من هداك النهار بقينا نتهادرو اما كنت نحس بالحكاية ما ولاتش كيما اللول، تقريبا كي عرفني شكون هاد الشي ما جابش النتيجة لي كنت حابتها بالعكس زاد بعدو عليا و هاربي ربي سيدس مليح و زيدلو الهو و الريح يعني شوية ثقة بالنفس لي لميتها تبخرت فالهوا حسيت كي عرفني شكون ما عجبتوش و انا هادا هو الهاجس ديتلي بالصح تعرفو نلسقلك فالرودة هاديك هي انا، مي بعد شي 20 يوم حشمت على اصلي واش نريح نعيطلو ندير و هو كلامو غير واش راكي الحمد لله واش تحكي من عندك اصبري جاو ناس ايا امبعد
كرهت قررت ما نعيطلوش و نشوف.
و كيما كان الحال ما عيطتلوش ما عيطليش و خلاني هكاك النار شاعلة فيا شوية من الحب و شوية من الولف و شوية من الوحش و شوية من العشم، غاضتني عمري والله بيناتنا ستنيت يدير هدة يتوحشني يحوس عليا💔 علاش يا زهري علاش دايمن داير عليا (يعني ماشي دايمن هادي اول مرة نجرب بالصح لزوم الدراما اكو تعرفو) و بديت بالنديب و النويح و حالتي شيانت و اكتابت و دورتها اغاني حزينة و حالتي ولات تغيض هملت قرايتي و صلاتي، حتى ناضو زهرة تعرش
زهرة : واش الالة خير برك مايكونش راجلك كلاه البخر و خلاك ب زوج دراري في رقبتك ؟ ولا ما يكونوش غرقولك البابورات و راحلك راس المال؟
انا: راس المال راح و كمل و لوكان غير بفايدة اااه يا زهورتي ماسويت حتى ابال من عندو العدو شهرين و انا نعيطلو و نحلب فيه و نرقق في صوتي و نخلق فالقصرة باش فاللخر غير عرفني شكون برد قاع و كي خليتو ما عيطتلوش والله ما خسر عليا حتى مساج
ناضت زهرة تضحك عليا : بوه عليك بوه يا الجايحة هادا الغبينة قاع على راجل حتاني مابينك و بينو والو السيد علاش كاش ما وعدك كاش ما طمعك
انا: فالحقيقة والله ما قال ما هدر بالصح انا ستنيت يدير حاجة يدير جاست بالصح اكي تشوفي الرجال تاع اخر الزمان
قاتلي : الله يهديك يا طفلة بركاي ما تحلمي وحدك و بركاي مالتبهليل باش تلتاي بقرايتك و روحك و دنيتك و صلاتك و صلاحك قاعدة تتبهلي و تبكيلي على حماية انتي لي رسمتيها في عقلك الراجل لوكان غدر بيك ما عليش يا مخلوقة انتي لي راكي رامية روحك عليه.
خزرت فيها تيريت عليها ب مخدة و حاوزتها مالشمبرة و بقيت وحدي نبكي و دايرة الغنية تاع ليال تمنيت الموت تديني عليك و نبكي قلب و رب ااااه يا زاكي ما درت فيا كويتني كويتني.
جازت سمانة عليا حسيتها دهر وليت نروح للجامعة نتكركر نلتي روحي و نولف في روحي بالسيف غيابو و زهرة عقابي نهار كامل و هي مورايا مع هيا فيمينيست و مناصرة كبيرة للمراة القوية هاداك هو الحساب وليت انا شغلها، شوفو هي صح الحكاية تبان جايحة و ماشي لي نطيح على جالها و ماشي لي نمرض و نفسيتي تتعب منها، بالصح و الله واعرة والله توجع كي تمني روحك و تتجرأ و دير خطوة عكس طبيعتك و عكس تربيتك و مجتمع غير باش تتقرب من شخص حابو و تحاول جهدك امبعد يعاملك ببرود والله احساس انك ماتكفيش ولا ناقص ولا دون النستوى والله يحرق و يوجع و انا تخلطو عليا قاع الاحاسيس من جيهة ندمت لي درت الخطوة و من جيهة والفت هدرتو و قصرتو مام ادا ماكانتش كيما تمنيتها و من جيهة نحبو و تمنيتو ليا يا ربي لحقت نصلي و ندعي ربي يكتبهولي و توحشتو موت يا ربي تعبت و عييت يا ربي صبرني.
هاداك الويكاند ما حبطتش للدار جاني مروان جابلي القاطو و حوايج مقيين و مصروف و ماكلة بصك كانو بداو لي كونطرول ريحت فلاسيتي نراجع، و الجمعة مع العصر صونا التليفون تاع الفليكسي لي كنت عندي شحال ما حوستش عليه اصلا الفليكسي تقريبا كليت قاع دراهمو ضربت طلة لقيت نيميروه، قلبي وليت نسمع فيه يخبط راح يخرج من ضلوعي بالسيف باش استجمعت قوتي و سقمت التنفس ديالي و قدرت نريبونديلو
زاكي: سلام، وي مينا واش راكي
يا ربي داك الصوت😍الرجلة تقطر منو
انا: و عليكم السلام، الحمد لله و انت واش راك هادي غيييبة كيفاش تفكرتني اليوم
زاكي : كنت مشغول شوية و ضروف خدمة اكي تعرفي
انا: ماعليش ربي يعينك الحمد لله كي تفكرتني و سمعت صوتك
سكت شوية وامبعد قالي : جيستومون حبيت نحكي معاك ادا راكي قاعدة
سقمت قعدتي و حكيت : وي خير اني نسمع قولي
قالي : شوفي مينا انا نهار عرفت انتي شكون حوست مليح عليك و على داركم هي صح انا راني خدام في حومتك بالصح مانيش وليد البلاصة علابيها حبيت نعرف و نضن هاد الشي من حقي سيرتو مور ما صارحتيني و جيتيني ماللخر و انا نحب الناص الصريحة بصك انا تاني صريح
مالا دوك حابك تعرفي بلي انتي ماكيش ليا ماللخر انا وياك مانتوالموش و منقدروش نكونو كيفكيف.
زاد كمل عليا مليح مليح، كلامو حسيتو موس و جوزوه على قلبي النفس لي ندخل فيه حسيتو يوجعني ماعرفت نهدر ما عرفت نرد ما عرفت حتى نخمم و هو مازال مكمل يهدر
زاكي: شوفي ماتتوسوسي ما تلومي روحك ما والو عادي ديريني خوك انا مروان حبيبي و خويا و داير فيا الخير و عمي جمال باباك سيد الناس قدرو عزيز عالناس كامل و انا انسان ماشي كيما راكي متمنيتني شوفي بالاك الحاجة الوحدية لي مليحة فيا هي الصراحة والله غير ماكي ديالي
ماجيت ننطق بالسيف: تسمى ماعجبتكش هكا ماشي النيفو ديالك
قالي : شو داك التخمام لي عندها يا حاي عليا وين روحتي انتي
جاوبتو: اه مالا واشنو ياك انت صريح مالا اهدر بصراحة
قالي: شوفي هي قضية عجبتيني ولا لالا انا والله ماخممت هكا يعني طفلة ماشاء الله عاقلة و قصرتك حلوة و متربية و مثقفة و قارية و زيد بنت ناس ماشاء الله و العيب ماهوش فيك انا لي مانقدرش نكون معاك و سامحيني ما نقدرش نفهمك اكثر من هكا، يا طفلة انا خوك حبيبي و ثاحبي و داير فيا خير نروح انا نخرجلو ختو علاه ولينا شمايت يا الزح قلوبنا كليناهم ولا كيفاش
انا : بالصح انا ماقتلك لا خرجني لا نخرجك انا حاباتك فالحلال
هو: عليك نور جوستومون انا مانيش تاع زواج سيرتو دوكا، شوفي مينا باش نقصوها من تالي انا نشوفك اختي و انتي ديريني كيما مروان غاب مروان يحضر زاكي و كاش ما تسحق ختي من عينيا تلقايها و سامحيني ادا كاش ما غلطت معاك فالهدرة .
انا: يعطيك الصحة تعيش لالا مسامح ماكان حتى مشكل
كوبيت و حطيت التليفون و دخلت فراشي و رقدت بكل هدوء تالمون كلامو وجعني حتى طرافي بردو ما عرفت نسبو لا نبكي عليه ولا نعيط مالقيت غير نسكت و نرقد بالاك يخف الوجع.
أنت تقرأ
رأفة حب.....روضت المنحرف
Romanceفاقد الشئ لا يعطيه قول كاذب و ظالم و منافى للحقيقة، فلا اكرم و لا اجود في العطاء ممن فقد و حرم من حب و من قلب و من حنان و من رزق و من دفء. تذكر....ان تكون يتيم احساس لا يعني دوما ان تكون اجوف خالي المشاعر بل انك ادرى الناس بقيمة الاحساس و انك اكثر...
