رأفة حب.....روضت المنحرف

الحزء 23

جازو اليامات و لحق الجمعة نهار الفاتحة، فاتحة حياتي مع عشقي لي فرحتي بيه ما نمدها لحتى واحد نكسب زاكي بالنسبة ليا اكثر و خير الف مرة من اني نكسب الدنيا بلي فيها و اللي عليها كلش نحس فيه فرحان لفرحتي، بالنسبة لانسانة كيما انا تربات على الصلاة و القدر و الحشمة واش عشت و درت مع زاكي مام ادا نحبو و عشقي غالبني كان حرام و معذبني خصوصا من جيهة بابا و مروان، ااااااه يا مروان لي مازالو لليوم ما قابلني ما حكى معايا يا لوكان نص كلمة خزرة عينو و توحشتها عمرو عمرو و عمري ما كان جافي و لا قسح قلبو عليا و نهار دخل زاكي فالوسط خلاني ما فرحش معايا، علاش زعما ، "يا ربي ما تحرمني من عشقي ما تفرقني على خويا",هاد الدعوة لي مانسيتهاش حتى مرة في صلاتي نقول بالاك يكونو بيبان السما مفتوحين و ربي يحنن القلوب.
فطنت بكري، دارنا معمرة بالغاشي عماتي 4 ببناتهم و ولادهم، نسا عمومي زوج ببناتهم و عرايسهم، خوالاتي 4 ببناتهم و عرايسهم و نسا خوالي 3 كيفكيف، طاطا صبيحة و بنتها الصغيرة ايمان بوبية تبان باربي زينها تقول ماشي تاع الصح بيضة بيضة عروقها يبانو وعينيها خضورا تقول حشيش و شعرها من عند ربي صفر و حرير و لاطاي بااااااربي.
عايلة هايلة و خلاص الله يبارك عليهم يهدرو ڨاع كيفكيف و يبوجيو ڨاع، كي نتفكر بلي هاد. اقرب الاقرباء لي ماكاش كيفاش ما يحضروش نقول مالا فالعارس كيفاش تخلاص علينا فالسطاد و خلاص هاداك ما يلمهم، عوايدنا نفطرو ضيافنا و لمالين العريس نديرو القهوة و لاتاي.
دارت ماما و طاطا صبيحة و مرت عمي الفطور شربة و شخشوخة و صلاد، انا نوضتني زهرة كانت بايتة معايا عندها يومين و هي هنا حنونتي هاديك، دخلت دوشت و غير خرجت لبست روبة ميامي خفيفة و حجاب ماما مالفوق و زهرة معايا رحنا للحفافة، كانت ديجا ماما حكمتلي رونديفو عندها قبل و فهمتها و وصاتها قبل، للامانة ماما محلبة و تعرف خير مني بمراحل في امور المكياج و الشعر و السبايغ ساعات نضحك على روحي نقول الراجل هادا واش راو عاجبو فيا العفايس تاع الانوثة تاع البنات ڨاع ما نعرفهمش حدي كي نطير غيسيل و ماجيك شيعى نقرا فالجامعة و نريح فلاسيتي، تيكيات تاع بنات لاسيتي باطل.
دخلنا سلمت عليا كي قتلها انا بنت وداد عقلت ماما داتني معاها ما طلقتنيش حتى كملت كلش، زهرة جبدت شعرها برك اصلا تماكيي خير مالحفافات هي غير ماما حبت خسارة الدراهم كانت قادرة زهورتي غير فالدار تريڨليني، ما كملنا حتى كرهت حياتي و انا ماشي مالفة بالتغنجيق هادا بالصح صبرت و شديت فمي، كملنا عيطت لبابا جا دانا، لحقت مع كملو الفطور كانو يلايمو و يسقمو فالدار الصالون التحتاني للرجال كانو سيقوه و فرشوه و الفوقاني مازالهم عڨابو دخلت للكوزينة راح نعاونهم ما خلاتنيش ماما قاتلي يفسدلك شعرك و مكياجك عيطي لختك تجي تغسل مع هدى بنت عمي و ريتاج بنت طاطا صبيحة و انا نروح نلبس حوايجي، خرجت رحت للبيت لقيت ختي قاعدة تهدر فالتليفون رفدت روبتي و خرجت رحت لبيت ماما نلبس عيطت لزهرة جات عاونتني لبست بلا ما نقيس شعري، روبتي سامبل لونها لافندر جاية فولاغ يديها طرونيبارون و مفتوحة في صدرها و طويلة و دوبل كلوش مالتحت درت معاها زوج سناسل واحدة ساريو و فيه ديامونودمعة فالغوز كلاغ و الدوزيام سنسلة طويلة فيها زوج خيوط يحبطو مع صدري السناسل ماشي خشان بزاف جاو يهبلو مع بعضاهم و درت مناڨش صغار و خاتم لي دارهولي فالخطبة و خاتم دايراتو دايمن و براصلي و ساعة فيدي اليسار درت من الريحة تاع ماما تاع الياسمين لي ولات ريحتي دايمن نديرها كي نشوف زاكي ريحة الياسمين j'adore de Dior.
جيت نخرج قاتلي زهرة هنا تريحي دوك نزڨي لطاطا وداد تحي تشوف ادا كاش ما خصك.
راحت شوية و دخلت ماما بقات تبوس فيا و تصلي عالنبي فرحانة بيا و انا كثر منها لوكان برك تعرف شحال ستنيت هاد النهار سقمتلي ماما لي روتوش و قاتلي منا ما تخرجيش قتلها نريح وحدي عيطي لختي و زهرة يجو يريحو معايا
قاتلي دوك تجيك زهرة بالصح ختك الكلبة تجوز الفاتحة و نوريلها
قوتلها علاش
قاتلي ماما مخليتني مع التاس و الدار تغلي و هي تقول ضيفة
كالميت ماما و خرجت وخلاتني بعد ما حلفت ما نخرج ما يشوفوني و صح قعدت لتماك نستنى حتى سمعت الزغاريت و الكلاكسونات، جاو ناس داري محملين اكثر مالخطرة اللولى، فاليزتي و صندوق الحنة و تاع الكوسميتيك و الورد و الباتيسري و سلة فاكية و صندوق الصداق و سنيوات الفال قاطو و حلوة و سنيوة اللحم (لي عندهم هاد العادة فالفاتحة يقولولي).
حكاتلي زهرة انا ما شفتش بقيت غير نسمع حتى جات ختي باستني قاتلي راكي شابة ايا ارواحي ام يعيطولك و خرجت موراها رحت لقيت الصالون رلح يطرطق، انا ماليا وحدهم غاشي و زاد زاكي ماليه تاتي الله يبارك سلمت عليهم و ريحت قدام ماما
لقيتهم حطو الفاكية، كانت دخلت لامود تاع الفاكية مشكلة فالتبسي مع الفلون، شوية و جابو لي تاخت بالكانيطات تاع الجو تماك عجوزتي جبدت جهازي و خرجت انا نبدل باش نلبس القفطان لي جابوهولي جات معايا ماما سقمتلي و زادتلي الذهب، هي معايا و صونا التليفون ديالها قالها بابا خلاص كملنا الفاتحة زغرتو، خرجت ماما تزغرت و انا فشلت حسيتوالدوخة حكمتني ريحت على طرف الفراش و شديت و جهي بين يديا نحمد في ربي لي استجاب لدعائي وليت مرتو و حلالو اللهم لك الحمد، عاودت دخلت ماما داتني للبيت الصغيرة كونا مفرشينها و مفرغينها باش كي يجي هو قاتلي دوك يجي راجلك يشوفك
هي قالت راجلك و انا قلبي رعش صعيبة بزاف نوصف هداك الاحساس و انا مازالت مانيش مستةعبة و لا مامنة بلي خلاص وليت مرتو شرعا ، دقدق الباب و دخل، حبيبي و روحي جاني عندي سمانة ما شفتوش بانتلي تقول دهر توحشتو، اه يا ربي ناوي يجلطني، ادا حبس قلبي اعرفو بالي زاكي سبابي، انا بلا والو نغير نموت و هو زاد رجع للسبور و الحديد يخدم فلي ميسكل و الباك صدرو راح يخرج منحوت نحت، لابس كوسايك سبور قري كلاغ و شوميز بلا كول مفتوحين قفاليها اللولين و السنسلة لي درتهالو تبان، قمحة بيضة مزيرة على صدرو و هو اسمر جاتو تشهي و باسكات بيضة stan smith
و انا حالتي يعلم بيها ربي من حطتو و وقفتو و ضحكتو لي تبان في عينيه و شعرو لي ماشطو تقول مرسوم ما عرفت الاوهو لي زيان و لا انا لي العشق عماني.
جا سلم عليا و جبد روحو للور يخزر و يكيل فيا و يضحك قالي يالورد اليوم ديتيها للورد انا بلا هاد الزين و هبلتيتي و جبتيني لباب الدار نجري دوك بهاد الحطة و المكياج واش ندير نخطفك ولا نحلف نسكن معاك
ضحكت عليه، جبدني عندو باسني في راسي بوسة طويلة و حنييييييينة قالي و شواربو مازالهم في جبهتي وليتي حلالي العقوبة لمامات ولادي.
عنقتو زيرت بيديا على ظهرو، حس بيا و زاد دخلني مليح في صدرو. وانا ما صدقت مادابيا بقيت تماك عندو مدة امبعد قالي يا مخلوقة رقدتي واقيل افطنيلي بنتي لا يتهموني بكاش حاجة و انا ياك تعرفيني غير نلقا سبة ما نقولش لالا.
جبدت عليه مسحت دمعة من عيني حبطت وحدها طلعلي راسي باسني في خدي و زاد عيني بالعقل عالمكياج و زاد الخد لوخر و زاد حبط لفمي يبوس بالعقل شوية و طلقني، تامنوني لوكان نقولكم بوسة الحلال وحدها فالبنة طيرتني لعالم وحدوخر، جبد عليا سواسوا و الباب يدقدق، دار يدو في جيبو فالوقت لي دار الباص و دخل بابا و باباه و مروان و خوه و عمي مدلي هو دراهم و جبد للطرف يخزر فيا و زاد موراه باباه و زاد خوه تاني مدولي دراهم و باركولي و خرجو و موراهم بابا و عمي بابا باسني و عنقني و اخيرا بقا غير زاكي و مروان و انا، لحق عندي مروان عنقني فوووور و باسني في جبهتي و دار ليه و هو معنقني قالو شوف يا زاكي راك راح تديلي بنتي و ختي و صاحبتي و عينيا لي نشوف بيهم والله يا زاكي و تبكيها نهار ولا توجعها ولا تخدعها غير ندفنك، راك مديتلي كلمة رجال و نعرفك راجل و راني نزيد نوصيك والله يا زاكي و تبكيها غير ندفنك
ضحك زاكي قالو و الله و نخدعها ولا نبكيها غير حلال عليك و مسامح دنيا و اخرا.
خرج زاكي و مروان بقا معايا يضحك و يقصر قالي خفت عليك و مانيش حاب تروحي و تخلينا شوية و راح مروان و خرجت انا للصالون بالزغاريت و التسلام و دارتلي عجوزتي الخاتم و هناولي و كملو معانا بالقهوة والقاطو امبعد لاتاي و المكسرات و المقروط و راحو مع المغرب، اللحم لي جابوه درنا بيه العشا و الفال لي كان قسمتله على الضياف كامل، الحق ڨاع عجبهوم واش جابو و فرحولي، زاكي حنوني كلف روحو غير باش ما نتحڨرش في وسط فاميلتي بالعين و الحمد لله دارلي خير منهم كاملين و اصلا ماكاش لي يشوف هكاك من غير ختي لي قاتلي منعرف علاه لم هاداك الكشرون ڨاع معاه
قاتلها ماما لوكان تبلعيه ماشي خيرلك.
جازت الفاتحة اروع ما يكون و شبعت تصاور مع دارنا و مام مع زاكي تصورت و مع مروان لي عاود ولا معايا عادي فرحان كل دقيقة يبوسلي راسي و يعنقني تقول كان غايب و توحشني.
علاقتي بزاكي ولات تقول تاع الحكايات قوالي لا دوز تاع الخب و الغرام و انا كي العادة سايحة فيه زبدة الحمد لله لي مانيش نقرا و نخرج معاه مزية لي غير فالتليفون و البالكون.
نطل عليه شفتو كي غلق الحانوت و راح يركب فالطونوبيل و معاه زوج صحابو، عيطتلو قوتلو علاش غلقت دوك مازال الحال غير الخير
قالي خير خير اني رايح مع صحابي نحوسو شوية
قوتلو اه داكور ايا اوك بصحتك و فالليل عيطلي نستناك.
لحقت العشرة تليفون طافي و هو ريحتو ماكاش ما ولا للحانوت ما عيطلي و انا بدا الدم يفور في عروقي و بديت نخرج على سينتي و حالتي بدات تتهول غير ندعي و نصبر في روحي، مع الوحدة صونالي نيميرو يبدا ب +216 معرفتش شكون ولا وين درت التليفون في وذني نسمع...