رأفة حب.....روضت المنحرف

الجزء 44

-ارواحي يا البهلولة ارواحي
شدتني ماما و داتني معاها للبيت دخلتني و غلقت الباب
-اقعدي تشوفي قدامي و حليلي وذنيك مليح
راجلك على ما ولفتيه و وليدك على ما ربيتيه، و الراجل لا تعطيه سرك لا تنقصيلو من قدرك، لا تشبعيه من زرك و لا تشفيه في حرك.
-ايييه يا ماما و انا هاد الشعر واش يحفظني فيه دوك
-يعزيني فيك يا الجايحة شيعة القراية و الديبلوم
-ههههه ايا يا المدرسة اني سكت احكي
-مدرسة تاع مك ماشي، شوفي انتي زاكي لوكان ما والفش بيك ساهلة و تمتم ترضاي و علابالو بلي بزوج كلمات يبلعطك ما يدير هكا و يريسكي بيك، و لوكان علمتيه بلي ماكاش اللعب معاك بلي عمرك عزيزة هو تاني يعزك
-كيفاش يا ماما كيفاش نعلمو
-ساهلة ماهلة كي يغلط ما تجوزيهاش بالساهل و كي يفوت الحدود لحقيها معاه لكبيرو و مام كي تسامحيه دايمن فكريه الرجال ما يحبوش المرأة الساكتة، شوفي كي قلتي لباباك و لحقت الحكاية للكبير كيفاش تسقم و دوك يولي يطلب فالسماح، انتي هنا زيريه، جيت نهدر سكتتني و كملت، يعيطلك ماشي تكوبي عليه لالا خليه يبدا يحكيلك و يشرحلك بالصح انتي ديري روحك ڨاع ما علابالكش عااادي كي يبدا يحلل و يتمسكن قوليلو سامحني انت خيرت و حتمت عليا بلا نا تشاورني و انا خلاص دوك والفت و دخلت في راسي حبيت نتفارقو اوك روح لعند بابا و قولهالو و دوك اني مشغولة سامحني و كوبيلو راح يهبل كي يشوفك باردة و تقبلتيها عادي، و كي يولي يعاود مع اللول مرة جاوبي و مرة كوبي و امبعد ولي ما تجاوبيهش كامل خليه يتحرق كيما حرقك و بالاكي يلمح خيالك خليه يهبل عليك و انتي كملي قرايتك و ميموار ديالك و بردي قلبك عليه و اتهلاي في روحك من لبستك لضحكتك لمشيتك كلش لازم يكون مستف غير الخبر لي يلحقو جرجريه كيما جرجرك و شوفي ادا صبر و كمل معنتها حابك و ادا كره معنتها الله لا ردو
-بالصح يا ماما مانيش حاباتو يزيد يسمح فيا
-مايزيدش حنونتي ما تخافيش والله ما يعاودها غير يتربى و على ضمانتي انتي برك شدي روحك و بردي قلبك عليه الرجال يخافو المراة لي تقدر تصبر عليهم يولو هابلين عليها و انتي مام لوكان تموتي بلا بيه قدامو تعاملي معاه كانو حيط عادي كي لي ما كان والو في حياتك هكا بعرف بلي هو لي مسحقك في حياتو ماشي العكس بصك كي يكون في حياتك تحني عليه و تفاجي همو و تفرحيه و تهنيه بالصح نهار يجيه العوج و يحب يشوف شوفات يا ختي البحر ياكلو تلافو يجيب خلافو تماك يعرف قيمتك و يولي يخاف عليك، فهمتي دوك ولا نزيد
-اواه خلاص مانا فهمت و الله غير فهمت و بزيادة ڨاع
ناضت ماما تحط العشا لبابا و بقيت انا نخمم في زاكي و كلام زاكي و شوفات زاكي و واش او جايك يا زاكي....الله يرحمك يا زاكي😈. 
غدوة من داك صبحت على التليفون يصوني يصوني يصوني درتو سيلونس و كملت رقدت، كي فطنت و فريت اموري كاملين و لبست بابا دايني للجامعة نحيت السيلونس لقيتو عيطلي بزااااف و باعتلي ميساج ( صباح الخير يا الورد علابالي باي راكي مجروحة و زعفانة و قلبك معمر و علابالي باي وجعتك بزاف و جرحتك بزاف بالصح الشاهد ربي فوق جهدي و ما لقيتش لي ينصحني و يوقف معايا، خلاص يا حبيبي نقصوها و ننساو الحكاية و نوعدك نولو خير ملي كونا) و ميساج ( ريبوندي ياو يااااو راني توحشتك ياااااو)
ضحكت عليه توحشتو و توحشت هبالو بالصح والله غير نربيك و لا ما نتسماش مينا بنت جمال السباعي
انا نقرا فالميساج و هو عيط خليتو كمل و سقسيت بابا قالي خلاص خارجين عيطت لزهرة نقولها توجد روحها نجوزو ليها ندوها حتى عيط في وذني و انا نهدر معاها
كي كوبيت لقيتو باعثلي ميساج( تقصري مع ر.... اني جاي نوريلك حسباتلك صح واقيل خليتك يامات درتي رايك) زدت ضحكت عليه و خليتو
عاودت درتو سيلونس و ركبت مع بابا مور ما عنقتني ماما و قاتلي في وذني بردي قلبك و اصبري ربيه يا بنتي يوليلك كيما تحبي انتي، بستها من خدها و ركبت مع بابا و هو حارڨ التليفون بالعياط حتى صونا تليفون بابا ريبوندا
-اهلا وليدي لباس ...الحمد لله صبحت بخير ....لالا وليدي والله يوجيت نوصل الطفلة تقرا و نولي... خلاص كي نجي نتلاقاو نروحو نشوفوه ماكاش مشكل ايا صحة وليدي ....يبلغ يبلغ صحيت
دار ليا يضحك
-او يسال عليك راجلك، حشمت حبطت راسي، مالا حفظتي الدرس البارح كملي هكاك اسمعي لكلام يماك رايها دايمن صواب.
جبنا زهرة و كملنا لاسيتي بابا يقصر معانا و نضحكو، سبحان ربي الحياة ولاتلي فرحانة و نڨصر و نغني مع بابا و نضحك و ندور لزهرة لي يشوفني اليوم ما يعرفنيش فال4 اشهر لي فاتو (يحي العظام و هي رميم)فما بالك بقلب ينبض و ربي جعل زاكي نبض قلبي و خلاه هو لي يعطيني القوة باش نتحرك و نفرح و نضحك هو لي يخلي جسمي و عقلي يفرفر.
كي لحقت للشمبرة و سقمت دوزاني و بدلت و غسلت و صليت باش جبدت التليفون و نحيت السيلونس بعتلو ميساج (سلام دوكا راني ليبغ ادا كاش ما راك حاب تحكي تقدر تعيطلي)
حسيت بيه صوطا عالتليفون تمتم عيط شكيتو ڨاع ما قراش الميساج غير شاف اسمي عاود
-الو
-عالسلامة يا الورد
والله غير على صوتو حسيت الهو هاداوين دخل لصدري توحشتو و توحشت كلامو و صوتو و حلاوتو حبيت برك نكون في عبونو و ندخل فيه ما نخرجش
-الو ماكيش تسمعي فيا
-نو اني نسمع، الله يسلمك
-واش بيك مالصباح و انا نعيط ما تريبونديش
-كنت مشغولة
-اييه ،حسيتو بدا يستغرب، ماعليه و دوك كملتي شغلك نقدرو نحكو ؟
- نورمالمون قريت الميساج لالا
-ماقريتش غير شفتك بعتي عاودتلك، عرفتها، قوليلي واش راكي و كيفاش جوزتي ياماتك و اني هنا حلب نجي نشوفك او قالي عمي جمال بلي داك لاسيتي خلاص قريب تكملي و نتهناو، ايا احكيلي فرغي قلبك اني هنا
- نفرغ قلبي؟! جابلي ربي انت لي مصباح و انت تعيط و تعاود و حاب تحكي انا ما عندي ما نحكي مالا ادا اك تستنى فيا نفرغلك قلبي انا قلبي فرغتو عندي 4 اشهر و كملت
-اممم هي صح انا لي نورمالمون نحكي بالصح حبيت نخليلك فرصة كاش ما تسقسيني و لا تقولي علابالي عندك بزاف حاحات حابة تعرفيهم و تسقسي عليهم
-non pas vraiment
-ايه اوك شوفي يا مينا انا تسرعت و علابالي بلي زدت عليها و خلعتك بالصح الله غالب عليا ضروف هي لي فورصاتني و انا علابالك بلي ما عندي حتى واحد يوريلي و تلفتلي ما عرفتش نسير و اصلا ماشي بيدي كنت ضايع و زادت تخلطت عليا حسيت راح نأذيك و لا ياذوني فيك مالا حبيت نبعدك باش ما نخسركش
-تسمى على حساب واش راني نسمع انت ماعندك حتى دور انت ما عندك حتى سلطة الضروف يحكمو فيك و اللي يوريلك نورمالمون عقلك هو لي توزن بيه اك تقول ماكاش و ما تعرفش تسير و ماشي بيدك تسمى انت يسيرو فيك ؟ و الشابة ياذوك فيا تسمى ماك قادر لا على روحك لا عليا ايه الحاجة المليحة لي درتها هي كي بعدت عليا احسن حل والله
-كيفاش هادا احسن حل و كيفاش يسيرو فيا و ماشي قادر واش بي ر...تخلطي فالهدرة دوك
-لالا تبانلي هادي هدرتك ماشي انا لي قلتها انت لي هدرتها انا عاودت برك واش قلت و لا علاش نلومك اك ماللول قتلي بلي انت ضايع و تخلط و لا لالا مخلطة عليك.
-دوك انتي علاس اكي تحكي معايا هكا واش كاين زعفانة و فهمنا و. وجعتك و فهمنا بالصح هاد التمنييك علاش دوك
-حاشا علاش بوه واش دانا لهاد الهدرة انا برك قلتلك و خلاص كي وليت تزعف اني ساكتة كمل احكي.
خليتو حكا و كيما قالت ماما يعبر و يشرح و يفسر و انا ساكتة اصلا لي حبيت نوصلهولو قلتو و دوك وقت الصمت.
كي حسيتو حلل بما فيه الكفاية
-زاكي انا دوك ما فهمتش واش راك حاب واش اك تحوس دوك خليتك تحكي مالصباح في حكاية فارغة
-فارغة ؟!
-وي فارغة، دوك انت ديسيديت و لا كيما قلت انت ضروف حكمت عليك تحبس كلش معايا و تجبد روحك و فرضت عليا نقبل بلا ما تحكيلي و تفهمني، و صح جاتني واعرة فاللول باش نتقبل اي عشرة كومام و ما تهون غير على وليد الحرام، و سيرتو مور الهدرة و الجاست و البلاصة لي ديتني ليه الخطرة اللخرة بالصح كلش يتنسى بالوقت و انا والفت و تقبلتها و خلاص
-كيفلش واش حاب يقول واش راكي تحكي ما فهمتش
-واش ما فهمتش معنتها اوك حبيتنا نتفارقو اوكي مام انا حابة نتفارقو و ربي يساهل على كل واحد عادي ما كتبش المكتوب ربي يفرقنا بلا ذنوب و خلاص.
حسيت بيه كيفاش تبلوكا جاني الضحك و انا نتخايل في وجهو الشح فيه يستاهل.
-ما فهمتش علابالك واش راكي تحكي
-بورطون ساهلة مافيها والو علاش كاش ما راك بالع و لا شارب ؟! عادي اني نقولك ياك حبيت نتفارقو اوك راني قابلة روح عند بابا و قولو
-واش نقولو واش بي ر... تهبلي في ز....مع صباح ربي دوك انتي
-اااااه لالا stp الهدرة الزايدة مكالاه خلينا بالقدر و دوك سامحني عندي ميموار مشغولة كي تفهم و تتكالما عيط لبابا و تفاهمو على الكوارط و الطلاق، تهلا ف روحك.
كوبيت و انا نضحك، لقيت زهرة فاتحة فمها و عينيها، ضحكت و رحت لبلاصتي
-والله غير نعاودلو التربية هادا والو (يولي راجل بلا مزيتو, قلتها في قلبي قدام الناس عمري ما نطيح بيه)....😈😉