درت التليفون في وذني نسمع الغنا و الحس و صوتو
زاكي: وي حبيبي الو نا تقوليليش رقدتي و ما تقلقتيش عليا يا العدوة
ضحكت ، كل ما يقولي العدوة نضحك: قوتلو مانيش راقدة نستنا فيك تعيطلي تقلقت عليك والله ما قدرت نرقد وين هملت
قالي : يا يما على الورد ماو داير فيا و في قلبي، يا طفلة نقصي الحنانة هادي راكي جبتيني ارض راني نطيح طابلة على جالك واش نزيد
قوتلو علاش حنوني واش درتلك انا و ديجا ما تبدليش سوجي وييييين راااااك هامل ؟ و هاد الحس ڨاع واشنوه عرس؟!
قالي: كي شغل عرس راني سهران مع صحابي قعدة عربي و ديجي
قوتلو وين هادي:قالي فالحمامات
قوتلو واش من حمامات في نص ليل يهديك ربي
قالي والله راني فالحمامات في تونس
هو قال تونس و انا حسيت مدفع ضرب في راسي، زوج بلايص مادابيا ما يشوفهمش مايروحلهمش وهران و تونس نخاف نمووووووت
قوتلو: واش داك لتونس انت
قالي والو خلاص الصيف ينقص الغاشي و تهنيت عليك جاني صاحبي مقبيل نسلفلو شوية دراهم رايحين فالبيس قلت نروح معاهم و بطونوبيلتي رحنا في 4 نحوسو يامات و نولي ما نبطاش 15 يوم برك
قوتلو 15يوم برك!؟!قليقة هي ال15يوم عندك
انا دوك قتلي تونس حاسة قلبي راح يحبس انت تقولي 15يوم
قالي علاش يحبس قلبك يا عمري اني عيطتلك والله ماكان الريزو حتى شريت بيس باش نغيطلك والله يما مازال ما عيطتلها
قوتلو حرام عليك يا زاكي تعرفني نهبل دوك انا نريح موسوسة وبن راح و معامن راه و واش راو يدير و شكون دار بيه انا هنا و ماشي مرتاحة نبعتك للزهو و لاليبرتي و نكون مليحة
بدا يضحك عليا بالصوت: قالي يا المهبولة انا نحاهد باش نديك و درت ڨيرا مع خوك و زدت زدمت في عرش قريب قتلونا انا و مروان باش فرات بيناتنا و فتحت عليك باش انتي دوك يبانلك تتوسوسي يا المهبولة وراه الڨلب لي يشوف في واحظوخرا وين راه القلب لي يبكيك
قوتلو ايه هاكاك بلعطني بلعطني لوكان صح اك قتلي قبل ما تروح ماشي حتى لحقت و راك سهران باش تفكرتني يعني حتى ستفت الافكار و وجدت القالب الصحيح لي راح تبلعطني بيه، ولا يضحك و يستغفر، انا شوف ماللخر مادامك تماك دير في بالك راني قاعدة عالجمر و نتكوا و انت و راحتك ادا عطاك قلبك تكويني ريح تم و خليني هنا
قالي: آااااااه يا ربي واش درت لعمري انا؟ يا طفلة خافي ربي فيا والله غير ساهر مع صحابي نجوز يمات برك و نجي اكي شفتيني غير الحانوت و السبور و الله غير كرهت حبيت نخرج شوية علاش حبيبي تعزيها فيا خرجة خطرة فالزمان مع صحابي علابالك بلي ما تهونيش ما نقدرش نزعفك عداك يا نكويك والله يا حبيبي غير نحبك والله ما نشوف في وحدة ما تعمرلي عيني وحدة من غيرك علاش مازال ما عرفتيش واش تسواي والله والله والله غير نفنا و نموت على جالك يا الورد
ضحكت برد قلبي ولا تقدرو تقولو بلعطني الستوت يعرف يجيبني طابلة هههه كيما يقول هو.
قوتلو خلاص حنوني بالصح تعيطلي صباح و عشية و ما تلقالي حتى سبة و وين تروح تصور كي جي توريهملي بلادات و نعطيك دعوة شر لوكان تشوف في مراة واحدوخرا
قالي ايه ماعليه اراجلي زيدي واش تاني
قتلني بالضحك قوتلو بركا ما تعوج في فمك
قالي شفتيني و نزيدلي يدي راهي في جنابي و نشالي بيدي و نقول احي على دقتي
ضحكت من قلبي قالي اضحكي اضحكي يا الصفرو يا بنت جمال ماكي دايرة فيا يا الستوتة طالبك يهودي يا العدوة على كبري وليتي تمشي فيا و تتشرطي عليا و انا كي توتو نقولك ماعليه كي نجيك نوريلك ادا ما قطعتلكش هادوك الشوارب مانتسماش زاكي
قوتلو ايه واش ندير نغيييييير الله غالب
قالي غيري و زيدي عمري ديري رايك اني قابل و شكون يسالني ايا حبيبي نروح نريح مع صحابي دوك يبداو يعايرو فيا هوما تان يعيطو لماليهم
قوتلو اوك و كوبيت صح غايرة و موسوسة و مقلقة بالصح هدراتو ريحتني شوية حنوني البلاعطي اللسان لي عندو هاداك هو لي قالو عليه يرضع اللبة.
غدوة من داك صباح ما عيطليش عرفتها سهرو و تعب الطريق ما نادش بكري مالا ما تقلقتش، لتيت مع شغل الدار مع ماما و ختي حتى نطقت ماما قاتلي اسمعي عيطي لراجلك شاوريه نخرجو مع طاطاك صبيحة تدينا لخياطة لي تعرفها نشوفو المودالات باش توجدلك الدراوات انا اني نوجدلك واحد تاع غرزة الحساب و تزيدلك هي واحد تاع التعمار و الباقي نشروهم طالعين.
قوتلها ماكاشو ماما راح مع صحابو لتونس حواسين كي يعيطلي العشية نشاورو، ما شكيتش يقولي لالا على كل حال
قاتلي ايه بصحتو مطول؟!
قوتلها قال 15 يوم
قاتلي ماعليه بصحتو بالصح انتي شاوريه باش غدوة نروحو الصباح نشوفو المودال و نشرولها القماش و نتهناو منو يا بنتي 3 سنين يجوزو يجرو عاللي يتماطل
قاتلي ختي وقتاش راح
قوتلها البارح عشية مع المغرب
قاتلي ايه شفتك كي كنتي تعيطي و تعاودي و تليفونو طافي وقتاش هدرتي معاه هادا
قوتلها فالليل ڨاع عيطلي و قالي
قاتلي ايه سمعتك في نص ليل تهدري فالتليفون كانت فايتة الوحدة
قوتلها ايه هاداك الوقت
قاتلي انا والله ما عرفت منين جبتي صحانية هاد الوجه السيد صاحب خوك و مقابل الباب و داصري فيه و تحكي معاه نص ليل و الناس نيام
قوتلهة نداصر فيه ؟! صافا شوية ليلى ياك علابالك بلي خاطبني و مفتح عليا تسمى راجلي معليش
قاتلي ابه امبعد خاطبك وقتاش لحقتي تعرفيه و تڨصري معاه و يداصرك حتى تلحقو تڨصرو في نص ليل غير ادا الحكاية عندها مدة و الدصارة بيناتكم قديمة
قتلها الله يهديك والله ماكي نورمال
قاتلها ماما يا طفلة تبركاي من هاد الهدرة و ترمي فالكلام على ختك ولا لالا واش راحلك فيها تهدر معاه فالليل ولا فالنهار لوكان تلتاي بدارك و راجلك لي سامحة فيهم و باقية هنا عايشة تبعي في ختك واش دارت واش ما دارتش ماشي خير
خزرت فيها ختي و دارت خرجت مالكوزينة.
كملت انا و ماما نديرو فالبقلاوة حتى قاتلي اسمعي بالاكي تنساي واش قوتلك شاوريلة غدوة لازم نروحو
قوتلها اوك ماما نقولو بالصح ماشكيتش يقولي لالا
قاتلي علابالي ما يقولش بالصح من باب القدر مليح تعلميه المساوىة بيناتكم مام هو يولي يديرلك قصة و يشاورك الراجل يموت على المراة لي تقادرو و تحترمو يا بنتي
قوتلها اوك ماما بالصح قوليلي زعما نايديموداش المودال منا على 3 سنين
قاتلي يديمودا السوقي تاع المرشي بالصح تاع خدمة اليد لالا يا بنتي هادوك هوما الطبع حاحة تاع زمان تاع عوايدنا يطبعو الفراش شان و هما كي تفرشيهم و يجوك ناس دارك.
ديك العشية زڨالي زاكي مع العصر. قالي هادا وين نضنا ندوش و نخرج نفطر و نخرج ندور شوية فالبلاد مع الدراري صحابي
قوتلو على ماما قالي ادا يدينا يونس قوتلو يونس ماكاشو يدينا مروان و يجيبنا مروان مالا قالي ماكان حتى مشكل انا مادوريليش مع هاداك الن...يشوفك ولا يهدر معاك نڨتلك و نباصي عليه ابار صا علابالي عمري فحلة ما ينخافش عليها.
ديك الليلة ماما قالت لمروان غدوة الصباح يوصلنا و كي نكملو يجي يدينا و ميما كان الحال الصباح نصنا بكري خملنا كلش و ماما طيبت الفطور بكري باش ادا بطينا ولا ما نحيروش فيه
قولت لختي تجي معانا قاتلي ايه مادابيا مام انا نخيط دراوات لبسنا و رحنا لدار طاطا صبيحة لقيناها غير هي و بنتها الباربي على قولة ماما
ريتاج صغيرة عليا ب عامين و نص واقيل و عاقلة عاقلة مسكينة حجرة ما تتحركش و صوتها ما يتسمعش قعدنا شوية و روحنا فرينا شغلتا كونا في واحد ولينا في 6 دراوت 3 ليا و زوج لختي و واحد لماما بالصح مخدومين بالقماش ماشي بالكروشي و التعمار كيما ديالي اللول و لوخرين حبيتهم سامبل فيهم قماش مخلط و فيهم بابيوانت بالصح بلا عقاش و برودي الواحد يقدر يرقد عليهم و اختي دارت كيما انا و ماما حباتو نواغ بالغوج طاطا صبيحة ضحكت عليها قاتلها يا وداد هادا تاع عرايس
جاوبتها ماما: يا ختي انا عند راجلي مازالني عروسة يا حنونتي نتهنا على بناتي و نلتى براجلي واش يمنع
كي تجي تشوف ماما مازالها الروايح و المكياج و لي ماش و لاكوب و الشعر كل يوم مجبود و الجبة لي تلبسها هاد العام والله ما تعاودها العام الجاي متهلية في روحها لاقصى درجة وين نبانو حنا قدامها حتى هيا تقولنا علاش ما خرجتوليش علاش.
وليت للدار عيطت لزاكي 3 مرات ما ريبونداش، حتى ال7 تاع العشية باش بعتلي مساج قالي اليوم كاين حفلة تاع الزهوانية يروح يحضرها مع صحابو الحس ما يقدرش يعيطلي
انا ما نصبرش ياك تمتم رفدت التليفون عيطتلو زوج خطرات باش ريبوندا
أنت تقرأ
رأفة حب.....روضت المنحرف
عاطفيةفاقد الشئ لا يعطيه قول كاذب و ظالم و منافى للحقيقة، فلا اكرم و لا اجود في العطاء ممن فقد و حرم من حب و من قلب و من حنان و من رزق و من دفء. تذكر....ان تكون يتيم احساس لا يعني دوما ان تكون اجوف خالي المشاعر بل انك ادرى الناس بقيمة الاحساس و انك اكثر...
