اشتهي معك ليلة مجنونة احاصر فيها جسدك في زاوية من زوايا غرفتي فعل يتحقق الحلم ؟؟؟؟؟؟
خرجت انا و زهرة نقضو بلا ليست لي دارتهالنا ماما، لابسة روبة بلوسيال و خمار و سندالة بلونوي و غوج كلاااااغ و قلوس فوقو و غيسيل و زهرة دارتلي لايناغ (كنت فرحانة بيه كيما البنات الصغار كي يديرولهم الغوجالافغ فالعرس) عيطتللو
-صباح الخير حبيبي
-صباح الورد يا الورد وين راكي هكا
-هاداوين خرجت مالدار انا و زهرة
-اااااه انتي و زهرة 😒 ڨعرتيلي الڨوسطو مع صباح ربي
- ههههه علاه تاني
-ايه انا صبحت صبح ربي قلت اليوم فيها جورنيا كومبلي كاش ما الواحد يصبح على بارتيا و لا زوج ولا عشرة
جبدت روحي و نقصت حسي
-يعطيك الربح يا السوفاج صبح صباح لله بديت من دوك غير طفي الضو و ابرد راح تدينا نقضو و نولو لا ڨوش لا دروات
-ما عليه يا لالة ديري رايك ديري ياك يجيك نهار و نحطك تحتي و تماك نوريلك اللسان و الهدرة
-كي تحكمني ديري فيا رايك دوك راني فليتساع خليني نرجل شوية
-ايه ماعليييييه ماعليه ايا اني لحقت نستناك فالخرجة بلا ما ندخل للزنقة ديالكم اوك
-خلاص 4 دقايق نكون عندك
شديت زهرة و مشيت نغاول فيها، توحشتو عندي قريب شهر ما شفتوش الفاكونس و العرس و الحري و هو بدل بلاصة تاع الخدمة و تربط بيها عجباتو خير مالكوسميتيك و فيها فايدة خير دايمن يقولي الحمد لله لي راييتي عليا والله غير نعود نشاورك رايك فيه الصواب، و فالحقيقة علاقتي معاه تسقمت بزااااف، ولات عندي سيطرة وليت نعرف نسيؤ معاه نعرف لي تفرحو و تزعفو و نعرفو وقتاش يقول الصح و وقتاش يكذب و مام هو ولا يعرف يتعامل معايا اصلا هو منهارو بزوج كلمات يبلعطني بالصح دوك ماولاتش قضية التبلعيط لي يدور بندامة ولا يحب يرضيني حبو ليا ولا ينشاف من فعايلو و مام ماليه و بالاخص جداتو لي فالصح ماعيش جداتو هي عمة باباه و عندها عامين ساكنة معاهم مور ما مات وليدها الوحدي لي كان عايش معاها و مرتو قاتلهم ما نقدرش نرفدها راح زاكي جابها و يحبها و تحبو تقول يماه ماشي غير جداه.
وصلت عندو طونوبيل كل ستة اشهر يبدلها هاظ المرة جاب 307 فالابيض شابة تهبل
طلعت ظالقدام و زهرة ماللور
-صباح الخير زهرة ختي واش راكي يا لالة هادي غيبة
-صباح الخير خويا (زهرة مالنوع لي ما تكثرش الهدرة و تحشم مالڨري نهار تزعف تحكم التليفون تغسلو غسيل بالصح كي يكون الكالم كيما اليوم تلقاها حاشمة و ساكتة)
- وانا ماصباحش الخير عليا
-شوف الغيورة شوفةياك قتلك صباح الورد عندي 5 دقايق
-لالا هاديك ما تتحسبش
-ايه مالا صباح الورد يا الورد، و جبدني سلم عليا في خدودي
ضحكت و ديمارا داير الغنا و يشاور في زهرة واش تسمع و انا نضحك نقولو تسمع ام كلثوم و هو يضحك يقولها عدنا غير كلثوم يماها ما جاتش اليوم
جوزنا نهارنا فالجري و هو حطنا و راح و العشية كي كملنا ولا لينا فطرنا و جابنا للدار
خملنا القضيان و وجدنا الدوزان تاع القاطو غدوة تبداو و ديك العشية بابا دا زهرة لدارهم و ناما راحت مع مروان عند مولات الماكلة
صونالي التليفون رحت نجري علابالي بيه هو
-وي حبيبي
-اسمعي اكي نسيتي صاشي عندي فالطونوبيل نجيبهولك
-بوه واش من صاشي واقيل راك غالط
- مانيش غالط ابعتيلي وليد عمك و لا مروان خوك يجي يديه
-دوك نحبط انا ماكاشو مروان
-شكون او معاك فالدار؟!
-ماكاش اني وحدي كامل خرجو
- ايا خلاص اني جاي 😈😈
ربع ساعة. كان لحق صونالي التليفون كوبيتلو و حبطت اصلا كنت فالبالكون نطل عليه
لابسة جبة تاع دار قصيرة شوية و مدخلتها فالسليب و شعري ملموم طوماطيشة و دايرة الفارني في رجليا و يديا حمر و لابسة بليغة تاع صبع اصلا كنت مباصية بالشغل درت في بالي نشد الصاشي و ندخل
غير فتحتلو الباب شافني من تحت لفوق، طبعني و دخل و غلق الباب موراه خلعني تالمون كلش رابيد
-زاكي واش بيك
-واش بيا بيا انتي يا العدوة
جبدني بين يديه و زير على جنابي
-اي واشبيك بالعقل وجعتني
-ينعل بو العقل لي تعرفيه علاش انا هكا كاش ما يبقا فيا عقل علاش راكي لابسة هكا علاش راكي ديري هكا علاش راكي تتحلوني هكا ؟! تحوسي عليا ؟! تحوسي تبروفوكيني
جبدني ليه و دخل في رقبتي يبوس و يعض و يديه من جنابي يطلعو و يحبطو و من رقبتي لشولربي و بدا يقوي فالجهد و الاحساس يزيد و انا اكثر منو نحبو و منصبرش عليه و مقنعة روحي بلي راجلي حلالي مانيش نغلط و هو والف هاد الشي لوكان ما نرضيهش انا تغلبو نفسو و يروح للحرامو انا نموت لوكان نعرف زاكي توشا كاش واحدة.
بفينا متلاصقين منعرف قاع شخال فاتووقت و هو غير يزيد يهيج، الروبة طلعت مالتحت و حبطت من فوق ما خلا حتى بلاصة فيا ما قاسهاش بيديه امبعد جبد روحو من صدري قالي ايا نطلعو لبيتك و نكملو تماك خير
مزية لي بعد شوية عليا ولالي شاهد العقل
-يا خاه حاب تفضحنا امشي دوك يجي بابا ولا مروان حابهم يودمو يلقاونا هكا امشي روح
-صح منك تخليني هكا نروح
- زاكي والله ما وقتها دوك يجو ماهمش بعاد
-واش دخلني في ق....انا احكيلي على روحي تخليني هكا تشعليني و تقوليلي روح منا دوك يجو
بستو من خدو نرعش مالخلعة
-يا عمري والله ما درتلك حاجة يرحم باباك حنوني والله غير نتبهدلو و نولو في فضيحة مع بابا و مروان
- ايا اوك ديري في بالك بلي انتي لي عكستيني
فتح الباب و خرج مشنف سمعتو كي ديمارا حارڨ الطريق طلعت نطل عليه مالبالكون انا شفتو دار و خرج مالزنقة و طونوبيل تاع بابا دخلت مالجيهة التحتانية، بقيت نحمد في ربي لي سترني كنت راح نروح فيها اليوم.
كملنا التخمال و جوزنا اليامات بالجري و هو مشنف عليا تشناااااف كبير و انا قد ما سييت نراضيه بالهدرة والو يحوس نخلفهالو و انا ماعنديش كيفاش ندير مربوطة بالعرس و زيد دارنا تعمرت بالغاشي و التحرحيرة نانقدرش ڨاع نسكيفي و اصلا ماماش وين نروح كي كان قدامي كانت ساهلة و اصلا حانوت نسا و مغلوق و فيمي دوك كيفاش ندير ؟ ماكاش حل بقيت نساعف فيه و نحلل و هو زعافو سم يخرجهالك من عينيك و انا نقطة ضعفي الغيرة نهبل و الوسواس تاع كلمة انا ضعيف قدام المراة نخاف غير كاش ما يوسوسلو بليس و يروح يدير.
لحقت ليلة حنة مروان و زاكي وقف معاه فالعشا وقفة خو و تصالحو و ولاو صحاب خير من قبل.
كي خلاصت الحنة برا مع صحابو يروحو يسهرو مع الغنا و الشطيح زاكي بعثلي حمزة وليد عمي نحبط نشد عليه التبق لي فيه الدوزان و التاوسة
لقيتها سبة كنت مسقمة روحي فالدار تاني درنا سهرة مع الفاميليا، حبطت ليه بجبة رايحة فالسواغي فيها اليدين بروتال و و مشرشفة على الكتاف بالنواغ و الكروفات (تشبه شوية للڨندوغة تاع شيراز بالصح بلا هاداك الدهب و المحزمة ) و الباب كان مشقوق طبعو و دخل رحت ليه نتزعبل بالصابو و الروبة مزيرة عليا و الغوج في فمي خصني غير شوينڤوم و نولي نبان رقاصة، نشوف فيه عينيه قلوبة بالصح ما حبش يبين طايح زعفان لحقت ليه عنقتو و سلمت عليه و هو تم خلاص طارلو العقل حط التبق فوق الكرسي و جبدني ليه يد في ضهري و يد في رقبتي و باسني بالزعاف امبعد ولات بالحنانة لي نحبها فيه و انا فرحانة نضحك في وسط فمو و هو يكمل ما جا يطلقني بالسيف
-ايا روحي دوك و مازال حسابنا ما خلاصش باش ديريها في بالك
ضحكت عليه، المهم طارلو الزعاف و رضا عليا، شديت التبق و طلعت نجري ...
جبنا العروسة و درنالها ايطاج فوقنا وحدها بالصح الشهادة لله الطفلة تتحط عالجرح يبرا من كلش و من نهارها ماما تقولها حطي راكي عروسة و هي والو تمشي بنيتها لاقصى درجة و تساعف كامل الدار و ما تشكي ما تقول عييت مالڨري مروان مور الزواج بان نورمال ماشي هاداك لي ملهوف على الزواج كان فرحان وي بالصح هاديك اللهفة ماكاش مور عرسو بيومين ولا للخدمة و الطراجي عيات فيه ماما و بابا قالهم داخلتني سلعة و ضيعت بزاف دراهم فالعرس و الدار لازم نوقف على رزقي، بالصح ريتاج ما شنفت ما قالت حتى كلمة ضحكتها ما تفارقش وجها بشوشة و عاقلة مسكينة.
3 اشهر مور مروان السمانة اللولة مور ما دخلت للقراية هاد العام اللخر جاتنا عجوزتي و لوستي و شيخي لتحت مع بابا باش يعرضونا لعرس فؤاد و يوصو و يعاودو على المرواح و عجوزتي تحلف لماما باش تجيبني معاها
كي راحو عيطلي هو قوتلو مانقدرش نجي عدنا عيب و ما تصلحش ولا يحلف فيا و يشنف عليا ما لقيت ما نقولو زاد دخل مروان لقانا نقصرو قاتلو ماما بلي معروضين كامل قالها بالصحةلي نعرفو نورمالمون مينا ما تروحش قاتلو ماما دوك نشوف .
قاعدين انا و ماما فلكوزينا نشربو فالقهوة صباح دخلني ميساج من زاكي ( بالاكي ديريها بيا تعرفيني مهبول و نخلي العرس و نجيك )
خزرت في ماما
- ماما واش درنا في عرس فؤاد لوسي تروحو ؟!
-ايه نروحو علاش انتي ما تجيش!؟
-ياماما كيفاش نروح للعرس ما تصلحش ڨاع
-بوه عليك علاش ما تصلحش راح نباتو عندهم حنا ياك عشا و حنة و دور حكايتها ساعتين نباركولهم و نجو
-جااتني عيب والله
-دوك راح توريلي انتي العيب و ماشي عيب و انا نروح وحدي قتلك مافيها والو و اصلا شفتيها كيفاش توصي و تعاود عليك نوضي بنتي نودي يسجيك.
ندت نحوس واش نلبس فتحت الخزانة نشوف حتى قابلتني الروبة تفكرت داك النهار شبعت ضحك على روحي و عليه اييييه يامات الخوف.
حطيتها فوق الفراش، دخلت للدوش دوشت و خرجت ديراكت للحفافة جبدتلي شعري اصلا ماشي طويل و دايراتو ايفيلي ديقرادي يلحق لكتافي و ماكياتلي و جيت للدار عاونت ماما لبست و لبست انا حبطت مرت خويا لابسة و تاحفة اصلا عروسة لازم تبان و هي بسلامتها بوبية ربي يحفضها مالعين.
ما جينا نكملو نوجدو رواحنا كانت لحقت الخمسة تاع العشية.
العرس دايرينو في دارهم في جوايهنا جينيرالمون ڨاع نظيرو فالدار قليييل لي يدير فلاصال، دخلنا روطار العروسة كانت قريب تكمل تصديرتها جاو مالين زاكي يماه و خياتو و عماتو فرحانين بينا مالقاوش وين يحطونا يعني الحق هوما ناس زواولا قيسهم قيس الحال بالصح فرحو بينا و قامو بينا، دارهم تبان معاودة زاكي مسكين قبل عرس خوه عاود كلش من فايونص ل دال دوصول لصبيغة حتى مالفراش و القش شرالهم جديد ...
بقيتونقصر كل خطرة تجي تريح قدامي وحدة و ماما مع النسا تقصر و تبريزونتي في عروستها فرحانة بيها، صونا تليفوني
-وي وين راكم لحقتو ولا مازال
-رانا قاعدين مع النسا فالصالون كيفاش لحقنا عندي نص ساعة و انا معاهم
-شكون او معاكم
-يماك و ماما و مرت خويا و خياتك زوج
- صح دوك نبعتلك بنت ختي ارواحي
جاتني طفلة صغيرة
-طاطا مينا ارواحي معايا نسحقك
نضت معاها نمشي بالعقل بالطالون لي لابساتو وقفت قدام باب تاع شمبرة مغلوقة دقدقت و راحت
تفتح الباب بالخف بانلي غير وجهو و يدو كيفاش خطفتني ،جبدني بالخف و غلق الباب
دور المفتاح و دار ليا
-يا يما جاتني بالحمر يا يما تحوس تقصرلي العمر واش ندير فييييك يا الورد واش ندير فيك.
ضحكت عليه نموت بالحشمة كي يبدا يهدر هكا نموت و ندوب
دورت عينيا نشوف نلقاها شمبرة العروسة مفرشة و واجدة و قشها محطوط
-شمبرة خوك هادي
-لالا شمبرتي هادي انا خليتهالو يتزوج فيها
-و انت وين راك ترقد
شاورلي على الفراش
-هنا مازالها شمبرتي، كنت نستنا فيك باش تجي ندشنوها و نروح لداري
رأفة حب.... روضت المنحرف
أنت تقرأ
رأفة حب.....روضت المنحرف
Romantizmفاقد الشئ لا يعطيه قول كاذب و ظالم و منافى للحقيقة، فلا اكرم و لا اجود في العطاء ممن فقد و حرم من حب و من قلب و من حنان و من رزق و من دفء. تذكر....ان تكون يتيم احساس لا يعني دوما ان تكون اجوف خالي المشاعر بل انك ادرى الناس بقيمة الاحساس و انك اكثر...
