوتلو ايه اصلا انا خدمت غير باش نخفف عليه الحمل و نتعاونو
قصتي فيها عبرة مخفية اعرفو تختارو الاب و الام المناسبة لولادكم، انتي و لا انت تقدر تبدل شريك حياتك ادا ما تفاهمتوش بالصح الدراري مجبورين يتحملو نتيجة اختياراتكم و يكبرو تحت ضغط الامراض النفسية و العقلية لي بليتوهم بيهم.
و من جهة ثانية ما تحكموش على الانسان من اغلاطو يمكن ضروف الحياة وسخاتو و هو معدنو ذهب لانو ببساطة ... في اغلب الاحيان المظاهر خداعة فاحذروا.