رأفة حب.....روضت المنحرف

الجزء التاسع

غدوة من داك التصديرة و العرس فالصالة ملي رحت و هو حارق عليا التليفون و انا ماما مقابلتني ما نقدرش نهدر قاعدة غير نكوبي و نبعت فالميساجات و هو والله ما حبس ما فهم روحو يدير فالزكارة و بعتلي ميساج قالي والله و يطفي التليفون غير نزدم ليك نكسرلك وجهك و خليها تخلى.
ما عندي ما ندير طحت في يد مهبول و نكدب نقول ماهوش عاجبني هبالو انا كنت نتمنى الشوفة منو وليت مهبلاتو و يغير عليا و الله ما تخيلتها ڨاع.
جاز العرس و ولينا للدار ماما ما فاقتش بالصح ختي خزراتها ما عجبونيش
غير دخلنا نبدلو قاتلي مافهمتش و تليفونك علاش ما سكتش عرس كومبلي و انتي لاسقة فيه
قتلها : ايه صاحبتي تجوز في امتحان و ماهيش حافضة كنت نعاونها خطش انا محضرة من قبل
سكتت و بلعتها معامن طاحت
غوة من داك لحقني بابا لاسيتي غير دخلت عيطتلو
انا: يا المهبول هاكاك البارح ديرلي
هو : عالسلامة يا الورد توحشت صوتك و ضحكتك
انا : يسلمك حبيبي (ارق طبقة صوت عندك استخدميها سيدتي نوصي و نعاود) علاش يا خبيبي تهبل فيا البارح عمبالك استغليت العرس كي الناس هههه والله ما رفدت راسي مالتليفون علاش يا ماما هكا العروسة ما شفتهاش واش لبست مامبا
ولا يضحك و ضحكتو عذاااااب يا ربي يقهر
قالي: ايوه و هو الهدف يعني انا تخليني مكوي عليك و انتي تروحي تشطحي و طالقة لاطاي و شعرك و زينك للنسا يتفرجو و يجو ليماك يساومو و يخطبو و انا المغبون نتكوا و نبلع اواه ما قراوش عليها هادي
ضحكت علبه : ههههه بوه على دقتي بوه شوف وين داه عقلو اك صح منك زاكي
هو : والله غير صح ماكاش لامان ايماجين تجي وحدة تخطبك من يماك و تقبل انتي امبعد راح تقوليلها لالا ولا راح تقبلي و تسكتي
قوتلو : وانت واش تميز ؟!
قالي انا علا حساب واش نعرف فالنسا الكلمة اللولى و اللخرة ليماك و انتي واش تقول هيا راح تسكتي
قوتلو صار!!! تسمى كلش فيد ماما
قالي باينة هادي امالا و انا علاش نربحلها فالملاحة كي تجيني للحانوت تشري نقصر معاها و نعطيها قلب الحبة و نهار كادو نهار بنص سومة اسكتي راكي خليتيني
طرطقت بالضحك : قتلو تسمى راك داير لافار مع ماما يا ستوت
قالي مع عمي جمال فاريها من بكري و مروان حبيبي و انتي راكي فالجيب تسمى بقاتلي هي و صعيبة يا محاينك الما ما يسيحش واعرة يا حبيبي انتي بالاكي تكوني واعرة كيما هي
قوتلو : انا جاية كيما بابا كالم و ما نكعررش
قالي ايوه وانا هكاك نحبك
هو قالي نحبك و انا شهقت هادي اول مرة يقولهالي، قطعت الحس و باقية نتبنن فيها الكلمة استحليتها و هو راهو فايقلي و ساكت امبعد قالي حبيبي
قتلو امممم
قالي ياك تحبيني
قوتلو نمووووت عليك
قالي و انا يشهد ربي غير نتناااااك عليك و راني حايبك اليوم قبل غدوة في داري
قوتلو ان شاء الله يا روحي
كملنا قصرنا غير شوية و كوبا
وليت لروتين و هو كل يوم يعيط .كل يوم نزيد نتعلق بيه و نغرق في حبو و انا فرحانة ما درتش حساب القلبة و علاش انا منين لي باش نعرف طبابع الرجال و منين لي نعرف المخبي.....
واحد النهار عيطتلي ماما قصرت معاها شوية و تكوبات عاودتلها لقيتو طافي حطيتو و كملت نقرا حتى عاود صونا لقيتو يونس
انا : وي يونس
ماما : انا انا مينا
انا : وي ماما هادا نيميرو تاع يونس
ماما ايه ياك راني عند خالتك صبيحة (صاحبة ماما يمات يونس)
قصرت شوية مع ماما و زادت جوزتلي طاطا صبيحة و كوبيت
شوية و عاودلي يونس بقا يحكيلي على العرس و يقصر معايا و يضحك بعني باش نكون صريحة انا نتفاهم بزاااااف مع يونس و هو بزاف هايل و قاري و مثقف و لاباس بيه و بما انو قاري نفس التخصص ديالي كان يفهم مليح فالدومتن ديالي بقيت نحكي معاه و فهمني فالسوجي لي كان في يدي و نضحكو و نقصرو
في نفس الوقت كان زاكي معيطلي 3 خطرات الزوج خطرات اللولين محسيتش بيه بالصح الثالثة شفت النيميرو كي صونا انا قلت هادي هي الاولى و ماعرفتش كيفاش نليكيدي يونس قلت معليش كي نكمل و نعاودلو
هدرت مع يونس 47دقيقة و 17 ثانية....
خرجهملي زاكي من عينيا.....
كوبيت مع يونس كان لحق المغرب خرجت نتوضا لقيت زهرة قاعدة فالكولوار مع زوج بنات توضيت و جيت قاتلي امشي نحبطو نجيبو العشا قالو دارو الحوت اليوم و جا بنين شدتني من يدي و دورتني رحنا حبطنا جبنا العشا و فالروتور لقينا جماعة فالايطاج التحتاني دايرين حالو بالشطيح شدونا معاهم واحدة فيهم لي كانت معاه راح خطبها ريحنا معاهم لومبيونس و الضحك جابو باسينة و يطبلو و نغنو امبعد جابو الحنة و دارولنا ڨاع جبتها ساعة و انا معاهم غير الضحك و التمسخير حتى جاو لي زاجون فرقونا (يامات الليسي و يامات الاقامة و الله ما يتعوضو).
طلعنا نتجاراو و نضحكو حطيت الماكلة زهرة راحت تعاود تسخن و تعاود دوزن و انا رحت نعاود نتوضى و نصلي (عدنا مصلى فالايطاج) كملت و جيت حطينا تعشينا و رفدت غسلت و جيت قصرت مع زهرة شوية امبعد حكمت بلاصتي و تكسلت، قلبت تليفوني مالقيت حتى ابال من عند زاكي استغربت امبعد ضربت في راسي دخلت لي زابال لقيتو عيط 3 مرات كي كنت نهدر مع يونس بانيكيت امبعد قلت علاش واش درت ياك عادي
عيطتلو خطرة ما ريبونداش زدت شوية و عاودتلو ريبوندالي
انا : وي حبيبي، بقا ساكت ما نسمع والو، الو زاكي اك تسمعني حبيبي، والو ما كاش، الو زاكي واقيل الريزو تاع الهم اووووف، جيت راح نكوبي نطق
زاكي: انطقي ماللخر
انا : اك تسمعني؟!؟؟ واش ننطق؟!؟!
بقا ساكت ، وانا فهمت. و حبيت نكوف روحي يبان زعفااااان وانا منعرفش واش ندير عمرو ما زعف عليا وليت نخرج الكلمة بالحرف شوية مالخوف و شوية مالتستات باش نغيضو
انا: حبيبي راهو زعفان عليا ؟! كي ما ريبونديتلكش ؟! سامحني يا عمري والله والله كنت نهدر مع يونس و لتيت معاه حكينا شوية على عرس خوه بصك ماما عيطتلي من عندو راهي في دارهم و زاد فهمني فوحد السوجي كنت حاصلة فيه، و حشمت ما لقيتش كيفاش نريبونديلك و انا نحكي معاه امبعد حبطت لتحتا جبت العشا و حضرت حنة تاع واحدة معانا خطبوها دارولها البنات حفلة و طلعت صليت و تعشيت و عيطتلك
نستنا فيه يهدر بالصح ما قال والو
انا: زاكي اك تسمع فيا
قالي بكل برود : كوبي يا ربك كوبي
و كوبالي بقيت كي الطنهة نخزر فالتليفون ما فهمت والو جازو واحد العشر دقايق باش بديت نستوعب عاودت عيطتلو لقيتو طافي
بعتلو ميساج (حبيبي علاش زعفت واش درتلك ياك فهمتك والله ما قدرت نليكيديه سيرتو كي ماما راهي تماك عندهم و زيد انت ماشي مالف تعيطلي هاداك الوقت)
مع الوحدة تاع الصباح صونا التليفون
لقيتو زاكي فرحت حسباتلي خلاص جازو الزعاف
ريبونديت فرحانة : اول وي حبيبي الزعفان
قالي : تسمى هاداك ما كانش وقتي مالا ؟هاداك وقتو هو ؟! تمنيكي بيا انتي ولا تتقحبني ولا قالولك زاكي كافي باش فرخة كيما انتي تلعب عليا
تنخلعت من هدرتو عمرو ما هظر معايا هكا صح مالف يسب و نهار السبيطار قال العجب بالصح اليوم مختلف كان يحتقر فيا كي شغل انا انسانة عيانة : علاش راك تهدر هكا معايا واشبيك
زاكي : انا لي واشبيني راكي سور
انا :تهدر معايا تقول عليا واحدة مالزنقة
زاكي : يا ربك تلعبي على زوج حبال انتي مينا تلعبي على زوج حبال ؟
انا : واشمن زوج حبال اك على يونس يا زاكي انعل بليس راهو معريفة و تقدر تقول فاميلتي زاكي: شوفي يا بنت الناس انا مادرتكش صحبتي و ما نقولكش راح تولي مرتي و التبلعيط لي مالف بيه انا والله ما تسمات مرا اخرى باسمي من غيرك والله و نحرقها غير دايك دايك بالصح باش تتمنيكي بيا هادا فاميلتي و هادا معريفة و هادا جاري يا ربك انا بابا اسمو بوعلام ماواسموش ميشال
كي ولا يعيط هكاك خلعني
جاوبتو غير بالعقل: علاش حبيبي واش درت انا ياك مانيش نكدب عليك واش صرا حكيتهولك
هو: لا حبيبي لا ز.... جوستومون و هادي هدرة وجهك صحيح و تقوليهالي ...مقودة انتي واش راكي تشوفي فيا جاتك نورمال و تحكي فيها ..
انا: بالصح علاش واش قتلك لوكان جات حاجة عيانة مانديرهاش اصلا
ريبوندالي بطريقة باردة : مالا ديري في بالك بلي حاجة عيانة و عيانة ڨراف
بديت نبكي: والله يا زاكي غير نحبك و من غيرك ما نشوف حتى واحد فالدنيا
ريبوندالي لسانو ثقيل بنفس البرود : ياو شفتي و كملتي روحي يا بنت الناس انا لي غالط ماشي انتي قالهالي السيد لي ماو ليك غير يعييك
وليت نشهق: بالصح انا مانيش حابة نخليك علاش راك ديرلي هكا
ولا يحكي بالعقل تاع واحد عيان و حزين: معليش مانيش قادر نهدر معاك دوك خليني و الله راني كارهك و عايفك
حبطو دموعي : وانا واش ندير؟!؟!
ضحك : ربطتيها بيديك حليها بسنيك ياك اكي تقولي نحبك مالا نهار تولي تعرفي واش ديري تماك حوسي عليا.
كوبا زاكي و انا قلبت الدنيا بالبكا ، ناضت زهرة مخلوعة حسباتلها كاش واحد من دارنا صراتلو حاجة جاتني عنقتني و تسكت فيا بالسيف باش قدرت نفهمها كي فهمت ولات تضرب فيا بالبليغة و انا نغطي في روحي و قاتلي يغزيلك يا الجايحة الشح فيك عندو الحق حسبتيه كووول واقيل او غزالك و انا منو نجرجرك و نجريك السبع اشواط و ما تغيضينيش يا البهلولة
قوتلها : بهلولة كي قوتلو الصح و ما كذبتش عليه
قاتلي ايه تقوليلو ساعة و انا نحكي مع راجل و ما قدرتش نكوبي عليه و تزيدي تقوليلو هاداك ماشي وقتك انت مالف تعيط فالليل هههههه صح منك
بت ديك الليلة نندب على سعدي و سوادو
غدوة من داك جوزتها كيفكيف كل ما نعيطلو يكوبي امبعد روجتاني و كي كثرت عليه لي ميساج طفاه ڨاع
تخيلو 15 يوم و انا نحلل نعيط و نعاود و هو والله صوتو ما خلانيش نسمعو روحت لدارنا زوج خطرات غير باش نشوفو والو سقسيت ماما قاتلي ما نتبهتش و انتي خليتي البلاد و جيتي لهادا لازم عندو خلاص كي تروحي و اشري تم سكت ما خصنيش سوال
منعرف كيفاش واحد النهار كملت القرايا خرجت نمشي فالطريق لقيتو يعيط قلبي فرفر
ريبونديتلو بلهفة : وي حبيبي
قالي : سلام (يهدر ببرود يقتل)تسمى مازالو مشنف و زعفان، اسمعي كي تخرجي مالجامعة الكوسميتيك اللول لي فالدورة روحي ليه قوليلو بعتني زاكي يمدلك صاشي فيه بيس ترمي لاي عندك و ديريها و شوفي يا مينا والله لي هو ربي و نلقى نيميروك عند وليد ق... غير نقع ...رك
قوتلو بفرحة مخلطة بخوف: و دارنا واش نقولهم
قالي الله يساهل عليك دبري راسك ياك قتلك حليها بسنيك، ديجا وين راكي درك
انا وليت نحكي و غايسة نخمم في ماما واش نقولها و مروان خويا
قوتلو خارجة من الجامعة هادا وين كملت
قالي عندك 25 دقيقة تعيطيلي بالنيميرو الجديد باش نماركيك فافوري و لا ما عيطتيليش و بدلتي النيميرو غير قولي باي لزاكي والله ما تزيدي تكحلي عليا
قوتلو لالا خلاص اني خارجة
وليت نزرب فالخطوة كي المهبولة لحقت للحانوت قوتلو سلام بعتني زاكي مدلي صاشي صغير فيه بيس بالكونطرا ديالها على اسمو (مول الحانوت) شديتها عليه و قلعت نجري لاسيتي
وصلت ركبتها و عيطتلو كوبالي و شوية و صونالي نيميرو 0660 ريبونديت قالي: من اليوم يعيطلك نيميرو ما تعرفيهش تموتي ما تريبونديش
و لوكان تكوني تحكي مع عزرين نعيط تكوبيلهم و ترفديلي و نلقى نيميرو ديالك عند عطاي تخلصيها انتي فهمتي ولا نعاود
قوتلو فهمت فهمت خلاص حبيبي بركا ما تهبل فيا والله ما بلعاني و الله ما نعاود غير سامحني انت و بركا مالزعاف منحبش نشوفك هكا
قالي علاش انتي راكي تشوفيني ولا انا راني نشوفك
قوتلو جيت زوج خطرات و سقسيتوماما عليك
قالي علاش هاديك تسميها انتي شوفة
قوتلو مالا واشنو
قالي شوفي نسقسيك و جاوبي
قوتلو ايه
قالي الراجل لي ماقدرتيش تكوبيلو هو لي رحتي مع داركم لعرسهم فالليل نهار جزتي عليا بالجلابة و المكياج
بلعت ريقي خفت نجاوب تفكرت كلام زهرة خفت نقول ايه و نحصل و خفت نكذب و يفيقلي، قلت نقول الصح و خليها تخلى
قوتلو بخوف ايه عرس خوه
قالي تسمى شافك بالمكياج و شاف شعرك بلا ما نسقسي ياك معريفة و فاميليا و دين باباه و دين قسامو حسيتو بدا يفور سكت و تكمشت في بلاصتي خايفة من ردة فعلو
شوية و نطق قالي شوفي اليوم الاثنين غدوة لالا لاربعا صباح نستناك كيما لاجونس تاع الطاكسيات وين تقراي و ديري في حسابك كيما شاف شعرك راح نشوفو عال10 تاع صباح نلقاك تم.
جيت نهدر قالي : بلعيه يا ربك بلعيه بليس راهو يقولي دوك نزدم ليك نڨعرك و بالاكي تقوليلي منقدرش و مانعرفش كيما عرفتي تروحي تقابلي السي يونس و انتي محرقسة تعرفي تجي عندي
سكت و بلعتها قوتلو ماعليه غدوة نشوف كيفاش ندير و كوبيت
انا كنت خايفة منو و مالزعاف لي فيه بالصح نكدب لوكان نقول ما فرحتش يا عمري مالقري زعفان و مقلق و انا الغالكة بالصح ما سمحش فيا و داك العقاب الزين يا عمري عاقبني بشوفتو ياو انا غير جاتني حشمة انا مايتة عليه متوحشاتو مووووت
غدوة الصباح خرجت شريت روبة و مونتو ديالها حجاب بالصح ميدي قصيرة شوية فالباج و كنت ديجا شريت كافالياغ نواغ كنت مخبيتلها الدراهم عجبتني عندها شحال و كنت بديت نحسن لبستي جاتني شابة ياك الطويلة تطبع الروبات الطوال باش ما تقولوش تشكر في روحها زهرة لي قاتلي جاتك تهبل غدوة منداك الصباح مكياتلي زهرة و راحت قبلي كان عندها تيدي و تفاهمنا نلحقها قاتلي نوصلك انا خافت عليا قوتلها اوك
مزية لي قرات بصك كنت حابة نسقم شعري و هي تقتلني لوكان تعرف بلي راح نحي الخمار، انا ما نعرفش ندير السيشوار وحدي و نخاف نقصد كاش وحدة تقولي صحبتك هي لي ديرلنا كامل و انتي تجي عدنا مالا خرجت روحت لحفافة قطعتلي لاماش ايفيلي و جبدتهولي مليح مليح هو نواغ و يفوت كتافي بشوية ماشي طويل بزاف عاودت لميتو غير شوية قيس ما ندير الخمار و خرجت رحت عندها 9 و نص خرجت تلاقينا و داتني كي لحقت لقيت طونوبيلتو بلو نوي عند الخرجة تاع لاجونس كلينيوتالي دورتني زهرة ليها : ما تروحي معاه حتى بلاصة خالية ما يقولك نديك تشوفي يما ما يقولك تشوفي خالتي حسيتيه حب يدني ليك اجبدي القرعة تاع الديودوغون و ديريلو في عينيه و اهربي تجري ما تشوفيش موراك.
وليت نضحك : قتلها يالمهبولة
عنقتني قاتلي بالاكي على روحك الرجال ما فيهمش لامان
ماجات تطلقني بالسيف
رحت نمشي عندو نتختل منها دلع و منها حشمة و زيد نوريلو فالروبة و لاطاي علاش شريتها مالا ههههه
فتحت الباب و طلعت قلت السلام ريحتو تعبق تهبل ريحة مخلطة بلالكول و الدخان و فيها عطر رجالي قاوي دوختني و هبلتني
دار خزر فيا جبدني ليه سلم عليا و قالي: اليوم صح صباح الورد يا الورد
حشمت حبطت راسي
قالي يعني علاش حارمتني علاش حرام نتصبح بهاد الزين و هاد الطلة انا والله يا الزعاف طار كي شفتك تتزعبليلي
ضحكت بحشمة
قالي قولي الالة وين حابة تروحي
قوتلو ما نعرف كاش ريسطو ولا بيزيريا
قالي ريسطورون تاع مك لي تروحيلو عال10 تاع الصباح هاه باش تديها من عندي رسمي
طرطقت بالضحك تفكرت عثمان عريوات في سوق موك لي يفتح فالليل 😂😂
قوتلو ماعلباليش انا
قالي حتى انا قلت هكاك امشي نروحو ندورو شوية تتنحالك الحشمة و امبعد نديك تاكلي راكي جيعانة على حساب الشوفة
قوتلو نقولك الصح كنت جيعانة كي شفتك شبعت
قالي ايما قلبي راح تقتليني يا طفلة ياو والله ني شاد روحي بالسيف خافي على روحك
تكوانسيت معرفتش واش نقول خفت صح
ولا مطرطق بالضحك
قوتلو وصاتني صحبتي ما تخافش
قالي علابيها ساعة و هي تقري فيك كانت عليا
قوتلو ايه
قالي قوليلها كي نحب ندي حاجة نديها برضايتك و نخليك فرحانة و ما نخليكش تندمي عليها
بلعت ريقي خفت من كلامو بصك علابالي بلي صح تالمون نحبو نقدر ندير كلش و بلا ما نندم المهم هو معايا ديمارا يسوق و دار الغنية ڨلبي عندك جابني و يغني و يشطح زاهي و كي لحقت ل نشوفك مع وحدوخر نقتلك حبدني عندو باسني من ختي قالي و الله يا حبيبي غير تعاوديها نقتلك وليت نضحك درتلو براسي ايه كي طلقني قوتلو حرمت والله قريب النفس قطعتو عليا بقا يدور و شوية و حبط كي شفتو وقف لابس سروال جين قري و تريكو بودي مزير على صدرو راح ينطق عليه هاداك الصدر ميسكلي قري نفس لون السروال و صباط جاي بين السباط و البسكات فالنواغ فتح ماللور الباب جبد فيستا كوير كحلة و راح بقا كل خطرة يشريلي حاجة هادي شوكولا هادا ورد هادا ببون ما خلا ما جاب لحقت 12قالي اني جعت انا امشي نروحو ناكلو امبعد نكملو قوتلو واش نكملو ياك نروح
قالي ايه ديك هي دوك تروحي بزاف ياو اليوم يسموك تاعي
دخلنا لريسطو ناكلو نقصرو انا كنت حاشمة ناكل قدامو و هو فاقلي جبد طبسي ديالي عندو و بدا يوكل فيا هو قوتلو الناس يشوفو قالي يقودو كل واحد يلتا في طبسيه خير ما نوض نقلبلو راسو فيه و دار يخزر فالسيد لي كان يشوف فينا، المخلوق حبط راسو مالخلعة بصك سمعو واش قال انا مت بالضحك عليه و هو ولا علابالو كلينا خلص و طلعنا للطونوبيل جاب في يديه زوج كيسان تاي و جا ركب حطهملي في يدي و راح زاد ولا في يدو صاشي و يد لوخرا باكي كبير مكسرات مخلطين
نحالي الكيسان حطهم في بورت كاب و حطلي الصاشي في حجري قالي تعرفي تنقي التشينا
مشينا نقصرو انا نقيلو فالتشينا و هو ياكل جوزت نهار عمري ما ننساه و حتى نهايتو ما نسيناها لانا لا هو، شوية و قارا قالي حبيبي ياك وعدتيني بعفسة و دوك ايا
قوتلو واشنوها
قالي اممم زعما نسيتي
قوتلو يا سيدي فكرني
قالي ايه نفكرك علاش لالا وعدتيني طيري عليا هاد الخمار نشوف الشعر لي حارمتني منو و سايباتو للهمال يتفرجو فيه باطل
بلعتها قوتلو انا ما وعدتكش انت لي حلفت عليا
قالي ايه ياسيدي انا لي حلفت
قوتلو بالصح الناس يشوفو يا حي لالا ما تصلحش
ديمارا قالي تسمى مقلقينك الناس برك
قوتلو يعني قالي ايا اوك خلاص ماشي مشكل كي نكونو في بلاصة ايزولي وين ماكاش الغاشي نحيه قوتلو اوك، ارتحت اصلا الفكرة ماشي مريحتني كملنا نقصرو ونضحكو حكالي على مغامراتو و على خاوتو شوية و نلقاه خرج ماللافيل و شد طريق الحصايد (الولاية لي فيها نقرا جاية المدينة صغيرة و تمتم تلقا روحك فالصحاري و الحصايد و الخلا) قوتلو وين بيها يا زاكي واقيل ناوي تخطفني صح
دار ليا قالي انا خطفتك و كملت علاش دوك لي فقتي و غمزلي قالي ايا لالة هانا في خلية الخلا ماطان حتى واحد ايا نحي نشوف و ان شاء الله ما يكونش كي شعر يوسف خويا والله نحكمك بالطوندوز هههههه
ضحكت عليه تخيلت شعر خوه بورطون هو شعرو هايل اصلا هو كانل من كلش مافيهش غلطة فتحت الخمار بالصح ما نحبتوش حشمت رما يدو على راسي حبطو قالي ماشاء الله وكيلك ربي يا مينا والله لا نسمحلك لا دنيا لا اخرة علاش غابنتني حرام عليك هاد الرزق حارمتني انا و توري فيه للناس
قوتلو خلاص زاكي انسى
قالي علاش انتي خليتيني ننسى جبد الخمار نحاه و طلقلي شعري على كتافي قالي شوفي انتي اصلا باهية وجهك ضاوي و هاد الشعر زاد فيك النص بقينا متقابلين و حاطةيدو في شعري يلعب بيه حتى حسيتو يقرب ليا بالشوية حسيت السخانة تخرجومنو ولا مني ما فهمتش حكمني الخوف شلني ما عرفتش واش ندير بالصح مادامني معاه راني مرتاحة قلت جات جات خلي يبوسني و تخلا موراها ما نموتش بحرقة قرب ليا حط شواربو عليا يبوس و يتفنن و انا جامدة حبس شدلي وجهي بيد قالي حبيبي ديري كيما انا قتلو ما نعرفش قالي علابالي برك تبعيني عاود باسني بالصح تفاعلت معاه بالشوية قالي افتحي فمك حط لسانو و نجبدو ما عرفت نمصو لا نعضو ولا نحيه ههههه المهم لتيت بيه حتى سمعتو عيط و جبد روحو قالي بلعقل يا الرب راح تنحيه
انا زرقت بالحشمة و هو شد فمو امبعد ولا يضحك ضربتو لكتافو قوتلو قتلك ما نعرفش
قالي بالصح على الاقل تعرفي بلي اللسان ما يتكلش ولا مازالك جيعانة هههههه وليت نضرب فيه و هو ميت عليا بالضحك.
جوزت معاه اروع يوم في حياتي و رجعني للجامعة كي جيت حابطة جبدلي صاشي صغير قالي هادي سبيسيال ليا كي تكوني جايا عندي برك لي ديري منها سلم عليا و عنقني و حطني عند لاسيتي و راح
انا دخلت نمشي عالسحاب مايتة بالفرحة لي نتمناها لكل واحدة و الحمد لله لي لقيتها بالصح ياك هكا الزمان عمرك ما تامنلو ....