رأفة حب.....روضت المنحرف

الجزء 40

تحت اشراف السي زاكي...
فتحت عيني و رميت يدي باش نجبدها لعبوني ما لقيتهاش، دورت راسي نحوس عليها بعينيا فالشمبرة لقيت حجابها و حوايجها و سباطها مكاش، خبطت يدي عالفراش تنهدت و غمضت عينيا
-انت لي حبيت انت لي حبيت تخلعها و تخوفها و تبعدها عليك علاش راك نادم دوك علاش راك محروق عليها، بالصح تمتم هربت دين ب.. كنت حاب ندخلها في عبوني نحس بدفاها و رعشتها و حشمتها و عشقها بين يديا خطرة لخرة و تروح، هربت تجري العدوة ماسويتش عندها حتى بقا على خير،😏 على الخير لي شافتو معايا تبقيني على خير .
نضت غسلت توضيت و خرجت لبست سروالي و فيستاتي و رفدت مفاتحي و دوزاني و خرجت نسيت حتى الصلاة لي توضيتلها اي من دوك بدا الروبار يتبحر.
رحت لاغيسيبسيون سقسيت عليها قالي لاجون لي تماك بلي شافلها طاكسي و راحت دت تقودت ڨاع قسامهم الطاكسيات تاع لي زوتال يا تلقايه يدراڨي فيها يا يلعبها عليها و يخسرلها و هوما ڨاع ولا ق.... ديماريت ديراكت لعند لياس صاحبي غير هو لي يفهمني بالصح واش راح نقدر نحكيلو ما علاباليش واشنوه الحل و لا القرار لي ديتو واش راح تكون نتيجتو علابالي بلي وجعتها بالصح حتى انا يعلم بيا ربي واش راني نجوز واش راهو صاري فيا.
دورت الفولون ديركسيون الدار اليوم نفريها مع رب... ضربة واحدة يونامار ما خسرلي حياتي خلاص.
عيطت ليما نسقسي واش صرا مور الحكاية تاع البارح
-وي يما صباح الخير ....لباس لباس زعمة واش راح يصرالي ... شوفي لاكي حابتني ما نكوبيش و نروح نهمل ما تشوفونيش على 5 ولا 10 سنين زيدي عاوديلي هاد الهدرة.... شوفي كوبي كوبي انا الع....لي مازالني صابر عليكم كوبي يما مانيش حاب نغلط معاك.
عيطتلها زعما كاش ما تكالميني زادت على ما بيا الله ينعلها فاميليا و ينعلها راصة ڨاع.
عفست عالاكسيليراتور حرڨت الطريق لحقت للدار دخلت لبيتي ديراكت لميت قشي ڨاع ما خليت حتى بوكسور حبطت الفاليزا و الكابا للطونوبيل و وليت لقيت يما عند الباب تبكي
-و دوك علاش راكي تبكي
-علاش راك رايح ياك تعرفو ماجاكش جديد هادي هي عقليتو علاش يا وليدي و انا ليمن تخليني
-يما هادي اللخرة ديالو والله ما قعدتلو فيها يندب كنت قاعد على جالك و جال ولادك هو من بكري ماشي حاسبني وليدو بالصح مالبارح حتى انا مانيش حاسبو بابا و انتي انتي لي ركبتيه فوق راسك انتي لي خليتيه يعفسك و يرخسك امشي تروحي معايا خليك منو
-ما نقدرش يا وليدي ما نقدرش نخليه يدير واش يدير فيا محال نقدر نخليه وين نروح انت تتزوج و تجيب مرتك و انا كيفاش يصرالي شكون بيا لالا يا وليدي روح جوز يامات و تكالما و ولي و لا حتى غير طل علينا فالنهار يا سيدي بالصح باش تديني لالا منقدرش محال يخليني.
شفت فيها عينيها يقهرو معرفتش علاواش صابرة عليه علاواش حاملة الذل لي يذل فيها البارح سلك من يدي على شعرة كنت راح ننسى بلي بابا و من وقتها و هو مخبي منعرف وين.
Flash back on
دخلت للماڨازان الدوزيام نقلب فالكارني لقيت البيع ماشاء الله خير ربي و السلعة فرغت بالصح لي هاوشني كي طبيت على لاكاس فارغة اووو ماشي مالف ينحيهم منا عيطتلو
-فؤاد وين راك
-فالدار علاش
-ارواحلي للحانوت نتحاسبو اني نستنا فيك
شوية و دخل مشنف
-خير واشبيك مشنف تان
-راح يصرا مشكل كبير و انا مانيش قادر نزيد نساعف
-خير برك واش من مشكل
-باباك جا عندو يومين رفد لا روسات ڨاع و قال عندو شغل يفريه و يرجعها
-واش من غوسات تاع الحانوت
حسيت وذنيا صفرو الروسات تفوت 80 مليون واش راح يدير بيها
-اك تتمن...ك بيا انت واش من روسات لي رفد علاش تاعطيلو و علاش ما عيطتليش
-جا دارلي التبهديل لي كليون هنا و لا يطيح قدامهم و يحاوز فيهم اك تعرفو تاع سينيمات و حلفلي كان ما نعطيلوش غير يحاوزني و كي قوتلو لازم نشاورك قالي مع اللول بلي انت علابالك و امبعد كي شدهم فيدو قالي حكاية سمانة و يرجعهم مايشقاش تقولي
-ر....انت بنادم ولا واش كيفاش هادا ما يشقاش تقولي و جاتك نورمال انت علاش الرزق تاعو و لا تاعي و انت راجل و لا نق.... كيفاش بطا يطيح خلعك يا ز........يا خاه واش درت في روحي انا انا الع.....لي قلت خويا ستبيت نوقف معاه باش يڨعرني هو و باباه
-اني نقولك ماشي انا باباك
-باباك دوك نلتالك و نلتالو هو تان شحال عطيتلو ؟
خزر فيا و بلع ريقو عرفتها بلي هو تان او يسرق ايا دوك دير النية في هاد القوم .
تحاسبت معاه و نحيتلو المفتاح و خرجتو و حبطت للدار زلقاه مكسل يشوف في لاشان تاع الغنا و الشطاحات
-بابا علاش ترفد الدراهم ملاكاس مافهمتش
-سحقيت رفدت كان عندي شغل ديتهم و كي يدخلولي نرجعلك
-و انت منين راح يدخلولك 86 مليون في سمانة ظا فهمتش انا لاروترات ديالك 2 ملاين ما تلحقهاش
-و انت راك جاي تحسبلي و ديجا انا ديت 75 لي قالك 86 هو لي دا الباقي ادخل لشمبرتو تشوف الياوورت و الجوز و البنان لي كاين تم تفهم
-دوك حابين تهبلوني انتوما علاش ما تشاوروش سبحان الله واش هاد الشغل لي تسحقلو 75 مليون كاش ما شريت طونوبيل ولا حاجة
-ماكان ما قودك فيا واش نشري واش ندير انا لي ولدتك ماشي انت لي ولدتني و ندي كيما نحب و علاش نشاورك واقيل حسبت روحك وليت راجل و نشاورك هاداك ما بقالي غير كلب كيما انت يحكم فيا
-الكلب لي ماشي راجل هو لي خدملك الدار و راهو يصرف عليك و على ولادك لي حياتك ڨاع و انت سامح فيهم اللقمة لي راك تاكل فيها و جابها الملب لي ما هوش عاجبك و دوك نسحق رب دراهمي يحضرو خير ما نقلب الدار هادي عليكم و نوريلك الكلب واش يقدر يدير
-اييييه وليت تعاير فيا يالعط ... يا النق..... واقيل كي ناسبت السبوعة حسبت روحك وليت حاجة و جاي تنفخ في روحك عليا اي قود عليا برا و ما عندك والو عندي تحب تشكي تعرف دار الشرع و نزيدلك حاجة ادا ما بهدلتكش و درتهالك كبيرة مع نسابك مانيش عمر الضبع
-دارك كي كانت سيمان و تراب كتت تقولي داركم راكم ملمومين فيها و انا ما قدرتش كي رجعتها دار و نقيتها و خدمتها ولات دارك و تعرف تحاوز ياو مانيش خارج نسال فيها اكثر منك و تاعب فيها اكثر منك و دوك تنوض تجيب رب الدراهم باللتي هي احسن خير ما ننسى بلي انت بابا كثر ملي راني ناسي و ندمك على هدرتك و تم انت لي تروح تشكي
ناض وقف جا راح يرفد يدو عليا نحيتهالو و طبعتو جا طايح ولا يعيط ضربني ضربني كسرني جات يما تجري ليه
-قودي انتي لهيه انتي يباب البلا لوكان ربيتيهم ما يخرجو سوكارجيا و عاصيين هكا
-اواه اك غالط العرڨ دساس خرجنا سوكارجيا لبابانا لي ماكانش يصحا و خرجنا عاصيين لبابانا لي كان يضرب يماه و يزنحيلها دراهمها و يجوعها ولا نسيت انت انا ما نسيتش يا الضبع، دوك تجيب الدراهم ولا لالا
-مانمدش و من عندي ما راح تدي حتى فراك هادوك دراهم الكرا لي راك ساكن عندي باطل حياتك ڨاع
-هههههه ساكن عندك باطل مي ربك انت بنادم ولا واش تكون يا عمر مانيش حاب نلحق معاك للمحال روح جيبلي دراهمي ماشي انا زتعب و نشقا و انت تجي تديهم تصرفهم عالخامجات و نسا الرجال
-نصرف على لي نحب ما قودك فيا
-كي تجيبهم انت انا دراهمي ما جبتهمش بالحرام باش نعطيهملك، يماااااااا روحي جيبيلي الدراهم هير ما ندير فيه حاجة، درت لفؤاد، و انت ؟
- اصبر دقيقة
راحت يما تجري للشمبرة و فؤاد دخل لشمبرتو, شوية و جاو فؤاد دايلي واحد ل 25 ماشي غير 10 و يما جابتلي 60  قاتلي هادا واش لقيت 
و هو ولا يتهدد عليها راح يضربها درتها مورايا
-شوف يا عمر ادا راك راجل توشينا. والله غير نباصي عليك انا خرجت خرجت للعيب و راني منك واصل لاليميت لوجه ربي ما تپوسينيش ليها خلي نهارك يجوز
ولا يخبط و يكسر و يطيح و قالي دوك نروح نديرلك بورديل مع نسابك و تشوف واش نسوا و خرج.
خرجت مالدار هايج مكلوب نحوس نعيطلها نحكي معاها تكالميني نشوفها ضحكتها ريحتها بنتها يكالميوني باش ما نشربش و نزيد نعميها سورتو مور ما حلفتلها اميعد تفكرت حتى هي ربها تقولي كاين لي بردني كاين الف يتمناني، علابالي بلي ما ديرهاش و ما قصدتهاش هكاك بالصح وجعتني يا الزح دوك منين نلقاها من الخماج لي عندي فالدار و لا منها هيا نعلمها تهدر و تقادر.
ديسيديت نروح ليها و نربيها على الهدرة الخاسرة لي تحل في فمها  عفست الطنوبيل حرڨتنا نص ساعة نلحق عيطتلها حبطت كي شفتها جاية ضربتلي في راسي هدرتو الخامج هداك محال يخليني نتهنى معاها محال يجوزلي الحكاية تاع اليوم مسموم و يهودي و يخدم خدمة القح...ب يضرب غير مالتحت للتحت، الطفلة هادي ماشي تاعي ما تستاهلش واحد كيما انا صح نحبها و نعشق فدين والديها نتن......ك عليها بالصح حرام عليا نغبن بنت الناس عمري ما خممت فيها بالصح ماليها و هي بروحها واش راح يقولو كي يعرفو بيه سوكارجي و خامج يتبع في نسا الرجال و كاش ما يزيد يديرلي فالطفلة الڨزانات ڨاع حباباتو ما نجيب الطفلة ما نظلمها معايا.
ديسيديت نخوفها نخليها تكرهني و نحسسها بلي كنت نلعب بيها برك باش تجيها ساهلة و تنساني بالخف و انا نليكيدي كلش و نعاود نغبر منا مابقاليش قعاد مع هاد الراصة الخامجة.
End flash back.