နွေမိုးတွေဆွေလာတဲ့အခါ တိမ်ယံတွေမှိုင်းညှို့လာ၏....[COMPLETED]

အခန်း (၃)

'‌ မကောင်းဆိုးဝါး၏ကျိန်စာကိုဖြတ်တောက်ပစ်လိုလျှင် သူ၏အစွဲကို တွေ့အောင်ရှာအံ့ '

ကမ္ဘာ့စည်ကြီးတီးလိမ့်မည်.....

မျက်နှာမဲကြီးငိုလိမ့်မည်.....

သေသောသူများရှင်လိမ့်မည်.....

ပုန်းသောသူများပေါ်လိမ့်မည်.....

မြောက်ပိုင်းအဝင်တွင် ဆယ်နှစ်အောက်ကလေးတစ်သိုက်က ကဗျာ‌လေးကြောင်းကို ထပ်ခါတလဲလဲအော်ဆိုလိုက်ရင်း ထုပ်ဆီးထိုးပြေးလွှားနေကြ၏။

နွေရာသီရောက်လျှင်အရိပ်ကောင်းကောင်းရလိုက်မည့်ဖြစ်ချင်းဖြစ်သည့် ကုက္ကိုလ်တန်းနဲ့ မန်ကျည်း‌တောတို့က အဝင်လမ်းမ၏ ဘေးတစ်ဖက်တစ်ချက်စီတွင် နေရာစိပ်စိပ် စီတန်း‌ ပေါက်ရောက်နေလို့....

သျှားညိုရောင်ကတ္တီပါဖိနပ်တစ်ရံက သဲဖြူထဲမှာနစ်မြုပ်နေတဲ့ မန်ကျည်းခွံတစ်ခုကိုတက်နင်းမိတော့ ဖိနပ်အောက်ကနေဖောက်ဆိုတဲ့အသံတစ်သံလျှံထွက်လာသည်။

ခဲပန်းချီနဲ့စုတ်ချက်‌ဆွဲထားသလိုမျိုးပြီးပြည့်စုံလွန်းတဲ့ မီးခိုးရောင်မျက်ခုံးတန်းတန်းလေးတွေက အလိုမကျစွာ ကုပ်ကွေးသွားရ၏။

ကောင်းကင်ကိုမော့ကြည့်လိုက်တော့ မိုးသားဖြူဖြူတို့ကပြေးလွှားနေပြီး နေရောင်ကခပ်ပြေပြေကျနေသည်။ စွန်ညိုနှစ်ကောင်က စပါးခင်းတွေရှိရာ နေရာတည့်တည့်မှာ ဝေ့ကာဝဲလို့....

လေငြိမ်ငြိမ်တစ်သွယ် လွင့်ကာလူးလေသော် ရင့်မှည့်နေတဲ့မန်ကျည်းတစ်တွဲက ဖွဲခနဲဖွဲခနဲ ပြိုပျက်လာကြသည်။

ကံမကောင်းရှာတဲ့ နတ်သက်ကြွေမန်းကျည်းခွံတွေဟာ မကြာခင်မှာပင် စိန်ပြေးလိုက်တမ်းကစားနေကြတဲ့ ကလေးတစ်စုရဲ့နင်းခြေခြင်းကို ခံ‌နေရချေသည်မှာ မတည်မြဲသောတရားသဘောကိုဆောင်နေ၏။

သို့သော် ပင်ယံထက်မှာတော့ နွေရာသီလက်ကျန်ဖြစ်တဲ့ အခွံညိုညိုမန်းကျည်းခိုင်တို့က အတော်များများကျန်ရှိ‌နေသေးတာမို့ အနည်းအကျဉ်းပမာဏလေးကို ဘယ်သူကများထည့်တွက်မှာပါလိမ့်...