رأفة حب.....روضت المنحرف

الجزء 15

تخلعت و ابشع سيناريوات جاو في راسي
ساميتها بزربة و قوتلها بالخلعة و العياط: واش كاين زهرة ما تحبسيليش قلبي انطقي
عنقتني بكات بكات امبعد مسحت دموعها و بدات تحكي: قاتلي كونا خاطبين لخويا عندنا واحد 6 اشهر و متفاهمين فالصيف يجيبها
قوتلها ايه علابالي حكيتيلي
قاتلي: كي روحت بالويكاند حرڨ الشعير قالك ندير فاتحة سي ندير فاتحة و حنا عوايدنا الفاتحة نهار عرس الطفلة، هدرت معاه ماما و بابا و انا والو هدرنا باطل
مالا سلمناوو لمينا روحنا باللي كان ماما كانت مخبيتلها شوية دوزان و دراهم الصداق وجدنالها فاليزة تاع الدفوع و التبق و رحنا درنا الفاتحة.
قوتلها صحة وين راهو المشكل لحد الساعة عادي انتي علاش راكي تبكي و حالتك حالة
قاتلي : علاش ما تعيطليش لالا مرت خويا اليوم نشفتلي الدم في عروقي
قوتلها خير علاش
قاتلي الطفلة بالجوف و داخلة في شهرين.
ضربت يدي على صدري: ياحي عليا واشبي جدها هادي
قاتلي هاديك هي لي حسيت بيها و نزيدلك الشابة
قاتلي لالة ديرولي العرس هاد الشهر دبرو راسكم خوك ما يجيش يحشيلي ب فاتحة و زحسباتلو سكتتي انا نحب نشد الليفري فيدي و نشالي بيه
سينون يخلصها كيما يحب،
قلتلنا: يا زهرة ختي هكا تهدر معاك!! هادي جادور
قاتلي بوه عليك ما شفتي والو اني خايفة على ماما و بابا الطفلة ما تحشمش و حنا شفتينا كيفاش بزاف كالم تجي تهرجنا و تمرجنا علابالي
قوتلها اييه و دوك كيفاش و ديجا انتي علاش تعيطلك تفريها مع لي مدتلو قاعها
قاتلي: المشكل هو لي قالها تعيطلي
قوتلها مبوهة: كيفاش؟ يا حاي نندب كي سيدي كي لالة في زوج عند روحهم في زوج نساب السلطان 
قاتلي و نزيدلك المليحة
قوتلها بشريني
قاتلي لالة عيطت باش تقولي انتي لي تهدري مع يماك و باباك و تقنعيهم انا ما يجيش يحشيلي بالفاتحة راهو يقول والديا ما حبوش العرس ماهمش واجدين حتى للصيف و انا ماكاش كيفاش نهدر قولي لزهرة عاقلة و تعرف تقنعهم، قاتلي انالا يا لالة زهرة يالعاقلة فهمي يماك بلي ما عندكم حتى حل يا تغاولولي فالعرس و تلمو الحكاية ياما والله غير نولو و نرميهولكم و بالفضح و الفضايح و يطب غير فيك و في يماك تربو فالكبابل و انتي شوفي انبعد شكون ياخذك، تولو تتوراو بالصبع خوك يكرش فالبنات و يجيبلكم تربو ولاد الحرام و دعوة الوليات تخرج غير فيك انتي مالا غاولي افريها قبل ما تتفر بصك انا عادي نتفضح نرفد يما و نبدلو بلاد شوفي انتي.
بقيت حالة فمي
قتلها: زهرة اكي صح منك
قاتلي والاه غير صح يا مينا ختي راسي راهو راح يطرطق من الهدة تاع خويا و من العريانة هادي مالقا مع شكون يباصينا
قتلها سامحيني مي هادي غولة يا ختي واش راح ديري دوك
قاتلي واش ندير لازم نفريها مع بابا و يما ولا اني حكيتلك واش ناوية دير و ديرها صح
خلعتني الطفلة
قوتلها يا زهرة ختي مالفين نسمعو البنات هوما لي يخافو و يولو يحلو باش ينسترو هادا راهي تهدد  و تخلع فيك و في وجهك الله يسترناوو يستر علينا واشنو هاد العباد
قاتلي والله غير من نهار دخلنا لدارهم نا حملتهم ما دخلو قلبي كي شافية كي جيت حكيتلك قتلك شاف خويا طفلة و ما عجبتنيش بزاف
درتلها براسي ايه: خلاص حنونتي فيها ولا فيك انتي احكي لماماك. اش كاين و خليهم يبهدلوه خوك الجايح مالقا ما يدير ما صبرش يديها قاتلي اصبري نلتالو برك هاداك الهامل.
قعدت معاها حتى تكالمات، كانت كل ما ترفد التلفون باش تعيط تعاود تحطو و تبدا تبكي خايفة على باباها مريض مسكين و يماها كيفكيف حسيت بيها مسكينة خايفة و مقلقة و ما لاقية واش تقول، تفكرت ماما ضربة لي سمعت مروان خويا يهدر مع الطفلة و الخوف لي شفتو في عينيها عليه البلا واعر الله يبقي الستر علينا و على بناتنا و ولادنا.
كي حسيتها ريحت و جملت عقلها خرجت و خليتها تحمي مع يماها على راحتها. بالصح انا تماك وين حسيت بالوجعة كنت حابة نعيطلو نحكيلو و نحس بالامان معاه و يطمني و يعطيني حل و يكالميني و يقولي واش لازم و كيفاش ندير، زاكي عاشر بزاف ناس و مرحي عالجيهتين يعرف يتعامل مع جميع انواع البشر و هاد المراة ماراحش تخوفو بالعكس يقدر يخليها تتخبى و تخاف، حاجة فيا كانت تقولي عيطيلو اي جاتك السبة ياك هو قالك نكونو صحاب و اي حاجة تسحقيها تلقايني شديت التليفون في يدي و كومبوزيت نيميرو ديالو و نخزر فيه انا راح نعيط و زهرة خرجت مالبيت تعيطلي
زهرة: مينا ادخلي البسي حجاب اجري نسحقك
دخلتني و دخلت تلبس هي تاني
لبسنا و نحكو
انا خير وين
قاتلي: واش عندك دراهم قتلها ايه عطاني بابا و كنت مخبية قبل حسبت لقبت مليون و 7مية
قاتلي مزية حتى انا مخبية 2و نص
قتلها علاش
قاتلي بابا قالي 10 ايام نديرلهم عرس باللي كان
قتلها ياحي
قاتلي والله مالا نخرجو دوك نشرو دوزان القاطو و الطراشن و الحاجات و نبروفيتي مادام البنات هنا نتعاونو نوجد لي لازم و يبقالنا العشا تلتا بيه ماما و خالتي
قوتلها اوك
و هكداك درنا جوزناها ضحك و لعب و دموع و قرايا اصلا ما بقاش للڨزامان.
زهرة دايرتها مليحة مع ڨاع الناس طفلة تنحط عالجرح يبرا مالا لقات ڨاع البنات في لاسيتي يعاونو فيها، كونا كل يومين نديرو نوع تاع ڨاطو نهار نطيبوه و النهار لي موراه نسقموهوو نديروه فلي كيسات، نتلايمو 7 8 بنات فالكولوار نسيقوه و نفرشو و نريحو نستفو و نضحكو كانو زوج بنات عندهم فورنو تاع تريسيتي جابوهم ولينا نطيبو على خطرة و مزيهين الحالة بالضحك و اللعب و الدربوكة لي في كل محضر تحضر و لي عندها لبسة جابتهالها و لي قدرت تعاونها بحاجة ما بخلتهاش (والله يامات الاقامة و الجامعة ما يتعاودوش) خلينا الصابلي و القريوش و لي الصالي هوما اللخرين باش ما ييبسوش و نهار لي باش تروح جا بابا دانا و جات معاه ماما بصك عرضونا رحنا بتنا معاهم مساكن صح زواولا بالصح يعني متولين من كلش دارهم لاباس بيها خوها كان باني فوقهم شمبرتو و كوزينة و بيت صفيرو و صالونب الصح  ماكملش الصالون و الكوزينة مافيهاش الكتروميناجي قيس ما دخل تريسيتي و الما و سبيغة و شرا الشمبرة خلاصو دراهمو بالصح قاتلو يماه ماعليش اصلا انا وحدي طيب معايا و تريح معايا راني وحدي زهرة تقرا و هي اصلا طفلة بين 3 خاوة ولاد، دارو العرس الطفلة ما دارتش تصديرة و العرس داروه فالسطح لبست قفطان و بقات بيه و كي جا دارلها الخاتم لبست روب بلونش كملنا العشا و ماما مدتلها ليمات زهرة تاوسة مليون و انا كنت قلب لبابا من قبل بلي الدراهم سلفتهم لزهرة ماما قاتلو باباه مريض حب يديرلو العرس قبل ما يموت
قالي بابا خليهم لها و زادلي مليون قالي تعاون روحها بيه، دارنا يحبوها زهرة بصك صح نعم التربية و مام يماها و باباها ماشاء الله بالصح واش يقول الواحد النار تجيب الرماد خوها خرجلهم خرجة مالڨصب و جابلهم جاادوووووور للدار قد ما نقولكم شحال واعرة و تخوف قليل عرفتو هادوك النسا لي يعاطيو فالزنقة و يبداو يتعايطو ويقطعو في حوايجهم و يديرو فالسينما عرفتوهم هادوك ايوه... مرت خو زهرة أكثر منهم فجورا.
زهرة مسكينة ما ريحت ما تحطت حتى جاز العرس و تهنات على خوها و يماها علابالها بلي ما تقدرش وحدها و كيما كانت تقول خير البنات في لاسيتي عمري لا ننساه و عرضتهم كاملين و لي فدرت تروح جات ختى فالعرس هبلنا مليح.
غير ولينا جبناها تربص مغلق مع الامتحانات ما رفدتش راسي دقيقة غير كملنا ديركت للدار عرس هدى ما بقالوش و حنا عراسنا 7 ايام و 7 ليالي .
لي يشوف الزربة و الضغط لي كنت فيهم و كيفاش ما كنتش نلقى الوقت حتى باش نحك راسي يقول نسيت بالصح انا تشهد على دموعي المخدة لي كل يوم نبات نبكي و غارسة راسي فيها باش ما يتسمعوش شهقاتيو يشهد عليا التلفون لي ما نطلقوش كل ما يصوني نقول هو و اليوم رابحة للدار يا ربي واش يصبرني كي يقابلني يادرا راهو يتعدب على فراقي كيما راني نيتة عليه ولا فاتني و نساني و حاب الجديد، واش يتعدب و هو يقولي بفمو انا ضعيف قدام النسا لازملي مراة في حياتي. هاد الفكرة كنت نحسها موس في صدري قد ما سييت نتقبل بلي ماكتبش المكتوب و هاكدا هير ما يديني و بدور عليا و باللي اصلا البداية غالطة ماحقنيش ماللول ندور بيه اصلا لوكان جا عينو فيا كان هو يدير طريق ليا بالصح هو ما عجبتو ما جيتو في بالو و ميما قال هو ساعات تعجبو وحدة يروح هو ليها و ساعات يقصدوه نسا و ما يردهمش، وجعت روحي بيدي هو لمحلي على هاد الشي من قبل و انا الجايحة ما فهمتش، دوك كي فهمتها وجعت روحي بيها احساس بزاف واعر تفيق بلي كنت زيادة بلي قاع واش حسيت شعور من طرف واحد هو دايمن يقول ما نفرطش في نعمة ربي، بالنسبة ليه اي مراة تجيك برجلها ما تردهاش اشبع منها و سرحها، لحقت لدارنا قانطة، الوسواس ديالي زاد عليا، مزية حانوتو مغلوق دخلت ديركت رقدت ماني قادرة لا نحكي لا نقابل الغاشي صح عييت مالامتحانات و لابريسون و زيد الطريق بالصح والله ما قد ما طيحتني الافكار لي في راسي...